1 ፓርሳዋቱዋፐ ግዴዳ ካፑዋ ንቆድሞሳ ጌተትያ እት ብታኒ ደኤ። 2 ንቆድሞስ ቃማ የሱሳኮ ዪደ፥ “ታማርስያዎ፥ ኔን ኑና ታማርሳና ማላ ጾሳይ ኪቴዳ ግድያዋ ኑን ኤሬቶ፤ አያዉ ጎፐ፥ ጾሳይ አናና ደእያ አሳፐ አትን፥ ሀ ኔን ኦꬅያ ዎልቃማ ማላታቱዋ ኦꬃናዉ ዳንዳይያ አሳይ ባዋ” ያጌዳ።

3 የሱስ ዛሪደ፥ “ታን ነዉ ቱሙዋ ኦዳይ፤ አሳይ ላኤንꬁዋ የለታና ꬋዮፐ፥ ጾሳ ካዉተꬃ በአናዉ ዳንዳየና” ያጌዳ።

4 ንቆድሞስ፥ “ጭማ አሳይ ዋኒደ ላኤንꬁዋ የለታናዉ ዳንዳዪ? ባረ ዳይ ኡሉዋ ስም ገሊደ፥ ላኤንꬁዋ የለታናዉ አሳይ ዳንዳዪ?” ያጌዳ።

5 የሱስ ዛሪደ፥ “ታን ነዉ ቱሙዋ ኦዳይ፤ አሳይ ሃꬃፐነ ጌሻ አያናፐ የለታና ꬋዮፐ፥ ጾሳ ካዉተꬃ ገላናዉ ዳንዳየና። 6 አሳይ አሹዋን አሳፐ የለቴ፤ ሽን አሳይ አያናን ጌሻ አያናፐ የለቴ፤ 7 ‘ህንተንቱ ላኤንꬁዋ የለታናዉ በሴ’ ጋደ ታን ኦዴዳ ድራዉ፥ ማላለቶፓ። 8 ጫርኩ ባረ ኮዬዳሳ ጫርኬ። ኔን አ ኮሹንቻ ስሳሳ፤ ሽን እ ሀቃፐ ይንቶ ዎይ ሀቃ ብንቶ ኤራካ። ጌሻ አያናፐ የለቴዳ ኡባይ ሄዋ ማላ” ያጌዳ።

9 ንቆድሞስ፥ “ሀዌ ዋኒደ ሀናናዉ ዳንዳዪ?” ያጊደ ኦቼዳ።

10 የሱስ ዛሪደ፥ “ኔን እስራኤላቱዋ ታማርስያዋ ግዳደ ሀዋ ኤርኪ? 11 ታን ነዉ ቱሙዋ ኦዳይ፤ ኑን ኤርያዋ ሃሳዬቶነ በኤዳዋ ማርካቴቶ፤ ሽን ኑን ማርካትያዋ ህንተንቱ አክክታ። 12 ታን ህንተንቶ ሳኣባ ኦድና፥ አማነናዋንታ ግዶፐ፥ ሳሉዋባ ኦድና ዋን አማናንቴ? 13 ሳሉዋፐ ዎꬌዳ ታፐ አትን፥ ሳሉዋ ከሴዳዌ ኦንነ ባዋ፤ ሳሉዋን ደእያ አሳ ናአይ ታና።

14-15 “ሙሴ ዎራን ጻንቂማሉዋ ሾሻ ሱሌዳዋዳን፥ ታና አማኔዳ ኡባይ መꬍና ደኡዋ አካና ማላ፥ ታን አሳ ናአይ ማስቃልያ ቦላ ፑደ ደንዳና በሴ። ፓይ. 21:9

16 “ጾሳ ናኣ አማንያ ኡባይ መꬍና ደኡዋ አካናፐ አትን፥ ꬋየና ማላ፥ ጾሳይ ሀ አላምያ አሳ ሎይꬅ ሲቄዳ ድራዉ፥ ባረ መጽ እት ናኣ እሜዳ። 17 አያዉ ጎፐ፥ ጾሳይ ባረ ናኣ ሀ አላምያ አሳ ፕርዳናዉ ኪትቤና፤ ሽን ኡንቱንታ አ ባጋና አሻናዉ ኪቴዳ።

