1 ሄዋፐ ጉይያን፥ የሱስ አይሁዳቱ ቦንችያ ባላዉ የሩሳላመ ቤዳ። 2 የሩሳላመን ዶርሳ ፐንግያ ማታን እብራይስጸ ቃላን ቤተሳይዳ ጌተትያ ዳጋት ኡቴዳ ሃꬃይ ደኤ፤ ሄ ዳጋት ኡቴዳ ሃꬃ ዩይ አꬌዳ እቼሹ ካሻይ ደኤ። 3 ሄዋን ጮራ ሀርጋንቻቱ፥ ቆቃቱ፥ ዎባቱነ ስሌዳዋንቱ ግሴድኖ። [ሃꬃይ ቃጽያዋ ናጊኖ። 4 አያዉ ጎፐ፥ እት እት ገደ ጎዳ ኪታንቻይ ሄ ዳጋቴዳ ሃꬃኮ ገሊደ፥ ሃꬃ ቃꬄ፤ ሃꬃይ ቃጼዳዋፐ ጉይያን፥ ኮይሮ ገሌዳ ኡራይ ባረና ኦይቄዳ አይ ሀርግያፐካ ፓጼ።]*ሀ ፓይዱ እት በን ኮይሮቲደ ጻፈቴዳ ጌሻ ማጻፋቱዋን ባዋ። 5 ሄዋን ሀታማነ ሆስፑን ላይꬃ ሳከቴዳ እት ብታኒ ደኤ። 6 ሄ ብታኒ ሄዋን ግሴዳዋ የሱስ በኢደ፥ ዳሮ ዎድያ ሳከቴዳዋካ ኤሪደ ብታንያ፥ “ፓጻናዉ ኮያይ?” ያጌዳ።

7 ሳከትያ ብታኒ ዛሪደ፥ “ጎዳዉ፥ ሃꬃይ ቃጽያ ዎደ፥ ታና ሃꬃን የግያ አሳይ ꬋዬዳ፤ ታን ገላና ሀንያ ዎደ፥ ሀራ ኡራይ ታፐ ካሰቲደ ገል አጌ” ያጌዳ።

8 የሱስ አ፥ “ደንዳ ኤቃ፤ ኔን ግሶዋ ቶካደ ባ” ያጌዳ። 9 ብታኒ ኤለካ ፓጽ አጌዳ፤ ባረ ግሱዋ ቶኪደ ቤዳ።

ሄዌ ሀኔዳዌ ሳምባታ ጋላሳና። 10 ሄዋ ድራዉ፥ አይሁዳቱ ፓጼዳ ብታንያ፥ “ሀቼ ሳአይ ሳምባታ፤ ኔን ነ ግሱዋ ቶካ ብያዌ ዎጋ ግደና” ያጌድኖ። ናህ. 13:19፤ ኤር. 17:21

11 ሽን ብታኒ፥ “ታና ፓꬄዳዌ፥ ‘ነ ግሱዋ ቶካደ ባ’ ያጌዳ” ጊደ ኡንቱንቶ ዛሬዳ።

12 ኡንቱንቱ አ፥ “ኔና፥ ‘ነ ግሱዋ ቶካደ ባ’ ጌዳዌ እ ኦኔ?” ጊደ ኦቼድኖ።

13 ሽን ሄዋን ጮራ አሳይ ደእያ ድራዉነ፥ የሱስካ ጌመቴዳ ድራዉ፥ ብታኒ ባረና ፓꬄዳዌ ኦነንቶ ኤረና። 14 የሱስ ጉየፐ ሄ ብታንያ ጌሻ ጎልያን ደሚደ፥ “በአ፥ ኔን ሀእ ፓጻዳ፤ ሀዋፐካ ኢታባይ ኔና ጋከና ማላ፥ ላኤንꬆ ናጋራ ኦꬆፓ” ያጌዳ። 15 ሄዋፐ ጉይያን፥ ብታኒ ቢደ፥ ባረና ፓꬄዳዌ የሱሳ ግድያዋ አይሁዳ አሳ ካፓቶ ኦዴዳ።

