1 መꬍና ጎዳይ ኢዮባ፥ 2 “ኢዮባ፥ አሳይ ኡባ ዳንዳይያ ጾሳና ሞተቲደ፥ ሻትም ኤሪ? አነ ጾሳና ሞተትያ ኡራይ አዉ ዛሮ” ያጌዳ።

3 ሄዋፐ ጉይያን፥ ኢዮብ መꬍና ጎዳዉ ዛሪደ፥ ሀዋዳን ያጌዳ፤ 4 “አቤት ጾሳዉ፥ ታን ፓና ላፋ አሳ፤ ታን ነዉ ዎታ ዛራናዉ ዳንዳያይታ? ታን ታ ዶናን ታ ኩሽያ ዎꬃድ። 5 ታን እት ገደ ሃሳያድ፤ ሽን ታዉ ዛርያዌ ባዋ። ላኤንꬁዋ ሃሳይከ” ያጌዳ።

6 ሄዋፐ ጉይያን፥ መꬍና ጎዳይ ጎትያ ግዶፐ ኢዮባዉ ሀዋዳን ያጌዳ፤ 7 “አቱማ አሳዳን ነ ጼሳ ዳንጫ ደንዳደ፥ ታን ኦችያዋ ታዉ ኦዳ። 8 ኔን ታና ባይዛንቻ ከሳና ሀናይ? ነዉ ጽሉዋ ግዳናዉ፥ ታና ዎርዱዋ ከሳይ? 9 ጾሳ ዎልቃ ማላ ዎልቃይ ነዉ ደኢ? ጾሳይ ጉምያዋዳን ኔን ጉማናዉ ዳንዳያይ? 10 ሄዋ ግዶፐ፥ አነ ነ ቦንቹዋንነ ግታተꬃን ደንዳ! ነ ፑላነ አንጋ ማያ! 11 ነ ሀንቁዋ ቦሻ አነ ትጋ፤ ኦቶረትያ አሳ ኡባ ጼላደ፥ አነ ካዉሻ! 12 አነ ሎይꬃ ጼላደ፥ ኦቶረትያ ኡባ ዬላያ፤ ኢታ ኦꬅያዋንታ ኡባ ኡንቱንቱ ደእያ ሳን የꬋ! 13 ኡንቱንቱ ኡባ ቢታን ሞጋ፤ ዱፉዋ ዱገ ዎꬃደ፥ ኡንቱንታ ጎርዳ። 14 ያቶፐ፥ ነ ዎልቃን ኔን ጾናናዋ ታን ነዉ ማርካታና።

15 “ታን ኔና መꬌዳዋዳን መꬌዳ፥ ብሄሞታ ግያ ዶኣ አነ ጼላ! እ ቦራዳን ማታ ሜ። 16 አ ጼሳን ደእያ ዎልቃይነ አ ኡሉዋ ካሜዳ ሻያ ምኖተꬃይ ሎይꬅ ዳሮ። 17 አ ዱፊ ዝጋዳን ስት ግ ኡቴዳ፤ አ ገድያ ጻጶቱካ ምኑዋን ዶቀቴዳዋንታ። 18 አ መቀꬃቱ ናስያ ቦምባ ማላ፤ አ ገዲካ ብራታ ዛንገቱዋ ማላ።

19 “ጾሳይ መꬌዳ መታቱ ኡባፐ እ አꬍ ማላልስያዋ። አ መꬌዳዋፐ አትና፥ አ ጾናናዉ ዳንዳይያዌ ባዋ። 20 ዶአይ ኡባይ ካእያ ዞዚ አዉ ምያዋ ሞክሴ። 21 አጉንꬃይ ደእያ ምꬃ ጋርሳን ግሴ፤ ማቃ ግዶን ጫርያን ቆሰቴ። 22 አጉንꬃይ ደእያ ምꬃቱ ባረንቱ ኩዋን አ ገንꬂኖ፤ ሻፋ ዶናን ዶሊያ ምꬃቱ አ ካሚኖ። 23 ሻፋይ ኩሚደ ጎግያ ዎደካ ዳጋመና፤ ዮርዳኖሳ ሻፋይ አ ሶምኡዋን ꬋርጨትያ ዎደካ እ ሳሮ ደኤ። 24 አ አይፍያ ቶይሲደ፥ አ ኦይቃናዉ ዳንዳይያ አሳይ ደኢ? አ ሲꬍያካ ጲርያ ቃራን ጫድ ኦይቃናዉ ዳንዳይያዌ ኦኔ?