1 “ማላንቻ ማጫውኖ ጼላደ አሞተናዳን፥ ታን ታ ዎዛና አይፍያና ጫቁዋ ጫቀታድ። 2 ቦላን ደእያ ጾሳይ ታዉ አያ ካጫ እማንዴሻ? ሳሉዋን ደእያ ኡባ ዳንዳይያ ጾሳይ አሳዉ እምያ ዎይቱ አያ ግዳንዴሻ? 3 ኢታቱዋ ቦላ ቦሻይ፥ ባይዙዋ ኦꬅያዋንቱ ቦላ ባሻይ ጋካናዌ ኤረቴዳዋ ግደኔየ? 4 ጾሳይ ታ ሄመታ ኡባ በኤ፤ ታ ታንጉዋ ኡባካ ፓይዴ።

5 “ታን ዎርዱዋ ሙለካ ኦꬃበይከ፤ አሳካ ጭማናዉ ካጄላበይከ። 6 ጾሳይ ታና ልከ ሚዛናን ማዛኖ፤ ያቲደ ታን ጽሉዋ ግድያዋ ኤሮ። 7 ታ ሀመታይ ኦግያፐ ሸርኤዳባ ግዶፐ፥ ታ ዎዛናይካ ታ አይፊ ጼሌዳዋ አሞቴዳዋ ግዶፐነ፥ ቃይ ታ ኩሺካ ናጋራን ቱኔዳዋ ግዶፐ፥ 8 ታ ጫርሻይ ኡባይ ሾደት ꬋዮ፤ ታን ዘሬዳዋካ ሀራይ ሞ።

9 “ታ ዎዛናይ ታ ሾሩዋ ማጫ አሳ አሞቴዳዋ ግዶፐ፥ ዎይ ታን እዝ ፐንገን ዙጋደ ናጌዳዋ ግዶፐ፥ 10 ታ ማቻታ ሀራ አሳዉ ጋጩ፤ ቃይ ሀራ አቱማ አሳቱ ኢናና ግስኖ። 11 አያዉ ጎፐ፥ ሻርሙጽያዌ ሎይꬅ ፖካነ ፕርዳን ሙርስያ ናጋራ። 12 ሀ ናጋራይ ታማዳን ጹጊደ፥ ታ ማጹዋ ኡባ ꬋይስያዋ።

13 “ታን ታ አቱማ ዎይ ታ ማጫ ቆማቱ ታና ሞትና፥ ኡንቱንቱ ሞቱዋ ካꬌዳዋ ግዶፐ፥ 14 ጾሳይ ታና ብድያ ዎደ፥ ታን ዋናኔ? ቃይ እ ታና ኦችያ ዎደ፥ ታን ዋጋ ዛራኔ? 15 ታና መꬌዳ ጾሳይ ታ ቆማቱዋካ እ መꬌዳ። ኑና ኡባካ ኑ አት ኑ አት ኡሉዋን መꬌዳዌ እት አ ጻላላ።

16 “ታን ህዬሳቱ ዎሴዳዋ ድጋድታንቶ፥ ዎይ አምኤቱዋ ምንናን አጋድታንቶ፥ 17 አዉ አታ ባይና ናናቱ መላ አቅያ ዎደ፥ ታን ታ ቁማ ታረካ ማበይከ። 18 ታን ኡንቱንታ ታ ያላጋተꬃፐ ዶማደ፥ ኡንቱንቱ አዉዋዳን ድቻድ፤ ታ አት ኡሉዋፐ የለቶደፐ ዶማደ፥ አምኤቱዋ ማዳድ። 19 ማዩ ꬋይና፥ ሜጉ ዎꬍያ ኡራ፥ ዎይ ካሎ ደእያ መቶታንቻ ደምያ ዎደ፥ 20 ታ ዶርሳቱዋ እክስያፐ ኦሰቴዳ ማዩዋ ታን ኡንቱንታ ሆኤꬄዳዋፐ አትን፥ ኡንቱንቱካ ባረንቱ ፖሎ ዎዛናን ታና ጋላታነንቶፐ አትን፥ 21 ታን ሞቱዋን ኡንቱንታ ሻትማናዋ ኤራደ፥ አዉ ባይና ናናቱዋ ናቄዳዋ ግዶፐ፥ 22 ታ ቄሲ ኩርያፐ መኦ፤ ታ ኩሺካ ሀሽያፐ ካረት ዎꬎ። 23 ሄዋ ታን ኦናዌ ጾሳ ሙሮ ያይያ ድራሳነ አ አንጋይ ታና ዳጋንꬅያ ድራሳ።

