1 ሄዋፐ ጉይያን፥ ኢዮብ ዛሪደ፥ ሀዋዳን ያጌዳ፤ 2 “ኤ፥ ሀዌ ህንተ ግያዌ ቱማ ግድያዋ ታን ኤራይ። ሽን አሳይ ጾሳ ስንꬃን ጽሉዋ ግዳናዉ ዋን ዳንዳዪ?ኢዮባ 4:17 3 አናና እት ኡራይ ፓሉመታናዉ ኮዮፐ፥ ሄ ኡራይ እ ኦችያ ሻኡ ኦሻፐ እቱዋነ ዛራናዉ ዳንዳየና። 4 ጾሳይ ባረ ዎዛናን አꬌዳ ኤራንቻ፤ ባረ አቢያንካ ዳሮ ዎልቃማ። አናና ኤቀቲደ ጾነትቤናዌ ባዋ። 5 ኤረናን ደእሺና፥ ꬎቃ ደረቱዋ እ ኡንቱንቱ ሳኣፐ ድጌ፤ ባረ ሀንቁዋንካ አꬅ የጌ። 6 እ ቢታ አ ሳኣን ቃꬄ፤ ቢታ ቱቀቱዋካ ዪቂዪቂሴ። 7 አዋይ አዋጸናዳንነ ጾልንተቱ ፖኤናዳን አዛዛናዉ ዳንዳዬ። 8 እ ባረካ ሳሎቱዋ ምጬዳ፤ አባ ቤታ ቦላንካ ሀመቴ። 9 ጾሳይ ዎጋ ቤርያ፥ ኦርዮና፥ ፕልያድሳ ግያ ጾልንተቱዋ ጩጉዋነ ሄዋዳንካ ገድሳ ባጋና ደእያ ጾልንተቱዋ ጩጎቱዋ መꬌዳዋ። 10 ፕልጊደ ኤራናዉ ዳንዳየተና ዎልቃማቱዋ፥ ፓይዱ ባይና ኦራꬃባቱዋ እ ኦꬄ።

11 “ጾሳይ ታኮ ሺቅንቶካ፥ ታን አ በአናዉ ዳንዳይከ፤ እ ታ ምይያና አꬍንቶካ፥ ታን እ ሄዋን ደእያዋ ኤራናዉ ዳንዳይከ። 12 እ ባረ ኮዬዳዋ አክና፥ አ ኦንነ ድጋናዉ ዳንዳየና። ‘ዋታይ?’ ያጊደ አ ኦቻና አሳይ ባዋ። 13 ጾሳይ ባረ ሀንቁዋ ተኤና፤ ራኣባ ግያ ዳዊያ ማድያ ባረ ሞርከቱዋ ባረ ገድያፐ ጋርሳዉ አꬂደ የꬌ።

14 “ያትና፥ ታን አ ኦሻ ዛራናዉ ሎኦ ቃላ ሀቃፐ ደማናዉ ዳንዳያይታ? 15 ታን ጽሉዋ ግድንቶካ፥ ፕርድያ ጾሳይ ታና ማራናዳን ዎሳናፐ አትና፥ ታን አ ቦላ ሃሳይከ። 16 ታን አ ጼስና፥ እ ታዉ ኮይንቶካ፥ ‘ታ ኮሻ ስሴዳ’ ጋደ አማንከ። 17 እ ታና ጎትያን መንሬꬄ፤ ጋሱ ባይናን እ ታ ማዱꬃ ዳርሴ። 18 ታና ሸምፑዋካ ሸምፕሰናን ድጌ፤ እ ታ ደኡዋ ጫሙዋን ኩንꬄዳ። 19 ዎልቃባ ሃሳዮፐ፥ እ ዎልቃማ። ፕርዳዋ ሃሳዮፐ፥ አ ጼሲደ፥ ፕርዳ ጎለ ሺሻና አሳይ ባዋ። 20 ታን ጽሉዋ ግድንቶካ ታ ዶናይ ታና ባይዛንቻ ከሴ፤ ታን ቶሺ ባይና አሳ ግድንቶካ፥ እ ታና ጌላ ከሴ።

21 “ታን ቶሺ ባይና አሳ። ሽን ታ ደኡዋ ዶስከነ ካꬋይ። 22 ዱማተꬃይ ባዋ፤ ሄዋ ድራዉ፥ ታን፥ ‘እ ቶሺ ባይናዋንታነ ኢታቱዋ ላኡዋካ እትፐ ꬋይሴ’ ያጋይ። 23 ባሻይ ጽሎ አሳቱዋ ቆፐናን ዎꬍያ ዎደ፥ ጾሳይ ቅሊጬ። 24 ጾሳይ ሀ ሳኣ ኢታ አሳቶ አꬂደ እሜዳ፤ ፕርድያዋንቱ አይፍያካ ጎዜዳ። ሀዋ ኡባ ኦꬄዳዌ አ ግዳናፐ አትና፥ ሀራይ ኦኔ?

25 “ታ ደኡዋ ላይꬃቱ ዎꬃ ዎጽያ ኡራፐካ አꬊደ ኤሌሊኖ፤ ኡንቱንቱ ሎኦባ በኤናን ፓሊደ ꬋዪኖ። 26 ታ ደኡዋ ላይꬃቱ ማቃ ዎንግርያዳን ኤሌሊኖ፤ አርጋንꬃይ ባረዉ ምያዋ ኦይቃናዉ ሳሉዋፐ ዱገ ፓልያዋዳን ፓሊኖ። 27 ታን፥ ‘ታ ዙዙንꬃ ዶጋና፤ ታ ሶምኡዋካ ꬉምስያዋ አጋደ ፓሽካና’ ያጎፐ፥ 28 ኔን ታና ጌሻ ጌናዋ ታን ኤራይ፤ አያዉ ጎፐ፥ ታና ጋካና ዋይያ ኡባዉ ታን ያያይ። 29 ያትና፥ ታን ባይዛንቻ ግዳ ክቻድፐ አትና፥ ጮ መላ አያዉ ዳቡራይታ?

30 “ታን ታ ቦላ ሀራይ አቶ ሳሙናን ሜጨታንቶካ፥ ታ ኩሽያ ሀንጪጭያን ሜጫንቶካ፥ 31 ኔን ታና ኡርቃ ኦላን ኦላና፤ ታ ማዩካ ታና ሸነታና። 32 ታን አዉ ዛሩዋ እማና ጋናዉ፥ ጾሳይ ታ ማላ አሳ ግደና። ሄዋ ድራዉ ፕርዳዉ ቦይተ ጋናዉ ዳንዳይከ። 33 ሽን ባረ ኩሽያ ኑ ላኡዋ ቦላ ዎꬂደ፥ ኑና ስገꬅያ አሳይ ኑ ግዶን ደኤረኔሻ! 34 አቤት ጾሳዉ፥ ታና ሙርያዋ አጋ፤ ታና ዳጋንꬅያዋነ ያሽስያዋ አጋ። 35 ያቶፐ፥ ታን አዉ ያየናን ሃሳያና፤ ሽን ሀእ ዳንዳይከ።