1 ባብሎነ ቢታነ ባብሎነ አሳ ጼልያዋን ትምቢትያ ኦድያ ኤርማሳ ባጋና መꬍና ጎዳይ ኦዴዳ ቃላይ ሀዋ:ኢሳ. 13:1—14:23፤ 47:1-15 2 “ካዉተꬃቱዋ ግዶን ኦድተነ አዋይተ። ባንድራ ꬎቁ ኦꬅ ኦይቂደ፥ አያነ ቆሰናን፥ ሀዋዳን ያጊደ ኦድተ፤ ‘ባብሎነ ኩንዴዳ! ቤላነ ማርዱካ ጌተትያ አ ጾሳቱካ ዬላቴድኖነ መኤረቴድኖ። ቃይ አ ምስለቱነ አ ኤቃቱ መኤረቴድኖ። 3 ሁጲሳ ባጋ ቢታፐ እት ካዉተꬃይ ያና፤ ባብሎነ ቢታ ባይዛና። ያቶፐ አሳይካ መሂካ ኡባይ ባቃታና፤ ኦንነ ያን ደኤና’ ያግተ” ያጌዳ።

4 መꬍና ጎዳይ ሀዋዳን ያጌ፤ “ሄ ዎድያንነ ሄ ጋላሳቱዋን እስራኤልያ አሳይነ ይሁዳ አሳይ እትፐ ግዲደ፥ ዬኪደ ያና፤ መꬍና ጎዳ ባረንቱ ጾሳ ኮያና። 5 ኡንቱንቱ ጽዮነ አፍያ ኦግያ ኦቺደ፥ ባረንቱ ስንꬃ ያ ዛሪደ፥ ‘ሃይተ!’ ኑን ኡባካ ዶገተና መꬍና ጫቁዋ መꬍና ጎዳና አነ ጫቀቴቶ ያጋና።

6 “ታ አሳይ ባዬዳ ዶርሳቱዋ ማላ ግዴዳ፤ ኡንቱንቱ ሄንꬃንቻቱ ኡንቱንታ ባለꬂደ፥ ደርያን ዎራ የዴድኖ። እት ሳፐ ሀራ ደርያ ቶይላካቲደ፥ ባረንቱ አቅያ ሳኣ ዶጌድኖ። 7 ደሜዳ ኡባይ ኡንቱንታ ሻንካቴዳ። ኡንቱንቱ ሞርከቱ፥ ‘ኑን አይነ ባይዝበይኮ፤ ሀዌ መቱ ኡባይ ኡንቱንታ ጋኬዳዌ፥ ኡንቱንቱ መꬍና ጎዳ፥ ባረንቱ ሸምፑዋ ሳኣ፥ መꬍና ጎዳ ባረንቱ ማይዛ አዎቱዋ ህዶታ ናቄዳ ግሻሳ’ ያጌድኖ።

8 “ህንተኖ፥ እስራኤልያ አሳቶ፥ ሀእ ስም ባብሎነ አሳ ግዶፐ ከሲደ ባቃትተ! ባብሎናቱዋ ቢታፐ ቢተ! ያቲደ ዉድያ ካለꬅያ ዴሻ ኦርግያ ማላ ግድተ። ሳፃ 18:4ሳፃ 18:4 9 አያዉ ጎፐ፥ ታን ሁጲሳ ባጋ ቢታፐ ዎልቃማ ዎልቃማ ካዉተꬃቱዋ ጭታቱዋ ደንꬃደ፥ ባብሎነ ቦላ አሃደ ደአይ። ኡንቱንቱ አ ኦሊደካ ኦይቃና፤ ኡንቱንቱ ዎንዳፊ ዱኪደ የዴዳ ሂላንቻ ኦላንቻ ማላ። 10 ባብሎነ ቢታይ ቦንቀታና፤ አ ቦንቂያ ኡባይ ካላና። ታን መꬍና ጎዳይ ሀዋ ኦዳይ።

11 “ህንተኖ፥ ባብሎነ አሳቶ፥ ታ አሳ ቦንቂያዋንቶ፥ ህንተ ናሸቲደ፥ ፖጩ ጌድታ። ቆሩዋ ካሌዳ ኡሳቲዳን፥ ህንተ ጲጽሌድታ፤ ዎታራ ፓራዳን ጫጌድታ። 12 ሽን ሀእ ህንተ ዋና ካታማይ ዬላታናነ ካዉሻና። ቃይ ካዉተꬃቱዋ ግዶንካ ባብሎነ ኡባፐ ዉርሰꬃ ግዳናዋ፤ ሃꬅ ባይና መላ ቢታ ግዳናዋ። 13 መꬍና ጎዳ ሀንቁዋ ጋሱዋን፥ ባብሎነ አሳይ ደኤናሳ ግዳናዋ፤ እ ኡባና ኮለተና። አ ላንቂያና አꬍያ ኡባይ አ ቦላን ጋኬዳ ቦሻ በኢደ፥ ዳጋማናነ፥ ‘ፖራ!’ ጋና።

