1 ሞኣባ ቢታ ጼልያዋን ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ ኢሳ. 15:1—16:14፤ 25:10-12፤ ህዝ. 25:8-11፤ አሞጻ 2:1-3፤ ሶፎ. 2:8-11 “ናቦ ካታማዉ አየ አና! አያዉ ጎፐ፥ እ ባያና። ቅርያታይማ ካታማይ ካዉሻናነ ኦሞደታና፤ ኡንቱንቱ ጌሱካ ካዉሻናነ መኤረታና። 2 ሀዋፐ ህን ባጋን ሞኣባ ጬቁ ꬋያና። አያዉ ጎፐ፥ ሀሰቦና ካታማን ደእያ አሳይ ሞኣባ ቦላ፥ ‘ሃይተ! ሄ ቢታ አነ ኡባና ꬋይሴቶ’ ያጊደ ኢታባ ማቀቴዳ። ኔኖ፥ ማድሜና ካታማትዉ፥ ኔናካ ስርጵ ኦꬃና፤ ነ ጌዱዋ ኦላይ ካላና።

3 “ሆሮናይማ አሳይ፥ ‘ላለꬃይነ ዎልቃማ ባሻይ ጋኬዳ’ ያጊደ ዋስያ ዋሱዋ ስስተ! 4 ሞኣበ መኤረታና፤ አ ናናቱ ዬክያ ዬኩዋ ስስተ! 5 ኡንቱንቱ ዬኪደ፥ ሉሂታ ፑደꬃ ከሳና፤ ሆሮናይማ ዱገꬃካ ባሻዉ ዋስያዋንቱ ዋሱዋ ስሲደ ዎꬋና። 6 ኡንቱንቱ እቱ እቱዋ፥ ‘ባቃትተ! ህንተ ሸምፑዋ አሽተ!’ መላ ደምባን ደእያ አሮኤራ ካታማ ማላ ግድተ። 7 ኔኖ፥ ሞኣባ ቢታዉ፥ ኔን ነ ዎልቃንነ ነ ዱረተꬃን ጬቀቴዳ ድራዉ፥ ኔንካ ኦሞደታና። ቃይ ካሞሻ ግያ ጾሳይካ ባረ ቄሳቱ ዋነ ባረ ሞድያዋንቱና እትፐ ኦሞደቲደ፥ ሀራሳ ባና። 8 መꬍና ጎዳይ ኦዴዳዋዳን፥ ካታማቱዋ ኡባ ꬋይስያዌ ያና፤ እት ካታምነ ደኤና፤ ዎምባይነ ደምባይ ኡባይ እትፐ ꬋያና። 9 ሞኣባዉ እ ፓሊደ አትያ ቀፍያ እምተ። አ ካታማቱ ኡባይ አይነ ባይናዋ ግዳና፤ እት አሳይነ ኡንቱንቱን ደኤና።

10 “መꬍና ጎዳ ኦሱዋ ሸነኮ ጊደ ኦꬅያ ኡራይ ሸቀቴዳዋ ግዶ! ጾሳይ አዛዝ ዎꬅና፥ ሱꬃ ጉሰናዳን ባረ ማሻ ተእያ ኡራይካ ሸቀቴዳዋ ግዶ!

11 “ሞኣበ ያላጋተꬃፐ ዶሚደ፥ እሻሉዋን ደኤዳ አሳ ማላ፤ እ ሀራ ቢታዉ ኦሞደትቤና። ሞኣበ ባꬃፐ ባꬃዉ ትገተናንነ ቃጸናን፥ ማልኡ ላመተናንነ ሳዉ አገናን፥ ኡቲደ ደእያ ዎይንያ ኤሳ ማላ። 12 ሞኣባ አꬅ የግያዋንታ ታን መꬍና ጎዳይ ኪትያ ጋላሳቱ ያና። ኡንቱንቱ አ አꬅ የጊደ፥ ባꬃፐ ጭንግርሳና፤ አ ባꬃ መንሬꬃና። 13 ያትና፥ እስራኤልያ አሳይ ባረ አማነቴዳ፥ ቤቴለን ደእያ ኤቃን ካዉሼዳዋዳን፥ ሞኣባ አሳይካ ባረ ጾሳን ካሞሻን ካዉሻና።

14 “ህንተ፥ ‘ኑን ዎልቃማ አሳነ ምኖ ኦላንቻ’ ጊደ አያዉ ጬቀቲቴ? 15 በእተ፥ ሞኣባ ቢታይነ ያን ደእያ ካታማቱ ባዬድኖ። አ ያላጋ አቱማ አሳቱካ ሹከታናዉ ዱገ ቤድኖ። ታን ካቲ፥ ኡባፐ ዎልቃማ መꬍና ጎዳ ጌተትያዌ ሀዋ ኦዳይ። 16 ሞኣባ ባሻይ ማታቴዳ፤ ቱጋይ አ ቦላን ይያ ዎዲካ ኤሌሊደ ጋኬዳ።

