1 መꬍና ጎዳይ ሀዋዳን ያጌ፤ “ባብሎነ አሳነ ባብሎነ ቢታ ꬋይስያ ጫርኩዋ ታን ኪታና። 2 ታን ባብሎነ ቦላ አላጋቱዋ፥ ጫርኩዋዳን ፑንያዋንታ ኪታና፤ አ ቢታ አይነ ባይናዋ ኦꬃና። አ ባየꬃ ጋላስ ኡንቱንቱ ኡባ ሳና አ ዶዳና። 3 አ ኦላንቻቱ ዎንዳፍያ ዱካናዉ ዎይ ባረንቱ ኦላ ሚሻ ዳንጫናዉ ናጎፕተ። አ ያላጋቱዋ አሾፕተ፤ አ ኦላንቻቱዋ ሙልያ ꬋይስተ። 4 ኡንቱንቱ ባብሎነ ቢታን ሲፈት ዉራና፤ ኡንቱንቱ ካታማቱዋ ኦገቱዋንካ ጫደት ኩንዳና። 5 እስራኤልያ ቢታይነ ይሁዳ ቢታይ እስራኤልያ ጌሻ፥ ታና፥ ናቄዳ ናጋራን ኩሜዳዋ ግዶፐነ፥ እስራኤልያ ግድና፥ ይሁዳ ግድና፥ ላኡዋካ ታን ኡንቱንቱ ጾሳይ፥ ኡባፐ ዎልቃማ መꬍና ጎዳይ አምአቲዳን የጋበይከ።

6 “ባብሎነፐ ባቃትተ! አሳይ ኡባይ ባረ ሸምፑዋ ሸምፑዋ አሾ! እ ኦꬄዳ ናጋራ ጋሱዋን ህንተ ዎꬎፕተ! ሀዌ ዎዲ ታን መꬍና ጎዳይ ታ ሀሉዋ ከስያ ዎደ። 7 ባብሎነ ሳኣን ደእያ አሳይ ኡባይ ኡሺደ ማꬆትያ ዎይንያ ኤሳይ ትገትያ፥ መꬍና ጎዳ ኩሽያን ደእያ ዎርቃ ዋንጫ ማላ። ካዉተꬃቱ ኡባቱ ሄ ዎይንያ ኤሳ ኡሺደ ጎዬድኖ። ሳፃ 17:2-4፤ 18:3 8 ባብሎነ ቆፐናን ኩንዲደ መኤዳ። ሄዋ ድራዉ፥ አዉ ዬክተ! አ ማዱꬃዉ ꬋልያ እምተ። ኦን ኤሪ፥ እ ፓጻነንቶነ። 9 ባብሎነን ደእያ አላጋ አሳቱ፥ ‘ኑን ባብሎነ ፓꬃናዉ ኮዬዶ፤ ሽን ፓጻናዉ ዳንዳይቤና። አነ አ አግ ባሺደ፥ ኑ ቢታ ቢታ ስሜቶ። አያዉ ጎፐ፥ አ ፕርዳይ ሃኪደ፥ ሳሉዋ ጋኬዳ፤ ቦላ ሻርያ ጋካናዉ ፑደ ꬎቄዳ’ ያጌድኖ” ያጌ። ሳፃ 18:5

10 እስራኤልያ አሳይ፥ “መꬍና ጎዳይ ኑና ሻትንꬄዳ! አነ ጽዮነ ቢደ፥ መꬍና ጎዳይ ኑ ጾሳይ ኦꬄዳዋ አሳዉ ኦዶይተ!” ያጋና።

11 መꬍና ጎዳይ ባብሎነ ꬋይሳናዉ ቆፋ ቃቼዳ ድራዉ፥ ሜዶናቱዋ ካተቱዋ ኦላዉ ደንꬄዳ፤ መꬍና ጎዳይ ባረ ጌሻ ጎልያ ሀሉዋ ሀዋዳን ኦꬂደ ጭገታና። ሜዶናቱዋ ጋዳዋቱ ሀዋዳን ያጌድኖ፤ “ዎንዳፍያ ሌፍተ፤ ጎንዳለቱዋ ኦይቂተ! 12 ባብሎነ ቦላ ኦላ ባንድራ ደንꬅተ፤ ናግያዋንታካ ምንꬅተ! ዎችያዋንታካ ኡንቱንቱ ሳኣን ሳኣን ዎꬅተ፤ ዙጊደ ናግያ ኦላንቻቱዋካ ጊግስተ!” ያጌድኖ። አያዉ ጎፐ፥ መꬍና ጎዳይ ባብሎነን ደእያ አሳ ቦላ ሃሳዬዳዋነ ቆፔዳዋ ኦꬃና።