16 የሱስ ሀዋ ሳምባታን ኦꬄዳ ድራዉ፥ ኡንቱንቱ የሱሳ የደሳን ዋይሱዋ ዶሜድኖ። 17 የሱስ ዛሪደ ኡንቱንቶ፥ “ታ አቡ ኡባ ዎደ ኦꬄ፤ ታንካ ኦꬃናዉ በሴ” ያጌዳ።

18 ሄዋ ድራዉ፥ የሱስ ሳምባታ ጋላሳ ቦንቼና ድራ ጻላላሳ ግደናን፥ ባረና ጾሳና ቃራዪደ፥ “ጾሳይ ታ አባ” ጌዳ ድራዉ፥ አይሁዳ አሳ ካፓቱ አ ዎꬋናዉ ካሰዋፐ ምንሲደ ኮዪኖ።

19 የሱስ ዛሪደ ኡንቱንቶ፥ “ታን ህንተንቶ ቱሙዋ ኦዳይ፤ ናአይ ባረካ አይነ ኦና። እ ባረ አቡ ኦꬅሽን በእያዋ ጻላላ ኦꬄ፤ አዉ ኦꬅያዋ ናአይካ ኦꬄ። 20 አያዉ ጎፐ፥ አዉ ባረ ናኣ ሲቄ፤ ቃይ እ ኦꬅያ ኦሱዋ ኡባባ ባረ ናኣ በሴ። ኡባ ህንተንቱ ማላለታና ጋካናዉ፥ እ ሀዋፐ አꬍያ ኦሱዋካ ባረ ናኣ በሳናዋ። 21 ጋሱኔ፥ አዉ ሀይቄዳዋንታ ሀይቁዋፐ ደንꬂደ ሸምፑዋና ዎꬅያዋዳን፥ ናአይካ ቃይ ባረ ኮዮዋንታ ሸምፑዋና ዎꬄ። 22-23 አሳይ ኡባይ አዉዋ ቦንችያዋዳን፥ ናኣካ ቦንቻና ማላ፥ አዉ ፕርዳ ኡባ ናአዉ እሜዳዋፐ አትን፥ እ ኦናነ ፕርደና፤ ናኣ ቦንቼና ኡራይ፥ አ ኪቴዳ አዉዋካ ቦንቼና።

24 “ታን ህንተንቶ ቱሙዋ ኦዳይ፤ ታ ቃላ ስስያዎነ ታና ኪቴዳዋን አማንያዎ መꬍና ደኡ ደኤ። ሀይቁዋፐ ደኦ እ ፕኔዳዋፐ አትን፥ ፕርደተና። 25 ታን ህንተንቶ ቱሙዋ ኦዳይ፤ ሀይቄዳ አሳይ ጾሳ ናኣ ኮሻ ስስያ ዎዲ ያናዋ፤ ሄዌኔካ ሀአ። ሄ ኮሻ ስስያዋንቱ ሸምፑዋና ደአና። 26 አያዉ ጎፐ፥ አዎ ደኡዋ እምያ ዎልቃይ ደእያዋዳን፥ ደኡዋ እምያ ሄ ዎልቃ ባረ ናአዉካ እሜዳ። 27 ጾሳ አዉ ባረ ናአዉ ፕርድያ ማታ እሜዳ፤ አያዉ ጎፐ፥ ናአይ አሳ ናኣ።

28 “ሀዋን ማላለቶፕተ፤ አያዉ ጎፐ፥ ዱፉዋን ደእያዋንቱ አ ኮሻ ስስያ ዎዲ ዬ። 29 ስሲደ ኡንቱንቱ ዱፉዋፐ ጋጻ ከሳና፤ ሎኦባ ኦꬄዳዋንቱ ደኡዋን ደአናዉ ደንዳና፤ ቃይ ኢታባ ኦꬄዳዋንቱ ፕርደታናዉ ደንዳናዋንታ። ዳኔላ 12:2

