1 ሄዋፐ ጉይያን፥ መꬍና ጎዳይ ጎትያ ግዶፐ ኢዮባዉ ሀዋዳን ያጊደ ዛሬዳ፤ 2 “ኤር ባይና ሃሳያን ታ ዞርያ ቶችያዌ እ ሀዌ ኦኔ? 3 አነ ኔን አሳዳን ነ ጼሳ ዳንጫ ደንዳደ፥ ታን ኦችያዋ ታዉ ኦዳ።

4 “ታን ሳኣ መꬍያ ዎደ፥ ኔን ሀቃን ደአይ? አነ ነዉ አኬካይ ደኦፐ፥ ታዉ ኦዳ። 5 ሀ ሳአይ አይ ኬሻ ግዳናዉ በስንቶ፥ ሄ ቆፋ ቃቼዳዌ ኦኔ? ልክያ ዎዶሩዋካ ሳኣ ቦላ የጌዳዌ ኦኔ? ሄዋ ዛሩዋ ኡባ ኤራይ? 6 ሳኣ ቱቀቱዋ ኩንደናዳን ምንꬅ ኦይቄዳዌ አዬ? ሳኣ ባሶ ኮይሮ ሹቻ ዎꬄዳዌ ኦኔ? 7 ሄ ጋላስ ዎንታ ጾልንተቱ እትፐ የጼዳዋነ ኪታንቻቱ ኡባይ ናሸቻዉ እልሌዳዋ ኔን ኤራይ?

8 “አባ ሃꬃይ፥ ቢታ ጎምፓፐ ꬉቂደ ከስያ ጋላስ፥ አ ፐንገቱዋ ጎርዴዳዌ ኦኔ?ኤር. 5:22 9 አባ ሻርያ ማይዜዳዌ፥ ቃይ ꬉማንካ ጻጻ ዎꬄዳዌ ታና። 10 አባዉ አና ዛዋ መꬌዳዌ፥ አ ፐንግያነ አ ኩልቡዋ ሳኣን ዎꬄዳዌ ታና። 11 ታን፥ ‘ሀዋ ጋካ፤ ሽን ሀዋፐ አꬎፓ፤ ነ ዎልቃማ ቤታይካ ሄዋን ኤቆ’ ያጋድ።

12 “ኢዮባ፥ ኔን የለቶደፐ አዋይ ዎንታ ጉራና ከሳናዳን አዛዛ ኤራይ? 13 ቢታ ጋጻን ፖኡዋ በሳና ማላነ ኢታ አሳቱዋካ ኡንቱንቱ ቆሰቴዳ ሳፐ ቆንጭያ ከሳና ማላ፥ ኔን ዎንታ አዛዛ ኤራይ? 14 ጋላሳ ፖኡ ዞዛቱዋነ ዛንጋራቱዋ ዳኮዪደ ዎꬄዳ ማዩ ኤቄዳዋዳን ቤታናዳን ኦꬄ፤ ቃይ ኡርቃ ሚሻ ቦላ ዎꬄዳ ማታፋዳን ጌሺደ በሴ። 15 ኢታቱ ባረንቶ ፖኦ ግ ዎꬄዳ ꬉማይ ꬋዬ፤ ኡንቱንቱ ማካላዉ ደንꬅያ ኩሺካ መኤ።

16 “ጪማ አባ ግዶ ገላደ፥ ፑልቱዋ በኣድ? ዎይ አሳይ ጋክ ኤረና አባ ግዱዋ ፓጫ ጼላ ኤራይ? 17 ሀይቁዋ ፐንገቱዋ ኔና ኦነንቶ በሴዴ? ዎይ ꬍጵ ጎ ꬉማ ፐንገቱዋ በኣድ? 18 ሳአይ አይ ኬሻ ዎልቃመንቶ ኤራይ? ሄዋ ኡባ ኔን ኤርያዋ ግዶፐ፥ ታዉ ኦዳ።

19 “ፖኡ ደኢያሳ አፍያ ኦጊ ሀቃን ደኢ? ቃይ ꬉማይ ደእያ ሳአይ ሀቄ? 20 ኡንቱንታ ኔን ኡንቱንቱ ጎለ ጎለ አፋናዉ ዳንዳያይ? ኡንቱንቱ ደኢያሳ አፍያ ኦገቱዋ ኔን ኤራይ? 21 ኔን ሳአይ መትያ ዎደ የለቴዳ ድራዉነ ዳሮ ላይꬃካ ደኤዳ ድራዉ፥ ሄዋ ኤረናን አጋካ!

