1 ሄዋፐ ጉየ፥ የሱስ ጋሊላን ያ ሃ ዩዬዳ፤ አይሁዳቱ አ ዎꬋናዉ ኮይያ ድራዉ፥ ይሁዳን ዩያና ኮይቤና። 2 አይሁዳቱ ቦንችያ ዳስያ ባላይ ጋክ ኡቴዳ። ዎጋ 23:34፤ ዛረ. 16:13 3 ሄዋ ድራዉ፥ የሱሳ እሻቱ አ፥ “ኔና ካልያዋንቱ ኔን ኦꬅያዋ በአና ማላ፥ ሀዋፐ ደንዳደ ይሁዳ ጋድያ ባ። 4 አያዉ ጎፐ፥ ባረዉ ኤረታናዉ ኮይያ አሳይ ኦንነ ባረ ኦሱዋ ገንና። ኔን ሀዋንታ ኦꬅና፥ ነባ አላምያ ኡባይ ኤሮ!” ያጌድኖ። 5 አያዉ ጎፐ፥ ሀራይ አቶ አ እሻቱካ አ አማንበይክኖ።

6 የሱስ ኡንቱንታ፥ “ታዉ እንጀትያ ዎዲ ጋክቤና፤ ሽን ህንተንቶ አይ ዎደካ እንጀቴ። 7 አላሚ ህንተንታ እጻናዉ ዳንዳየና፤ ሽን ታን ሳኣ ኪታይ ኢታ ግድያዋ ማርካትያ ድራዉ፥ ታና እጼዳ። 8 ባላ ቦንችያሳ ህንተንቱ ቢተ፤ ታዉ እንጀትያ ዎዲ ጋክቤና ድራዉ፥ ታን ባላ ቦንችያሳ ባናዌ ብራ” ያጌዳ። 9 እ ሀዋ ጊደ፥ ጋሊላን አቴዳ።

10 ሽን አ እሻቱ ባላ ጋላሳ ቦንችያሳ ቤዳዋፐ ጉይያን፥ እካ አሳይ በኤናን ጌማን ያ ቤዳ። 11 አይሁዳቱ ባላ ጋላሳ ቦንችያሳን አ ኮዪኖነ፥ “እ ሀቃን ደኢ?” ያጊደ፥ አ ላቢኖ።

12 አሳ ግዱዋን ዳሮ ዙዙንꬃይ ደንዴዳ። አማሬዳ አሳይ፥ “እ ሎኦ አሳ” ያጌ፤ ሀራቱ ቃይ፥ “አ፥ እ አሳ ባለꬄ” ያጊኖ። 13 ሽን አይሁዳቱ ያዬዳ ድራዉ፥ ኦንነ አባ ቆንጭያን ሃሳየና።

14 ባላ ቦንችያ ጋላሳ ባጋን፥ የሱስ ጌሻ ጎልያ ቢደ፥ ታማርሱዋ ዶሜዳ። 15 አይሁዳቱ ማላለቲደ፥ “ሀ ብታኒ አይነ ታማረናን ሀዋ ኬና ዋን ኤሬዴ?” ያጌድኖ።

16 ሄዋ ድራዉ፥ የሱስ ዛሪደ፥ “ታና ታማርስያዌ ታና ኪቴዳ ጾሳ ማታፐ ይያዋፐ አትን፥ ታዋ ግደና። 17 ጾሳ ሸንያ ኦꬃናዉ ዶስያ ኦንነ ሀ ታን ታማርስያዌ ጾሳ ማታፐ ይንቶ ዎይ ቃይ ታን ታፐ ሃሳያይታንቶ ኤራና። 18 ባረዋ ሃሳይያ ኡራይ ባረ ሁጲያዉ ቦንቹዋ ኮዬ፤ ሽን ባረና ኪቴዳዌ ቦንቼታና ማላ ኮይያ ኡራይ ቱማንቻ፤ አን ዎርዶባይ ባዋ። 19 ሙሴ ህንተንቶ ህግያ እምቤኔ? ሽን ህንተፐ እቱነ ህግያ ናገና። ታና አያዉ ዎꬋናዉ ኮዪቴ?” ያጌዳ።

