1 “ታን ታ ደኡዋ ካꬋይ! ሄዋ ድራዉ፥ ታን ሞተታናፐ አትና፥ ጮኡ ጊከ፤ ታን ምሸታደ ሃሳያይ። 2 ታን ጾሳ ሀዋዳን ያጋይ: ሀእ ታ ቦላ ፕርዶፓ፤ ኔን ታና ሞትያ ሞቱ አየንቶነ ታዉ ኦዳ። 3 ኔን ታና ኡቁናናዉ በሲ? ኔን ነ ኩሽያን መꬌዳ ኡራ ካꬍያዌ፥ ቃይ ኢታቱዋ ሀልቹዋ ፖልስያዌ ሎኤ? 4 ነ አይፊ አሳ አይፍያ ማሌ? አሳይ ጼልያዋዳን ኔን ጼላይ? 5 ነ ደኡዋ ላይꬃይካ አሳዋ ኬሼ? ነ ደኡዋ ላይꬃይካ አሳ ላይꬃይዳ ቃንꬄ? 6 ያትና፥ ታ ባይዙዋ አያዉ ኮያይ? ታ ናጋራካ አያዉ ቆራይ? 7 ታን ባይዛንቻ ግደናዋነ ነ ኩሽያፐ ታና ኦንነ አሻናዉ ዳንዳየናዋ ኔን ኤራሳ።

8 “ታና ነ ኩሺ ጊግሲደ መꬌዳ፤ ሽን ሀእ ሄ ኩሺ ስሚደ፥ ታና ꬋይሴ። 9 ኔን ታና ኡርቃፐ መꬌዳዋ ሀሳያ። ያትና፥ ሀእ ታና ባናዳን ሊቅሳናዉ ሀናይ? 10 ታና ማꬃዳን ታ አት ኡሉዋን ትጌዳዌነ ድቼዳዌ ኔና። 11 ታና ኔን አሹዋነ ጋልባ ማይዛዳ፤ ታ መቀꬃ ጻጱዋና ጋꬃደ ዋጻዳ። 12 ኔን ታዉ ደኡዋነ አገና ነ ሲቁዋ እማዳ፤ ነ ናጉዋን ኔን ታና ፓጻ ዎꬃዳ።

13 “ሽን ኔን ሄ ዎድያፐ ዶማደ፥ ነ ዎዛና ግዶን ታና ቆሀናዉ ቆፕያዋ ታን ኤራይ። 14 ታን ናጋራ ኦꬆፐ በአናዉ፥ ኔን ታና ጌዳሳ፤ ታ ባይዙዋካ ሙረናን አꬋካ። 15 ባይዛንቻ ግዶፐ፥ ታዉ አየ አና! ቃይ ታን ጽሎ ግድንቶካ፥ ታ ሁጲያ ፑደ ꬎቁ ኦꬃናዉ ዳንዳይከ። አያዉ ጎፐ፥ ኔን ታና ዬላን ኩንꬃ ዎꬃዳነ ቱጋን ማꬆያ ዎꬃዳ። 16 ታን ኦቶረቶፐ፥ ኔን ታና ጋሙዋዳን የደርሳደ ኦይቃና፤ ቃይካ ታና ቆሀናዉ፥ ነ ማላልስያ ኦሱዋ ኔን ኦꬃና። 17 ኔን ታ ቦላ ኦራꬃ ማርካቱዋ አሃሳ፤ ነ ሀንቁዋካ ታ ቦላ ዳርሳሳ፤ ታና ኦላናዉ ኦራꬃ ሀልቾቱዋ ጊግሳሳ።

18 “ያትና፥ ታና ታ አት ኡሉዋፐ አያዉ ከሳዲ? ኦንነ ታና በኤናን ሀይቃርክታሻ! 19 ታን ደኤናን አጋርክታሻ! ዎይ ታ አት ኡሉዋፐ ከሶሳና ዱፉዋን ዎꬋአርክታሻ! 20 ታ ደአናዉ አቴዳ ላይꬃቱ ጉꬃ ግድክኖ? ታን ላፋ ናሸታ አካና ማላ፥ ሀእ ታና አጋርኪ! 21 ሌሌዳ ꬉማ ሳኣ ታን ብያ ዎዲ ማቴዳ፤ ታን ሄዋፐ ስማደ ሃ ዪከ። 22 ታን ብያሳአይ ꬍጵ ጎ ꬉማይነ ማራይ ባይናዋንቱ ደእያ ቢታ፤ ሄዋን ደእያ ፖኡካ ꬉማ ማላ” ያጌዳ።