1 ሄዋፐ ጉይያን፥ የሱስ ጋሊላ አባፐ ዎይ ጽብርያዶሳ አባፐ ሄፍንꬃ ፕኔዳ። 2 እ ሀርጋንቻቱዋ ቦላ ኦꬄዳ ዎልቃማ ማላታ በኤዳ ድራዉ፥ ጮራ አሳይ አ ካሌዳ። 3 የሱስ ደርያ ከሲደ፥ ያን ባረና ካልያዋንቱና እትፐ ኡቴዳ። 4 አይሁዳቱ ቦንችያ ፓስጋ ጋላሳይ ጋኬዳ። 5 የሱስ ስንꬃኮ ጼሊደ፥ ጮራ አሳይ ባረኮ ይያዋ በኢደ ፕልጶሳ፥ “ሀ አሳ ኡባ ምዛናዉ ግድያ ቁማ ሀቃፐ ሻማኔ?” ያጌዳ። 6 እ ሄዋ ፕልጶሳ ፓጫናዉ ጌዳ፤ አያዉ ጎፐ፥ እ ባረ ሁጰዉ አያ ኦꬃና በስንቶ ኦꬃናባ ኤሬ።

7 ፕልጶስ ዛሪደ የሱሳ፥ “ሁጲያን ሁጲያን፥ ሀራይ አቶ እት እት ባርሱዋ ጋꬃናዉ፥ ላኡ ጼቱ ድናርያን ሻሜዳ ኡክꬃይካ ግደና” ያጌዳ።

8 ቃይ የሱሳ ካልያዋንቱፐ እቱ፥ ስሞን ጰጽሮሳ እሻይ እንድራስ፥ 9 “ባንጋ ኡክꬃ እቼሹነ ላኡ ሞሊ ደእያ እት ናአይ ሀዋን ደኤ፤ ሽን ሀ አሳ ኡባዉ ሄዌ ዎት ግዳኔ?” ያጌዳ።

10 የሱስ ባረና ካልያዋንታ፥ “አሳይ ኡታናዳን ኦꬅተ” ያጌዳ። ሄ ሳኣን ዳሮ ማታይ ደኤ። አሳይ ኡባይ ኡቴዳ፤ አቱማ አሳይ እቼሹ ሻኣ ግድያዋ። 11 የሱስ ኡክꬃ አኬዳ፤ ጾሳ ጋላቲደ፥ ሄዋን ኡቴዳ አሳዉ ግሼዳ። ሞልያካ ሄዋዳን ኦꬅና አሳይ ባረ ኮዬዳዋ ኬና ሜዳ። 12 ኡንቱንቱ ኡባይ ካሌዳዋፐ ጉይያን፥ የሱስ ባረና ካልያዋንታ “እትባይካ ጮ ባየና ማላ፥ አቴዳ ዶካ ሺሽተ” ያጌዳ። 13 ሄዋ ድራዉ፥ ኡንቱንቱ ኡባካ ሺሼድኖ፤ አሳይ ካልና አቴዳ ባንጋ ኡክꬃ ዶካ ሺሺደ፥ ታማነ ላኡ ዛምቤልያ ኩንꬄድኖ።

14 አሳይ የሱስ ኦꬄዳ ዎልቃማ ማላታ በኤዳ ዎደ፥ “ሀዌ ቱሙዋፐ ሀ ሳኣ ያና ጌዳ ናብያ” ያጌድኖ። 15 ኡንቱንቱ ዪደ ባረና ዎልቃን ኦይቂ ካትያ ኦꬃናዉ ሀንያዋ የሱስ ኤሪደ፥ ባረካ ደርያ ቦላ ሽረቲደ ከሴዳ።

16 ሳአይ ኦማርሴዳ ዎደ፥ የሱሳ ካልያዋንቱ አባኮ ቤድኖ፤ 17 ሳአይ ቃሜዳ፤ ሽን የሱስ ኡንቱንቱኮ ሄ ሳቲ ጋካናዉ ይቤና፤ ሄዎ ኡንቱንቱ ዎንግርያን ገሊደ፥ አባ ፕን ሄፍንꬃ ቅፍርናሆማ ቤድኖ። 18 ዎልቃማ ጫርኩ ጫርኬዳ ድራዉ፥ አባይ ቃጼዳ፤ 19 እት ሳትያ ኬና ኡንቱንቱ አባ ሻጎዋፐ ጉይያን፥ የሱስ አባ ቦላና ሀመቲደ ይያዋ በኢደ ያዬድኖ። 20 ሽን እ፥ “ያዮፕተ፤ ታናቴ!” ያጌዳ። 21 ኡንቱንቱ ዎንግርያን አ ገልሳናዉ ኮዬድኖ፤ ዎንግሪ ኡንቱንቱ ብያሳ አባ ጋጻ ኤለካ ጋክ አጌዳ።