13 ባብሎነ፥ ኔን ዳሮ ሻፋቱነ ዳሮ ማጹ ኩሜዳ ቢታ፤ ሽን ነ ዉርሰꬃይ ጋኬዳ፤ ኔን በሰና ኦግያን ደምያ ጎአይካ ዱጼዳ። ሳፃ 17:1 14 ኡባፐ ዎልቃማ መꬍና ጎዳይ፥ “ቦሊ ቢታ ኩምያዋዳን፥ ታን አሳቱዋ ነ ቢታን ኩንꬃና፤ ኡንቱንቱካ ኔና ጾኔዳ ናሸቻ ባረንቱ ቃላ ꬎቁ ኦꬂደ፥ ነ ቦላን ጋይራና” ያጊደ ባረ ሱንꬃን ጫቄዳ።

20 ጾሳይ ሀዋዳን ያጌ፤ “ባብሎነ፥ ኔን ታ ድጅኑዋነ ታ ኦላ ሚሻ። ኔናን ጎኤታደ ታን ቢታቱዋ መንሬꬃድ፤ ካዉተꬃቱዋካ ꬋይሳድ። 21 ኔናን ጎኤታደ ፓራቱዋነ ፓራ ቶግያዋንታ፥ ፓራ ጋረቱዋነ ኡንቱንታ ላግያዋንታ መንሬꬃድ። 22 ኔናን ማጫዋነ አቱማዋ፥ ጭማነ ናናቱዋ፥ ዎዳላቱዋነ ጌላዮቱዋ መንሬꬃድ። 23 ኔናን ሄንꬃንቻነ አ ዉድያ፥ ጎሽያዋነ አ ዋꬃ ቦራቱዋ፥ ደርያ ሞድያዋንታነ ካፖቱዋ መንሬꬃድ” ያጌ።

24 መꬍና ጎዳይ ሀዋዳን ያጌ፤ “ባብሎነ አሳይነ ባብሎነን ደእያዋንቱ ጽዮነ ቦላ ኦꬄዳ ኢታ ሀሉዋ ታን ህንተ ጼልሽን ከሳና።

25 “ኔኖ፥ ባብሎነ፥ ኔን ቢታ ሳኣ ባይዝያ ዎጋ ደርያ ማላ፤ ሽን ታን መꬍና ጎዳይ ኔና ሞርካይ። ታን ታ ኩሽያ የዳደ፥ ኔና ደርያ ቦላፐ ዱገ ጎንዶርሳና፤ ሄዋፐ ጉይያን፥ ኔን ጹገቴዳ ደርያ ግዳደ አታና። 26 ላኤንꬆ ኔፐ ባሱዋን የግያ ዎይ ግምቢያዉ አክያ ሹቻይ ደኤና፤ ኔን መꬍናዉካ አይነ ባይናዋ ግዳናዋ። ታን መꬍና ጎዳይ ሀዋ ኦዳይ።

27 “ባብሎነ ቦላ ኦላ ባንድራ ደንꬅተ፤ አሳ ኡባ ግዶን ማላካታ ፑንተ። አ ኦላናዉ አሳ ኡባ ጊግስተ፤ አራራተ፥ ሚናነ አሽካናዛ ካዉተꬃቱዋ ጼስተ። ኦላ ጋዳዋካ ሱንꬅተ፤ ቦልያ ኬሻ ዳሮ ፓራቱዋካ አህተ። 28 ባብሎነ ኦላናዉ ካዉተꬃቱዋ ኡባ ጊግስተ፤ ሜዶና ካተቱዋ፥ ኡንቱንቱ ካፖቱዋ፥ ደርያ ሞድያዋንታነ ኡንቱንቱ ሞድያ ቢታ አሳ ኡባ ደንꬅተ።