30 “ታን ታፐ አይነ ኦꬃናዉ ዳንዳይከ፤ ጾሳይ ታዉ ኦዴዳዋዳን ፕርዳይ። ታ ፕርዳይ ቱማ፤ አያዉ ጎፐ፥ ታን ታና ኪቴዳዋ ሸንያ ፖልያዋፐ አትን፥ ታን ዶስያዋ ኦꬅከ።

31 “ታን ታ ሁጰዉ ታባ ማርካቶፐ፥ ታ ማርካተꬃይ ቱማ ግደና። 32 ታባ ማርካትያዌ ሀራይ ደኤ፤ እ ታባ ማርካትያዌ ቱማ ግድያዋ ታን ኤራይ።

33 “ህንተንቱ ዮሃንሳኮ አሳ ኪትና፥ እ ኡንቱንቶ ቱሙዋ ማርካቴዳ። 34 ታን ሄዋ ህንተንታ አትኖ ጋደ ግያዋፐ አትን፥ አሳ ማርካተꬃይ ታዉ ኮሽና ግደና። 35 ዮሃንስ ሙቃዳዳን፥ ኤጼዳነ ፖእሴዳ፤ ህንተንቱካ አማሬዳ ዎድያ አ ፖኡዋን ናሸታናዉ ኮዬድታ።

36 “ሽን ታዉ ዮሃንሳዋፐ አꬍያ ማርካተꬃይ ደኤ፤ አያዉ ጎፐ፥ ታን ዉርሳናዉ ታ አቡ ታዉ እሜዳ ኪታይ፥ ሀ ታን ኦꬅያዌ፥ እ ታና ኪቴዳዋ ግድያዋ ማርካቴ።

37 “ቃይ ታና ኪቴዳ ታ አቡ ባረ ሁጰዉ ታባ ማርካቴ። ህንተንቱ አ ኮሻ አይነ ስስበይክታ፤ አ ማላካ በእበይክታ። 38 እ ኪቴዳዋ አማነና ድራዉ፥ አ ቃላይ ህንተንቱ ዎዛናን ባዋ።

39 “ጾሳ ማጻፋቱዋፐ መꬍና ደኡዋ ደምያዋ ህንተዉ ማላትና፥ ኡንቱንታ ብዲታ፤ ኡንቱንቱካ ታባ ማርካትያዋንታ። 40 ሽን ደኡዋ ደማናዉ ታኮ ይያዋ ህንተንቱ ኮይክታ።

41 “ታን አሳፐ ቦንቹዋ ኮይከ። 42 ሽን ታን ህንተንቱ ዎዛናን ጾሳ ሲቁ ባይናዋ ኤራይ። 43 ታን ታ አቡ ሱንꬃን ያድ፤ ሽን ታና አክበይክታ። ሽን ሀራ አሳይ ባረ ሱንꬃን ይያ ዎደ፥ አ አኪታ። 44 ህንተንቱ እቱ እቱዋ ቦንቺታ፤ ሽን እት ጾሳፐ ይያ ቦንቹዋ ኮይክታ። ያትና፥ ዋኒደ አማናናዉ ዳንዳዪተ?

45 “ታን ታ አቡ ስንꬃን ህንተንታ ሞትያዋ ህንተዉ ማላቶፖ፤ ህንተንታ ሞትያዌ፥ ህንተ ህዶታ ዎꬅያ ሙሳ። 46 ህንተንቱ ሙሳ አማኔዳባ ግድንቶ፥ ታናካ አማናንታ፤ አያዉ ጎፐ፥ ታባ ጻፌዳዌ አ። 47 ሽን ህንተንቱ እ ጻፌዳዋ አማነናን እጾፐ፥ ታን ግያዋ ዎት አማናንቴ?” ያጌዳ።