1 ኢዮብ ዛሪደ፥ ሀዋዳን ያጌዳ፤ 2 “ኤ፥ ህንተ ቱሙካ አꬌዳ ኤራንቻ፤ አꬌዳ ኤራተꬃ ኡባይካ ህንተናና ሀይቃና! 3 ሽን ታዉካ ህንተዋዳን አኬካይ ደኤ፤ ታን ህንተፐ ላፍከ! ሀ ህንተ ሃሳዬዳዋ ኡባ ኦንነ ኤሬ። 4 ታን ጾሳ ዎስና፥ እ ስሴዳ አሳ ግዶፐነ፥ ታ ላገቶ ሚጭያዋ ከሳድ፤ ታን ጽሉዋነ ቶሺ ባይና አሳ ግዶፐካ፥ ቅሊጭያዋ ከሳድ። 5 ህንተና አይ መቱነ ጋክቤና ድራዉ፥ ታ መቱዋ ካꬊታ፤ ኩንዳናዉ ጋንድጋርያ ብታንያካ ሱጊታ። 6 ቦንቂያዋንቱ ጎለቱ ሳሮ ደኢኖ፤ ጾሳ ሀንቀꬅያዋንቱ ህርግ ባይናን ደኢኖ። ኡንቱንቱ ኩሽያ ዎልቃይ ኡንቱንቱ ጎይንያ ጾሳ።

7 “ሽን ኔን አነ መሄቱዋ ኦቻ፤ ኡንቱንቱ ኔና ታማርሳና። ዎይ ሳሉዋ ካፎቱዋ ኦቻ፤ ኡንቱንቱ ነዉ ኦዳና። 8 ዎይ ሳአዉ ሃሳያ እዛካ ኔና ታማርሳና፤ አባ ሞለቱካ ነዉ ኦዳና። 9 መꬍና ጎዳ ኩሺ ሀዋ ኦꬄዳዋ ሀዋንቱ ኡባ ግዶን ኤረናዌ ኦኔ? 10 ፓጻ ደእያ መታቱዋ ኡባ ደኡነ አሳ ኡባ አያናይ አ ኩሽያና። 11 እንጻርሳይ ቁማ ሻክ ኤርያዋዳን፥ ሀይꬃይ ሃሳያ ሻኪደ ኤረኔየ?

12 “አꬌዳ ኤራተꬃይ ጭሜዳ አሳቱ ማታን ደኤ፤ ዳሮ ዎድያ ደእያዌ አኬካ እሜ። 13 ጾሳዉ አꬌዳ ኤራተꬃይነ ዎልቃይ ደኤ፤ ዞሪነ አኬካይ አን ቤቴ። 14 ጾሳይ ቆሌዳዋ ዛረꬅ ኬጻናዌ ኦኔ? እ ቃቼዳ ኡራካ ብል የዳናዌ ኦኔ? 15 ጾሳይ እራ ተኦፐ፥ ቢታይ መሌ፤ እ እራ ቡክሶፐ፥ ድኡ ቢታ ባይዜ።

16 “ምኖተꬃይነ ጾኑ ጾሳዋ፤ ጭመትያዌነ ጭምያዌነ ላኡካ አፐ ጋርሳና ደኢኖ። 17 ዞርያዋንቱፐ እ አꬌዳ ኤራ ቃር አኬ፤ ዳናቱዋካ እ ኤያ ከሴ። 18 እ ካተቱዋ ካተቱዋ አራታፐ ዎꬄ፤ ኡንቱንታካ አይለቱዋ ኦꬄ። 19 ቄሳቱ ዋፐካ ቦንቹዋ ቃር አኬ፤ ዎልቃማቱዋካ አꬅ የጌ። 20 አማነቴዳ አሳቱዋካ ጮኡ ኦꬄ፤ ጭማቱዋፐካ አኬካ ዎꬅ አኬ። 21 ካፓቱዋ ካዉሼ፤ ደርያ ካለꬅያዋንቱ ዎልቃካ ዉርሴ።

22 “ꬉማን ደእያ ጹራ የዎቱዋ ቆንጭሴ፤ ꬍጵ ጎ ꬉማ ሳኣካ ፖኦ ከሴ። 23 ጾሳይ ካዉተꬃቱዋ ꬎቂሴ፤ ቃይ ጾኔ። ካዉተꬃካ አሴ፤ ቃይ ꬋይሴ። 24 ሳኣ አሳ ካፓቱዋ አኬካ ድጊደ፥ ኦጊ ባይና መላ ሳኣን ቶይላካታናዳን ኦꬄ። 25 ፖኡ ባይና ꬉማን ኡንቱንቱ ታታፊኖ፤ ማꬆቴዳ አሳቱዋዳን ኡንቱንቱ ጋንድጋሪኖ።