1 ሽን የሱስ ዎጋራ ምꬃን ኤረቴዳ ደርያኮ ቤዳ። 2 ዎንተꬃ ጋላስ ጉራን ጌሻ ጎልያ ስሜዳ፤ ኡባ አሳይ አኮ ዪና፥ ኡቲደ ኡንቱንታ ታማርሱዋ ዶሜዳ። 3 ሙሴ ህግያ ታማርስያዋንቱነ ፓርሳዋቱ ዎሹምሽን ኦይቀቴዳ እት ምሽራቶ አኮ አሄድኖ። ኡንቱንቱ አሳ ኡባ ስንꬃን እዞ ኤሲደ የሱሳ፥ 4 “ታማርስያዎ፥ ሀ ምሽራታ ዎሹማደ ኦይቀታዱ። 5 ህግያ ቦላን ሙሴ ሀን ማላ ማጫ አሳ ሹቻን ጫዳና ማላ፥ ኑና አዛዜዳ። ያትና ኔን ዋጋይ?” ያጌድኖ። ዎጋ 20:10፤ ዛረ. 22:22-24

6 ኡንቱንቱ ሄዋ ጌዳዌ የሱሳ ሞትያዋ ደሚደ አ ፓጫናሳ፤ ሽን የሱስ ሆኪደ፥ ባረ ብራꬍያን ቢታ ቦላ ጻፌዳ። 7 ኡንቱንቱ አ ኦቺደ አገናን እጽና፥ ፑደ ꬎቁ ጊደ፥ “ህንተንቱ ግዱዋን ናጋራ ኦꬅቤና አሳይ ካሰቲደ፥ እዞ ሹቻን ጫዶ” ያጌዳ። 8 ቃይካ ሆኪደ፥ ቢታ ቦላ ጻፌዳ።

9 ኡንቱንቱ ሄዋ ስሴዳ ዎደ፥ ካሰቲደ ጭማቱ ከስና፥ እቱ እቱ ከሲደ ዉሬድኖ፤ አ ስንꬃን ምሽራታ ኤቃ ደእሽን፥ የሱስ ባረ ጻላላ አቴዳ። 10 እ ፑደ ꬎቁ ጊደ ምሽራቶ፥ “ምሽራቴ፥ አሳቱ ሀቃን ደኢኖ? ኦንነ ነ ቦላ ፕርድቤኔ?” ያጌዳ።

11 ምሽራታ፥ “ጎዳዉ፥ ኦንነ ታ ቦላ ፕርድቤና” ያጋዱ።

የሱስ እዞ፥ “ታንካ ነ ቦላ ፕርድከ፤ ባ፤ ላኤንꬃደ ናጋራ ኦꬆፓ” ያጌዳ። *7:53—8:11 እት እት በን ጻፈቴዳ ጌሻ ማጻፋቱዋን ሀ ፓይዱ ባዋ።

12 ቃይካ የሱስ አሳዉ፥ “ታን አላመዉ ፖኡዋ፤ ታና ካልያ ኦንነ ደኡዋ እምያ ፖኡዋ ደማናፐ አትን፥ ꬉማን ኡባካ ሀመተና” ያጊደ ሃሳዬዳ።

