52
የሩሳላመ ኩንደꬃባዉ ኪተቴዳ ጉጃ ኦዱዋ
(52፤ 2 ካታ. 24:18—25:7፤ ኤር. 39:1-10)
1 ሰደቅያስ ካተትያ ዎደ፥ ላይꬃይ አዉ ላታማነ እታ፤ የሩሳላመን እ ታማነ እት ላይꬃ ካተቴዳ። አ አት ሱንꬃይ ሀሙጻሎ፤ አ ሊብና ካታማን ደእያ ኤርማሳ ናቶ። 2 እዮአቄም ኦꬄዳዋዳን፥ ሰደቅያስካ መꬍና ጎዳ ስንꬃን ኢታባ ኦꬄዳ። 3 መꬍና ጎዳይ የሩሳላመ አሳ ቦላነ ይሁዳ አሳ ቦላ ሀንቀቴዳ ድራዉ፥ ዉርሰꬃን ኡንቱንታ ባረ ስንꬃፐ ድጌዳ።
ሰደቅያስ ባብሎነ ካትያ ቦላ ማካሊደ ደንዴ። 4 ሰደቅያስ ካተቴዳ ኡዱፑንꬃ ላይꬅ፥ ታማንꬃ አግናን፥ ታማንꬃ ጋላስ ባብሎነ ካቲ ናቡካዳናጾር ባረ ኦላንቻቱዋ ኡባ አክ ዪደ፥ የሩሳላመ ዶዴዳ። ኡንቱንቱ አ ዩሹዋንካ ቢታ ኬላ ኬሌድኖ። ህዝ. 24:2 5 ሰደቅያስ ካተቴዳ ታማነ እተንꬃ ላይꬃ ጋካናዉ፥ የሩሳላመ ካታማይ ዶደቲደ ጋምኤዳ።
6 ሄዋ ጋሱዋን ቢታን ኮሻይ ሱልና፥ ሄ ላይꬅ ኦይደንꬆ አግናን፥ ኡዱፑንꬃ ጋላሳን፥ ሄ ቢታ አሳዉ ምያባይ ꬋዬዳ። 7 ያን ደእሽን ካታማ ዩሹዋ ግምቢ እት ባጋና ኮለቴዳ። ባብሎነ አሳይ ካታማ ዩይ አꬊደ ናጎፐካ፥ ይሁዳ ካትያ ኦላንቻቱ ሙለ ኡባይ ቃማ ካትያ አታክልትያ ሳኣ አፍያ ኦግያ ኦይቂደ፥ ላኡ ድርሳ ግምበቱዋ እትፐ ጋꬅያ ፐንግያና ከሲደ ባቃቴድኖ። ኡንቱንቱ ዮርዳኖሳ ድልቡዋኮ ስሚደ ቤድኖ። ህዝ. 33:21 8 ሽን ባብሎነ ኦላንቻቱ ካትያ ሰደቅያሳ የደርሲደ፥ እያርኮ ደምባ ጋꬂደ ኦይቄድኖ። አ ኦላንቻቱ ኡባይ አፐ ሻከቲደ ላለቴድኖ።
9 ሄዋፐ ጉይያን፥ ኡንቱንቱ አ ሀማታ ቢታን፥ ርብላ ካታማን ደእያ ባብሎነ ካትያኮ አፌድኖ። ያን ናቡካዳናጾር ሰደቅያሳ ቦላ ፕርዴዳ። 10 ቃይ ሰደቅያሳ ናናቱዋ ሰደቅያስ ጼልሽን፥ ባብሎነ ካቲ ዎꬌዳ። ይሁዳ ካፖቱዋ ኡባካ ኡንቱንቱ ያን ርብላ ካታማን ዎꬌድኖ። 11 ሄዋፐ ጉይያን፥ ሰደቅያሳ አይፈቱዋ ዎጭ ከሲደ፥ ሳንሳላታን አ ቃቺደ፥ ባብሎነ ቢታ አኪደ አፌድኖ። እ ሀይቃና ጋካናዉ፥ ያን ቃሾ ጎልያን አ ዎꬄድኖ።ህዝ. 12:13
