1 የሱስ ካልያዋንታ “ህንተንቱ ዎዛናይ ህርጎፖ፤ ጾሳን አማንተ፤ ታናንካ አማንተ። *ጾሳን አማንተ፤ ታናንካ አማንተ፦ ጾሳን አማኑ ህንተዉ ደኤ ጉሳይ፥ ታናንካ አማኑ ደኤ ጉሳ። 2 ታ አቡ ጎለን ዳሮ ሳአይ ደኤ። ሄዋ ግደነንቶ፥ ታን ህንተንቶ ሄዋ ኦድከ፤ ታን ህንተንቶ ሳኣ ጊግሳናዉ ባይ። 3 ታን ባደ ሳኣ ጊግሴዳዋፐ ጉይያን፥ ታን ደእያ ሳኣን ህንተንቱካ ደአና ማላ፥ ስማ ያደ ህንተንታ ታኮ አፋና። 4 ቃይ ህንተንቱ ታን ብያ ኦግያ ኤሪታ” ያጌዳ።

5 ቶማስ፥ “ጎዳዉ፥ ኔን ብያሳ ኑን ኤሮኮ፤ ኦግያ ዋኒደ ኤራናዉ ዳንዳዬቶ?” ያጌዳ።

6 የሱስ ዛሪደ፥ “ኦጊ፥ ቱሙነ ደኡ ታና፤ ታ ባጋናፐ አትን፥ ኦንነ ታ አቡኮ ባናዉ ዳንዳየና። 7 ህንተንቱ ታና ኤርያዋ ግድንቶ፥ ታ አባካ ኤራና፤ ሀእፐ ዶሚደ፥ ህንተንቱ አ ኤሪታነ ቃይ አ በኤድታ” ያጌዳ።

8 ፕልጶስ የሱሳ፥ “ጎዳዉ፥ አዉዋ ኑና በሳ፤ ሄዌ ኑዉ ግዳናዋ” ያጌዳ።

9 የሱስ ዛሪደ ያጌዳ፤ “ፕልጶሳ፥ ታን ሀዋ ኬና ዎድያ ህንተናና ደእናካ ታና ኤርኪ? ታና በኤዳ ኡራይ አዉዋካ በኤዳ፤ ያትና፥ ኔን ዋጋደ፥ ‘አዉዋ ኑና በሳ’ ጋይ?” 10 ታን አዉዋ ግዶን ደእያዋ ቃይ አዉካ ታ ግዶን ደእያዋ ኔን አማንኪ? ታን ህንተንቶ ኦድያ ቃላ ታን ታፐ ኦድከ፤ ሽን ታ ግዶን ደእያ አዉ ባረ ኦሱዋ ኦꬄ። 11 ታን አዉዋ ግዶን ደእያዋነ ቃይ አዉካ ታ ግዶን ደእያዋ ታና አማንተ፤ ሄዌ ꬋዮፐ፥ ታ ኦሱዋባዉ ታና አማንተ።

12 “ታን ህንተንቶ ቱሙዋ ኦዳይ፤ ታና አማንያ ኡራይ ታን ኦꬅያ ኦሱዋ ኦꬃና። ታን አዉዋኮ ብያ ድራዉ፥ ሄ ኡራይ ሀዋፐ አꬍያ ኦሱዋ ኦꬃና። 13 አዉ ናኣ ጋሱዋን፥ ታ ባጋና ቦንቼታና ማላ፥ ታ ሱንꬃን ህንተንቱ ዎስያ ኡባባ ታን ህንተንቶ ፖላና። 14 ህንተንቱ ታ ሱንꬃን ታና አያነ ኦቾፐካ፥ ታን ፖላና።

15 “ህንተንቱ ታና ሲቅያዋ ግዶፐ፥ ታ አዛዙዋ ናጋና። 16-17 ታን አዉዋ ዎሳና፤ ህንተናና መꬍናዉ ደአና ማላ፥ ቱማተꬃ አያና፥ ሀራ መንꬅያዋ ህንተንቶ እ እማና። ሀ ሳአይ ሄ ቱማተꬃ አያና በኤናዋነ ኤረናዋ ግድያ ድራዉ፥ አ አካናዉ ዳንዳየና፤ ሽን እ ህንተናና ደእያ ድራዉነ ህንተንቱ ግዶን ደአና ድራዉ፥ ህንተንቱ አ ኤሪታ።