13 ሄዋፐ ጉየ ፓርሳዋቱ፥ “ኔን ነባ ማርካታሳ፤ ነ ማርካተꬃይ ቱማ ግደና” ያጌድኖ።

14 የሱስ ዛሪደ፥ “ታን ታባ ማርካቶፐካ፥ ታ ማርካተꬃይ ቱማ፤ አያዉ ጎፐ፥ ታን ሀቃፐ ያድታንቶነ ቃይ ሀቃ ባይታንቶ ኤራይ፤ ሽን ህንተንቱ ኤርክታ። 15 አሳይ ፕርድያ ኦግያን ህንተንቱ ፕርዲታ፤ ታን እት ኡራ ቦላካ ፕርድከ። 16 ሽን ታን ፕርድያዋ ግዶፐነ፥ ታ ፕርዳይ ቱማ፤ አያዉ ጎፐ፥ ታና ኪቴዳ ታ አቡ ታናና ደኤፐ አትን፥ ታን ታረካ ደእከ። 17 ላኡ አሳ ማርካተꬃይ ቱማ ግድያዌ ህንተንቱ ህግያን ጻፈት ኡቴዳ። ዛረ. 19:15 18 ታን ታባ ታ ሁጰዉ ማርካታድ፤ ቃይ ታና ኪቴዳ ታ አቡካ ታባ ማርካቴ” ያጌዳ።

19 ኡንቱንቱ፥ “ነ አቡ ሀቃን ደኢ?” ያጊደ የሱሳ ኦቼድኖ።

የሱስ ዛሪደ፥ “ህንተንቱ ታናካ ዎይ ታ አባካ ኤርክታ፤ ታና ኤሬዳዋ ግድንቶ፥ ታ አባካ ኤራንታ” ያጌዳ።

20 የሱስ ጌሻ ጎልያ ታማርሲደ፥ እሞታ ሚሻይ ኡትያ ሳጽንያ ማታን ሄዋ ሃሳዬዳ። አ ኦንነ ኦይቂቤና፤ አያዉ ጎፐ፥ አ ዎዲ ብሮ ጋክበና።

21 ቃይካ የሱስ ኡንቱንታ፥ “ታን ባና ህንተንቱ ታና ኮያና፤ ሽን ህንተንቱ፥ ህንተንቱ ናጋራን ሀይቃንታ። ታን ብያሳካ ባናዉ ህንተንቱ ዳንዳይክታ” ያጌዳ።

22 አይሁዳቱ፥ “እ፥ ‘ታን ብያሳ ህንተንቱ ባናዉ ዳንዳይክታ’ ያጌ፤ እ ባረና ባረካ ዎꬋኔየ?” ያጌድኖ።

23 የሱስ ዛሪደ፥ “ህንተንቱ ጋርሳ አሳ፤ ታን ቦላ አሳ። ህንተንቱ ሀ አላምያ አሳ፤ ታን ሀ አላምያ አሳ ግድከ። 24 ህንተንቱ፥ ህንተንቱ ናጋራን ሀይቃናዋ ታን ህንተንቶ ኦዴዳዌ ሀዋሳ፤ ታን ታና †ታን ታና፦ አይሁደ አሳዉ ዎልቃማነ ጌሻ ግዴዳ ጾሳ ሱንꬃይ “ያህዌህ” ግዲደ፥ ሀዋ ብለꬃይካ ታን ታና ግያዋ። ግድያዋ ህንተንቱ አማናና ꬋዮፐ፥ ህንተንቱ፥ ህንተንቱ ናጋራን ሀያንታ” ያጌዳ።

25 ኡንቱንቱ፥ “ኔን ኦኔ?” ያጊደ ኦቼድኖ።

የሱስ ዛሪደ፥ “ታን ታና። 26 ታን ህንተባ ሃሳይያባይነ ፕርድያባይ ዳሮባይ ደኤ። ሽን ታና ኪቴዳዌ ቱማንቻ፤ ቃይ ታን አፐ ስሴዳዋ አላምያ አሳዉ ኦዳይ” ያጌዳ።

27 እ ባረ አዉዋባ ሃሳይያዋ ኡንቱንቱ አኬክበይክኖ። 28 ሄዋ ድራዉ፥ የሱስ ኡንቱንታ፥ “ታና አሳ ናኣ ህንተንቱ ማስቃልያ ቦላ ፑደ ደንꬅያ ዎደ፥ ታን ታና ግድያዋነ ቃይ ታን ታ አቡ ታና ታማርሴዳዋዳን ሃሳይያዋፐ አትን፥ ታ ሸንያን አይነ ኦናዋ ህንተንቱ ኤራንታ። 29 ቃይ ታና ኪቴዳዌ ታናና ደኤ፤ ታን ኡባ ዎደ አ ናሸችያዋ ኦꬅያ ድራዉ፥ እ ታ ጻላላ አግቤና” ያጌዳ።