14 “ህንተኖ፥ ዎንዳፍያ ዱክያዋንቶ፥ ባብሎነ ኦላናዉ አ ዩሹዋን ሳልፕተ፤ እ መꬍና ጎዳ ቦላን ናጋራ ኦꬄዳ ድራዉ፥ ህንተ ፖꬃቱዋን ኡባን አ ዱክተ። 15 ኡባ ባጋናካ ባብሎነ ቦላን ኦላ ዋሱዋ ዋስተ! ባብሎነ ኩሽያ እሜዳ፤ አ አዱሳ ግምበቱ ኩንዴድኖ፤ አ ግምቢያ ድርሳይካ ኮለቴዳ። መꬍና ጎዳይ አ ቦላን ሀሉዋ ከሲደ ደእያ ድራዉ፥ ህንተካ አ ቦላን ሀሉዋ ከስተ! እ ሀራቱ ቦላን ኦꬄዳዋ ህንተካ አ ቦላን ኦꬅተ! 16 ዘረꬃ ዘርያዋነ ጫካ ዎደ ሺሻናዉ ከስያዋ ኡባ ባብሎነፐ ꬋይስተ። ኡንኤꬅያዋንቱ ማሻዉ ያዬዳ ድራዉ፥ ሄ ቢታን ደእያ አሳይ ኡባይ ባረ ያራኮ ያራኮ ስሚደ፥ ባረ ቢታ ቢታ ባቃታና።

17 “እስራኤሊ ጋሙ የደርሲደ ላሌዳ ዶርሳ ማላ። ኮይሮ አሶረ ካቲ አ አሹዋ ሜዳ፤ ዉርሰꬃን ቃይ ባብሎነ ካቲ ናቡካዳናጾር አ መቀꬃ ꬎጌዳ። 18 ሄዋ ድራዉ፥ ኡባፐ ዎልቃማ መꬍና ጎዳይ፥ እስራኤልያ ጾሳይ፥ ታን ሀዋ ኦዳይ: አሶረ ካትያ ታን ሙረዳዋዳን፥ ባብሎነ ካትያካ አ ቢታካ ሙራና። 19 ሽን እስራኤልያ እ ሄመትያ ሳኣ ዛራና፤ ቃርመሎሳነ ባሳነ ደረቱዋን እ ሄመታና። ቃይ ኡንቱንቱ ኤፍሬማ ገዝያንነ ጋላኣደ ገዝያን ካሊደ ማና። 20 ሄ ዎድያንነ ሄ ጋላሳቱዋን አሳይ እስራኤልያን ባይዙዋ ኮያና፤ ሽን ባይዙ ꬋያና፤ ይሁዳን ናጋራ ኮያና፤ ሽን ቤተና። አያዉ ጎፐ፥ ሀይቁዋፐ ታን አሼዳ እስራኤልያ አሳ አቴዳዋንቱ ናጋራ ታን አቶ ያጋና። ታን መꬍና ጎዳይ ሀዋ ኦዳይ” ያጌ።

