1 አሞና አሳ ጼልያዋን መꬍና ጎዳይ ሀዋዳን ያጌ፤ “እስራኤልያዉ አቱማ ናአይ ባዌ? ዎይ ላትያዌ ባዌ? ያትና፥ ሞሎካ ግያ ጾሳዉ ጎይንያ አሳቱ ጋዳ ቢታ አያዉ ኦይቄድኖ? ኡንቱንቱ ካታማንካ አያዉ ኡቴድኖ?ህዝ. 21:28-32፤ 25:1-7፤ አሞጻ 1:13-15፤ ሶፎ. 2:8-11 2 አሞና አሳይ ደእያ ራባ ካታማ ቦላን ኦላ ዋሱ ስሰታናዳን፥ ታን መꬍና ጎዳይ ኦꬃና ጋላሳቱ ያና። ሄ ካታማይ ኮለቲደ፥ መላ አታናዋ። አ ዩሹዋን ደእያ ቄር ካታማቱካ ታማን ጹገታና። እስራኤልያ አሳይካ ባረና ባረ ላታፐ የደርሴዳዋንታ የደርሳና። ታን መꬍና ጎዳይ ሀዋ ኦዳይ።

3 “ህንተኖ፥ ሀሰቦና አሳቶ፥ አታ ካታማይ ኮለት ክቼዳ ድራዉ ዝላልተ! ህንተኖ፥ ራባ አሳቶ፥ ዬክተ! ማቃ ማዪደ ካዮትተ! ቃይ ዎዛና ባዪደ፥ ካታማ ግምቢያ ግዶን ዎጸረትተ! አያዉ ጎፐ፥ ህንተ ጾሳይ ሞሎክ ባረ ቄሳቱ ዋነ ባረ ሞድያዋንቱና ኦሞደታና። 4 ህንተኖ፥ አማኑ ባይና አሳቶ፥ ህንተ፥ ‘ኑ ቦላን ኦን ዎራጂ?’ ያጊደ ህንተ ዱረተꬃንነ ህንተ አራዳ ዎምባቱዋን አያዉ ጬቀቲቴ? 5 ታን ነ ዩሹዋን ደእያዋንቱ ኡባይ ኔና ዳጋንꬃናዳን ኦꬃና። ታን መꬍና ጎዳይ፥ ኡባፐ ዎልቃማ መꬍና ጎዳይ ሀዋ ኦዳይ። ህንተ ኡባይካ ከሲደ ባቃታና፤ ቃይ ባቃቲደ ቤዳዋንታ ሺሽያዌ ꬋያና።

6 “ግዶፐነ፥ ዉርሰꬃ ዎደቱዋን ታን አሞና አሳዉ ዛራደ እሻልሳና። ታን መꬍና ጎዳይ ሀዋ ኦዳይ” ያጌ።

7 ኤዶማ ቢታ ጼልያዋን ኡባፐ ዎልቃማ መꬍና ጎዳይ ሀዋዳን ያጌ፤ “ተማና አሳዉ አꬌዳ ኤራተꬃይ ባዌ? ጭንጫ አሳቱዋፐ ዞሪ ꬋይ ክቼዴ? ኡንቱንቱ አꬌዳ ኤራተꬃይ ኡንቱንቱፐ ጎዘት ክቼዴ?ኢሳ. 34:5-17፤ 63:1-6፤ ህዝ. 25:12-14፤ 35:1-15፤ አሞጻ 1:11-12፤ አብድ. 1-14፤ ሚልክ. 1:2-5 8 ህንተኖ፥ ዳዳናን ደእያዋንቶ፥ ባቃቲደ ጪማ ጎንጎሉዋን ቆሰትተ! አያዉ ጎፐ፥ ታን ኤሳ ዘረꬃ ሙርያ ዎድያን፥ አ ቦላ ባየꬃ አሀና። 9 ዎይንያ ማጽያዋንቱ ዮፐ፥ ማጺደ ቃርምያ አሽክኖ? ካይሳቱ ቃማ ገሎፐካ፥ ባረንታ ኮሽያዋ ጻላላ አክክኖ? 10 ሽን ታን ኤሳ ዘረꬃ ቃራደ ካሎ አሻና፤ ኡንቱንቱ ቆሰታናዉ ዳንዳየና ማላ፥ ኡንቱንቱ ቆሰትያ ሳአቱዋካ ታን ቃራደ፥ ቆንጨ ሳኣ ኦꬃና። ኤሳ ዘረꬃይ፥ አ ዳቦቱነ አ ሾሮቱ ኡባይ ꬋያና። 11 ህንተ ግዶን ደእያ አዉ ሀይ ድጌዳ ናናቱዋ ታዉ አግ ባሽተ፤ ኡንቱንታ ታን ድቻና። ቃይ ህንተ አምኤቱካ ታናን አማነትኖ” ያጌ።