22 ዎንተꬃ ጋላስ፥ አባፐ ሄፍንꬃና አቴዳ ጮራ አሳይ አባ ቦላ እት ዎንግርያ ጻላላይ ደእያዋ በኤድኖ፤ የሱስ ባረና ካልያዋንቱና ዎንግርያን ገሊደ፥ ኡንቱንቱና ቤናን፥ ኡንቱንቱ ባረካ ቤዳዋ አኬኬድኖ። 23 ሽን ጽብርያዶሳፐ ሀራ ዎንግራቱ የሱስ ጾሳ ጋላትና፥ አሳይ ኡክꬃ ሜዳሳ ማታ ዬድኖ። 24 አሳይ የሱስ ዎይ አ ካልያዋንቱ ሄዋን ባይናዋ በኢደ፥ የሱሳ ኮያናዉ ዎንግርያን ገሊደ፥ ቅፍርናሆማ ቤድኖ።

25 አሳይ የሱሳ አባፐ ሄፍንꬃን ደሜዳ ዎደ፥ “ታማርስያዎ፥ ሀዋ አዉደ ያዲ?” ያጌድኖ።

26 የሱስ ዛሪደ፥ “ታን ህንተንቶ ቱሙዋ ኦዳይ፤ ህንተንቱ ታና ኮይያዌ ኡክꬃ ሜዳ ድራሳነ ካሌዳ ድራሳ ግድያዋፐ አትን፥ ዎልቃማ ማላታ በኤዳ ድራሳ ግደና። 27 መꬍና ደኡዋ ቁማዉ፥ ታን አሳ ናአይ ህንተንቶ እማናዎ፥ ኦꬅተፐ አትን፥ ሳምያ ቁማዉ ኦꬆፕተ፤ አያዉ ጎፐ፥ አዉ ጾሳይ ሄዋ ꬊሽሳናዉ ማታፋ አታም ዎꬄዳ” ያጌዳ።

28 ሄዋፐ ጉይያን ኡንቱንቱ፥ “ኑን ጾሳ ኦሱዋ ኦꬃናዉ አያ ኦꬃናዉ በሲ?” ያጊደ የሱሳ ኦቼድኖ።

29 የሱስ ዛሪደ፥ “ህንተንቱ ኦꬃና ማላ፥ ጾሳይ ኮይያ ኪታይ ሀዋ፤ እ ኪቴዳዋን አማንተ” ያጌዳ።

30 ኡንቱንቱ ዛሪደ፥ “ኑን በኢደ፥ ኔናን አማናና ማላ፥ አይ ዎልቃማ ማላታ ኦꬃኒ? አያ ኪተታኒ? 31 ጾሳ ማጻፋን፥ ‘ኡንቱንቱ ማና *ማና፦ እስራኤልያ አሳይ ግብጼ ጋድያፐ ከስ ካናነ ቢደ መላ ቢታን ሀመቲደ ብያ ዎደ፥ ኡንቱንቱ ማናዳን ጾሳይ እሜዳ ማልእያ ቁማ። ማና ጉሳይ እብራይስጽያ ቃላን “ሀዌ አዬ?” ግያዋ። ማላ ሳሉዋፐ ኡክꬃ እሜዳ’ ያገት ጻፈቶዋዳን፥ ኑ አዎቱ መላ ቢታን ማና ሜድኖ” ያጌድኖ። ከሳ 16:4፣ 15፤ ማዝ. 78:24

32 የሱስ፥ “ታን ህንተንቶ ቱሙዋ ኦዳይ፤ ህንተንቶ ሳሉዋፐ ቱሙ ኡክꬃ እምያዌ ታ አባፐ አትን፥ ህንተንቶ ሳሉዋፐ ኡክꬃ እሜዳዌ ሙሳ ግደና። 33 አያዉ ጎፐ፥ ቱማ ግዴዳ ጾሳ ኡክꬃይ፥ ሳሉዋፐ ዎꬍያዌ ሀ አላምያ አሳዉ ደኡዋ እሜ” ያጌዳ።