ጌሻ ጎሊ ኮለቴዳ
(2 ካታ. 25:8-17)
12 ናቡካዳናጾር ባብሎነን ካተቴዳ ታማነ ኡዱፑንꬃ ላይꬃን፥ እቼሸንꬆ አግናን፥ ታማንꬆ ጋላሳን፥ ካትያ ኦሳንቻቱዋፐ እቱ፥ ካትያ ናግያዋንቱ ካፑ ናቡዛራዳን የሩሳላመ ገሌዳ። 13 መꬍና ጎዳ ጌሻ ጎልያ፥ ካትያ ጎልያነ የሩሳላመን ደእያ ኬꬃቱዋ ኡባ ታማን ጹጌዳ፤ ዎልቃማ ጎልያ ግያ ጎልያ ኡባ ጹጌዳ። 1 ካታ. 9:8 14 ባብሎነ ኦላንቻቱ ኡባይ ካትያ ናግያዋንቱ ካፑዋ አዛዙዋን፥ የሩሳላመ ካታማ ዩሹዋን ደእያ ድርሳ ግምቢያ ኡባ ቆሌድኖ። 15 ናቡዛራዳን አማሬዳ ህዬሳቱዋ፥ ካታማን አቴዳ አሳቱዋነ ካዲደ ባብሎነ ኦላንቻቱዋን ጋከቴዳ አሳቱዋ ኩሽያ ሂላ ኤርያ አሳቱዋናካ ጉጂደ፥ ኦሞዶ አፌዳ። 16 ሽን ናቡዛራዳን ህዬሳቱዋፐ አማሬዳዋንታ ዎይንያ ቱራ ቶካናዳንነ ጋድያ ጎሻናዳን፥ ይሁዳን አሼዳ።
17 ባብሎነ አሳቱ መꬍና ጎዳ ጌሻ ጎልያ ስንꬃን ደእያ ናሃስያፐ መꬌዳ ቱሳቱዋ፥ ሚሻቱዋ ዎꬅያ ጋረቱዋነ አኮ-ከርያ መንሬꬄድኖ፤ ናስያ ኡባ ባብሎነ አፌድኖ። 1 ካታ. 7:15-47 18 ሄዋዳንካ፥ ቃይ ከረቱዋ፥ አካፋቱዋ፥ ጾምፕያ ሻሉዋ ጼራ ፕትያባቱዋ፥ ኩይጻሮቱዋ፥ እጻና ሳነቱዋነ ያርሽያ ዎደ ጎኤትያ ናሃስያ ሚሻቱዋ ኡባ አክ አፌድኖ። 19 ካትያ ናግያዋንቱ ካፑ ናቡዛራዳን ቃይካ ዎርቃፐነ ብራፐ ኦሰቴዳ ድስተቱዋ፥ ታማ አክያ ሚሻቱዋ፥ ኩይጻሮቱዋ፥ ከረቱዋ፥ ጾምፕያ ዎꬅያ ባላቱዋ፥ እጻና ሳነቱዋነ ኡሻ ያርሾ ጎኤትያ ኦቶቱዋ አክ ቤዳ። 20 ካቲ ሶሎሞን መꬍና ጎዳ ጌሻ ጎልያን ኦሰትያባቶ መꬌዳ ላኡ ቱሳቱ፥ አባ ጋጳቲ፥ አፐ ጋርሳና ደእያ ታማነ ላኡ ኮሩማቱዋ ምስለቱነ ሚሻቱዋ ዎꬅያ ጋረቱ መቴዳ ናሃስያ ብራታቱ ሚዛናን ልካናዉ ዳንዳየተናዋ ኬሻ ዳራ። 21 ላኡ ቱሳቱካ እት ማላ ግዲደ፥ እቱ እቱ ታማነ ሆስፑን ዋꬋ አዱሳ። ኡንቱንቱ ጼሳ ዩሹ ታማነ ላኡ ዋꬋ። ኡንቱንቶ ግዱ ኮፋ ግዲደ፥ ብራታይ ኦይዱ ብራꬍያ ኬሻ ኦርዶ። 