1 ሄዋፐ ጉይያን፥ ሹሀ ቢታፐ ዬዳ ብልዳደ ዛሪደ፥ ሀዋዳን ያጌዳ፤ 2 “ኔን ሀዋ ማላባ አዉደ ጋካናዉ ሃሳያይ? ነ ዶናፐ ከስያ ቃላይ ዎልቃማ ጎትያ ማላ። 3 ኡባ ዳንዳይያ ጾሳይ ፕርዳነ ጽሎባ ጌላዪ? 4 ነ ናናቱ ጾሳ ቦላ ናጋራ ኦꬄዳ ድራዉ፥ እ ኡንቱንታ ኡንቱንቶ በስያዋዳን ሙሬ። 5 ሽን ኔን ጾሳኮ ስሞፐ፥ ኡባ ዳንዳይያ ጾሳ ዎሶፐ፥ 6 ኔን ጌሻነ ሱረ ግዶፐ፥ እ ነ ድራዉ ደንዲደ፥ ኔና ማዳና፤ እ ካሰ ነ ደኦ ዛሪደ ዎይታና። 7 ነ ዶመꬃይ ጉꬃ ማላቶፐነ፥ ነ ዉርሰꬃይ ሎይꬅ ዳራና።

8 “ካሰ የለታ አነ ኦቻ፤ ኑ ማይዛ አዎቱ አያ አያ ታማሬደንቶ፥ ኮያደ ደማ። 9 አያዉ ጎፐ፥ ኑን ዝኖ የለቴዳዋንታ፤ ኑን አያነ ኤሮኮ። ኑን ሀ ሳኣን ደእያ ላይꬃይ ኩዋ ማላ። 10 ኡንቱንቱ ኔና ታማርስኖ፥ ነዉ ኦድኖነ ባረንቱ አኬኬዳዋፐ ሃሳይኖ።

11 “ጫሪ ጫርያ ሃꬃይ ባይና ሳን ድጫናዉ ዳንዳየና፤ ማቃይካ ሃꬅ ባይና ሳን ሞካናዉ ዳንዳየና። 12 ብሮ ድጪደ፥ ቃንጸተናን ደኢድ፥ ማታፐካ ኤለ ሹላና። 13 ጾሳ ዶግያ አሳ ኡባ ዉርሰꬃይ ሄዋ ማላ፤ ጾሳይ ባይና ኡራ ህዶታይካ ꬋያና። 14 እ አማነትያዌ መእ ክችያዋ፤ እ ጬቀትያባይካ ሻራሮታ ጎልያ ማላ። 15 እ ባረ ሻራሮታት ጎልያን ዘምፔ፥ ሽን ኤቀና፤ እ አ ኦይቃና፥ ሽን አ ዳንዳየና። 16 እ አዋን ሃꬃ ኡሼዳ አታክልትያ ማላ፤ አታክልትያ ሳኣ ፕን ከሳና ጋካናዉ ዳሼ። 17 ኬላ ሹቻ ዩሹዋን ባረ ጻጱዋ የዴ፤ ሹቻቱዋ ግዶንካ ባረዉ ሳኣ ኮዬ። 18 ሽን እ ባረ ሳኣፐ ሾደት ꬋይንቶ፥ ሄ ሳአይ አ፥ ‘ታን ኔና በአበይከ’ ያጋና። 19 በአ፥ ኢታ አሳቱዋ ናሸቻይ ሀዋ ማላ። ሀራ አሳቱካ ዪደ፥ ኡንቱንቱ ሳኣ ኦይቂኖ።

20 “ጾሳይ ቱሙዋፐ ቶሺ ባይና አሳ ኦል ኤረና፤ ኢታ ኦꬅያዋንታ ቃይ ማደና። 21 እ ዛሪደ፥ ኔና ሚጭሳናነ እልልሳና። 22 ኔና እጽያዋንቱ ዬላ ማያና፤ ኢታቱዋ ጎሊ ꬋያና” ያጌዳ።