12 መꬍና ጎዳይ ሀዋዳን ያጌ፤ “ስም ሙረታናዉ በሰና አሳቱ ሙሩዋ ጹኣ ኡሽያዋንታ ግዶዋፐ አትና፥ ህንተ ዋን ሙረተናን አታና ጊደ ቆፒቴ? ቱማ ህንተካ ሙሩዋ ጹኣፐ ኡሺታፐ አትና፥ ጮ አትክታ። 13 ቦጽራ ካታማይ መላ ግዲደ አታና፤ አ በኤዳ አሳዉ ኡባዉ ዳጋንꬅያባ፥ ቅሊጭያባነ ቦርያባ ግዳናዋ። ቃይ አ ዩሹዋን ደእያ ቄር ካታማቱ ኡባይካ መꬍናዉ ኮለቲደ አታናዋ። ሀዋ ታን መꬍና ጎዳይ ታ ሱንꬃን ጫቃይ” ያጌ።

14 ታን መꬍና ጎዳፐ ዬዳ እት ኪታ ስሳድ። ካዉተꬃቱዋ ግዶ ኪተቴዳዌ፥ “ኤዶማ ቦላ ዶዳናዉ ሺቅተ! አናና ኦለታናዉ ደንድተ!” ያጌዳ።

15 መꬍና ጎዳይ ሀዋዳን ያጌ፤ “ስም ታን ህንተና ካዉተꬃቱዋ ግዶን ጉꬃና፤ አሳ ግዶንካ ካቴዳዋንታ ኦꬃና። 16 ህንተኖ፥ ሹቻ ጎንጎሉዋንነ ደርያ ቦላን ደእያዋንቶ፥ ህንተ ያሽስያ ያሻይነ ህንተ ኦቶሩ ህንተና ጭሜዳ። ህንተ ህንተ ጎልያ አርጋንꬃዋዳን ꬎቃን ኬጾፐካ፥ ታን ህንተና ሄዋፐካ ዱገ ዎꬃና።

17 “ኤዶማ ቢታይ አሳ ዳጋንꬅያ ቢታ ግዳናዋ። ያና አꬍያ አሳይ ኡባይ አ ባየꬃ በኢደ፥ ዳጋማናነ፥ ‘ፖራ!’ ጋና። 18 ሶዶምነ ጋሞር ባረንቱ ዩሹዋን ደእያ ካታማቱዋና ባይያ ዎደ ሀኔዳዋዳን፥ ኦንነ ያን ደኤና፤ አሳይ ኡባካ ያን ኡተና። ታን መꬍና ጎዳይ ሀዋ ኦዳይ። ዶመꬃ 19:24-25

19 “ዮርዳኖሳ ሻፋ ላንቂያን ደእያ ዎራፐ ሎኦ ቆሩ ደኢያሳ ቆፐናን ከስያ ጋሙዋዳን፥ ታን ያደ፥ ኤዶማ አሳቱዋ ቆፐናን ኡንቱንቱ ቢታፐ የደርሳና። ሄዋፐ ጉይያን፥ ታ ዶሬዳ አሳ አ ቦላን ሱንꬃና። ታ ማላይ ባዋ፤ ታን ኦꬃና ጌዳዋካ ተአናዉ ዳንዳይያ አሳይ ባዋ። አይ ሄንꬃንቻይ ታናና ኤቀታናዉ ዳንዳዪ?

20 “ሄዋ ድራዉ፥ ታን መꬍና ጎዳይ ኤዶማ ቦላንነ ተማና ካታማ አሳ ቦላን ኦꬃናዉ ሀልቼዳዋነ ቆፔዳዋ ስስተ! ኡንቱንቱ ናናቱዋ ዎልቃን ጎቺደ አፋና፤ ሄዋ ጋሱዋን ኡንቱንቱ ሶ አሳይ ኡባይ ዳጋማና። 21 ኤዶማ ኩንደꬃ ጊረꬃይ ቢታ ቃꬃና፤ ኤዶማቱዋ ዋሱካ ዞኦ አባ ጋካናዉ ስሰታና። 22 አርጋንꬃይ ባረ ቀፍያ ፕድ ኦꬂደ፥ ቦላፐ ዱገ ኤለካ ፓሊደ ይያዋዳን፥ ሞርኪ ቦጽራ ቦላን ያና። ሄ ጋላስ ኤዶማ ኦላንቻቱ ኦይꬃይ ኦይቄዳ ምሽራቲዳን ህርጋና” ያጌ።

23 ዳማስቆ ጼልያዋን ጾሳይ ሀዋዳን ያጌ፤ “ኢታ ኦዱዋ ስሴዳ ድራዉ፥ ሀማታነ አርፋዳ ካታማቱዋን ደእያ አሳይ ዬላቴዳነ ያዬዳ። ቤታይ ሾጭያ አባዳን፥ ኡንቱንታ ዎዛናይ ሸምፑዋ ደማናዉ ዳንዳይቤና። ኢሳ. 17:1-3፤ አሞጻ 1:3-5፤ ዛካ. 9:1 24 ዳማስቆ አሳይ ዳቡሬዳ፤ ኡንቱንቱ ዳጋማን ሻባረቲደ ባቃቴድኖ፤ ምሽራቶ ኦይꬃይ ኦይቂያዋዳን፥ መቱነ ቱጋይ ኡንቱንታ ኦይቄዳ። 25 ናሸቻይ ኩሜዳ ሄ ኤረቴዳ ካታማይ አሳይ ደኤና ሳኣ ግዳናዋ! 26 ሄዋ ድራዉ፥ ሄ ጋላሳን ሄ ካታማን ደእያ ያላጋ አቱማ አሳ ኡባይ ካታማ ግዶ ኦገቱዋን ሀይቃና፤ ኦላንቻቱ ኡባይካ ዉራና። ታን፥ ኡባፐ ዎልቃማ መꬍና ጎዳይ ሀዋ ኦዳይ። 27 ታን ዳማስቆ ካታማ ድርሳ ግምቢያን ታማ የዳና፤ ሄ ታማይ በንሀዳዳ ካዉተꬃ ጎልያ ኡባ ማና” ያጌ።