18 “አ ናኣ አማንያ ኦንነ ፕርደተና፤ ሽን ናኣን አማነና ኦንነ፥ ጾሳ ናኣ እቱዋ አማንቤና ድራዉ፥ ሀእካ ፕርደት ኡቴዳ። 19 አሳ ቦላ ይያ ፕርዳይ ሀዋ: ፖኡ ሀ አላምያ ዬዳ፤ ሽን አሳ ኪታይ ኢታ ግድያ ድራዉ፥ ፖኡዋፐ አꬂደ፥ ꬉማ ሲቄዳ። 20 ኢታባ ኦꬅያ ኦንነ ፖኡዋ እጼ፤ አያዉ ጎፐ፥ ባረ ኪታይ ቆንጨና ማላ፥ ፖኡዋኮ ሺቀና። 21 ሽን ቱሙዋ ኦꬅያ ኦንነ ጾሳይ አዛዜዳዋዳን፥ እ ኦꬄዳዋ ፖኡ ቆንጭሳና ማላ፥ ፖኡዋኮ ሺቄ” ያጌዳ።

22 ሄዋፐ ጉይያን፥ የሱስነ አ ካልያዋንቱ ይሁዳ ጋድያ ቤድኖ፤ የሱስ ሄ ጋድያን ኡንቱንቱና አማሬዳ ዎድያ ኡቲደ፥ አሳ ጻማቂደ ደኤ።

23 ቃይ ዮሃንስ ሳሌመ ማታን ደእያ ሄኖና ግያ ሳን ዎጋ ሃꬃይ ደእያ ድራዉ፥ አሳይ አኮ ዪና ጻማቄ። 24 ሄዌ ሀኔዳዌ ዮሃንስ ቃሸታናፐ ካሰና።

25 ሄዋፐ ጉይያን፥ ዮሃንሳ ካልያዋንቱና አማሬዳ አይሁዳቱዋ ሜቻ ዎጋባ *አይሁዳቱዋ ሜቻ ዎጋባ፦ ሀዋ ጉሳይ አይሁዳቱ ባረንቱ ጎይናና ጋꬃናዉ ኦꬅያ ዱማ ዱማ ባረንታ ሜቻባይነ ባረንቱ ሳንያ ሜጭያ ዎጋቱ ደእያዋ በሴ። ፓሉመቴድኖ። 26 ኡንቱንቱ ዮሃንሳኮ ቢደ፥ “ታማርስያዎ፥ ዮርዳኖሳ ሻፋፐ ሄፍንꬃን ኔናና ደእያዌ፥ ኔን አባ ማርካቶዌ፥ በአ ሀእ ጻማቄ፤ አሳይ ኡባይካ አኮ ቤ” ያጌድኖ።

27 ዮሃንስ ዛሪደ፥ “ጾሳይ እማና ꬋዮፐ፥ አሳይ አይነ አካናዉ ዳንዳየና። 28 ‘ታን ክርስቶሳ ግድከ፤ ሽን ታን አፐ ስንꬃዉ ኪተታድ’ ጌዳዎ ህንተ ህንተንቱ ሁጰዉ ማርካ። 29 ምሽራ ማጫዉና ደእያ ኡራይ እካ ምሽራ፤ ሄ ምሽራ ምያታይ ኤቂደ፥ እ ግያዋ ስስያዌ አ ሃሳያን ዳሮ ናሸቴ። ሄዋ ድራዉ፥ ሀዌ ታ ናሸቻይ ፖለቴዳ። 30 እ ዳርና ታ ጉጻና በሴ” ያጌዳ።

31 ቦላፐ ይያዌ ኡባፐ ቦላ። ሳኣፐ ቤቴዳዌ ሳኣሳ። እካ ሳኣባ ሃሳዬ። ሳሉዋፐ ይያዌ ኡባፐ ቦላ። 32 እ ባረ በኤዳባነ ስሴዳባ ማርካቴ፤ ሽን አ ማርካተꬃ አክያዌ ባዋ። 33 አ ማርካተꬃ አክያ ኦንነ ጾሳይ ቱማንቻ ግድያዋ ሄዋን ማርካቴ። 34 ጾሳይ ኪቴዳዌ ጾሳ ቃላ ኦዴ፤ አያዉ ጎፐ፥ ጾሳይ ባረ ጌሻ አያና ፓላህሲደ እሜ። 35 ጾሳይ ባረ ናኣ ሲቂደ ኡባባ አ ኩሽያን ዎꬄዳ። 36 ናኣ አማንያ ኡራዉ መꬍና ደኡ ደኤ፤ ሽን ናኣ አማነናዋ ቦላ ጾሳ ሀንቁ ደአናዋፐ አትን፥ እ ደኡዋ በኤና።