1 ሄዘንꬆ ጋላስ ጋሊላ ጋድያን ቃና ጌተትያ ካታማን ቡላቻይ ቡላቼቴዳ፤ የሱሳ ዳያ ሄ ቡላቻን ደአዉ። 2 የሱስካ ባረና ካልያዋንቱና እትፐ ሄ ቡላቻ ጼሰቴዳ። 3 ዎይንያ ኡሻይ ዉር ድግና፥ የሱሳ ዳያ አ፥ “ኡንቱንቶ ዎይንያ ኡሻይ ዉር ድጌዳ” ያጋ ኦቻዱ።

4 የሱስ ዛሪደ፥ “ታ ዳዬ፥ ሀዌ ታ ኦሱዋ ግድያ ድራዉ፥ ነ ያያና ኮሸና። ታ ዎዲ *ታ ዎዲ፦ ሀዋ ጉሳይ የሱሳ ቱሙ ቦንቹ በኤታናዉ በሴነ እ ጾሳ ናኣ ግዶዌ ኤረታናዉ በሴ ግያዋ። ብሮ ጋክቤና” ያጌዳ።

5 የሱሳ ዳያ ኪተትያዋንቶ፥ “እ ህንተንቶ ኦድያዋ አያ ግዶፐነ ኦꬅተ” ያጋ ኦዳዱ።

6 አይሁዳቱ ካሰ ኦꬅያ ዶያዳን፥ ሜቻ ዎጋዉ እቱ እቱ ጼቱ ጻራሙስያ ኦይቂያ ኡሱፑን ሹቻ ባꬃቱ ሄዋን ደኢኖ። 7 የሱስ ኪተትያዋንታ፥ “ባꬃቱዋን ሃꬃ ኩንꬅተ” ያጌዳ፤ ጌተቶዋዳንካ ኡንቱንቱ ባꬃቱዋን ዶና ጋካናዉ ሃꬃ ኩንꬄድኖ። 8 የሱስ ኡንቱንታ፥ “ሀእ ዱቂደ፥ ቡላቻ ካፖ እምተ” ያጌዳ፤ ኡንቱንቱ አዉ አፊደ እሜድኖ።

9 ቡላቻ ካፑ ዎይንያ ኡሻ ግዴዳ ሃꬃ ጋንጽ ጼሊደ፥ ሀቃፐ ዬደንቶ ኤርቤና፤ ሽን ሃꬃ ኩንꬄዳ ኦሳንቻቱ ኤሪኖ። ቡላቻ ካፑ ማቻቶ አክያዋ ጼሲደ፥ 10 “ኦንነ አይፈ ግዴዳ ዎይንያ ኡሻ እማꬃ አሳ ካሰቲደ ኡሼ፤ ያቲደ አሳይ ዳርስ ኡሼዳዋፐ ጉይያን፥ ቅራርያ ኡሼ። ሽን ኔን አይፈ ግዴዳ ዎይንያ ኡሻ ሀኖ ጋካናዉ ናጋዳ!” ያጌዳ።

11 የሱስ ባረ ኦꬄዳ ዎልቃማ ማላታቱዋፐ ሀዋ ኮይሩዋ ጋሊላ ጋድያን ቃና ጌተትያ ሄራን ኦꬄዳ፤ ሄዋን ባረ ቦንቹዋ እ ቆንጭስና፥ አ ካልያዋንቱ አን አማኔድኖ።

12 ሄዋፐ ጉይያን፥ የሱስ ባረ ዳይና፥ ባረ እሻቱዋናነ ባረና ካልያዋንቱና እትፐ ቅፍርናሆማ ጌተትያ ካታማ ቢደ አማሬዳ ጋላሳ ታኬድኖ።

13 አይሁዳቱ ቦንችያ ፓስጋ ባላ ጋላሳይ ማታትና፥ የሱስ የሩሳላመ ቤዳ። 14 ጌሻ ጎልያ ግቢያን ሚዛ፥ ዶርሳነ ዶጎማቱዋ ዛልእያ አሳ ደሜዳ፤ ቃይ ሀራቱ ባረንቱ ኦይድያን ኡቲደ፥ ሚሻ ላምያዋንታ ደሜዳ። 15 እ ጎላ ጅራፍያ ዶቂደ፥ አሳ ኡባ ዶርሳናነ ምያና ጌሻ ጎልያ ግቢያፐ ካረዉ ከሲደ የደርሴዳ። ሚሻ ላምያዋንቱ ኦይድያካ አꬅ የጊደ፥ ኡንቱንቱ ሚሻ ላሌዳ። 16 ዶጎሙዋ ዛልእያዋንታ እ፥ “ሀ ዶጎማቱዋ ሀዋፐ ከስተ፤ ታ አቡ ጎልያ ገያ ኦꬆፕተ!” ያጌዳ።

17 የሱሳ ካልያዋንቱ ጾሳ ማጻፋን፥ “ታን ነ ጎለዉ ሴለትያ ሴላይ ታና ታማዳን ጉዴ” ጌተቲደ ጻፈቴዳዋ ሀሳዬድኖ። ማዝ. 69:9

18 ሄዋፐ ጉየ፥ አይሁደ አሳ አይስያዋንቱ ዛሪደ፥ “ነዉ ሀዋ ኦꬃናዉ ዳንዳይያ ማታይ ደእያዋ ኑና አያ ማላታ በሳኒ?” ያጌድኖ።

19 የሱስ፥ “ሀ ጌሻ ጎልያ ኮልተ፤ ታን ሄዙ ጋላሳን ዛራደ ኬጻና” ያጌዳ።

20 ቃይካ አይሁደ አሳ አይስያዋንቱ፥ “ሀ ጌሻ ጎልያ ኬጻናዉ ኦይታማነ ኡሱፑን ላይꬃ አኬዳ፤ ሽን ኔን ሄዙ ጋላሳን ኬጻኒ?” ያጌድኖ።

21 ሽን እ ሃሳዬዳ ጌሻ ጎሊ ባረ አሳተꬃባ። 22 ሄዋ ድራዉ፥ የሱስ ሀይቁዋፐ ደንዴዳዋፐ ጉይያን፥ የሱሳ ካልያዋንቱ እ ሄዋ ጌዳዋ ሀሳዬድኖ። ቃይ ኡንቱንቱ ጾሳ ማጻፋይ ጌዳዋነ የሱስ ሃሳዬዳዋ አማኔድኖ።

23 ፓስጋ ባላ ቦንችያ ዎደ፥ የሱስ የሩሳላመን ደእሽን፥ እ ኦꬄዳ ማላታ በኢደ፥ ጮራ አሳይ አ አማኔድኖ። 24 ሽን የሱስ አሳ ኡባ ኤርያ ድራዉ፥ ሄዋንታ አማንቤና። 25 አሳባ ኦንነ አዉ ማርካታና ማላ ኮይቤና፤ አያዉ ጎፐ፥ አሳ ዎዛናን አዬ ደእንቶ፥ እ ባረ ሁጰዉ ኤርያ ድራሳ።