29 “ባብሎነ ኦንነ ደኤና ባዞ ኦꬃናዉ መꬍና ጎዳይ ሀልቼዳ ሀልቹዋ ፖልያ ድራዉ፥ ቢታይ ኡባይ ኮኮረነ ፖርቃካቴ። 30 ባብሎነ ኦላንቻቱ ኦላ ኦለትያዋ አጌድኖ፤ ባረንቱ ጌሱዋን ኡት ባሼድኖ። ኡንቱንቱ ዎልቃይ እጽና፤ ኡንቱንቱ ማጫ አሳ ማላ ግዴድኖ። ኡንቱንቱ ጎላቱካ ጹገቴድኖ፤ ኡንቱንቱ ካታማ ዩሹዋ ግምቢያ ፐንገቱዋ ኩልቡካ መኤድኖ። 31 ሀ ጋጻፐ ህን ጋጻ ጋካናዉ፥ ካታማይ ሞርክያን ኦይቀቴዳዋ ባብሎነ ካትያዉ ኦዳናዉ፥ ዎጽያዌ ዎጽያዋ ካሊደ፥ ኪተቴዳዌካ ኪተቴዳዋ ካሊደ ቢኖ። 32 ቃይ ሻፋና ፕንያ ሳአቱ ኦይቀቴዳዋ፥ ሻፋ ዩሹዋን ደእያ ዎራይ ጹገቴዳዋነ ኦላንቻቱ ዳጋሜዳዋ ኡንቱንቱ ካትያዉ ኦዳናዉ ቢኖ” ያጌ።

33 ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ “ባብሎነ ቢታይ ካꬃ ቆጽያ ኡዱማ ማላ፤ ጉꬃ ዎድያፐ ጉይያን፥ እ ጫከትያ ዎዲ ያና” ያጌ።

34 ባብሎነ ካቲ ናቡካዳናጾር ኑና ዉርሲደ ሜዳ፤ ኑ ካታማካ መላ ደእያ ኦቱዋ ማላ ከሴዳ። ዳዊ ምትያዋዳን፥ አ ምቴዳ፤ ማልኦባ ሚደ ኩንꬄዳዋዳን፥ እ ኑ አቁዋን ባረ ጋንጅያ ኩንꬄዳ፤ ያቲደ አቴዳዋ ሙጪደ ጩቼዳ። 35 ሄዋ ድራዉ፥ ጽዮነ አሳይ፥ “ባብሎነ ኑ ቦላነ ኑ አሳ ቦላ ኦꬄዳ ኢታባይ ኡባይ አ ቦላ ስሞ።” የሩሳላመ አሳይ፥ “ኑ ሱꬃ አጩ ባብሎነን ደእያ አሳ አቾ” ያጌ።

36 ሄዋ ድራዉ፥ መꬍና ጎዳይ የሩሳላመ አሳዉ ሀዋዳን ያጌ፤ “ነ ድራዉ ታን ሞተታና፤ ነ ሀሉዋካ ታን ከሳና። ታን ባብሎነ ሃꬃ መልሳና፤ አ ፑልቶቱዋካ ቶይሳና። 37 ባብሎነ ሹቻ ኬላነ ዎራካናቱ ደእያ ጌሶ ግዳናዋ። ቃይ አ በኤዳ ኡባይ ዳጋማናነ፥ ‘ፖራ!’ ጋና። አን እት አሳይነ ላኤንꬆ ደኤና። 38 ባብሎነ አሳይ ኡባይ ጋሙዋዳን ጉዳና፤ ቃይ ጋሙዋ ማራዳን ዳራና። 39 ኡንቱንቶ ቦላይ ሆእያ ዎደ፥ ታን ኡንቱንቶ ናሸችያ ኡሻ ግብራ ጊግሳና፤ ኡንቱንቱ ሄዋፐ ኡሺደ፥ ባረንታ ዶጋና ጋካናዉ፥ ታን ኡንቱንታ ማꬆያና። ኡንቱንቱ ላኤንꬆ ደንደናዳን፥ መꬍናዉ ገምእሻና። ታን መꬍና ጎዳይ ሀዋ ኦዳይ። 40 ሹካናዉ አፍያ ዶርሳቱዋዳን፥ ዶርሳ ኦርገቱዋዳንነ ዴሻ ኦርገቱዋዳን፥ ታን ኡንቱንታ ሹካዉ አፋና።

