1 ኢዮብ ቃይካ ሀዋዳን ያጌዳ፤ 2 “ሀእ ታ ደእያ ደኡ ጾሳይ በን ታና ናጌዳ ዎድያዋ ማላ ግዴረኔሻ! 3 አ ጾምፒ ታ ቦላ ፖእና፥ ታን ꬉማን አꬋደ አ ፖኡዋን ሀመታድ። 4 ሄ ዎዲ ጾሳይ ታናነ ታ ሶ አሳ ናግና፥ ታን ታ ኩመንꬃ ዎልቃና ደኤዳ ዎደ። 5 ሄ ዎደ ኡባ ዳንዳይያ ጾሳይ ታናና ደኤ፤ ታ ናናቱካ ታ ዩሹዋን ደኢኖ። 6 ታን ታ ኩሽያ ማꬃን ሜጨታድ፤ ታ ዎጋራ ጉምኢያሳፐካ ዛይቲ ሻፋዳን ጎጌዳ።

7 “ታን ካታማን ደእያ ፕርዳ ጎልያ ቤዳ ዎደ፥ ዳናቱዋና እትፐ ኡታድ። 8 ሄ ዎደ ያላጋቱ ታና በኢደ፥ ኦግያ እሜድኖ፤ ጭማቱካ ታና ቦንቻናዉ ደንድ ኤቄድኖ። 9 ካፓቱ ሃሳይያዋ አግ ባሼድኖ፤ ባረንቱ ዶናንካ ባረንቱ ኩሽያ ዎꬄድኖ። 10 ሄ ካታማን ደእያ ዎልቃማ አሳቱካ ጮኡ ጌድኖ፤ ኡንቱንቱ እንጻርሳይካ ኡንቱንቱ ኮክያ ባቂ ኦይቄዳ።

11 “ታዋ ስሴዳዋንቱነ ታና በኤዳዋንቱ ኡባይ ታና ጋላቲደ ሃሳዬድኖ። 12 አያዉ ጎፐ፥ ማዶ ዋስያ ህዬሳቱዋነ አዉ አታ ꬋይና፥ ማድያዌ ባይናዋንታ ታን አሻድ። 13 ሀይቃና ሀንያ ብታኒ ታና አንጄዳ፤ አምአታካ ታ ማዱዋን ናሸታዱ። 14 ታን ጽሎተꬃ ማዩዋዳን ማያድ፤ ሱረ ፕርዳይካ ታ አፍላ ማላነ ቁማሻ ማላ። 15 ታን ቆቀቶ አይፍያ፥ ዎባቱዋ ገድያ ግዳድ። 16 ህዬሳቶ አዉዋ ግዳድ፤ ታን ኤረና አሳቶካ አባካቶ ግዳድ። 17 ታን ኢታቱዋ ጋፓታ መንꬃድ፤ ኡንቱንቱ ሻንካቲደ ኦይቄዳዋንታካ ኡንቱንቱ ዶናፐ ዎꬃ አካድ።

18 “ታን ታ ቆፋን፥ ‘ታን አዱሳ ላይꬃ ታ ሶ አሳ ግዱዋን ደኣደ ሀይቃና። 19 ታን ባረ ጻጶቱዋ ሃꬃ ግዶ የዴዳነ ከተርሳይ ቃማ ኡባን አ ታሽያ ቦላ ደእያ ምꬃ ማላ። 20 ታን ኡባ ዎደካ ቦንቼታደ ደአና፤ ታ ዎልቃይካ ኡባ ዎደ ኦራጻና’ ጋደ ቆፓድ።

21 “ታን ሃሳይያዋ አሳይ ስርጵ ግ ሀይዚደ፥ ታ ዞርያ አኬዳ። 22 ታን ሃሳዬዳዋፐ ጉይያን፥ ኡንቱንቱ ዛረꬂደ ሃሳይበይክኖ፤ አያዉ ጎፐ፥ ታ ቃላይ ኡንቱንቱ ዎዛናን ጾኬዳ። 23 ጎሻንቻይ እራ ናግያዋዳን፥ ኡንቱንቱ ታን ሃሳያናዋ ስሳናዉ ሀንጊደ ናጌድኖ። 24 ኡንቱንቱ ህርግ ኡት ደእሽን፥ ታን ታ ሶምኡዋ ፓሽክሳድ፤ ሄዋን ኡንቱንቱ ምንቴድኖ። 25 ታን ኡንቱንቱ ደአና ኦግያ ዶራድ፤ ኡንቱንቱ ካፑዋዳን ኡታድ። ባረ ኦላንቻቱዋ ግዶን ደእያ ካትያዳን፥ ታን ኡንቱንቱ ግዶን ደኣድ። ቃይ ካዮትያዋንታ ምንꬅያ አሳ ማላ ግዳድ።