21 ቃይካ መꬍና ጎዳይ ሀዋዳን ያጌ፤ “ምራታይማ ቢታነ ፕቆዳ ቢታን ደእያ አሳ ቦላን ደንድተ፤ ኡንቱንታ ኦልተ፥ ዎꬍተነ ኡንቱንታ ሙለ ꬋይስተ። ታን ህንተና አዛዜዳዋዳን ኡባባ ኦꬅተ። 22 ሄ ቢታን ኦላ ዋሱ ስሰቴ፤ ዎልቃማ ባሻይካ ጋኬዳ። 23 ቢታ ሳኣ ኡባ ሊቅስያ ድጅኑ አይ መኡዋ መኤዴ! አይባ ሊቁዋ ሊቄዴ! ካዉተꬃቱዋ ኡባ ግዶን ባብሎነ አይባ ዳጋንꬅያባ ግዴዴ! 24 ኔኖ፥ ባብሎነ፥ ታን ኔና ኦይቃናዉ ጲርያ ዎꬃድ፤ ኔን ኤረናን ደኣደ ገላደ ኦይቀታዳ። ኔን ታናና፥ መꬍና ጎዳና ጋዳቴዳ ድራዉ ኦይቀታዳ። 25 ታን መꬍና ጎዳይ ታ ኦላ ሚሻ ዎꬅያ ጎልያ ዶያድ፤ ታ ሀንቁዋ ኦላ ሚሻ አፐ ከሳድ። አያዉ ጎፐ፥ ታን ጎዳይ፥ ኡባፐ ዎልቃማ መꬍና ጎዳይ ባብሎነ ቢታን ኦꬅያ ኦሱ ደኤ። 26 ያና ሃና አ ቦላ ዶድተ! ካꬃይ ደእያ አ ጎታራቱዋ ፖግተ፤ ኦሞዱዋካ ካꬃዳን እት ዲራን ጉፕተ! አያነ አሸናን ዉርስ ꬋይስተ! 27 ቦራቱዋ ሹክያዋዳን፥ ኡንቱንቱ ኦላንቻቱዋ ሲፍተ! ባብሎነ አሳዉ አየ አና! አያዉ ጎፐ፥ ኡንቱንቱ ጋላሳይ፥ ኡንቱንቱ ሙረትያ ዎዲ ጋኬዳ።

28 “ኦሞደቴዳ አሳቱ ባብሎነፐ ከስ አኪደ፥ የሩሳላመ ባቃታና። ባብሎነ ቢታ አሳይ ጌሻ ጎልያ ቦላን ኦꬄዳባዉ መꬍና ጎዳይ ኡንቱንቱ ጾሳይ ሀሉዋ ከስያዋ ኡንቱንቱ ጽዮነን ሃሳያና።

29 “ባብሎነ ኦላናዉ ዎንዳፍያ ዱክያዋንታ ኡባ ጼግተ፤ እቱነ ከስ አከናዳን፥ ኡንቱንቱ አ ዩሹዋን ዶድኖ። መꬍና ጎዳ ቦላ፥ እስራኤልያ ጌሻ ቦላ፥ እ ኦቶረቴዳ ድራዉ፥ አዉ አ ኦሱዋዳን ዛርተ። እ ሀራቱ ቦላን ኦꬄዳዋዳን፥ አ ቦላንካ ኦꬅተ።ሳፃ 18:6 30 ሄዋ ድራዉ፥ አ ያላጋ አቱማ አሳቱ ካታማ ግዶ ኦግያን ሀይቃና፤ ሄ ጋላስ አ ኦላንቻቱ ኡባይ ꬋያና። ታን መꬍና ጎዳይ ሀዋ ኦዳይ” ያጌ።

31 ጎዳይ፥ ኡባፐ ዎልቃማ መꬍና ጎዳይ ሀዋዳን ያጌ፤ “ኔኖ፥ ኦቶራንቻዉ፥ ታን ነ ቦላ ደንዳድ። አያዉ ጎፐ፥ ነ ጋላሳይ፥ ኔን ሙረትያ ዎዲ ጋኬዳ። 32 ኦቶራንቻይ ꬉበቲደ ኩንዳና፤ አ ፑደ ደንꬅያዌካ ደኤና። ታን አ ካታማቱዋ ግዶን ታማ ኤꬃና፤ ሄ ታማይ ዩሹዋን ደእያ ኡባ ም ድጋና” ያጌ።

33 ኡባፐ ዎልቃማ መꬍና ጎዳይ ሀዋዳን ያጌ፤ “እስራኤልያ አሳይነ ይሁዳ አሳይ እትፐ ናቀቴዳ። ኡንቱንታ ኦሞዲደ አፌዳዋንቱ ኡንቱንታ ዎልቃፐ ምንስ ኦይቄድኖ፤ የደናን ድጌድኖ። 34 ሽን ኡንቱንታ ዎዝያዌ ምና፤ አ ሱንꬃይካ ኡባፐ ዎልቃማ ጾሳ። እ ኡንቱንቱ ቢታዉ ሸምፑዋ እማናዉ፥ ኡንቱንቱ ድራዉ ሞተቴ። ሽን ባብሎነ ቢታን ደእያዋንቱ ሻቢርሳ እማና።

35 “ባብሎነ አሳይነ ባብሎነ ቢታን ደእያዋንቱ ማሻን ሀይቂኖ!