30 የሱስ ሄዋ ሃሳይሽን ስሴዳ ዳሮ አሳይ አ አማኔድኖ።

31 የሱስ ባረና አማኔዳ አይሁዳቱዋ፥ “ህንተንቱ ታን ታማርስያዎ አዛዘቶፐ፥ ቱሙ ታና ካልያዋንታ። 32 ህንተንቱ ቱማተꬃካ ኤራንታ፤ ቃይ ቱማተꬃይ ህንተንታ አይለተꬃፐ ከሳናዋ” ያጌዳ።

33 ኡንቱንቱ ዛሪደ፥ “ኑን አብራሃሞ ዛረ፤ ኑን ኦስነካ አይለትበይኮ። ያትና ኔን ዋጋደ፥ ‘አይለተꬃፐ ህንተንቱ ከሳንታ’ ጋይ?” ያጌድኖ።

34 የሱስ፥ “ታን ህንተንቶ ቱሙዋ ኦዳይ፤ ናጋራ ኦꬅያ ኦንነ ናጋራ አይልያ። 35 አይሊ ኡባ ዎደ ሶይን ደኤና፤ ሽን ናአይ መꬍናዉ ጎለን ደኤ። 36 ናአይ ህንተንታ አይለተꬃፐ ከሶፐ፥ ህንተንቱ አይለተꬃፐ ቱሙ ከሳንታ። 37 ህንተንቱ አብራሃሞ ዛረ ግድያዋ ታን ኤራይ፤ ሽን ታ ታማርስያዋ ህንተንቱ አከና ድራዉ፥ ታና ዎꬋናዉ ኮዪታ። 38 ታን ታ አቡ ታና በሴዳዋ ሃሳያይ፤ ቃይ ህንተንቱካ ህንተንቱ አዉዋፐ ስሴዳዋ ኦꬂታ” ያጌዳ።

39 ኡንቱንቱ ዛሪደ፥ “ኑ አቡ አብራሃማ” ያጌድኖ።

የሱስ ኡንቱንታ፥ “ህንተንቱ አብራሃሞ ናና ግዴደንቶ፥ እ ኦꬄዳ ኦሱዋ ማላ ኦꬃንታ። 40 ሽን ጾሳፐ ስሴዳ ቱሙዋ ኦዴዳ ታና ህንተንቱ ዎꬋናዉ ኮዪታ፤ አብራሃመ ሄዋዳን ኦꬅቤና። 41 ህንተንቱ፥ ህንተንቱ አዉ ኦꬄዳዋ ኦꬂታ” ያጌዳ።

