1 ኤልሁ ጉጂደካ ሀዋዳን ያጌዳ፤ 2 “ጾሳ ዶና ግዳደ ታን ነዉ ኦድያዌ ብሮ ደእያ ድራዉ፥ ጉꬃ ዳንዳያደ ስሳ። 3 ታን ታ ኤራ ሃኩዋፐ አሃድ፤ ታና መꬌዳዌ ጽሎ ፕርዳ እምያዋ ግድያዋ ታን ኔና ኤርሳና። 4 ታን ዎርዱዋ ሃሳይከ፤ ኩመንꬃ ኤራይ ደእያ ኡራይ ኔናና ደእያዋ አማና።

5 “በአ፥ ጾሳይ ዎልቃማ፤ ሽን እ ኦናነ ካና። እ አኬካንካ ምና። 6 ኢታቱዋ እ ፓጻ ዎና፤ ሽን ኡቁነቴዳዋንቱ ማታ እ ናግሴ። 7 ጾሳይ ባረ አይፍያ ጽሎቱዋፐ ደንና። እ ኡንቱንታ ካተቱዋና ኡትሲደ፥ መꬍናዉ ꬎቁ ꬎቁ ኦꬄ። 8 ሽን አሳይ ሳንሳላታን ቃሸቶፐ፥ ዎይ ቱጋ ዎዶሩዋን ኦይቀቶፐ፥ 9 እ ኡንቱንቱ ኦሱዋነ ኦቶሩዋን ኡንቱንቱ ኦꬄዳ ናጋራ ቆንጭሴ። 10 ሴራ ስሳናዳን ኡንቱንቱ ሀይꬃ ዶዬ፤ ናጋራፐ ስማናዳንካ እ ኡንቱንታ አዛዜ። 11 ኡንቱንቱ ስሲደ፥ አዉ ኦꬆፐ፥ ባረንቱ ላይꬃ እሻሉዋንነ ዎፓን ዉርሳና። 12 ሽን ኡንቱንቱ ስሰናን እጾፐ፥ ማሻን ዉራና፤ ኡንቱንቱ ኤራ ꬋዬዳ ድራዉ ሀይቃና።

13 “ጾሳ አማነና አሳቱ ባረንቱ ዎዛናን ሀንቁዋ ዳጋዪኖ፤ እ ኡንቱንታ ሙርያ ዎደካ፥ ማዳ ጊደ ዎስክኖ። 14 ኡንቱንቱ ባረንቱ ያላጋተꬃን ሀይቂኖ፤ ኡንቱንቱ ደኡካ ዬላን ዉሬ። 15 ጾሳይ ቱጋትያዋንታ ኡንቱንቱ ቱጋን ታማርሴ፤ እ ኡንቱንቱ መቱዋ ባጋና ኡንቱንታ ስሴ።

16 “ጾሳይ ኔና መቱዋፐ ከሲደ መቱ ባይና አኮ ሳኣ አፌዳ፤ ነ ምያ ማሶፍያንካ ሞꬉዋ ጉፔዳ። 17 ሽን ሀእ ኢታቱዋ ፕርዳ አካዳ፤ በስያ ሙራካ አካደ ደኣሳ። 18 ኔና ኦንነ ዱረተꬃ በሲደ ጭመናዳን፥ ዳሮ ማታይያንካ ባለናዳን ናገታ። 19 ነ ማጹዋ ዳሩ ዎይ ነ ምኖተꬃይ ኔና መቱዋፐ አሻኔ? 20 አሳቱ ባረንቱ ሳኣፐ ꬋይያ ቃማይ ያናዳን አሞቶፓ። 21 ሀ መቱ ኡባይ ኔና ጋኬዳዌ፥ ኔና ኢታፐ አሻናሳ። ሄዋ ድራዉ፥ ኢታተꬃዉ ጉየ ስመናዳን ኔና አኬካ።

22 “ጾሳይ ባረ ዎልቃን ꬎቁ ꬎቁ ጌዳ! አ ማላ አስታማሪ ኦኔ? 23 ‘ሀዋ ኦꬃ’ ጊደ ጾሳ አዛዝያ አሳይ፥ ዎይ፥ ‘ኔን ኢታ ኦሱዋ ኦꬃዳ’ ያጋናዉ ዳንዳይያ አሳይ ባዋ። 24 አሳይ ማዛሙርያን ሳቤዳ አ ኦሱዋ ኔንካ ሳባናዉ ሀሳያ። 25 አሳይ ኡባይ ጾሳ ኦሱዋ በኤዳ፤ ሽን በኢደ፥ ሃኩዋን በኤዳ። 26 በእተ፥ ጾሳይ ዎልቃማ! አ ግታተꬃ ኑን አኬክቦኮ፤ አ ላይꬃ ጮራተꬃይካ ፓይድና ጋከተና።

27 “ጾሳይ ሃꬃ ሳኣፐ ፑደ ሳሉዋ አፌ፤ ያን እራ ከሴ። 28 ሄ እራይ ሻርያፐ ከሲደ፥ አሳዉ ዳሮ ቡካናዳን ኦꬄ። 29 ሻሪ ዋን ዩይንቶ፥ ዋልቃንꬃይካ ጾሳይ ደእያ ሳሉዋን ዋን ጉምንቶ፥ ኦንነ ኤረና። 30 እ ባረ ዩሹዋን ዋልቃንꬃ ፖኡዋ ላሌ፤ ሽን አባ ጪማ እ ꬉማን ካሜ። 31 እራ ቡክስያዋን ባረ አሳዉ ዳሮ ካꬃካ ሞክሴ፤ ሀዋዳን ኦꬂደ ጾሳይ አሳ ኡባ አይሴ። 32 እ ዋልቃንꬃ ባረ ኩሽያን ኦይቄ፤ ባረ ሀልቼዳ ሳኣ ሾጫናዉ አዛዜ። 33 ጉጉንꬃይ ጉምያዌ ኡሹ ኡሾታናዋ አዋዬ፤ መሂካ ኡሹ ይያዋ ኤሬ።