22 ላኡ ቱሳቱዋ ሁጲያንካ ናሃስያፐ ኦሰቴዳ ጉምቦቱ ደኢኖ። እት ጉምቡዋ ጌሳይ እቼሹ ዋꬋ ግዲደ፥ ዩሹ ግትያ ምስልያንነ ሮማንያ ቴራ ምስልያን አሌቀት ኡቴዳ። ላኤንꬆ ጉምቡካ አ ማላ። 23 ጉምቦቶ ምይያን ምይያን ደእያ ሮማነቱዋ ምስለቱ ኡዱፑን ታማነ ኡሱፑና፤ ዩሹዋን ደእያ ግትያ ማላትያ ምስለቱዋፐ ቦላ ባጋና ደእያ ሮማንያ ምስለቱ ኡባና እት ጼታ።
ይሁዳ አሳይ ኦሞደቲደ ባብሎነ ቤዳ
(2 ካታ. 25:18-21፣ 27-30)
24 ካትያ ናግያዋንቱ ካፑ ናቡዛራዳን ቄስያ ኡባቱዋ ካፑዋ ሳራያ፥ አፐ ካልያ ቄስያ ጻፋንያነ ፐንግያ ናግያ ሀራ ሄዙ አሳቱዋ ኦይቄዳ። 25 ቃይ ሄ ዎደ ጋካናዉ፥ ካታማን ደእያ አሳፐ ኦላ ጋዳዋ፥ ካትያ ዞርያዋንቱፐ ላፑን አሳቱዋ አፌዳ። ኦላ ጋዳዋ ጻፍያ፥ ሄዌነ ኦላንቻቱዋ አሳ ግዶፐ ቆሪደ ከስያዋነ ሀራ ኡሱፑን ታሙ ዎልቃማ አሳቱዋ አፌዳ። 26 ካፑ ናቡዛራዳን ኡንቱንታ ኡባ አኪደ፥ ባብሎነ ካትያኮ፥ ርብላ ካታማ አፌዳ። 27 ያን ርብላ ካታማን፥ ሀማታ ቢታን ባብሎነ ካቲ ኡንቱንታ ኡባ ዎꬌዳ። ሄዋዳን ሀኒደ፥ ይሁዳ አሳይ ባረ ቢታፐ ደንዲደ፥ ኦሞዶ ቤዳ።
28 ናቡካዳናጾር ካተቴዳ ላፑንꬃ ላይꬃን ሄዙ ሻአነ ላታማነ ሄዙ አሳ ይሁዳፐ ኦሞዴዳ። 29 ቃይ ታማነ ሆስፑንꬃ ላይꬃን ሆስፑን ጼታነ ሀታማነ ላኡ አሳ የሩሳላመፐ ኦሞዴዳ። 30 ናቡካዳናጾር ካተቴዳ ላታማነ ሄዘንꬆ ላይꬃን ካትያ ናግያዋንቱ ካፑ ናቡዛራዳን ላፑን ጼታነ ኦይታማነ እቼሹ አሳ ኦሞዴዳ። አሳ ፓይዱ ኡባና ኦይዱ ሻአነ ኡሱፑን ጼታ።
31 ኤዊል-ማሮዳክ ካተቴዳ ላይꬅ ይሁዳ ካትያ ዮኣኪና ቦንቺደ፥ ቃሹዋፐ ብሌዳ። ሄዌ ሀኔዳዌ ዮኣኪን ኦሞደት ቃሸቲደ ቤዳ ሀታማነ ላፑንꬃ ላይꬅ፥ ታማነ ላኤንꬆ አግናን፥ ላታማነ እቼሸንꬆ ጋላሳና። 32 ኤዊል-ማሮዳክ ዮአኪናና ማልኦ ቃላ ሃሳዪደ፥ ባብሎነን ኦሞዱዋን ደእያ ሀራ ካተቱዋ ኡባፐ አꬂደ፥ አ ቦንቼዳ። 33 ሄዋ ድራዉ፥ ዮኣኪን ቃሾ ጎልያን ማዬዳ ማዩዋ ላሜዳ። እ አቴዳ ባረ ደኡዋ ላይꬃ ኡባን ካትያ ማዳፐ ሜዳ። 34 ዮኣኪን ሀይቃና ጋካናዉ፥ ሀች ሀች አዉ ኮሽያባ ኡባ ባብሎነ ካቲ እሜዳ።