28 ባብሎነ ካቲ ናቡካዳናጾር ኦሊደ ጾኔዳ ቄዳረነ ሀጾራ ካዉተꬃቱዋ ጼልያዋን መꬍና ጎዳይ ሀዋዳን ያጌ፤ “ደንድተ፤ ቄዳረ አሳ ኦልተ! ሄ አዋይ ዶልያ ባጋና ደእያ አሳ ዉርስተ! 29 ኡንቱንቱ ዱንካነቱዋነ ኡንቱንቱ ዉደቱዋ አክተ! ኡንቱንቱ ጋርዳቱዋ፥ ኡንቱንቱ ማጹዋ ኡባነ ኡንቱንቱ ጋሎቱዋ አክተ! ያቲደ ኡንቱንቶ፥ ‘ህንተ ዩሾ ኡባን ሻቢርሳይ ደንዴዳ!’ ያጊደ ኦድተ።

30 “ህንተኖ፥ ሀጾራን ደእያዋንቶ፥ ባብሎነ ካቲ ናቡካዳናጾር ህንተ ቦላን ኢታባ ኦꬃናዉ ማቀት ኡቴዳ ድራዉ፥ ባቃትተ፤ ሃኮ ሳ ቢደ፥ ጪማ ጎንጎሉዋን ቆሰትተ! መꬍና ጎዳይ ሀዋ ኦዳድ።

31 “ናቡካዳናጾራ፥ ደንዳ! ህርግ ባይናን ሳሮ ደእያ ካዉተꬃቱዋ ቦላ ዎራጃ! ታን መꬍና ጎዳይ ሀዋ ኦዳይ። ኡንቱንቱ ካታማ ግምቢያዉ እፍꬃይ ዎይ ኩሉቡ ባዋ። ኡንቱንቱ ባረካ ደኢኖ።

32 “ኡንቱንቱ ጋሎቱ ቦንቀታና፤ ኡንቱንቱ ዉዲካ ኦሞደታና። ባረንቱ ሁጲያ ሹፌርያ ሜድስያዋንታ ኡባ ታን ጫርኩዋን ላላና፤ ታን ኡባ ሳና ኡንቱንቱ ቦላ ባየꬃ አሀና። ታን መꬍና ጎዳይ ሀዋ ኦዳይ። 33 ሀጾር መꬍናዉካ ዎራካናቱ ደእያ ባዞ ግዲደ አታናዋ። ኦንነ ያን ደኤና፤ አሳይ ኡባካ ያን ኡተና” ያጌ።

34 ይሁዳ ካቲ ሰደቅያስ ኮይሮ ካተቴዳ ዎደ፥ ኤላማ ቢታ ጼልያዋን መꬍና ጎዳፐ ኤርማሳኮ ዬዳ ቃላይ ሀዋ። 35 ኡባፐ ዎልቃማ መꬍና ጎዳይ ሀዋዳን ያጌ፤ “ኤላማዉ ዋና ዎልቃ ግድያ ኡንቱንቱ ዎንዳፍያ አሳቱዋ ታን ዎꬋና። 36 ኡባ ሳና ታን ኤላማ ቦላን ጫርኩዋ አሀና፤ ኡንቱንታካ ሄ ጫርኩዋን ኡባሳ ላላና። ሄዋ ድራዉ፥ ኤላማ አሳይ ላለቲደ ጋከና ቢታይ ደኤና። 37 ኡንቱንቱ ሞርከቱዋ ስንꬃንነ ኡንቱንታ ዎꬋናዉ ኮይያዋንቱ ስንꬃን ታን ኤላማ ዳጋንꬃና። ታን ታ ዎልቃማ ሀንቁዋን ኡንቱንቱ ቦላ ባየꬃ አሀና። ታን መꬍና ጎዳይ ሀዋ ኦዳይ። ታን ኡንቱንታ ꬋይሳና ጋካናዉ፥ ማሻን የደርሳና። 38 ታን ኤላማ ካትያነ ኡንቱንቱ ካፖቱዋ ꬋይሳደ፥ ታ ካዉተꬃ አራታ ያን ዎꬃና ያጌ መꬍና ጎዳይ።

39 “ግዶፐነ፥ ዉርሰꬃ ዎደቱዋን ታን ኤላማ አሳ ዛራደ እሻልሳና። ታን መꬍና ጎዳይ ሀዋ ኦዳይ” ያጌ።