13
የሱስ ባረ ካልያዋንቱ ገድያ ሜጬዳ
1 ፓስጋ ቦንችያ ጋላሳይ ጋካናፐ ካሰቲደ፥ ሀ ሳኣፐ ሻከቲደ፥ አዉዋኮ ብያ ዎዲ ጋኬዳዋ የሱስ ኤሬዳ፤ ሀ ሳኣን ደእያ ባረዋንታ ኡባ ዎደ ሲቄዳ፤ ዉርሰꬃይ ጋካናዉ ኡንቱንታ ሲቄዳ።
2 የሱስነ ካልያዋንቱ ካዉዋ ሚሽን፥ ስሞና ናኣ ይሁዳ አስቆሮቱ የሱሳ አꬅ እማናዳን፥ ጻላሂ አ ቆፍስ ዎꬄዳ። 3 የሱስ ባረ አዉ ኡባባ አ ኩሽያን ዎꬄዳዋ፥ ቃይ ጾሳ ማታፐ እ ዬዳዋነ፥ ስሚደ አኮ ባናዋ ኤሬዳ። 4 የሱስ ምያሳፐ ደንድ ኤቂደ፥ ቦላ ባጋ ማዩዋ ቃር ዎꬂደ፥ ፖጻ ባረ ጼሳን ዳንጬዳ። 5 ሄዋፐ ጉይያን፥ ሃꬃ ሜቻ ሚሻን ትጊደ፥ ባረና ካልያዋንቱ ገድያ ሜቻነ ባረ ጼሳን ዳንጬዳ ፖጻን ቁጩሳ ዶሜዳ።
6 የሱስ ስሞን ጰጽሮሳኮ ዪና ጰጽሮሰ፥ “ጎዳዉ፥ ኔን ታ ገድያ ሜጫናዉ ሀናይዬ?” ያጌዳ።
7 የሱስ ዛሪደ አ፥ “ታን ኦꬅያዋ ኔን ሀእ ኤራካ፤ ሽን ጉየፐ ኤራናሳ” ያጌዳ።
8 ጰጽሮሰ፥ “ኔን ታ ገድያ ኡባካ ሜጫካ!” ያጌዳ።
የሱስ አ፥ “ታን ነ ገድያ ሜጫና ꬋዮፐ፥ ነዉነ ታዉነ እትፐተꬃይ ባዋ” ያጊደ ዛሬዳ።
9 ስሞና ጰጽሮሰ የሱሳ፥ “ጎዳዉ፥ ያቶፐ፥ ታ ገድያ ጻላላ ሜጮፓ፤ ታ ኩሽያካ ታ ሁጲያካ ሜጫ!” ያጌዳ።
10 የሱስ ዛሪደ፥ “ቦላ ሜጨት ድጌዳ ኡራይ ኦንነ ገድያፐ ሀራባ ሜጨታናዉ ኮሸና፤ አዉ ኡባሳይካ ጌሻ። ቃይ ህንተንቱካ ጌሻ፤ ሽን ኡባይ ጌሻ ግድክታ” ያጌዳ። 11 አያዉ ጎፐ፥ የሱስ ባረና አꬅ እማና ኡራይ ኦነንቶነ ኤሬዳ፤ እ፥ “ህንተንቱ ኡባይ ጌሻ ግድክታ” ጌዳዌ ሀዋሳ።
12 ኡንቱንቱ ገድያ ሜጬዳዋፐ ጉይያን፥ የሱስ ባረ ማዩዋ ማዪደ፥ ባረሳ ጉየ ስም ብ ኡቲደ ኡንቱንታ ያጌዳ፤ “ታን ህንተንቶ ኦꬄዳዋ አኬኪቴ? 13 ህንተንቱ ታና፥ ታማርስያዎነ ጎዳዉ ጊታ፤ ታን ሄ ህንተንቱ ግያዋ ግድያ ድራዉ፥ ሎይꬄድታ። 14 ታን ህንተንቶ ጎዳነ ህንተንታ ታማርስያዋ ግዳደ፥ ህንተንቱ ገድያ ሜጭያዋ ግዶፐ፥ ህንተንቱካ እቱ እቱዋ ገድያ ሜጫናዉ በሴ። 15 አያዉ ጎፐ፥ ታን ህንተንቶ ኦꬄዳዋዳን፥ ህንተንቱካ ኦꬃና ማላ፥ ህንተንቶ ሌምሱዋ ግዳድ። 16 ታን ህንተንቶ ቱሙዋ ኦዳይ፤ ቆማይ ባረ ጎዳፐ አና። ቃይ ኪተቴዳ ኡራይካ ባረና ኪቴዳዋፐ አና። 17 ህንተንቱ ሄዋ ኤሪደ ኦꬅያዋ ግዶፐ አንጀቴዳዋንታ።
18 “ታን ህንተንቶ ኡባባ ሃሳይከ። ታን ዶሬዳዋንታ ኤራይ፤ ሽን ጾሳ ማጻፋይ፥ ‘ታን ባርሴዳዌ ታ ኩሽያ ሳኤዳ’ ጌዳዌ ቱማ ግዳናዉ በሴ። ማዝ. 41:9 19 ሄዌ ሀንያ ዎደ ታን ታና *ታን ታና፦ ዮህ። 8:24 ጼልተ። ግድያዋ ህንተንቱ አማናና ማላ፥ ሄዌ ሀናናፐ ካሰታደ ህንተንቶ ሀናናዋ ኦዳይ። 20 ታን ህንተንቶ ቱሙዋ ኦዳይ፤ ታን ኪትያ ኦናነ ሞክያ ኡራይ ታናካ ሞኬ፤ ቃይ ታና ሞክያ ኦንነ ታና ኪቴዳዋ ሞኬ” ያጌዳ።
