1 ቃይካ ኤልሁ ሀዋዳን ያጌዳ፥ 2 “ህንተኖ፥ አꬌዳ ኤራንቻቶ፥ ታን ሃሳይያ ሃሳያ ስስተ። ህንተኖ፥ ኤራንቻቶ፥ ህንተ ሀይꬃ ታኮ የግተ። 3 እንጻርሳይ ቁማ ማልኡዋ ኤርያዋዳን፥ ኢዮባ 12:11 ሀይꬃይካ የዉዋ ሻኪደ ኤሬ። 4 አነ ኑን ልከባነ ሎኦባ ሻኪደ ኤሮይተ።

5 “ኢዮብ፥ ‘ታን ጽሉዋ፤ ሽን ጾሳይ ታ ሱረ ፕርዳ ታና ድጌዳ። 6 ታን ልከ ግዳደ፥ ዎርዳንቻዳን ፓይደታድ። ታናን ባይዙ ባይናንካ፥ እ ታና ፓጸናዳን ማዱꬄዳ’ ያጌዳ።

7 “ጾሳ ቦላ እዮበዋዳን ቅሊጭያ አሳይ ደኢ? 8 እ ኢታባ ኦꬅያዋንቱና ዙፐቴ፤ ናጋራንቻቱዋናካ ሀመቴ። 9 አያዉ ጎፐ፥ እ፥ ‘አሳይ ጾሳ ናሸቻና ጊደ ኦꬅያዌ አይነ ማደና’ ያጌ።

10 “ሄዋ ድራዉ፥ ህንተኖ፥ አኬካንቻ አሳቶ፥ ታን ኦድያዋ አነ ስስተ! ኡባ ዳንዳይያ ጾሳይ ኢታባ ሙለካ ኦና። 11 ጾሳይ አሳዉ አ ኦሱዋዳን እሜ፤ አ ኦግያዳን አዉ ጭጌ። ማዝ. 62:12 12 ጾሳይ ቱሙዋፐ ኢታባ ኦና፤ ኡባ ዳንዳይያ ጾሳይ ሱረ ፕርዳ ጌላየና። 13 ሳኣ ቦላን ጾሳዉ ማታ እሜዳዌ ኦኔ? ቃይ ቢታ ኡባ ቦላ አ ሱንꬄዳዌ ኦኔ? 14 ጾሳይ ባረ አያናነ ባረ ደኡዋ ሸምፑዋ ባረኮ ዛሪደ አክንቶ፥ 15 አሹዋ ማዬዳ ኡባይ እትፐ ꬋያና፤ አሳይ ቢታዉ ዱገ ስማና።

16 “ህንተ አኬካንቻ ግዶፐ፥ ሀዋ ስስተ፤ ታ ሃሳይያዋካ ሀይዝተ። 17 ሱረ ፕርዳ እጽያዌ ቢታ ሞዳናዉ ዳንዳዪ? ያትና፥ ኔን ጽሉዋነ ዎልቃማ ግድያ ጾሳ ፕርዳይ? 18 ጾሳይ ካተቱዋ፥ ‘ህንተ ሹፉሮቱዋ’ ያጌ፤ ቃይ ቢታ ሞድያዋንታካ፥ ‘ህንተ ኢታ’ ያጌ። 19 ካፓቱዋ ሶምኡዋ ጼሊደ ማደና፤ ዱርያካ ማንቁዋፐ አꬂደ ጼለና። አያዉ ጎፐ፥ ኡንቱንቱ ኡባይካ አ ኦሶቱዋ። 20 ኡንቱንቱ ሄካ ብላሄ አኬከናን ሀይቃና፤ አሳይ ኡባይካ ኮኮሪደ ꬋያና፤ ዎልቃማቱካ አይ አሳ ኩሺነ ቦቼናን ክቻና።

21 “ጾሳይ አሳ ሄመታ ጼሌ፤ አ ታንጉዋ ኡባካ ዎቼ። 22 ኢታ ኦꬅያዋንታ ጾሳፐ ገንꬃናዉ ዳንዳይያ ꬍጵ ጎ ꬉም ባዋ። 23 ጾሳይ አሳ ቦላ ፕርዳናዉ፥ አሳይ አ ስንꬃ ሺቃናዳን ኬሩዋ እመና። 24 ዎልቃማቱዋ አይነ ኦቼናን መንሬꬄ፤ ያቲደ ኡንቱንቱ ሳኣን ሀራቱዋ ዎꬄ። 25 እ ኡንቱንቱ ኦሱዋ ኤርያ ድራዉ፥ ኡንቱንታ እት ቃማ ማታፐ ዎꬂደ ꬋይሴ። 26 ኡንቱንቱ ኢታተꬃ ድራዉ፥ አሳይ ኡባይ በኢያሳን እ ኡንቱንታ ሙሬ። 27 ኡንቱንቱ አ ካለናን እጺደ፥ አ አዛዙዋካ አጌዳ ድራሳ። 28 ኡንቱንቱ ህዬሳቱዋ ኡቁኒደ፥ ኡንቱንቱ ጾሳኮ ዋሳናዳን ኦꬄድኖ፤ እካ ህዬሳቱዋ ዋሱዋ ስሴዳ። 29 ጾሳይ ጮኡ ጎፐ፥ አ ፕርዳናዌ ኦኔ? እ ባረ ሶምኡዋ ዎራ ዛሮፐ፥ አሳ ማድያዌ ባዋ። እ አሳፐካ ጮራፐካ ዳራ። 30 ሄዋዳንካ፥ ጾሳዉ ያየና አሳቱ ሞደናዳንነ አሳስካ ግተ ግደናዳን፥ አሳይ ኡባይ ድጋናዉ ዳንዳየና።

31 “ኢዮባ፥ ነ ናጋራ ጾሳዉ ፓጻዲ? ቃይ ዛራደ ናጋራ ኦናዳን ገፓዲ? 32 ነ ባይዙዋ ነዉ ቆንጭሳና ማላ፥ ጾሳ ዎሳዲ? ስንꬃናዉ ኢታ ኦሱዋ ኦናን አጋናዉ ኤኖ ጋዲ?

33 “ኔን ጾሳይ ኦꬅያዋ እጻደ፥ ነ ጋቲ ኔን ዶስያዋዳን ሀናናዉ ኮያይ? ስም ቆፋ ቃቻናዌ ኔናፐ አትና፥ ታና ግድከ። ሄዋ ድራዉ፥ ኔን ቆፕያዋ ታዉ ኦዳ። 34 አኬካንቻ አሳቱ ታን ኦድያዋ ኤኖ ጊኖ፤ ታን ኦድያዋ ስስያ አꬌዳ ኤራንቻቱካ ሀዋዳን ያጊኖ፤ 35 ‘እዮበ ኤራይ ፓጭና፥ ሀዋ ሃሳዬ፤ እ ሃሳይያዎ ብለꬃይካ ባዋ’ ያጊኖ። 36 ኢዮብ ኢታ አሳቱዋዳን ዛሩዋ እሜዳ ድራዉ፥ ዉርሰꬃ ጋካናዉ ፓጨቴዳ ግዴረኔሻ! 37 አያዉ ጎፐ፥ እ ባረ ናጋራ ቦላ ማካላ ጉጄ፤ ኑ ስንꬃን ጾሳ ቅሊጬ። ባረ ቃላካ ዳርሲደ፥ ጾሳ ቦላ ብዴ” ያጌዳ።