1 ኢያሱነ እስራኤልያ አሳይ ዎንታ ጉራን ደንዴድኖ። ኡንቱንቱ ሺጽማ ጌተትያ ሳኣፐ ደንዲደ፥ ዮርዳኖሳ ሻፋኮ ቢደ ፕነናን ያን ጋምኤድኖ። 2 ሄዙ ጋላሳፐ ጉይያን፥ ካፓቱ ኡንቱንቱ ዱንካኔዳ ሳኣን ስመረቴድኖ። 3 አሳ ሀዋዳን ያጊደ አዛዜድኖ፤ “ጾሳ ህንተንቱ ጾሳ ቃላ ጫቁዋ ታቦታነ አ ቶኬዳ ሌዊያ ዛረ ቄሳቱ ዋ በእያ ዎደ፥ ህንተንቱ ዱንካኔዳ ሳኣፐ ደንዲደ፥ ኡንቱንታ ካልተ። 4 ህንተንቱ ካሰ ሀ ኦግያና ብ ኤረና ድራዉ፥ ህንተንቱ ባና ኦግያ ኡንቱንቱ ህንተንታ በሳና። ሽን ቃላ ጫቁዋ ታቦታኮ ሺቆፕተ፤ ቃላ ጫቁዋ ታቦታፐ ላኡ ሻአ ዋꬋ ግድያዋ ኬሻ ሃኩዋን ኤቂተ” ያጌድኖ።

5 ኢያሱ አሳ፥ “ህንተንቱ ሁጲያዉ ጌይተ፤ አያዉ ጎፐ፥ ጾሳይ ዎንት ህንተንቱ ግዶን ማላልስያባ ኦꬃናዋ” ያጌዳ። 6 ቃይ ኢያሱ ቄሳቱ ዋ፥ “ቃላ ጫቁዋ ታቦታ ቶኪደ፥ አሳፐ ስንꬃዉ አꬍተ” ያጊደ ኦዴዳ። ቃላ ጫቁዋ ታቦታ ቶኪደ፥ አሳፐ ስንꬃዉ አꬌድኖ።

7 ጾሳይ ኢያሳ፥ “ታን ሙሴና ግዴዳዋዳን፥ ኔናና ግዳናዋ እስራኤልያ አሳይ ኡባይ ኤራና ማላ፥ ሀቼ ኡንቱንቱ ስንꬃን ታን ኔና ꬎቁ ꬎቁ ኦꬃናዉ ዶማና። 8 ኔን ቃላ ጫቁዋ ታቦታ ቶክያ ቄሳቱ ዋ፥ ‘ዮርዳኖሳ ሻፋ ዶናዉ ጋክያ ዎደ፥ ሃꬃን ገሊደ ኤቂተ’ ያጋደ አዛዛ” ያጌዳ።

9 ኢያሱ እስራኤልያ አሳ፥ “ሃ ዪተ፤ ጾሳ ህንተንቱ ጾሳ ቃላ ስስተ። 10 ደኡዋ ጾሳይ ህንተንቱ ግዶን ደእያዋነ እ ቱሙፐ ካናነቱዋ፥ ሂተቱዋ፥ ሂዌቱዋ፥ ፓርዘቱዋ፥ ገርጌሰቱዋ፥ አሞረቱዋነ ያቡሳቱዋ ህንተንቱ ስንꬃፐ ከሳናዋ ህንተንቱ ኤራናዌ፥ 11 ሳኣ ኡባ ጎዳ ቃላ ጫቁዋ ታቦታይ ህንተፐ ስንꬃቲደ፥ ዮርዳኖሳ ሻፋ ፕንያ ዎድያና። 12 ሀእ እስራኤልያ ዛራቱዋፐ ታማነ ላኡ አሳቱዋ ዶርተ፤ እት እት ዛርያፐ እት እት አሳ ግዶ። 13 ሳኣ ኡባ ጎዳ፥ ጾሳ ቃላ ጫቁዋ ታቦታ ቶኬዳ ቄሳቱዋ ገዲ ዮርዳኖሳ ሃꬃ ቦችያ ዎደ፥ ቆሞፐ ዱገ ጎግያ ዮርዳኖሳ ሃꬃይ ኤቃና፤ እት ሳኣ ሺቂደ ዶረታና” ያጌዳ።

14 አሳይ ዮርዳኖሳ ሻፋ ፕናናዉ ባረንቱ ዱንካንያፐ ከሴዳ ዎደ፥ ቃላ ጫቁዋ ታቦታ ቶኬዳ ቄሳቱ አሳፐ ስንꬃን ሀመቴድኖ። 15 ካꬃ ጫክያ ዎድያን ኡባን ዮርዳኖሳ ሻፋይ ኩንꬄዳ። ግዶፐነ፥ ቃላ ጫቁዋ ታቦታ ቶኬዳ ቄሳቱ ዮርዳኖሳ ሻፋ ጋክና፥ ኡንቱንቱ ገዲ ሃꬃ ጋጻ የꬌዳ ዎደ፥ 16 ቆሞፐ ዱገ ጎግያ ሃꬃይ ኤቂ አጌዳ፤ ህን ዳርስ ሃኮ ሳን፥ ጻርታና ግያ ሳን ደእያ አዳማ ጌተትያ ካታማን እት ሳኣ ሺቂደ ዶረቴዳ። ዱገ አራባ ጋꬋን ደእያ ማጽነ አባዉ ጎግያ ሃꬃይ ቃይ ኡባይ ዱጺደ አት ባሼዳ። ያትና፥ አሳይ ያርኮ ካታማ ሄፍንꬃ ፕኔዳ። 17 እስራኤልያ አሳይ መላ ጋድያ የꬊደ ፕንያ ዎደ፥ አሳይ ኡባይ ፕኒደ ዉራና ጋካናዉ ጾሳ ቃላ ጫቁዋ ታቦታ ቶኬዳ ቄሳቱ ዮርዳኖሳ ሻፋ ግዶን መላ ቢታን ኤቄድኖ።