34 ኡንቱንቱ ዛሪደ፥ “ጎዳዉ፥ ኑካ ሄ ኡክꬃ ኡባ ዎደ እማ” ያጌድኖ።

35 የሱስ፥ “ታን ደኡዋ ኡክꬃ፤ ታኮ ይያ ኡራይ ኡባካ ኮሻተና። ቃይ ታና አማንያ ኡራይ አይነ ሳመተና። 36 ሽን ታን ህንተንቶ ኦዴዳዋዳን፥ ህንተንቱ ታና በኤድታ፤ ሽን አማንክታ። 37 ታ አቡ ታዉ እምያ ኡባይ ታኮ ያናዋ፤ ቃይ ታኮ ይያ ኦናነ ኡባካ ታን ካረ የድከ። 38 አያዉ ጎፐ፥ ታን ታና ኪቴዳዋ ሸንያ ፖላናዉ ሳሉዋፐ ያድፐ አትን፥ ታ ሸንያ ፖላናዉ ያበይከ። 39 ታና ኪቴዳዌ ኮይያዌ ሀዋ፤ ታን እ ታዉ እሜዳ ኡባቱዋካ ዉርሰꬃ ጋላስ ደንꬃናፐ አትን፥ እቱዋካ ባይዛና ማላ ኮየና። 40 አያዉ ጎፐ፥ ታ አቡ ኮይያዌ ሀዋ፤ ታና ናኣ በኢደ፥ አማንያ ኡባቱ መꬍና ደኡዋ አካናዋንታ፤ ታንካ ሄ ኡባቱዋ ዉርሰꬃ ጋላስ ደንꬃና” ያጌዳ።

41 የሱስ፥ “ታን ሳሉዋፐ ዎꬌዳ ኡክꬃ” ጌዳ ድራዉ፥ አይሁዳቱ አ ቦላ ዙዙሜድኖ። 42 ኡንቱንቱ፥ “ሀዌ ኑን አ አዉዋነ አ አቶ ኤርያ ዮሴፎ ናኣ የሱሳ ግደኔ? ያትና፥ እ ዋጊደ፥ ‘ታን ሳሉዋፐ ዎꬋድ’ ጋናዉ ዳንዳዪ?” ያጌድኖ።

43 የሱስ ዛሪደ፥ “እቱ እቱዋና ዙዙምያዋ አግተ። 44 ታና ኪቴዳ ታ አቡ ታኮ አሄዳ አሳፐ አትን፥ ታኮ ያናዉ ዳንዳይያ አሳይ ባዋ፤ ታንካ ዉርሰꬃ ጋላስ አ ደንꬃና። 45 ናባቱ ‘ጾሳይ አሳ ኡባ ታማርሳና’ ያጊደ ጻፌድኖ፤ አዉ ግያዋ ስስያዌነ አዉዋፐ ታማርያዌ ኦንነ ታኮ ዬ። ኢሳ. 54:13 46 ጾሳ ማታፐ ዬዳዋፐ አትን፥ ጾሳ በኤዳ አሳይ ባዋ፤ አ ጻላላይ ጾሳ በኤዳ።

47 “ታን ህንተንቶ ቱሙዋ ኦዳይ፤ ታና አማንያ ኡራዉ መꬍና ደኡ ደኤ። 48 ታን ደኡዋ ኡክꬃ። 49 ህንተንቱ አዎቱ መላ ቢታን ማና ሜድኖ፤ ሽን ሀይቄድኖ። 50 አሳይ አፐ ሚደ ሀይቀና ኡክꬃይ ሳሉዋፐ ይያዌ ሀዋ። 51 ሳሉዋፐ ዎꬌዳ ደኡዋ ኡክꬃይ ታና፤ ኦንነ ሀ ኡክꬃፐ ሞፐ፥ መꬍናዉ ደአናዋ፤ ቃይ ሀ አላምያ አሳዉ ደኦ ግዳና ማላ፥ ታን እማና ኡክꬃይ ታ አሹዋ” ያጌዳ።