20 አሳይ ዛሪደ፥ “ኔናን ጻላሂ ደኤ፤ ኔና ዎꬋናዉ ኦኔ ኮዬዳዌ?” ያጌዳ።

21 የሱስ፥ “ታን እት ዎልቃማባ ኦꬅና፥ ህንተንቱ ኡባይ ማላለቴድታ። 22 ህንተንቱ ናና ህንተንቱ ዶካላና ማላ፥ ሙሴ ህንተንታ አዛዜዳ። ሽን ዶካሉሳይ ህንተንቱ አዎቱዋና ዬዳዋፐ አትን፥ ሙሴና ይቤና፤ ሄዎ ህንተንቱ ሳምባታን አቱማ ናና ዶካሊታ። ዶመꬃ 17:10፤ ዎጋ 12:3 23 ሙሴ ህጊ አዛዜዳ ድራዉ፥ ህንተንቱ ሳምባታን ዶካልያዋ ግዶፐ፥ ያትና ታን እት አሳዉ ኩመንꬃ ቦላ ፓꬄዳ ድራዉ፥ ታና አያዉ ሀንቀቲቴ? 24 ቱሙ ፕርዳ ፕርድተፐ አትን፥ አሳ ዴሙዋ ጼሊደ ፕርዶፕተ” ያጌዳ።

25 ሄዋ ድራዉ፥ የሩሳላመ አሳፐ እቱ እቱ፥ “ኡንቱንቱ ዎꬋናዉ ኮይያ ብታኒ ሀዋ ግደኔ? 26 በእተ፥ ቆንጭያን እ ሃሳዬ፤ ኡንቱንቱ አ አይነ ጊክኖ። ሀዌ ክርስቶሳ ግድያዋ ኑ ካፓቱ ቱሙ ኤሪኖሻ? 27 ሽን ኑን አ ሀቃፐ ዬደንቶ ኤሮይተ፤ ክርስቶስ ይያ ዎደ፥ እ ሀቃፐ ይንቶነ ኦንነ ኤረና” ያጌድኖ።

28 ሄዋፐ ጉይያን፥ የሱስ ጌሻ ጎልያን ታማርሲደ፥ ባረ ቃላ ꬎቁ ኦꬂደ፥ “ህንተንቱ ታና ኤሪታ፤ ቃይ ታን ሀቃፐ ዬደንቶካ ኤሪታ። ታን ታ ሸንያን ያበይከ፤ ሽን ታና ኪቴዳዌ ቱማንቻ፤ ህንተንቱ አ ኤርክታ። 29 ሽን ታን አ ኤራይ፤ አያዉ ጎፐ፥ እ ታና ኪትና፥ ታን አ ማታፐ ያድ” ያጌዳ።

30 ሄዋ ድራዉ፥ ኡንቱንቱ አ ኦይቃናዉ ኮዬድኖ፤ ሽን አ ዎዲ ብሮ ጋክቤና ድራዉ፥ ኦንነ አ ቦላ ኩሽያ ዎꬅቤና። 31 ሽን ዳሮ አሳይ የሱሳ አማኒደ፥ “ክርስቶስ ይያ ዎደ፥ ሀ ብታኒ ኦꬄዳ ማላታፐ ዳርያዋ ኦꬃኔዬ?” ያጌድኖ።

32 ፓርሳዋቱ ዳሮ አሳይ የሱሳባ ዙዙምያዋ ስሴድኖ፤ ቄሳቱዋ ካፓቱነ ፓርሳዋቱ አ ኦይቂ ቃሽሳናዉ አማሬዳ ዎታዳራቱዋ ኪቴድኖ።

33 የሱስ፥ “ታን ህንተናና ላፋ ጋምአና፤ ሄዋፐ ጉይያን፥ ታና ኪቴዳዋኮ ባና። 34 ህንተንቱ ታና ኮያና፤ ሽን ደምክታ፤ አያዉ ጎፐ፥ ታን ደእያ ሳኣ ህንተንቱ ባናዉ ዳንዳይክታ” ያጌዳ።

35 አይሁዳቱ እቱ እቱዋና፥ “ሀዌ ኑን አ ደመናሳ ሀቃ ባና ሀኒ? አይሁዳቱ ደእያ ግሪከ ካታማ ቢደ፥ ግሪከ አሳቱዋ ታማርሳና ሀኒ? 36 እ፥ ‘ህንተ ታና ኮያና፤ ሽን ደምክታ’ ቃይ፥ ‘ታን ደኢያሳ ህንተንቱ ባናዉ ዳንዳይክታ’ ያጌ፤ ሄዋ ግያዌ ዋግያዌ?” ያጌድኖ።

