1 “ሽን ሀእ ታፐ ያላግያ አሳቱ ታና ቅሊጪኖ። ኡንቱንቱ ታ ዶርሳ ዉድያ ሄምያ ካናቱዋ ማዳና ጊናካ ታን ድጌዳ አዎቱዋ ናናቱዋ። 2 ኡንቱንቱ አዎቱ ዎልቃይ እጼዳዋንታነ ቦላ ግልቄዳዋንታ ግዴዳ ድራዉ፥ ታና አይነ ማድበይክኖ። 3 መቱዋነ ኮሻ ጋሱዋን ቃማ ደንዲደ፥ ባዙዋ ቢደ፥ ጻጱዋ ጮሜድኖ። 4 ቃይ ሻራፋነ ቦንጭያ ማጼድኖ፤ ማልኤና ሳንካራ ጻጶቱዋካ ሜድኖ። 5 አሳይ ዋሲደ፥ ካይሶቱዋ የደርሴዳዋዳን፥ አሳ ግዶፐ ኡንቱንታ የደርሴዳ። 6 ኡንቱንቱ ዛንጋራ ግዶን፥ ጎንጎሎ ግዶንነ ዛላ ጎንጎሉዋ ግዶን ደኤድኖ። 7 ኡንቱንቱ ቡራ ግዶን ባዞ ዶአቱዋዳን ዋሴድኖ፤ ዶቢያ ጋርሳን ሺቂደ፥ እትፐ ደኤድኖ። 8 ኡንቱንቱ ቃይጼርያን ሾጨቲደ፥ ቢታፐ የደርሰቴድኖ። ኡንቱንቱ ሱንꬃና ባዪደ፥ ቦዛ ግዲደ ደኤድኖ።

9 “ሀእ ኡንቱንቱ ናናቱ ታና የꬃን ቅሊጪኖ፤ ታን ኡንቱንቱ ግዶን ሌምሲደ ኦድያዋ ግዳድ። 10 ኡንቱንቱ ታና ሸነቲደ፥ ታፐ ሃኪኖ፤ አይነ ዬላተናን ታ ሶምኡዋን ጩቻ ጩቺኖ። 11 ጾሳይ ታ ዎልቃ ላፈꬂደ፥ ታና ካዉሼዳ ድራዉ፥ ኡንቱንቱ ታና ቆሀናዉ፥ ብጻላ ከስ ድጌዳ ፓራዳን፥ የዳ ግዴድኖ። 12 ሀ ሴር ባይናን ድጬዳ ናናቱ ታ ቦላ ደንዲደ፥ ታና የደርሲኖ፤ ኡንቱንቱ ታና ꬋይሳናዉ ታ ቦላ ዶዲኖ። 13 ኡንቱንቱ ታ ሀመትያ ኦግያ ጎርዲደ፥ ታና ꬋይሳናዉ ኮዪኖ፤ ኦንነ ኡንቱንቱ ሄዋ ኦꬃናዋ ድገና። 14 ኦላንቻቱ ካታማ ድርሳ መንꬂደ ገልያዋዳን፥ ኡንቱንቱ ታ ቦላ ዬድኖ። 15 ዎልቃማ ዳጋማይ ታና ድፕ ኦꬄዳ፤ ታ ቦንቹካ ጫርኩ አፍያዋዳን ቤዳ፤ ታ እሻሉካ ሻርያዳን ꬋዬዳ።

16 “ታ ሸምፓታ ኡንኤታዱ፤ ቱጋ ጋላሳቱ ታና ጭርፕ ኦይቄዳ። 17 ቃማ ቃማ ሳኩ ታ መቀꬃ ጮሜ፤ ሴላይካ ሸምፕ አከናን ገደ ጉጄ። 18 ታ ማዩ ጉንዲደ ባዬዳ፤ ሻምጭያ ቆꬍያዳን፥ ታና ጩል ኦይቄዳ። 19 ጾሳይ ታና ኡርቃን ኦሌዳ፤ ታን ቢታፐ ብድንꬃፐ ኬከና አሳ ግዳድ።

20 “አቤት ጾሳዉ፥ ታን ነዉ ዋሳይ፤ ሽን ኔን ታዉ አላበይካ። ኤቃደ ኔና ዎሳድ፤ ሽን ኔን ታ ዎሳ ስሳበይካ። 21 ኔን ካሰዋፐ ዱማታደ፥ ታዉ መቀꬃ ኢታዳ፤ ነ ዎልቃማ ዎልቃን ታና የደርሳሳ። 22 ኔን ታና ጫርኩዋን ደንꬃዳ፤ አ ቶግሳዳ፤ ጎትያንካ ታና ጎንዶርሳዳ። 23 አሳዉ ኡባዉ ዉርሰꬃ ግዴዳ ሀይቆ ኔን ታና አꬃደ እምያዋ ታን ኤራይ።

24 “ኩንዲደ መኤዳ አሳይ ቱጋቲደ፥ ‘ታና ማዳርኪ’ ጊደ ዋስና፥ አዉ ቃረተና አሳይ ደኢ? 25 ቱጋን ደእያዋንቶ ታን ዬካበይክታ? ህዬሳቶ ታን ቃረታበይክታ? 26 ሎኦባ ደማና ጋደ ታን አሞትያ ዎደ፥ ኢታባይ ታና ጋኬዳ። ታዉ ሳአይ ኬኬ ጋደ ታን ናግያ ዎደ፥ ጋላሳይ ታዉ ꬉሜዳ። 27 ታ ዎዛናይ ህርጌዳ፤ ታን ዎፓ ደማበይከ፤ ጋላሳፐ ጋላሳን ታ ቱጋይ ያ ዳሬዳ። 28 ታ ቦላይ አዋ ሱሉዋን ግደናን ካዩዋን ካረጼዳ፤ ታን ሺቁዋን ኤቃደ፥ ‘ታና ማድተ!’ ጋደ ዋሳይ። 29 ታን ዎራካናቶ እሻ፥ ሳጎንያዉካ ዳቦ ግዳድ። 30 ታ ጋልባይ ካረጺደ፥ ፖቀት ፖቀት ዎꬌ፤ ታ ቦላይካ ምሹዋን ጹገቴ። 31 ሄዋ ድራዉ፥ ታ ድንኪ ዝላሳዉ ፑነቴዳ፤ ታ ህጽጺካ ዬኮ ፑነቴዳ።