1 ናእማ ቢታፐ ዬዳ ጾፋር ዛሪደ፥ ሀዋዳን ያጌዳ፤ 2 “ሀ ሃሳየቴዳ ቃላዉ ኡባዉ ዛሩዋ እምያ አሳይ ባዌ? ዎይ ሀዋ ሃሳዬዳ ብታኒ ቱማንቻ ግዳናዉ ዳንዳዪ? 3 ነ መላ ሃሳያይ አሳ ጮኡ ኦꬂ? ኔን ቅሊጭያ ዎደ፥ ኔና ሴርያዌ ባዋ ጋድየ? 4 ኔን ኦዳደ፥ ‘ታ ትምርቲ ቱማ፤ ታን ጾሳ ስንꬃን ጌሻ’ ያጋሳ። 5 ጾሳይ ነ ቦላ ባረ ዶና ዶዪደ ሃሳዬረኔሻ! 6 እ ነዉ አꬌዳ ኤራተꬃ ጹራ ቆንጭሴረኔሻ! አያዉ ጎፐ፥ ቱሙ አꬌዳ ኤራተꬃዉ ላኡ ክፍለቱ ደኢኖ። ጾሳይ ኔና ነ ኦꬄዳ ናጋራ ኬሻ ሙርቤናዋ ኤራ።

7 “ኔን ጾሳ ጪማ ጹራ ቆራደ ኤራናዉ ዳንዳያይ? ዎይ ኡባ ዳንዳይያ ጾሳ ዛዋቱዋ ኮያደ ደማናዉ ዳንዳያይ? 8 ኡንቱንቱ ሳሎቱዋፐካ ꬎቃ፤ ኔን አይነ ኦꬃናዉ ዳንዳያካ። ኡንቱንቱ ስኦልያፐካ አꬌዳ ጪማ፤ ኔን ኤራናዉ ዳንዳያካ። 9 ጾሳ አꬌዳ ኤራተꬃይ ቢታ አዱሳተꬃፐ አዱቄ፤ አባ ጎምፓፐካ አኬ። 10 እ ዪደ፥ ኔና ቃሾ ጎልያን የግንቶነ ፕርዳ ጎለ ሺሽንቶ፥ አ ድጋናዉ ዳንዳይያዌ ኦኔ? 11 ጾሳይ ፓና አሳቱዋ ኤሬ፤ ኢታባ በእያ ዎደ፥ እ ጮ አገና። 12 ኤያ አሳይ አꬌዳ ኤራንቻ ግድያዋፐ ደንባ ሃሪ አሳ ግዲ የለትያዌ ማቴ።

13 “ኢዮባ፥ ኔን ነ ዎዛና ሱረ ኦꬆፐ፥ ነ ኩሽያካ አኮ ምጫደ ዎሶፐ፥ 14 ናጋራ ኔፐ ሃሶፐ፥ ነ ጎለንካ ኢታባይ ደኤናዳን ኦꬆፐ፥ 15 ያቶፐ፥ ኔን ꬎቁ ጋደ ዬላይ ባይናን ኡባባ ጼላና፤ ያሽያዌ ባይናንካ ምናደ ኤቃና። 16 ነ መቱዋ ኡባካ ኔን ዶጋና፤ ጉኬዳ ሃꬃዳን፥ ኔን አ ላኤንꬆ ሀሳያካ። 17 ነ ደኡ ሴታ ጋላሳ አዋፐካ አꬊደ ፖአና፤ ነ ደኡዋ ꬉማይካ ዎንታ ፖኡዋ ማላ ግዳናዋ። 18 ነዉ ህዶታይ ደእያ ድራዉ፥ ኔን ህርገናን ደአና። ጾሳይ ኔና ናግያ ድራዉ፥ ኔን ዎፑ ጋናነ ሸምፓና። 19 ኔን ገምእሽያ ዎደ፥ ኔና ያሽሳና ኡራይ ባዋ፤ ዳሮቱ ኔና አዉዳሻና። 20 ሽን ኢታቱዋ አይፊ ቆቃና፤ አፐ ባቃት አታናዉካ ዳንዳይክኖ። ኡንቱንቱ ህዶታይ ሀይቁዋ” ያጌዳ።