52 አይሁዳቱ፥ “ሀ ብታኒ ባረ አሹዋ ኑን ማና ማላ፥ ኑዉ ዎቲደ እማናዉ ዳንዳዪ?” ያጊደ ባረንቱ ግዱዋን ፓሉመቴድኖ።

53 ሄዋ ድራዉ፥ የሱስ ኡንቱንታ፥ “ታን ህንተንቶ ቱሙዋ ኦዳይ፤ ታ አሹዋ፥ አሳ ናኣ አሹዋ፥ ህንተንቱ ማና ꬋዮፐ፥ ቃይ ታ ሱꬃካ ኡሻና ꬋዮፐ፥ ህንተዉ ደኡ ባዋ። 54 ታ አሹዋ ምያ ኡራዉነ፥ ታ ሱꬃ ኡሽያ ኡራዉ መꬍና ደኡ ደኤ። ታን ዉርሰꬃ ጋላስ ኡንቱንታ ደንꬃና። 55 አያዉ ጎፐ፥ ታ አሹ ቱሙ ቁማ፤ ታ ሱꬃይካ ቱሙ ኡሻ። 56 ታ አሹዋ ምያ ኡራይነ ታ ሱꬃ ኡሽያ ኡራይ ታናን ደኤ፤ ታንካ አናን ደአይ። 57 ደኡዋ አዉ ታና ኪትና፥ ታን አ ጋሱዋን ደእያዋዳን፥ ታና ምያ ኡራይካ ታ ጋሱዋን ደአና። 58 ሳሉዋፐ ዎꬌዳ ኡክꬃይ ሀዋ፤ ህንተንቱ አዎቱ ሚደ ሀይቄዳ ማና ማላ ግደና፤ ሀ ኡክꬃ ምያ ኡራይ መꬍናዉ ደአና” ያጌዳ።

59 የሱስ ቅፍርናሆማ ካታማን አይሁዳ ዎሳ ጎለን ታማርሲደ፥ ሀዋ ኦዴዳ።

60 የሱሳ ካልያዋንቱፐ ዳርያ ባጋይ ሄዋ ስሴዳ ዎደ፥ “ሀዌ ገለና ትምርትያ፤ ሀዋ ኦን አካናዌ?” ያጌድኖ።

61 ሽን የሱስ ባረና ካልያዋንቱ ሄዎ ዙዙሜዳዋ ኤሪደ፥ “ሀዌ ህንተንታ ꬉቢ? 62 ስም ታን፥ አሳ ናአይ፥ ካሰ ደኢያሳ ፑደ ከስሽን በእንቶ አያ ጋንቴ? 63 ጌሻ አያናይ ደኡዋ እሜ፤ አሳ ምኖታይ አይነ ጎኤና። ታን ህንተንቶ ኦዴዳ ቃላይ አያናነ ደኡዋ። 64 ሽን ህንተንቱ ግዱዋን አማነናዋንቱ ደኢኖ” ያጌዳ፤ አያዉ ጎፐ፥ አማነናዋንቱ ሀቃዋንተንቶነ ባረና አꬅ እማናዌ ኦነንቶ የሱስ ኮይሮፐ ዶሚደ ኤሬዳ። 65 ቃይካ የሱስ፥ “ታ አቡፐ ግዳና ꬋዮፐ ኦንነ ታኮ ያናዉ ዳንዳየና ያጋደ ታ ኦዴዳዌ ሄዋ ድራሳ” ያጌዳ።

66 ሄዋ ጋሱዋን፥ የሱሳ ካልያዋንቱፐ ጮራቱ አ አጊደ፥ ጉየ ስሜድኖ፤ ላኤንꬆ አ ካልበይክኖ። 67 የሱስ ቃይ ታማነ ላኡ ባረና ካልያዋንታ “ህንተካ አጊደ ባናዉ ኮዪቴ?” ያጌዳ።

68 ስሞን ጰጽሮሰ ዛሪደ፥ “ጎዳዉ፥ ኑን ኦኮ ባኔ? ነዉ መꬍና ደኡዋ ቃላይ ደኤ። 69 ኔን ጾሳ ጌሻ ግድያዋ ኑን አማኔቶነ ኤሬቶ” ያጌዳ።

70 የሱስ ኡንቱንታ፥ “ታን ህንተንታ ታማነ ላአቱዋ ዶራበይክታ? ቃይ ህንተፐ እቱ ጻላህያ” ያጌዳ። 71 የሱስ ሄዋ ስሞና ናኣ ይሁዳ አስቆሮታ †አስቆሮታ፦ ሀ ቃላ ብለꬃይ፥ “ዎረትያ ብታንያ” ዎይ “ሀይቆ አꬅ እምያ ብታንያ” ግያዋ። ጌ፤ አያዉ ጎፐ፥ ይሁዳይ የሱሳ ካልያ ታማነ ላአቱዋፐ እቱዋ፤ እ የሱሳ አꬅ እማናዋ።