37 ሄ ባላ ጋላሳ ቦንችያ ጋላሳፐ ዋናትያ ዉርሰꬃ ጋላሳን የሱስ ደንድ ኤቂደ፥ ባረ ቃላ ꬎቁ ኦꬂደ፥ “ሳመቴዳ ኡራይ ኦንነ ታኮ ዪደ ኡሾ። ዎጋ 23:36 38 ታናን አማንያዎ፥ ጾሳ ማጻፋይ ግያዋዳን፥ አ ኡሉዋፐ ደኡዋ እምያ ሃꬃ ፑልቱ ጎጋናዋ” ያጌዳ። ህዝ. 47:1፤ ዛካ. 14:8 39 እ ሄዋ አ አማኔዳዋንቱ አካና ጌሻ አያናባ ሃሳዬዳ። የሱስ ብሮ ባረ ቦንቹዋኮ ከስቤና *የሱስ ብሮ ባረ ቦንቹዋኮ ከስቤና፦ ዮሃንሳ ምሽራቹዋ ቃላን፥ የሱሳዉ ኩመንꬃ ቦንቹ እመቴዳዌ፥ እ ማስቃልያ ቦላን ካቀቴዳ ዎደነ ባረ አቡ ኡሸቻ ባጋን ኡታናዉ ሀይቁዋ ጾኒደ ደንዴዳ ዎድያና ግድያዋ ቆንጭሴ። ድራዉ፥ ሄ ዎደ ጌሻ አያናይ ኡንቱንቶ እመትቤና።

40 ሄ አሳፐ ዳርያ ባጋይ እ ግያዋ ስሲደ፥ “ቱሙ ሀዌ ናገትያ ናብያ” ያጌድኖ።

41 ሀራንቱ፥ “ሀዌ ክርስቶሳ” ያጌድኖ።

ሽን ሀራንቱ ቃይ፥ “ክርስቶስ ጋሊላፐ ዬና። 42 ጾሳ ማጻፋይ፥ ‘ክርስቶስ ዳዊተ ዛርያፐ፥ ዳዊተ ደኤዳ ቤተሌመ ካታማፐ ያና’ ጌነዬ?” ያጌድኖ። 2 ሳሜላ 7:12፤ ሚክ. 5:2 43 የሱሳ ጋሱዋን አሳይ ባረ ግዱዋን ሻከቴዳ። 44 ሄ አሳፐ እቱ እቱ አ ኦይቃናዉ ኮዬድኖ፤ ሽን ኩሽያንነ አ ቦችበይክኖ።

45 ጌሻ ጎልያ ናግያዋንቱ ቄሳቱዋ ካፓቱዋኮነ ፓርሳዋቱዋኮ ስም ዬዳ ዎደ ኡንቱንቱ ናግያዋንታ፥ “አያዉ አ አህበይክቴ?” ያጊደ ኦቼድኖ።

46 ጌሻ ጎልያ ናግያዋንቱ ኡንቱንቶ፥ “ሀ ብታኒ ሃሳዬዳዋዳን፥ ኡባካ ኦንነ ሃሳይቤና!” ያጊደ ዛሬድኖ።

47 ፓርሳዋቱ ዛሪደ፥ “እ ህንተናካ ባለꬁዋ? 48 ካፓቱዋፐ ዎይ ፓርሳዋቱዋፐ አ አማኔዳ አሳይ ደኢ? 49 ሽን ህግያ ኤረና ሀ አሳይ ሸቀቴዳዋ” ያጌድኖ።

50 ኡንቱንቱፐ እቱ ካሰና የሱሳኮ ቤዳ ንቆድሞስ ኡንቱንታ፥ 51 “እት ኡራይ ግያባ ስሰናን ዎይ እ አያ ኦꬄደንቶ ኤረናን ደኢደ፥ ካሰቲደ አ ቦላ ፕርድያዌ ኑ ህግያን ደኢ?” ያጌዳ።

52 ኡንቱንቱ ዛሪደ አ፥ “ኔንካ ቃይ ጋሊላ ጋድያ አሴ? ጋሊላ ጋድያፐ ናቢ ቤተናዋ ጾሳ ማጻፋቱዋ ብዳደ ኤራ” ያጌድኖ።

53 አሳይ ኡባይ አጊደ፥ ባረ ሶይ ባረ ሶይ ቤዳ።