1 ኤልሁ ቃይካ ሀዋዳን ያጌዳ፤ 2 “ኢዮባ፥ ኔን፥ ‘ታን ጾሳ ስንꬃን ጽሉዋ’ ግያዌ ልኬ? 3 ቃይ፥ ‘ታን ናጋራ ኦꬆፐ፥ ኔና አይ ቆሀይታ? ናጋራ ኦናን አጎፐ፥ ታን ጎኤትያዌ አዬ?’ ያጋደ ኔን ጾሳ ኦቻዳ። 4 ታን ነዉነ ኔናና ነ ላገቶ ዛሩዋ ሃሳያና።

5 “ꬎቁ ጋደ ሳሎቱዋ ጼላ፤ ኔፐ ቦላና ደእያ ሻረቱዋካ አነ አኬካደ በአ። 6 ኔን ናጋራ ኦꬆፐ፥ ሄዌ ጾሳ አይነ ቆሄና። ነ ባይዙ ዳሮፐካ፥ ኔን ጾሳ አይነ ኦꬃካ።ኢዮባ 22:2-3 7 ጽሉዋ ግዶፐ፥ አዉ ኔን አያ እማይ? ዎይ ነ ኩሽያፐ እ አያ አካኔ? 8 ኔን ናጋራ ኦꬆፐ፥ ነ ማላ አሳ ቆሃሳ፤ ቃይ ጽሎፐካ፥ አሳ ጎኣሳ።

9 “ኡቁናይ ዳሮፐ አሳይ ዋሴ፤ ዎልቃማቱዋ ኩሽያፐ ከስ አካናዉ አሉዋ ጼጌ። 10-11 ሽን ኦንነ፥ ‘ጾሳይ፥ ታና መꬌዳዌ፥ ቃማን ማዛሙርያ እሜዳዌ፥ ሳኣ ዶአቱዋፐ አꬂደ፥ ኑና ታማርስያዌነ ሳሉዋ ካፎቱዋፐ አꬌዳ ኤራንቻ ኑና ኦꬅያዌ ሀቃን ደኢ?’ ያገና። 12 ኢታ አሳቱ ዋሲኖ፤ ሽን ጾሳይ ኡንቱንቱ ኦቶሩዋ ጋሱዋን፥ ኡንቱንቶ አለና። 13 ሀዳ ዋሱዋ ጾሳይ ቱሙዋፐ ስሰና፤ ኡባ ዳንዳይያ ጾሳይ ሄዋ ሀይዘና።

14 “ኢዮባ፥ ኔን፥ ‘ታን ጾሳ በአናዉ ዳንዳይከ፤ ታ ሞቱ አ ስንꬃን ደኤ፤ ታን አ ናጋይ’ ያጋሳ። ያትና፥ ነዉ እ ዛሩዋ እማናዉ፥ ነ ጋሱ አይ ኬሻ ጉጻንዴሻ! 15 ጾሳይ አሳ ሙረናባነ ናጋራካ ሸነኮ ጊደ አግ አግያዋ ጋደ ቆፓይ? 16 ሄዋ ግዶፐ፥ ኔን ነ ዶና ጮ መላ ዶያሳ፤ ኤራይ ባይና ሃሳያ ዳርሳሳ” ያጌዳ።