22 “ሱፓ ሻቻይ ምንጀትያሳ ገላዲ? ኦርዶ ሻቻይ ዶረቴዳሳካ በኣድ? 23 ታን ኡንቱንታ መቶ ዎድያዉ፥ ኦላ ዎድያዉነ ቶራ ጋላሳዉ ምንጃ ዎꬃድ። 24 ዋልቃንꬃይ ከስያ ሳኣ አፍያ ኦጊ ሀቃን ደኢ? ዎይ አዋይ ዉልያ ባጋ ጫርኩ ሀቃፐ ከሲደ ጫርኪ?

25 “ዎልቃማ እራይ ዎꬍያ ሎሱዋ ጊግሴዳዌ፥ ጉጉንꬃዉ ኦግያ ከሴዳዌ ኦኔ? 26 አስ ደኤና ባዙዋን እራ ቡክስያዌ ኦኔ? 27 መላ ባዙ እራ ሃꬃን ሹጊደ፥ ሎኦ ማታ ሞካናዳን ኦꬄዳዌ ኦኔ?

28 “እራዉ ዎይ ከተርሳዉ አዉ ደኢ? 29 ኦርዶ ሻቻዉነ ቡርጨ ሻቻዉ አታ ደአይ? 30 ዳሮ እርጻተꬃይ ሃꬃ ሹቻዳን ምንሴ፤ አባ ሃꬃዉ ቦላ ባጋካ ሻቻ ከሴ።

31 “ፕልያድሳ ጌተትያ ጾልንተቱዋ ጭታ እትፐ ጋꬃደ ቃቻናዉ ዳንዳያይ?ኢዮባ 9:9፤ አሞጻ 5:8 ኦርዮና ጌተትያ ጾልንተቱዋ ጭታይ ቃሸቴዳ ዎዶሩዋ ብላናዉ ዳንዳያይ? 32 ጭታን ጭታን ደእያ ጾልንተቱዋ ኡንቱንቱ ዎድያን ዎድያን ከሳናዉ ዳንዳያይ? ዎጋ ቤርያነ ቄር ቤርያ ጌተትያ ጾልንተቱዋ ጭታቱዋ እትፐ ካለꬃናዉ ዳንዳያይ? 33 ሳሎቱ አቅያ ህግያ ኔን ኤራይ? ዎይ ሄ ህጊ ሳኣን ሞዳናዳን ኦꬃናዉ ዳንዳያይ?

34 “ድኡ ኔና ሙካናዳን እራ ቡክሳናዉ፥ ነ ቃላ ꬎቁ ኦꬃደ፥ ሻራቱዋ አዛዛይ? 35 ዋልቃንꬃቱ ቢደ ዪደ፥ ‘ሄኮ፥ ሀእ አይ ኦꬂኖ’ ጋና ማላ፥ ኔን ኡንቱንታ አዛዛናዉ ዳንዳያይ? 36 ሃꬃ ካፎ አꬌዳ ኤራ፥ ኩቱዋ አዉርያዉካ አኬካ እሜዳዌ ኦኔ? 37-38 ባረ ኤራን ሻረቱዋ ፓይዳናዉ ዳንዳይያዌ ኦኔ? ባና ሙናቂደ፥ ኡርቃ ከሲደ፥ ምንሳናዉ ሳሉዋ ሻረቱዋ ገደ ኦꬂደ፥ ሃꬃ ዱገ ትግያዌ ኦኔ?

39-40 “ጋሞቱ ኡባይ ባረንቱ ጌሱዋን ጌሱዋን ግስ ደእሽን ዎይ ዙጊደ ናግሽን፥ ኔን ኡንቱንቶ ምያዋ ሻንካታደ እማናዉ ዳንዳያይ? ዎይ ኮሻት ኡቴዳ ኡንቱንቱ ማራቱዋ ካልሳናዉ ዳንዳያይ? 41 ቁሮቱ ኮሻት ብቻርያ ዎደ፥ ኡንቱንቱ ማራቱካ ምያዋ ደማናዉ ታዉ፥ ጾሳዉ፥ ዋስያ ዎደ፥ ኡንቱንቶ ምያዋ እምያዌ ኦኔ?