17 “አ ዩሹዋን ደእያ አሳዉ፥ አ ዎጋተꬃካ ኤርያ ኡባዉ፥ ‘ምኖ ግዴዳ ካዉተꬃ ጻምአይ ዋን መኤዴ! ቦንቼቴዳ ጻምአይ ዋን ክንቼቴዴ!’ ያጊደ ዝላልተ።

18 “ህንተኖ፥ ድቦና ካታማን ደእያዋንቶ፥ ህንተ ቦንቾ ሳኣፐ ዎꬊደ፥ መላ ቢታን ኡትተ። አያዉ ጎፐ፥ ሞኣባ ꬋይስያዌ ህንተ ቦላንካ ያና፤ ህንተ ጌሱዋ ኡባካ ላላና።

19 “አሮኤራ ካታማን ደእያዋንቶ፥ ኦግያ ዶናን ኤቂደ ጼልተ፤ ከስ አኪደ ባቃትያ አቱማ አሳነ ማጫ አሳ፥ ‘አዬ ከሴዳዌ?’ ያጊደ ኦችተ።

20 “ኡንቱንቱ፥ ‘ሞኣበ መኤዳ ድራዉ ካዉሼዳ፤ አዉ ዬክተነ ዝላልተ! ሞኣበ ባዬዳዋ አርኖና ሻፋ ላንቂያን አዋይተ!’ ያጊደ ዛራና።

21 “ገዝያን ደእያ ሆሎና፥ ያህጻ፥ መፋኣታ፥ 22 ድቦና፥ ናቦ፥ ቤት-ድብላታይማ፥ 23 ቅርያታይማ፥ ቤት-ጋሙላ፥ ቤት-ማኦና፥ 24 ቅርያታነ፥ ቦጽራ ጌተትያ ካታማቱዋ ቦላንነ ማታንነ ሃኩዋን ደእያ ሞኣባ ካታማቱዋ ቦላን ፕርዳይ ዬዳ። 25 ሞኣባ ካጪ ቃንጸቴዳ፤ አ ቀሲካ መኤዳ።

26 “መꬍና ጎዳ ቦላን ኦቶረቴዳ ድራዉ፥ ሞኣባ ኡሺደ ማꬆይተ። ባረ ጮሼዳ ጮሻ ቦላን ጎንዶረቶ፤ አሳይ ኡባይካ አ ቦላን ቅሊጮ። 27 ካሰ ኔን እስራኤልያ ቦላን ቅሊጫበይኪ? አባ ሃሳይያ ዎደ፥ ኔን ካꬋደ ሁጲያ ቃꬄዳዌ እስራኤሊ ካይሶቱዋ ግዶፐ ኦይቀቲኔየ?

28 “ህንተኖ፥ ሞኣባን ደእያዋንቶ፥ ካታማፐ ከስ ቢደ፥ ሹቻ ጎንጎሉዋ ግዶን ደእተ። አፉዋ ዶናን ባረ ጎልያ ኬጽያ ሀራጳት ማላ ግድተ። 29 ሞኣበ ሎይꬅ ኦቶረቴዳ፤ ሞኣባ አሳይ አይ ኬሻ አይንቶ፥ አሌቅንቶነ ኦቶረትንቶ፥ ቃይ ባረንታ ኡንቱንቱ አይ ኬሻ ꬎቂስ ዎꬄደንቶ፥ ታን ስሳድ። 30 ታን መꬍና ጎዳይ ኡንቱንቱ አሌቁዋ ኤራይ፤ ሽን አይነ ማደና፤ ኡንቱንቱ ጬቁካ አያካ ኦና። 31 ሄዋ ድራዉ፥ ታን ሞኣባዉ ዋሳይ፤ ቂርሄሬሳ አሳዉካ ካዮታደ ዬካይ።

32 “ህንተኖ፥ ሲብማ አሳዉ፥ ያእዜራ አሳዉ ዬክያዋፐ አꬃደ ታን ህንተዉ ዬካይ። ህንተ ታሺ ዳሺደ፥ ማጽያ አባ ፕኒደ፥ ያእዜራ ጋኬዳ ዎይንያ ቱራ ማላ፤ ሽን ህንተ ኦፍንꬃ ቴራነ ህንተ ዎይንያ ዉርጩዋ ቦንቂያዋንቱ ዪደ ꬋይስድጌድኖ። 33 ሎኦ ካꬃይ አይፍያ ሞኣባ ቢታፐ ፓሽካይነ ናሸቻይ አከት ክቼዳ። ዎይንያ ቴራ ጉምእያ ሳአቱዋፐካ ዎይንያ ኤሳይ ጎገናዳን ተአ ድጋድ። ኦንነ ላኤንꬆ አ እልሊድ ጉምኤና። አሳ ኮሻይ ስሰቶፐካ፥ ናሸቻ ኮሻ ግደና።