24 “ታን ዎርቃን አማነቴዳዋ ግድንቶ፥ ሙሩታ ዎርቃካ፥ ‘ታን ኔናን ጬቀታይ’ ጋድታንቶ፥ 25 ታ ዱረተꬃ ዳሩዋን፥ ታ ኩሺ ደሜዳ ዎꬍያን ታን ናሸታድታንቶ፥ 26 አዋ ጶለꬃ ዎይ አግና ሎኦተꬃ በኣደ፥ 27 ታ ዎዛናን ጌማን ኡንቱንታ ቦንቻድታንቶ፥ ዎይ ታ ኩሽያ ፕድ ኦꬃ የራደ፥ ኡንቱንታ ቦንቻድታንቶ፥ 28 ꬎቃን ደእያ ጾሳ ካዳድ ሽን። ሄ ናጋራይካ ፕርዳን ሙርስያ ናጋራ ግዴ ሽን።

29 “ታ ሞርከቱዋ ጋኬዳ ኢታ ካጫን ታን ናሸታበይከ፤ ኡንቱንታ ጋኬዳ መቱዋንካ ሆምቦጫበይከ። 30 ‘ታ ሞርኪ ꬋዮ’ ያጋ ሸቃደ፥ ናጋራ ኦꬃበይከ። 31 ታን ኡባ ገደ እማꬃ ሞክያዋ ታ ቆማቱ ታዉ ማርካቲኖ። 32 ሳአይ ቃሜዳ አሳ ካረን አይሳበይከ፤ ታን ታ ጎልያ ፐንግያ ኦግያና ብያዎ ኡባዉ ዶያ ዎꬃድ። 33 አሳይ ቆስያዋዳን፥ ታን ታ ናጋራ ታ ሾጵያን ቆሳበይከ። 34 ታን አሳ ሃሳያደ ዳጋማበይከ፤ ኡንቱንቱ ቦርያዉ ያያደ፥ ታን ጮኡ ጌዳ ዎዲነ ካረ ከሰናን አጌዳ ዎዲ ባዋ።

35 “ታን ሃሳይያዋ ስስያዌ ደኤረኔሻ! ታን ሃሳዬዳዌ ኡባይ ቱማ ግድያዎ ታን ፓራማይ፤ ኡባ ዳንዳይያ ጾሳይ ታዉ ዛሩዋ እሞ። ታ ባልጋራይ ታና ሞቴዳ ፓይሊ ደእና፥ በኣርክታሻ! 36 ዎይቱዋዳን ታን ታ ሀሽያን ዎꬃና ሽን! ካላቻዳን ታ ሁጲያን ቶካናሽን! 37 ታን ካፑዋዳን አኮ ሺቃደ፥ ታ ኦꬄዳዋ ኡባ አዉ ኦዳና ሽን!

38 “ታ ጎሻ ቢታይ፥ ‘ታና ቦንቃ አካዳ!’ ጊደ፥ ታ ቦላ ዋሴዳዋ ግዶፐ፥ ታ ያፋራቱካ ታ ቦላ ዬኬዳዋ ግዶፐ፥ 39 ሄ ቢታን ሞኬዳ ሚሻ ቃንጸናን ጮ ሜዳዋ ግዶፐ፥ ዎይ ሄ ቢታ ኦꬅያዋንታ ኮሻን ዎꬌዳዋ ግዶፐ፥ 40 ታዉ ዛርጋ ድራዉ አጉንꬃይ፥ ባንጋ ድራዉካ ሻራፋይ ሄ ቢታን ሞኮ” ያጌዳ።

ኢዮባ ሃሳያይ ሀዋን ፖለቴዳ።