1 ሄዋፐ ጉይያን፥ ቴማና ቢታፐ ዬዳ ኤልፋዝ ዛሪደ፥ ሀዋዳን ያጌዳ፤ 2 “እት ኡራይ ኔናና ጻሊደ ሃሳዮፐ፥ ኔን ሀንቀታኒ? ሽን ሃሳየናንነ አጋናዌ ኦኔ? 3 በአ፥ ኔን ዳሮቱዋ ታማርሳዳ፤ አርጋጬዳ ኩሸቱዋካ ምንꬃዳ። 4 ነ ቃላይ ꬉበቴዳዋንታ ምንስ ኤሴ፤ ዳቡሬዳ ጉልባታቱዋካ ምንꬄ። 5 ሽን ሀእ መቱ ኔኮ ዬዳ፤ ኔን ገንጫበይካ። መቱ ኔና ጋክና፥ ኔን ሻቢረታዳ። 6 ኔን ጾሳዉ ያይያዌ ኔና አማንꬂደ ዎኔ? ነ ሀመትያ ሱረ ሀመታይ ነዉ ህዶታ ግደኔ?

7 “አነ ኔን ሀእ ቆፓ: ጌሻ ግዴዳ አሳን ꬋዬዳዌ ኦኔ? ዎይ ሱረ አሳይ ሀቃን ꬎቆለቲደ ꬋይ ኤሪ? 8 ታን በኤዳዋዳን፥ ኢታተꬃ ጎሺደ፥ መቱዋ ዘርያዋንቱ ኢታተꬃነ መቱዋ ጫካና። 9 ኡንቱንቱ ጾሳፐ ከስያ ሸምፑዋን ፑነቲደ ባያና፤ አ ሀንቁዋ ሱሉዋንካ ኡንቱንቱ ሜተት ꬋያና። 10 ኢታቱ ጉድያነ ዳርያ ጋሞቱዋ ማላ፤ ሽን ጾሳይ ኡንቱንቱ አቻ መንꬄ። 11 ሻንካቲደ ኦይቄዳዋ ማናዉ አቻ ꬋያ ጋሞቱዋዳን፥ ኢታቱ ኮሻን ሀይቂኖ፤ ኡንቱንቱ ናናቱካ ላለቲኖ።

12 “እት ጋላስ እት ጹራይ ታኮ ዬዳ፤ ሄ ጹራይ ሳሱከቲደ፥ ታ ሀይꬃን ዎꬌዳ። 13 ቃማ ገምእሹዋ ፓኑርሽን፥ ታና ኢታ አኩሙ ኡንኤꬄዳ።ኢዮባ 33:15 14 ታና ያሻይነ ኮኮርሳይ ኦይቄዳ፤ ታ መቀꬃ ኡባ ጋጅ ጋጅሴዳ። 15 ጫርኩ አꬊደ ታ ሶምኡዋ ፕቲደ፥ ታ ስንꬃና አꬌዳ፤ ዳጋማፐ ደንዴዳዋን ታ ቦላን ደእያ ብናናይ ኤቄዳ። 16 እ ታ ስንꬃን ኤቄዳ፤ ሽን እ አየንቶ ታን ሻካደ ኤራናዉ ዳንዳያበይከ። ሄዋፐ ጉይያን፥ ጮኡ ጌዳሳፐ ሀዋዳን ያግያ ኮሻ ስሳድ፤ 17 ‘ሀይቂያ አሳይ ጾሳ ስንꬃን ጽሉዋ ግዲደ ቤታናዉ ዳንዳዪ? ዎይ አሳይ ባረና መꬌዳዋ ስንꬃን ጌሻ ግዲደ ቤታናዉ ዳንዳዪ? 18 ጾሳይ ባረ ቆማቱዋን አማነተና፤ ባረ ኪታንቻቱዋንካ ባይዙዋ ደሜ። 19 ያትና፥ ኡርቃፐ መቴዳዋንቱን፥ ኡንቱንቱ ደኡዋ ባሱ ባና ግዴዳዋንቱን፥ ብልኣፐካ ኤሌሊደ ዎቂያዋንቱን አይ ኬሻ ዳሮ ባይዙ ቤታንዴሻ! 20 ዎንታ ፓጻ ደእያ አሳይ ኦማርስ ጋካናዉ፥ ኦንነ ሀሳየናን ደእሺና ሀይቄ። 21 ኡንቱንቱ ደኡዋ ሽካሊ ሾደት ዎꬍያ ዎደ፥ ኡንቱንቱ አꬌዳ ኤራተꬃ ደመናን ሀይቂ ባዪኖ’ ያግያዋ ስሳድ።