41 “አሳይ ኡባይ ሳቢያ ባብሎነ ኦይቀቴዳ! ባብሎነ ካዉተꬃቱዋ ኡባ ግዶን አይባ ዳጋንꬅያባ ግዴዴ! 42 ባብሎነ ሞርከቱ አባ ቤታይ ደንድያዋዳን ደንዲደ፥ ካታማን ኤሌድኖ። 43 አ ካታማቱ ኮለቲደ፥ ዳጋንꬅያባ ግዴድኖ፤ እራይ ቡከና ባዞ ቢታ፥ አይ አሳይነ ደኤና ቢታነ አሳ ናአይ ግዱዋና አና ቢታ ግዴድኖ። 44 ቤላ ግያ ባብሎነ ጾሳ ታን ሙራና፤ እ ምቴዳዋካ ታን አ ኡሉዋፐ ከስሳና። ሄዋፐ ጉይያን፥ ካዉተꬃቱ አኮ ዙልያዋ አጋና፤ ባብሎነ ግምቢካ ኩንዳና።

45 “ታ አሳዉ፥ አ ግዶፐ ከስተ! ህንተ ኡባይካ መꬍና ጎዳ ሀንቁዋ ሱሉዋፐ ህንተ ሁጲያ ሁጲያ አሽተ! 46 ቢታን ኦደትያ ኦዱዋ ስስያ ዎደ፥ ህርጎፕተነ ያዮፕተ! ላይꬃን ላይꬃን ኦዱ ኦዱዋ ካል ካሊደ ያና። ሄ ዎደ ካቲ ካትያ ቦላ ደንድያ ማካላ ኦዱ ቢታን ስሰታና።

47 “ሄዋ ድራዉ፥ ታን ባብሎነ ኤቃ ምስለቱዋ ሙርያ ጋላሳቱ ያና። ሄ ቢታይ ኡባይካ ዬላታና፤ ሲፈቴዳዋንቱ ኡባይ ካታማ ግዶን ኩንዳና። 48 ሁጲሳ ባጋፐ ይያ ባይዝያዋንቱ ኩሽያን ባብሎነ ኦይቀትያ ድራዉ፥ ሳሉነ ሳአይ ቃይ ኡንቱንቱ ግዶን ደእያ ኡባባይ እልላና። ታን መꬍና ጎዳይ ሀዋ ኦዳይ። ሳፃ 18:20 49 ባብሎነ እስራኤልያ አሳነ ሀራ ቢታን ደእያ አሳ ኡባ ዎꬌዳዋዳን፥ ባብሎነ አሳይካ ሀይቃናዉ ኮሼ። ሳፃ 18:24

50 “ታ አሳዉ፥ ህንተ ኦላፐ ከስ አኬድታ። ሄዋ ድራዉ፥ ቢተ! ሀዋን ኤቆፕተ! ህንተ ደእያ ሃኮ ቢታንካ ታና መꬍና ጎዳ ሀሳይተ፤ የሩሳላመካ ቆፕተ። 51 ህንተ፥ ‘ኑን ቦረቴዳ ድራዉ ካዉሼዶ፤ አላጋቱ መꬍና ጎዳ ጎልያን ጌሻ ሳአቱዋ ገሌዳ ድራዉ፥ ኑን ዬላ ማዬዶ’ ያጌድታ።

52 “ሽን ታን መꬍና ጎዳይ ባብሎነ ኤቃቱዋ ሙርያ ዎዲ ያና። ደሸቴዳዋንቱ ቢታ ኡባን ኦላና። 53 ባብሎነ ሳሉዋ ፑደ ከሲደ፥ ያን ጌሱዋ መꬋናዉ ዳንዳይንቶነ፥ ያ ጋካናዉ ከሲደ፥ አ ያን ባይዝያ አሳ ታን ኪታና። ታን መꬍና ጎዳይ ሀዋ ኦዳይ።