የሱስ ባረና አꬅ እማናዌ ኦነንቶ ካሰቲደ ኦዴዳ
(ማቶሳ 26:20-25፤ ማር. 14:17-21፤ ሉቃሳ 22:21-23)
21 የሱስ ሄዋ ሃሳዬዳዋፐ ጉይያን፥ ባረ ዎዛናን ዳሮ መቶቲደ፥ “ታን ህንተንቶ ቱሙዋ ኦዳይ፤ ታና ህንተፐ እቱ አꬅ እማናዋ” ጊደ ቆንጭያን ኦዴዳ።
22 እ ኦና ሃሳይንቶነ፥ ካልያዋንቶ ኡባካ ኤረተናን እጽና፥ እቱ እቱዋ ጼሌድኖ። 23 የሱሳ ካልያዋንቱፐ እቱ፥ የሱስ ሲቅያዌ፥ የሱሳ ማታን ኡቴዳ። 24 ሄዋ ድራዉ፥ ስሞና ጰጽሮሰ ሄ ካልያዋ ስምኢደ፥ “እ ኦና ግንቶ፥ አነ አ ኦቻ” ያጌዳ።
25 ሄዋ ድራዉ፥ ሄ ካልያዌ የሱሳ ሀይꬃኮ ሺቂደ፥ “ጎዳዉ፥ እ ኦኔ?” ያጌዳ።
26 የሱስ ዛሪደ፥ “ታን ኡክꬃን ጫባ ቱሻደ እምያዌ አ” ያጌዳ። ቃይ ኡክꬃ መንꬅ አኪደ፥ ጫባ ቱሺደ፥ ስሞና ናኣ፥ ይሁዳ አስቆሮታዉ እሜዳ። 27 ይሁዳይ ኡክꬃ መንꬆዋ አኮዋፐ ጉይያን፥ ሴጻናይ ኤለካ ይሁዳን ገሌዳ። የሱስ አ፥ “ኔን ኦꬃናዋ ኤሌላ ኦꬃ!” ያጌዳ። 28 ሽን ሄ ሳኣን ኡቴዳዋንቱፐ ኦንነ የሱስ ሄዋ አ አያዉ ጌደንቶነ ኤርቤና። 29 ይሁዳይ ሚሻ ቃርጪትያ ኦይቂያ ድራዉ፥ ካልያዋንቱፐ እቱ እቱ የሱስ ይሁዳ፥ “ፓስጋ ቦንችያ ጋላሳዉ ባረና ኮሽያዋ ባደ ሻማ ዎይ ህዬሳዉ ምጹዋታ እማ ጌዳ” ያጊደ ቆፔድኖ።
30 ይሁዳይ ኡክꬃ መንꬆዋ አኪደ፥ ኤለካ ካረ ከሴዳ፤ ሄ ዎደ ሳአይ ቃማ።
ኦራꬃ አዛዙዋ
31 ይሁዳይ ካረ ከሴዳዋፐ ጉይያን፥ የሱስ ያጌዳ፤ “ሀእ ታን አሳ ናአይ ቦንቼታድ: ጾሳይካ ታ ባጋና ቦንቼቴዳ። 32 ጾሳይ ታ ባጋና፥ አሳ ናኣ ባጋና ቦንቼቶፐ፥ እ ባረ ሁጰዉ ታና አሳ ናኣ ቦንቻናዋ፤ ቃይ እ ታና ኤለካ ቦንቻናዋ። 33 ታ ናቶ፥ ታን ህንተናና ዳሮ ዎድያ ጋምእከ። ህንተንቱ ታና ኮያና፤ ሽን ታን አይሁዳቱዋ፥ ‘ታን ብያሳ ህንተንቱ ባናዉ ዳንዳይክታ’ ጌዳዋዳን፥ ህንተዉካ ሀእ ኦዳይ። 34 ታን ህንተንታ ኦራꬃ አዛዙዋ አዛዛይ፤ እቱ እቱዋ ሲቅተ። ታን ህንተንታ ሲቄዳዋዳንካ፥ ህንተንቱ እቱ እቱዋ ሲቃና በሴ። 35 ህንተንቱ እቱ እቱዋና ሲቀቶፐ፥ ታና ካልያዋንታ ግድያዋ አሳይ ኡባይ ኤራና” ያጌዳ።
ጰጽሮሰ ካዳናዋ የሱስ ካሰቲደ ኦዴዳ
(ማቶሳ 26:31-35፤ ማር. 14:27-31፤ ሉቃሳ 22:31-34)
36 ስሞን ጰጽሮሰ የሱሳ፥ “ጎዳዉ፥ ኔን ሀቃ ባይ?” ያጌዳ።
የሱስ ዛሪደ፥ “ታን ብያሳ ኔን ሀእ ታና ካላናዉ ዳንዳያካ፤ ሽን ጉየፐ ካላና” ያጌዳ።
37 ጰጽሮሰ፥ “ጎዳዉ፥ ታን ኔና ሀእ ካላናዉ አያዉ ዳንዳይክታ? ታን ነ ድራዉ፥ ሀይቃናዉካ ጊጋ ኡታድ!” ያጌዳ።
38 የሱስ ዛሪደ፥ “ታ ድራዉ ሀይቃናዉ ሀእ ቱሙ ጊጋ ኡታዲ? ታን ነዉ ቱሙዋ ኦዳይ፤ ኩቱ ዋሳናፐ ካሰ፥ ኔን ታና ሄዙ ገደ ካዳናሳ” ያጌዳ።