ኡንቱንቱ ዛሪደ፥ “ኑን ዎሹማን ድቃላተꬃ የለትበይኮ፤ ኑዉ እት አዉ፥ ጾሳ ጻላላይ ደኤ” ያጌድኖ።

42 የሱስ ኡንቱንታ፥ “ህንተንቱ ጾሳ ናና ቱሙ ግዴደንቶ፥ ታና ሲቃና፤ አያዉ ጎፐ፥ ታን ጾሳ ማታፐ ያደ ሀዋን ደአይ። ታና እ ኪቴዳዋፐ አትን፥ ታን ታ ሸንያን ያበይከ። 43 ታን ታማርስያዋ ህንተንቱ አኬከናዌ አያሴ? ታን ታማርስያዋ ህንተንቱ አከና ድራሳ። 44 ህንተንቱ፥ ህንተንቱ አዉዋ ኢታ አያና ናና፤ ቃይ ህንተንቱ፥ ህንተንቱ አዉ አሞትያዋ ኦꬃናዉ ኮዪታ። እ ካሰፐ ዶሚደ፥ ሸምፑዋ ዎꬌዳዋ፤ ቱማተꬃይ አን ባይና ድራዉ፥ ቱማተꬃኮ ሺቅ ኤረና። እ ዎርዱዋ ሃሳይያ ዎደ፥ ባረፐ ሃሳዬ፤ አያዉ ጎፐ፥ እ ዎርዳንቻነ ቃይ ዎርዶካ አዉዋ። 45 ሽን ታን ቱሙዋ ሃሳይያ ድራዉ፥ ህንተንቱ ታና አማንክታ። 46 ህንተፐ ታና ናጋራ ኦꬅሽን በኣድ ጋናዉ ዳንዳይያዌ ኦኔ? ታን ቱሙዋ ሃሳይያዋ ግዶፐ፥ ታና አያዉ አማንክቴ? 47 ጾሳ አሳ ግዴዳ ኡራይ ጾሳይ ግያዋ ስሴ፤ ህንተንቱ ጾሳ አሳ ግደና ድራዉ፥ ጾሳይ ግያዋ ስስክታ” ያጌዳ።

48 አይሁዳቱ ዛሪደ፥ “ኑን ኔና፥ ‘ኔን ሳማርያ አሳ፤ ኔናን ኢታ አያናይ ደኤ’ ጊደ ባይዜዶ?” ያጌድኖ።

49 የሱስ ኡንቱንታ፥ “ታ ቦላ ኢታ አያናይ ባዋ። ታን ታ አባ ቦንቻይ፤ ሽን ህንተንቱ ታና ካዉሺታ። 50 ታን ታ ሁጲያዉ ቦንቹዋ ኮይከ፤ ሄዋ ታዉ ኮይያዌነ ፕርድያዌ ደኤ። 51 ታን ህንተንቶ ቱሙዋ ኦዳይ፤ ታን ታማርስያዋ ናግያ ኦንነ ኡባካ ሀይቀና” ያጌዳ።

52 አይሁዳቱ ዛሪደ፥ “ነ ቦላ ኢታ አያናይ ደእያዋ ኑን ሀእ ኤሬዶ። አብራሃመ ሀይቄዳ፤ ናባቱ ሀይቄድኖ፤ ሽን ኔን፥ ‘ታ ቃላ ናግያ ኦንነ ኡባካ ሀይቀና’ ያጋ። 53 ኔን ሀይቄዳ ኑ አዉዋ አብራሃሞፐ ዳራይ? ናባቱ ቃይ ሀይቄድኖ። ኔን ኔና ኦና ጋደ ቆፓይ?” ያጌድኖ።

54 የሱስ፥ “ታን ታና ቦንቾፐ፥ ታ ቦንቹ መላ፤ ህንተንቱ ኑ ጾሳ ግያ ታ አቡ ታና ቦንቼ። 55 ህንተንቱ አ ኤራና ꬋዮፐካ፥ ታን አ ኤራይ። ታን አ ኤርከ ጎፐ፥ ህንተንቱዋዳን ዎርዶ ግዳይ፤ ሽን ታን አ ኤራይ፤ ቃይ አ ቃላካ ናጋይ። 56 ህንተንቱ አዉ አብራሃመ፥ ታ ዩሳ ዎድያ በአናዉ ላሞቴዳ፤ በኢደካ ናሸቴዳ” ያጌዳ።

57 አይሁዳቱ ዛሪደ አ፥ “ነዉ ሀራይ አቶ እሻታሙ ላይꬃ ኩምቤናዌ አብራሃማ በኣዲ?” ያጌድኖ።

58 የሱስ ኡንቱንታ፥ “ታን ህንተንቶ ቱሙዋ ኦዳይ፤ አብራሃሞ የለታናፐካ ካሰ ታን ታና” ያጌዳ።

59 ሄዋ ድራዉ፥ ኡንቱንቱ የሱሳ ጫዳናዉ ሹቻ አኬድኖ፤ ሽን የሱስ ኡንቱንቱፐ ጌመቲደ፥ ጌሻ ጎልያፐ ቤዳ።