1 ኢዮብ ዛሪደ፥ 2 “ታ ዋዪነ ታ ካዩ ኡባይ ሚዛናን ልከቴረነ! 3 ያትንቶ አባ ዶና ሻፍያፐካ አꬍ ዴጻናዋ። ሄዋ ድራዉ፥ ታ ቃላይ ጻላ ግዴዳ። 4 ኡባ ዳንዳይያ ጾሳ ዎንዳፍያ ፖꬃይ ታና ጫዴድኖ፤ ታ ቦላይካ ኡንቱንቱ ይሻ ኡሼ። ጾሳ ዳጋንꬅያ ቦሻይ ታ ዩሹዋ ዶዴዳ። 5 ሀሪ ማታይ አ ስንꬃን ደእሺና ዋሲየ? ዎይ ቦራይ ዳላ ደሚደ ጻጊየ? 6 ማልኤናባይ ማጽኒ ገለናን ሜተቲየ? ዎይ ቁቁልያ ግዶ ሃꬃይ ሎቅሎቅየ? 7 ሄዋ ማላ ቁማ ታን ሸነታይ፤ ሄዋ ማላ ቁማ ሞፐ፥ ታና ሳኬ።

8 “ታን ዎሴዳ ዎሳይ ጋኬረኔ! ጾሳይካ ታ ዎዛና አሙዋ እሜረኔ! 9 ጾሳይ ታና መንሬꬄረኔ! እ ባረ ኩሽያ የዲደ፥ ታ ደኡዋ ቱራ ዱꬄረኔሻ! 10 ጌሻ ጾሳ ቃላ ካዳቤና ድራዉ፥ ታዉ ሳኩ ዳሮፐነ፥ ምንꬁዋ ግዴረነሻ። 11 ታን ደኡዋን ደአናዉ ታዉ አይ ዎልቃይ ደኢ? ታን ዳንዳያናዉ፥ ታ ዉርሰꬃይ አዬ? 12 ታ ዎልቃይ ሹቻ ዎልቃ ማሌ? ዎይ ታ አሹ ናሃስያ ብራታ ማሌ? 13 ታና ማዳናዉ አይ ዎልቃይነ ታዉ ባዋ፤ ማዱዋ ደማናዉ ታን ብያ ሳአይካ ደኤና።

14 “መቱዋን ደእያ ኡራይ ኡባ ዳንዳይያ ጾሳዉ ያይያዋ አግንቶካ፥ አ ላገቱ አዉ ኬካተꬃ በሳናዉ ኮሼ። 15 ታ እሻቶ፥ ህንተ እራይ ቡከና ዎደ መልያ ሻፋ ማላ፥ ታና ጭሚታ። 16 ባልጉዋ አግናቱዋን ሄ ሻፋይ ኦርዶ ሻቻን ኩሚደ ካመቴ። 17 ሽን ቦኒ ጋክያ ዎደ፥ ሄ ሻቻይ ሙሺደ፥ ሃꬃ ከሴ፤ ሃꬃይካ ሄ ሳኣፐ ꬋዬ። 18 ጫና መህያ ላጊደ ብያ ዛልአንቻቱ ሃꬃ ኮያናዉ ባረንቱ ኦግያፐ ጋጻ ከሲደ፥ መላ ቢታን ቶይላካቲደ፥ ሀይቂ ꬋዪኖ። 19 ቴማ ቢታ ዛልአንቻቱነ ሳባ ቢታ ኦግያዋንቱ ሃꬃ ደማና ጊደ፥ ህዶታ ዎꬂኖ። 20 ሽን ኡንቱንቱ አማነቲደ ኮይና ꬋዬዳ ድራዉ፥ ዬላቴድኖነ ህዶታ ቃንጼድኖ። 21 ህንተካ ታዉ ሄ ሻፋቱዋ ማላ ግዴድታ፤ ታና ጋኬዳ መቱዋ በኢደ ያዬድታ። 22 ታን ህንተና፥ ‘ታዉ እትባ እምተ’ ዎይ፥ ‘ህንተ አቁዋፐ ታ ድራዉ አሳዉ ማታይያ እምተ’ ጋድታ? 23 ዎይ፥ ‘ታና ታ ሞርክያ ኩሽያፐ አሽተ’ ዎይ፥ ‘ኡቅንያዋንቱ ኩሽያፐ ታና ዎዝተ’ ጋድታ?

24 “ህንተ ታና ታማርስተ፤ ታን ጮኡ ጋና። አያ ባይዛድታንቶ፥ አነ ታና በስተ። 25 ቱማ ግዴዳ ቃላይ አይ ኬና ዎልቃሜ! ሽን ህንተ ፓሉማይ ኡባይ ታና አያነ ሴረና። 26 ህንተ ታን ሃሳይያ ሃሳያ ጫርኩዋ ማላ ጊደ ቆፒታ። ያትና፥ ታን ህዶታ ቃንጻደ ሃሳይያ ሃሳያ አያዉ ቆሪቴ? 27 አዉ ባይናዋንታ ሻክ አካናዉ ህንተ ሳማ የጊታ፤ ህንተ ላግያካ ዛልአናዉ ዋሽሲታ። 28 አነ ትሽ ኦꬂደ፥ ታና ጼልተ። ታን ህንተ ስንꬃን ዎርዱዋ ሃሳይከ። 29 ሀያና፥ አነ ዛረꬂደ ቆፕተ፤ ታን ጽሉዋ ግድያ ድራዉ፥ ታ ቦላ ጮ ፕርዶፕተ። 30 ታን ታ እንጻርሳን ዎርዶቴዳዋ ማላቲ? ታ ዶናይ ልክያ ልከ ግደናዋፐ ሻኪደ ሃሳያናዉ ዳንዳየኔ?