34 “ኡንቱንቱ ሀሰቦናንነ ኤልኣለን ዋስያ ዋሱ ያሃጻ ጋካናዉ ስሰቴ። ቃይ ጾኣሮፐ ቢደ፥ ሆሮናይማነ ኤግላት-ሻሊሽያ ጋካናዉ ስሰቴ። ሀራይ አቶ ንምሪማ ሃꬃይካ መሌዳ።

35 “ታን ሞኣባን አሳይ ጎይንያ ꬎቃ ሳአቱዋን ያርሽያዋንታ ባረንቱ ጾሳቶ እጻና ጩዋይያዋንታ ꬋይሳና። ታን መꬍና ጎዳይ ሀዋ ኦዳይ። 36 ኡንቱንቱ ካሰ ደሜዳ ዱረተꬃይ ኡባይ ሀእ ꬋይክቼዳ ድራዉ፥ ታ ዎዛናይ ሞኣባዉነ ቂርሄሬሳ አሳዉ ባልያን ህጽጽያን ዬክያዋዳን ዬኬ። 37 ኡንቱንቱ ኡባይ ባረንቱ ሁጲያነ ባረንቱ ቡቻ ሜዴድኖ፤ ባረንቱ ኩሽያካ ቃንጺደ ማዱꬄድኖ፤ ቃይ ባረንቱ ጼሳንካ ማቃ ዳንጬድኖ። 38 ሞኣባን ደእያ ጎልያ ሁጲያ ኡባንነ ዳባባን ዬኩዋፐ አትና፥ ሀራባይ ባዋ። አያዉ ጎፐ፥ ሞኣባ ታን ኦንነ ኮየና ኦቱዋዳን መንꬃድ። ታን መꬍና ጎዳይ ሀዋ ኦዳይ።

39 “ሞኣበ አይ መኡዋ መኤዴ! አ አሳይነ አይ ዋሱዋ ዋስ! ሞኣበ ዬላቲደ፥ ባረ ዞክያ ዎራ አይ ዛሩዋ ዛሪ! ሄዋ ድራዉ፥ ሞኣበ ባረ ዩሹዋን ደእያ ኡባቶ ሚጭያዋነ ዳጋምያባ ግዴዳ” ያጌ።

40 መꬍና ጎዳይ ሀዋዳን ያጌ፤ “አርጋንꬃይ ባረ ቀፍያ ፕድ ኦꬅ ፓሊደ ይያዋዳን፥ ሞርኪ ሞኣባ ቦላን ያና። 41 አ ካታማቱ ኦይቀታና፤ አ ጌሳቱካ አከታና። ሄ ጋላስ ሞኣባ ምኖ ኦላንቻቱዋ ዎዛናይካ ኦይꬃይ ኦይቄዳ ማጫ ምሽራት ዎዛና ማላ ግዳናዋ። 42 ሞኣበ ታ ቦላን፥ መꬍና ጎዳ ቦላን ማካሌዳ ድራዉ ꬋያና፤ ሀዋፐ ስንꬃዉ እ ካዉተꬃ ግደና።

43 “ህንተኖ፥ ሞኣባን ደእያዋንቶ፥ ያሽያዌ፥ ኦላይነ ጲሪ ህንተና ናጌ። ታን መꬍና ጎዳይ ሀዋ ኦዳይ። 44 ያሽያዋፐ ባቃቲደ ዎጽያ ኦንነ ኦላን ኩንዳና፤ ቃይ ኦላፐ ፑደ ከስያ ኦንነ ጲርያን ኦይቀታና። አያዉ ጎፐ፥ ታን ሞኣባ ሙርያ ዎድያን ሄዋ ኦꬃና። መꬍና ጎዳይ ሀዋ ኦዳይ።

45 “ባቃቲደ ቤዳዋንቱ ዎልቃ ꬋዪደ፥ ሀሰቦና ካታማ ኩዋን ኤቄድኖ። አያዉ ጎፐ፥ ሀሰቦና ካታማፐ ታማይ፥ ቃይ ካቲ ስሆን በን ደኤዳ ጎልያፐ ላጩ ከሲደ፥ ሞኣባ ቢታ ኡባነ አን ደእያ ማካላንቻ አሳ ማና። 46 ሞኣባ አሳዉ፥ ህንተዉ አየ አና! ካሞሻ ግያ ጾሳዉ ጎይንያዋንቱ ꬋዬድኖ፤ ኡንቱንቱ አቱማ ናናቱነ ማጫ ናናቱ ኦሞደቲደ ቤድኖ።

47 “ግዶፐነ፥ ዉርሰꬃ ዎደቱዋን ታን ሞኣባ አሳዉ ዛራደ ሳኣ እሻልሳና። ታን መꬍና ጎዳይ ሀዋ ኦዳይ” ያጌ።

ሞኣባ ቦላ ኦደቴዳ ትምቢቲ ሀዋን ዉሬዳ።