1 “ደርያን ደእያ ገንኤቱ አዉደ የሊኖንቶ፥ ኔን ኤራይ? ጋራቱ ባንኪደ፥ ባረንቱ ማራቱዋ የልያ ዎደ በኣድ? 2 ኡንቱንቱ ኩንꬂደ፥ ዎይሳ ኬሻ አግና ጋምኢኖንቶነ ቃይ አዉደ የሊኖንቶ ኤራይ? 3 ኡንቱንቱ ጉልባቲደ፥ ባረንቱ ማራቱዋ የልያዌ አዉደንቶ ኤራይ? 4 ኡንቱንቱ ማራቱ ባዙዋን ድጪደ ምኒኖ፤ ባረንቱ አየቱዋ ማታፐ ቢኖ፤ ላኤንꬆ ጉየ ስምክኖ።

5 “ደንባ ሃረቱ የዳ ደአናዳን ኦꬄዳዌ ኦኔ? ቃሹዋፐ ኡንቱንታ ብል የዴዳዌ ኦኔ? 6 ኡንቱንቶ ታን ባዙዋ ደኢያሳ ኦꬃደ እማድ፤ አሳይ ባይና ላዳ ቢታ ኡንቱንቱ ደአናዳን ኦꬃድ። 7 ካታማ ጫቡዋፐ ኡንቱንቱ ሃኪደ ደኢኖ፤ ላግያዋንቱ ዋሱዋካ ስስክኖ። 8 ኡንቱንቱ ደረቱዋ ባረንቶ ሄመትያ ሳኣ ኦꬂኖ፤ ሄዋን ምያ ሙልኦ ማታ ቆሪኖ።

9 “መንꬃይ ነዉ ኦꬃናዉ ኤኖ ጋንዴ? ዎይ ነ ጋጻታን ቃማ አቃንዴ? 10 ጎሻና ማላ፥ ኔን አ ዋጻይ? ዎይ ግንዳ ጎቻናዳን አ ኦꬃናዉ ዳንዳያይ? 11 ኔን አ ዎልቃ ምኖተꬃን አማነታይ? ነ ዳቡርስያ ኦሱዋ እ ኦꬃናዳን፥ አዉ የጋ አጋይ? 12 እ ስሚደ ዪደ፥ ነ ካꬃ ቆጽያ ነ ኡዱማዉ ሺሼ ጋደ ኔን አን አማነታይ?

13 “ሶጎናታ ባረ ቀፍያ ኤለካ ቃꬃዉ፤ ሽን ሶጎናት ቀፈቱ ሳንጋኑዋ ቀፈቱዋነ ባለቱዋ ማላ ግድክኖ። 14 ሶጎናታ ባረ ቁቁልያ ቢታን ቁቁላዉ፤ ባናይ ሆኤꬃናዳን አጋዉ። 15 ገዲ መንꬃና ዎይ፥ ‘ባዙዋ ዶአቱ የꬋና’ ጋደ ቆፑኩ። 16 ማራቱ ባረዋ ግደናዋዳን ፓይዳደ፥ ኡንቱንቶ መቀꬃ ኢታዉ። እ ዳቡራይ ኡባይ መላ አትያዌ እዉ አያነ ማላተና። 17 አያዉ ጎፐ፥ ታን ጾሳይ እዞ አꬌዳ ኤራተꬃ ድጋድ፤ ታን አኬካካ እዉ እማበይከ። 18 ሽን ደንዳደ እዛ ዎጽያ ዎደ፥ ባረናና ናሰትያ ፓራ ቦላነ ፓራዉ ቦላ ሚጫዉ።

19 “ኢዮባ፥ ፓራቶ ዎልቃ እሜዳዌ፥ ዎይ ፓራቱዋ ሞርግያ ጎቶሾ ጋማ ማይዜዳዌ ኔኔ? 20 ፓራቱ ቦልያዳን ጉፓናዳንነ ያሽያ ዳረꬃ ኡንቱንቱ ዳራናዳን ኦꬄዳዌ ኔኔ? 21 ፓራቱ ዛንጋራን ቢታ ቦዲኖ፤ ባረንቱ ዎልቃንካ ናሸቲኖ፤ ያቲደ ኦላ ሚሻቱዋ ዳንጬዳዋንቱና ጋከታናዉ ኦላ ደምባ ፕሪጺኖ። 22 ያሻ ግያዋ ኡንቱንቱ ሙለካ ኤርክኖ፤ ኡንቱንታ አያይነ ዳጋንና፤ ኡንቱንቱ ቦላ ማሻ ዛረꬆፐነ ጉየ ስምክኖ። 23 ኡንቱንቱ ቶግያ ኦላንቻቱ ኦይቄዳ ኦላ ሚሻቱ ጶሊደ፥ እቱ እቱዋና ጋከቲደ ጊረቲኖ። 24 ፓራቱ ፓቹሪደ ያሽሲደ፥ ኦላዉ ስንꬃዉ ፕሪጺኖ። ማላካታ ፑኑሳ ኮሻ ስስያ ዎደ፥ ጮኡ ጊደ ኤቃናዉ ዳንዳይክኖ፤ 25 ማላካታ ፑንያ ዎደ፥ ‘ሀያሾ!’ ያጊኖ። ኦላ ፔኑዋ ሃኩዋን አኪኖ፤ ኦላ ጋዳዋቱ አዛዝያ አዛዙዋነ ኦላንቻቱዋ ጬቁዋ ስሲኖ።

26 “ጋጪ ባረ ቀፍያ ገድሳ ምጪደ ፓላናዉ ዳንዳያናዳን፥ አꬌዳ ኤራተꬃ አዉ እሜዳዌ ኔኔ? 27 አርጋንꬃይ ፑደ ከሲደ፥ ባረ ጎልያ ꬎቃ ደረቱዋን ኬጻናዉ ነ አዛዙዋ ናጊ? 28 አርጋንꬃይ አፉዋ ዶናን ባረ ጎልያ ኬጺደ ደኤ፤ ዛላቱዋ ዛኦቱካ አዉ ጌሱዋ ግዴድኖ። 29 ሄዋን ኡቲደ፥ ባረዉ ምያዋ ዎቼ፤ አ አይፊ ሃኩዋፐ ደሜ። 30 አርጋንꬃ ማራቱ ሱꬃ ኡሺኖ፤ ባኩታይ ደእያ ሳን ሀቃንካ እ ሺቄ” ያጌዳ። ማቶሳ 24:28፤ ሉቃሳ 17:37