1 “ኢዮባ፥ አነ ጼሳ! ሽን ኦኔ ነዉ ኮያናዌ? ኪታንቻቱዋፐ ኦኮ ስማኒ? 2 ኤያ ኡራ ላንጪ ዎꬌ፤ አኬካይ ፓጬዳ ኡራካ ቃናቲ ꬋይሴ። 3 ኤያ ኡራይ ምኒደ ደእያዋ ታን ታ ሁጲያን በኣድ፤ ሽን ኤለካ ታን አ ጎልያ ሸቃድ። 4 አ ናናቱ ሳሩ ባይና ሳን ደኢኖ፤ ኡንቱንቱ ችሎታን፥ ማዲደ ሃሳይያዌ ባይና ሳን ፕርዳ ꬋዬድኖ። 5 እ ሺሼዳ ካꬃ ኮሻቴዳዋንቱ ማና፤ አጉንꬃ ግዶን ሞኬዳዋካ ኡንቱንቱ አዉ አግክኖ። ሳመቴዳዋንቱ አ ማጹዋ አካናዉ ያረቲኖ። 6 ቱጋይ ባናፐ ከሰና፤ መቱካ ቢታፐ ሞከና። 7 ታማይ ፑደ ፕርያዋዳን፥ አሳይ መቶ የለቴዳ።

8 “ታና ግድንቶ፥ ታን ጾሳኮ ሺቃና፤ ታ ሞቱዋካ አ ስንꬃን ዎꬃና። 9 ፕልጊደ ኤራናዉ ዳንዳየተና ዎልቃማባቱዋነ ፓይዱ ባይና ኦራꬃባቱዋ ጾሳይ ኦꬄ። 10 እራ ቢታን ቡክሴ፤ ጋድያዉካ ሃꬃ የዴ። 11 ቶሸቴዳዋንታ ቦንቼ፤ ካዮትያዋንታካ ምንꬂደ ናሸቼ። 12 ገናንቻቱዋ ሀልቹዋካ ሀልሴ፤ ሄዋ ድራዉ፥ ኡንቱንቱ ኩሽያ ኦሱ ፖለተና። 13 አꬌዳ ኤራንቻቱዋ እ ኡንቱንቱ ገንያን ኦይቄ፤ ጌላቱዋ ማቁዋካ አꬅ የጌ። 1 ቆሮ. 3:19 14 ኡንቱንቶ ጋላሳይ ꬉማና፤ ጋላሳ ሴታንካ ኡንቱንቱ ሄካ ብላህያዳን ታታፋና። 15 ህዬሳቱዋ እ ኡንቱንቱ ሞርከቱ ማሻፐ አሼ፤ እ ኡንቱንታ ዎልቃማቱዋ ኩሽያፐካ ዎꬅ አኬ። 16 ሄዋ ድራዉ፥ ህዬሳቶ ህዶታይ ደኤ፤ ኢታ አሳቱዋ እ ጮኡ ኦꬄ።

17 “ጾሳይ ሴርያ ኡራይ አንጀቴዳዋ፤ ሄዋ ድራዉ፥ ኡባ ዳንዳይያ ጾሳ ሴራ ካꬎፓ።ሌም. 3:11፤ እብራ. 12:5-6 18 እ ማዱꬄ፥ ሽን ማዱꬃ ቃቼ። እ ደቼ፥ ሽን አ ኩሺ ꬋሌ።ሆሰ 6:1 19 ኡሱፑን ቆሞ መቶባፐ እ ኔና አሻና፤ ላፑንꬅካ ኔና ቦቼና። 20 ኮሻ ዎደ ሀይቁዋፐ፥ ኦላ ዎደካ ማሻ ቃራፐ እ ኔና አሻና። 21 እ ኔና እንጻርሳ ልሱዋፐ ገንꬃና፤ ባሻይ ጋክያ ዎደካ ያያካ። 22 ባሻ ቦላነ ኮሻ ቦላ ኔን ሚጫና፤ ባዞ ዶአቶካ ያያካ። 23 ነ ጎሽያ ጎሻን ሹቻይ ደኤና፤ ባዞ ዶአቱካ ኔናና ሳሮ ግዳናዋንታ። 24 ነ ዱንካኒ ሳሮ ግድያዋ ኔን ጌሻደ ኤራና፤ ነ ዶርሳቱዋ አቁዋካ ኔን ጾሞስያ ዎደ፥ ኡንቱንቱፐ እቱነ ፓጨና። 25 ነ የለታይ ጮራታናዋነ ነ ዘረꬃቱካ ደምባ ማታ ኬሻ ግዳናዋ ኔን ኤራና። 26 ዛርጋ ቱኩ ባረ ዎድያን ኡዱማ ይያዋዳን፥ ኔን አዱሳ ላይꬃ ደኣደ፥ ዱፉዋ ባና። 27 ኢዮባ፥ ኑን ሀዋ ኡባ ፕልግ ጼሌዶ። ሄዌ ቱማ ግድያ ድራዉ፥ ሄዋ ስሳደ፥ ነዉ አካ” ያጌዳ።