1 “ኡሹ ታ ዎዛና ድድቅሴ፤ ባረ ደእያ ሳንካ ፕሬ። 2 ኡባይካ ጾሳ ኮሻ፥ ጉጉንꬃዳን ጉምያ አ ቃላ ስስተ። 3 እ ሳሉዋ ኡባፐ ኪትያ ዋልቃንꬃይ ቢታ ጋጻፐ ጋጻ ጋካናዉ ቤቴ። 4 ሄዋፐ ጉይያን፥ አ ጉንꬃ ኮሻይ ስሰቴ፤ ባረ ዎልቃማ ኮሻን ጉሜ፤ አ ኮሻይ ስሰትያ ዎደ፥ ባረ ዋልቃንꬃ ተኤና። 5 ጾሳ ኮሻይ ማላልስያ ጉንꬃ ጉሜ፤ ኑን አኬካናዉ ዳንዳየና ዎልቃማባ እ ኦꬄ። 6 ሻቻ እ፥ ‘ሳኣን ዎꬋ!’ ያጌ፤ ዎልቃማ እራካ፥ ‘ቡካ’ ያጊደ አዛዜ።

7 “አሳይ ኡባይ አ ኦሱዋ ኤራና ማላ፥ ሄ ዎደ ባረ ኦሱዋ ኦሱዋ አጋናዳን ኦꬄ። 8 ዶአቱካ ባረንቱ ጌሱዋ ጌሱዋ ገሊኖ፤ ያን ኡቲኖ። 9 ገድሳ ባጋፐ ጎቲ ዬ፤ ሁጲሳ ባጋፐካ ሜጉ ዬ። 10 ጾሳይ ሲꬍያና ሸምፕያ ሸምፑዋፐ ሻቻይ መቴ፤ ሄዋን አኮ ሃꬃቱካ ሹቻዳን ምኔ። 11 ሻሪ ሃꬃ ቶካናዳን እ ኦꬄ፤ ባረ ዋልቃንꬃካ ሻርያ ግዶን ላሌ። 12 አ ካለꬁዋን ሻረቱ ዩይ ዩይ አꬊኖ፤ እ አዛዝያዋ ኡባ ኡንቱንቱ ሳኣ ቦላ ኦꬂኖ። 13 ጾሳይ እራ ቡክስያዌ ቢታ እርጽሳናሳ፥ ዎይ አሳ ሙራናሳ፥ ዎይ ባረ ሲቁዋ ኡንቱንታ በሳናሳ።

14 “ኢዮባ፥ ሀዋ ስሳ፤ ጾሳይ ኦꬅያ ማላልስያ ኦሱዋ ታክ ጋደ አኬካ። 15 ጾሳይ ሻራቱዋ ዎት አዛዝንቶነ ባረ ዋልቃንꬃካ ዎት ዎልቃንꬅንቶ ኤራይ? 16 ሻራቱ ሳሉዋን ዋን ቶከቶፐነ ቃይ አ ኤራይ ፖሎ ግዴዳ ጾሳይ ኦꬅያ ማላልስያ ኦሱዋ ኔን ኤራይ? 17 ገድሳ ጫርኩ ዪደ፥ ቢታ ምሽስያ ዎደ፥ ኔን ሆምቢያን መቶታናፐ አትና፥ ሙለካ ሄዋ ኤራካ። 18 ጾሳይ ሳሉዋ ማስቶትያዳን ፕድ ኦꬂደ ምጭያ ዎደ፥ ኔን አ ማዳናዉ ዳንዳያይ? 19 ኑን ኤራ ፓጫ ግድያ ድራዉ ሃሳያናዉ ዳንዳዮኮ፤ ኑን ጾሳዉ ዋግ ሃሳያነንቶ፥ ኔን ኑና ታማርሳ። 20 ጾሳና ሃሳያና ጋደ ታን ኦችከ፤ እ ታና ꬋይሳና ማላ፥ ታን አያዉ አ ደንሬꬃይታ? 21 ጫርኩ ሳሎቱዋ ፕቲደ ጌሼዳዋፐ ጉይያን፥ ሳሎቱዋን ጶልያ አዋ ፖኡዋ አሳይ ጼላናዉ ዳንዳየና። 22 ሁጲሳ ባጋና ዎርቃ ማላትያ ፖኡ ቤቴ፤ ጾሳይካ ያሽያ አንጋን ቆንጬ።

23 “ኑን ኡባ ዳንዳይያ ጾሳ ማታ ሺቃናዉ ዳንዳዮኮ፤ አ ዎልቃይ ዎልቃማ። እ ባረ ቱሙ ፕርዳንነ ባረ ዎልቃማ ጽሎተꬃን ግታ። 24 ሄዋ ድራዉ፥ አሳይ አዉ ያዬ፤ ባረንታ አꬌዳ ኤራንቻ ግያዋንታ ኡባቱዋ እ ጼለና” ያጌዳ።