54 “ባብሎነፐ አሳ ዋሱዋ ኮሻይ፥ ባብሎነ ቢታፐ ዎልቃማ ባየꬃ ኮሹንቻይ ስሰታና! 55 አያዉ ጎፐ፥ መꬍና ጎዳይ ባብሎነ ባይዛና፤ አ ዎልቃማ ኮሻካ ጮኡ ኦꬃና። አባ ቤታዳን ጉምያ ሞርከቱ ዎራጂደ ጋርማማና። 56 ባይዝያዋንቱ ባብሎነ ቦላ ያና፤ አ ኦላንቻቱ ኦይቀታና፤ ኡንቱንቱ ዎንዳፊካ መአና። ታን መꬍና ጎዳይ ሀሉዋ ከስያ ጾሳ ግድያ ድራዉ፥ ኡንቱንቱ ኦሱዋዳን ታን ኡንቱንቶ ዛራና። 57 ታን አ ካፖቱዋ፥ አ አꬌዳ ኤራንቻቱዋ፥ አ ደርያ ሞድያዋንታ፥ አ ኦላ ጋዳዋቱዋነ አ ኦላንቻቱዋ ማꬆያና፤ ኡንቱንቱ ላኤንꬆ ደንደናዳን፥ መꬍናዉ ገምእሻና። ታን ካቲ፥ ኡባፐ ዎልቃማ መꬍና ጎዳ ጌተትያዌ ሀዋ ኦዳይ” ያጌ።

58 ኡባፐ ዎልቃማ መꬍና ጎዳይ ሀዋዳን ያጌ፤ “ኦርድያን ግምበቴዳ ባብሎነ ዩሹዋ ግምቢ ሳኣን ዋላከታና፤ አ አዱሳ ፐንገቱካ ታማን ጹገታና። አሳይ ኦꬄዳዌ ኡባይ መላ፤ ካዉተꬃቱካ ታማይ ማናባዉ ጮ ዳቡሪኖ” ያጌ።

59 ማህሴያ ናኣ ኔርያ ናአይ ሳራይ ካትያ ሰደቅያሳዉ ኦꬅያ ካፑዋ። ሰደቅያስ ይሁዳን ካተቴዳ ኦይደንꬆ ላይꬅ፥ ሳራይ አናና ባብሎነ ብያ ዎደ ኤርማስ ሳራያ ቦላ ኪታ የዴዳ። 60 ባብሎነ ቦላን ጋካናዉ ደእያ ኢታባ ኡባነ ባብሎነ ጼልያ ሀራባ ኡባ ኤርማስ እት ጻꬃ ማጻፋን ጻፌዳ። 61 ሳራያ ሀዋዳን ያጌዳ፤ “ኔን ባብሎነ ቢታ ጋኬዳ ዎደ፥ ነ ቃላ ꬎቁ ኦꬃደ፥ አሳዉ ሀ ማጻፋ ናባባ። 62 ቃይ ሀዋዳን ያጋደ ዎሳ፤ ‘አቤት መꬍና ጎዳዉ፥ ኔን፥ “ታን ሀ ሳኣ ባይዛና፤ ሀ ሳኣን ፓጻ ቃጽያ መት፥ አሳይካ፥ መሂካ ደኤና፤ ሀ ሳአይ መꬍናዉ ባዞ ግዳናዋ” ያጋዳ’ ያጋ። 63 ሀ ጻꬃ ማጻፋ ናባባደ ዉርሴዳዋፐ ጉይያን፥ ሹቻ ሄ ማጻፋና ጋꬃ ቃቻደ፥ ኤፍራጺሳ ሻፋን ኦላ። ሳፃ 18:21 64 ‘ታን ጾሳይ አ ቦላን አህያ ኢታ ጋሱዋን፥ ባብሎነካ ሀዋዳን ላኤንꬆ ደንደናዳን ሙከታና’ ያጋይ ያጋ” ያጌዳ።

ኤርማስ ሃሳዬዳ ቃላይ ሀዋን ፖለቴዳ።