18 “ታን ህንተንታ አዉነ አታ ባይና ዪኦ ናናዳን ህንተረካ አጋባሽከ፤ ታን ስማደ ህንተንቱኮ ያና። 19 ጉꬃ ዎድያፐ ጉይያን፥ አላሚ ታና ላኤንꬁዋ በኤና፤ ሽን ህንተንቱ ታና በአና፤ ታን ደኡዋን ደእያ ድራዉ፥ ህንተንቱካ ቃይ ደኡዋን ደአና። 20 ታን ታ አዉዋ ግዶን ደእያዋነ ህንተንቱ ታ ግዶን ደእያዋ፥ ቃይ ታን ህንተንቱ ግዶን ደእያዋነ ህንተንቱ ሄ ጋላስ ኤራና።

21 “ታ አዛዙ አ ማታን ደእያ አሳይ፥ ቃይ ሄ አዛዙዋካ ናግያዌ፥ እ ታና ሲቅያ አሳ። ታና ሲቅያ አሳ ታ አቡካ ሲቄ፤ ታንካ አ ሲቃይ። ታን አዉ ቆንጫና” ያጌዳ።

22 ይሁዳ አስቆሮታ ግደና ይሁዳይ የሱሳ፥ “ጎዳዉ፥ ኔን ነ ሁጲያ አላምያ በሰናን፥ ኑና በሳና ግያዋ ዋጋደ ጋይ?” ያጌዳ።

23 የሱስ፥ “ታና ሲቅያ ኦንነ ታ ቃላ ናጌ፤ ታ አቡ አ ሲቃናዋ፤ ቃይ ታ አቡነ ታንነ አኮ ዪደ፥ አናና ደአና። 24 ታና ሲቀና ኡራይ ኦንነ ታ ቃላዉ አዛዘተና፤ ህንተንቱ ስስያ ቃላይ ታና ኪቴዳ አዉዋፐ አትን፥ ታዋ ግደና።

25 “ታን ህንተናና እትፐ ደኣደ ሀዋ ህንተንቶ ኦዳድ፤ 26 ሽን ጌሻ አያናይ፥ መንꬅያዌ፥ አዉ ታ ሱንꬃን ኪታናዌ፥ ህንተንታ ኡባባ ታማርሳናዋ። ታን ህንተንቶ ኦዴዳ ኡባባካ ህንተንታ ሀሳይሳናዋ።

27 “ታን ሳሮተꬃ ህንተናና ዎꬃይ፤ ታ ሳሮተꬃ ህንተንቶ እማይ። ታን አላሚ እምያ ሳሮተꬃ ማላ እምከ። ህንተንቱ ህርጎፕተነ ያዮፕተ። 28 ታን ህንተንቶ፥ ‘ታን ባይ፤ ሽን ስማደ ህንተንቱኮ ያና’ ጌዳዋ ስሴድታ፤ ህንተንቱ ታና ሲቄዳዋ ግድንቶ፥ ታፐ አዉ ዳርያ ድራዉ፥ ታን አዉዋኮ ብያዋን ህንተንቱ ናሸታንታ። 29 ሄዌ ሀንያ ዎደ ህንተንቱ አማናና ማላ፥ ሄዌ ሀነናን ደእሽን፥ ሃናና ካሰታደ ታን ህንተንቶ ኦዳድ።

30 “ሀ አላምያ ሞድያዌ ይያ ድራዉ፥ ታን ሀዋፐ ስንꬃን ህንተናና ሎይꬃ ሃሳይከ። ታና እ አይነ ኦꬃናዉ ዳንዳየና። 31 ሽን ታን አዉዋ ሲቅያዋ አላሚ ኤራናዉ በሴ፤ ቃይ ታንካ አዉ ታና አዛዜዳዋዳን ኦꬃይ። ደንድ ኤቂተ፤ ሀዋፐ ቦይተ።