1 ኢዮብ፥ “ታን ጽሎ አሳ” ጌዳ ድራዉ፥ ሀ ሄዙ አሳቱ አዉ ዛሩዋ እምያዋ አግ ባሼድኖ። 2 ኢዮብ ጾሳ ጽሉዋ ግያዋ አጊደ፥ ባረና ጽሉዋ ኦꬄዳ ድራዉ፥ ራማ ያራ ግድያ ቡዝያ ባርኬላ ናአይ ኤልሁ ኢዮባ ቦላ ሎይꬅ ሀንቀቴዳ። 3 ኤልሁ ቃይ ኢዮባ ሄዙ ላገቱዋካ ሀንቀቴዳ፤ አያዉ ጎፐ፥ ኡንቱንቱ አ ጮ ባይዛንቻ ጌድኖፐ አትና፥ አዉ ሱረ ዛሩዋ ዛራናዉ ዳንዳይበይክኖ። 4 ኤልሁ ኡንቱንቱፐ ቴፋትያ ድራዉ፥ ኡንቱንቱ ኡባይ ሃሳያ ዉርሳና ጋካናዉ ናጌዳ። 5 ሀ ሄዙ አሳቱ ኢዮባዉ ግድያ ዛሩዋ እማናዉ ዳንዳይቤናዋ በኢደ፥ እ ሎይꬅ ሀንቀቴዳ።

6 ቡዝያ ባርኬላ ናአይ ኤልሁ ሀዋዳን ያጊደ፥ ሃሳያ ዶሜዳ፤ “ታን ላይꬃን ናአታይ፤ ህንተ ታፐ ጭሚታ። ሄዋ ድራዉ፥ ታን ታ ቆፋ ህንተዉ ኦዳናዉ ያያድ። 7 ታን፥ ‘ጭማቱ ሃሳይኖ፤ ባረንቱ ዳሮ ላይꬃን ደሜዳ አꬌዳ ኤራተꬃ ታማርስኖ’ ጋደ ቆፓድ። 8 ሽን አሳኮ ዪደ፥ አꬌዳ ኤራተꬃ አሳዉ እምያዌ ኡባ ዳንዳይያ ጾሳ አያና። 9 አሳ አꬌዳ ኤራንቻ ከስያዌ ጭማተꬃ ግደና፥ ዎይ ልከባይ ገልያዌ ዳሮ ደኤዳ አሳቱዋሳ ግደና። 10 ሄዋ ድራዉ፥ ስስተ፤ ታንካ ታ ቆፋ ህንተዉ ኦዳና።

11 “በእተ፥ ህንተ ሃሳይያ ዎደ፥ ታን ጮኡ ጋደ ሀይዛድ፤ ህንተ ሃሳያና ቃላ ቆፓደ ናጋድ። 12 ታን ህንተ ግያዋ ኡባ ዉርሳ ስሳድ፤ ሽን ህንተፐ ኦንነ ኢዮብ ባይዛንቻ ጊደ አማንꬅቤና፤ ቃይ ህንተፐ ኦንነ አ ፓላማዉ በስያ ዛሩዋ እምቤና። 13 ኢዮባ ሃሳያዉ ካልስያ ዛሩዋ ዛራናዌ ጾሳፐ አትና፥ አሳ ግደና ድራዉ፥ ህንተ፥ ‘ኑን አꬌዳ ኤራተꬃ ደሜዶ’ ጌናዳን ናገትተ። 14 ኢዮብ ፓሉመቴዳዌ ህንተናናፐ አትና፥ ታናና ግደና። ታን ህንተ ሃሳዬዳዋዳን አዉ ዛሩዋ እምከ።

15 “ኢዮባ፥ ኡንቱንቱ ዳጋሚደ፥ ነ ሃሳያዉ ዛሩዋ እማናዉ ዳንዳይበይክኖ፤ ኡንቱንቶ ሃሳይያዌ ꬋዬዳ። 16 ኡንቱንቱ ሃሳይያዋ ꬋዪደ፥ ጮኡ ጊደ ኤቆፐ፥ ታንካ ናጋናዉ ኮሺ? 17 ታዉካ ኦድያዌ ደኤ፤ ታንካ ታ ቆፋ ኦዳና። 18 ዳሮ ሃሳይያዌ ደእያ ድራዉ፥ ታ ግዶን ደእያ አያናይ ታና ኦዳ ጊደ ግዴ። 19 በእተ፥ ታዉ ሃሳይያ ካላይ እመተናዋ ግዶፐ፥ ታን ሆኦ ዎይንያ ኤሳይ ኩሜዳ ኦጎሩዋዳን ꬉቃና ሀናይ። 20 ታዉ ሀዋፐ ጉꬃ ኬካና ማላ፥ ታን ሃሳያናዉ ኮሼ፤ ታ ዶናካ ዶያደ፥ ታን ታ ዛሩዋ እማናዉ ኮሼ። 21 ሀ የዉዋን ታን ኦናነ ማድከ፥ ዎይ አይ አሳነ ጮ ሳቢከ። 22 አያዉ ጎፐ፥ አሳ ጮ ሳቢያዌ ታዉ ሙለካ ኤረተና። ታን ቃይ ሄዋ ሀኖፐ፥ ታና መꬌዳዌ ታና ሙራና።