“አ ካፓቱነ አ አꬌዳ ኤራንቻቱ ማሻን ሀይቂኖ! ታን መꬍና ጎዳይ ሀዋ ኦዳይ።

36 “አ ዎርዱዋ ትምቢትያ ኦድያዋንቱ፥ ኤያቱ ማሻን ሀይቂኖ!

“አ ዎልቃማ ኦላንቻቱ፥ ዳጋሜዳዋንቱ ማሻን ሀይቂኖ!

37 “አ ፓራቱዋ ቦላነ አ ፓራቱዋ ጋረቱዋ ቦላ፥ ቃይ ማጫ አሳ ማላ ግዴዳ አ አላጋ ኦላንቻቱዋ ቦላ ማሻይ ዮ!

“አ ዱረታ ምንጅያ ጎልያ ቦላ ማሻይ ዮ! ያቶፐ አ ዱረታይ ኡባይ ቦንቀታና።

38 “አ ቦላ ኮሻይ ዮ! ያቶፐ አ ሃꬃይ መላና። አያዉ ጎፐ፥ ባብሎነ ቢታይ ኤቃ ምስለቱ ኩሜዳ ቢታ፤ ሄ ምስለቱ አሳ ዳጋንꬂኖነ ኤያይኖ።

39 “ሄዋ ድራዉ፥ ባብሎነ ባዞ ዶአቱነ ዎራካናቱ ደእያ ሳኣ ግዳናዋ፤ ቃይ ሶጎነቱካ አን ደአና። አን መꬍናዉካ አሳይ ደኤና፤ የለታ ኡባንካ አሳይ አን ኡተና። ሳፃ 18:2 40 ጾሳይ በን ሶዶማነ ጋሞራ ኡንቱንቱ ዩሹዋን ደእያ ካታማቱዋና እትፐ ꬋይሴዳዋዳን፥ ባብሎነን ኦንነ ደኤና፤ አሳይ ኡባካ ያን ኡተና። ታን መꬍና ጎዳይ ሀዋ ኦዳይ። ዶመꬃ 19:24-25

41 “በእተ፥ አሳይ ሁጲሳ ባጋ ቢታፐ ዬ፤ ምኖ ካዉተꬃቱነ ዳሮ ካተቱ ሳኣ ጋጻፐ ያናዉ ደንዲኖ። 42 ኡንቱንቱ ባረንቱ ዎንዳፍያነ ቶራ ኦይቄድኖ፤ ኡንቱንቱ መቀꬃ ኢታነ የድ ማረና አሳ። ኡንቱንቱ ባረንቱ ፓራ ቶጊደ ብያ ዎደ፥ ቤታይ ሾጭያ አባ ጉንꬃዳን ሀኔ። ኔኖ፥ ባብሎነ፥ ኡንቱንቱ ኡባይካ ኦላዉ ጊጌዳ አሳ ግዲደ፥ ነ ቦላን ሳልፔድኖ።

43 “ባብሎነ ካቲ ኡንቱንቱ ኦዱዋ ስሴዳ፤ አ ኩሺ ዳቡሪደ፥ ህልስ ጌዳ፤ ኦይꬃይ ኦይቄዳ ምሽራቲዳን፥ ኡንኡ አ ኦይቄዳ።

44 “ዮርዳኖሳ ሻፋ ላንቂያን ደእያ ዎራፐ ሎኦ ቆሩ ደኢያሳ ቆፐናን ከስያ ጋሙዋዳን፥ ታን ያደ፥ ባብሎነ አሳ ኡንቱንቱ ቢታፐ የደርሳና። ሄዋፐ ጉይያን፥ ታ ዶሬዳ አሳ አ ቦላን ሱንꬃና። አያዉ ጎፐ፥ ታ ማል ባዋ፤ ታን ኦꬃና ጌዳዋካ ተአናዉ ዳንዳይያ አሳይ ባዋ። አይ ሄንꬃንቻይ ታናና ኤቀታናዉ ዳንዳዪ? 45 ሄዋ ድራዉ፥ ታን መꬍና ጎዳይ ባብሎነ አሳ ቦላንነ ባብሎነ ቢታ ቦላን ሀልቼዳዋነ ቆፔዳዋ ስስተ! ኡንቱንቱ ናናቱዋ ዎልቃን ጎቺደ አፋና፤ ሄዋ ጋሱዋን ኡንቱንቱ ሶ አሳይ ኡባይ ዳጋማና። 46 ባብሎነ ኩንደꬃ ጊረꬃይ ቢታ ቃꬃና፤ ባብሎናቱዋ ዋሱካ ካዉተꬃቱዋ ኡባን ስሰታና” ያጌ።