1 “ኢዮባ፥ ሀእ ታን ኦድያዋ ስሳ፤ ታ ግያዋ ኡባ ሀይዛ። 2 ሃሳያናዉ ጊጋድ፤ ታ ቃላቱካ ታ እንጻርሳ ጼራን ደኢኖ። 3 ታ ሃሳይያ ቃላቱ ታ ዎዛና ሱረተꬃ ቆንጭሲኖ፤ ታን ኤርያዋ ታ እንጻርሳይ ቱማተꬃን ሃሳዬ። 4 ታና ጾሳ አያናይ መꬌዳ፤ ኡባ ዳንዳይያ ጾሳ ሸምፑ ታዉ ደኡዋ እሜዳ። 5 ኔን ዳንዳይያዋ ግዶፐ፥ ታዉ ዛሩዋ እማ፤ ኔና ጊግሳደ፥ ታናና ጋከታ።

6 “በአ፥ ታን ጾሳ ስንꬃን ነ ማላ፤ ቃይ ታንካ ኡርቃፐ መታድ። 7 ኔን ታዉ ያይያ ጋሱ ባዋ፤ ታን ኔና ናቂከ።

8 “ነ ሃሳያ ኡባ ታን ሀይዛደ ታካድ፤ ኔን ሀዋዳን ያግሽን ስሳድ፤ 9 ‘ታን ጌሻነ ቶሺ ባይና አሳ፤ ታን ጽሉዋነ ናጋራ ኦꬃቤና አሳ። 10 ሽን ጾሳይ ታና ሙራናዉ ጋሱዋ ኮዬ፤ እ ታና ባረ ሞርክያዳን ፓይዴ። 11 ታ ገድያ ገድያ ብራታን ቃቼ፤ ኢዮባ 13:27 ታን ታንግያ ታንጉዋ ኡባካ እ ዎቼ’ ያጋዳ።

12 “ኢዮባ፥ ኔን ሀ ሃሳያን ልከ ግዳካ! አነ ታን ነዉ ኦዳይ፤ ጾሳይ አሳፐ አꬌ። 13 ኔን፥ ‘ጾሳይ ታን ሃሳዬዳ ሃሳያዉ ዛሩዋ እመና’ ጋደ፥ አያዉ አናና ፓሉመታይ? 14 አሳይ አኬካናፐ አትና፥ ጾሳይ ሀ ዱማ ዱማ ኦግያን ሃሳዬ።

15 “አሳይ ቃማ ሂጻን ግሲደ፥ ኢዮባ 4:13 ገምእሹዋ ፓኑሮ ዎደ፥ ጾሳይ አኩሙዋንነ ሳጻን ሃሳዬ። 16 ሄ ዎደ አሳይ ስሳናዳን ሀይꬃ ዶዬ፤ ባረ ሴራንካ እ ኡንቱንታ ዳጋንꬄ። 17 ያቲደ አሳይ ናጋራ ኦናዳን ተኤ፤ ኦቶሩዋካ አሳፐ ድጌ። 18 ጾሳይ አሳ ባሻፐ አሼ፤ ሀይቁዋፐካ ናጌ።

19 “ጾሳይ አሳ ሳኩዋ ሂጻን ደኦደካ፥ ባረ ባላፐ ስማናዳን ሴሬ። 20 ሄዋዳን ሀኒደ፥ ሀርጌዳ ኡራይ ካꬃ እጼ፤ ዳሮ ማልኦ ቁማይካ አ ሸነዬ። 21 አ አሹካ ግልቂደ ዉሬ፤ አ ቦላይካ መልና፥ መቀꬃይ ፓይደቴ። 22 አ ሸምፓታ ዱፉዋኮ፥ አ ደኡዋካ ሀይቁዋ ኪታንቻቱዋኮ ማቴዳ።

23 “አሳዉ ሱረ ኦግያ በስያ፥ ሻአን ፓይደትያ ኪታንቻቱዋፐ እቱ አዉ ጋናታናዉ ይንቶ፥ 24 አዉ ቃረቲደ፥ ‘እ ዱፉዋ ገለናዳን አ አሻና። ታን አዉ ዎዝያዋ ደማድ’ ያግንቶ፥ 25 አ ቦላይ ያላጋና፤ አ ያላጋተꬃ ዎልቃይካ አዉ ስማና። 26 ሄ ብታኒ ጾሳ ዎሳና፤ ጾሳይ አ ዎሳ ስሳና። ጾሳይ አዉ አ ጽሎተꬃ ዛርያ ድራዉ፥ እ ናሸቻን ጾሳዉ ጎይናና። 27 ሄ ዎደ አሳ ስንꬃን እ ሀዋዳን ያጋና፤ ‘ታን ናጋራ ኦꬃድ፤ ሱረባካ ጌላያድ፤ ሽን ጾሳይ ታ ባይዙዋዳን ታዉ ጭግቤና። 28 ዱፉዋን ገለናዳን ታና አሼዳ፤ ሄኮ፥ ሀእ ፓጻ ደኣደ፥ ፖኡዋ በአይ’ ያጋና።

29 “በእተ፥ ጾሳይ አሳዉ ሀዋ ኡባ ዛር ዛሪደ ኦꬄ፤ 30 አሳ ዱፉዋን ገልያዋፐ አሼ፤ ደኡዋን እ ናሸታናዳን ኦꬄ።

31 “ስም ኢዮባ፥ ታን ኦድያዋ ሀይዛደ ስሳ። አነ ኔን ጮኡ ጊና፥ ታን ሃሳያይ። 32 ኔን ሃሳያናዉ ኮይያዌ ደኦፐ፥ ታዉ ሃሳያ። ታን ኔን ጽሉዋ ግድያዋ በሳናዉ ኮያይ። 33 ሄዌ ꬋዮፐ፥ ጮኡ ጋደ፥ ታን ሃሳይያዋ ስሳ። ኔና ታን አꬌዳ ኤራተꬃ ታማርሳና” ያጌዳ።