1 ሄዋፐ ጉይያን መꬍና ጎዳይ ኢያሳ ሀዋዳን ያጌዳ፤ ፓይ. 35:9-34፤ ዛረ. 4:41-43፤ 19:1-13 2 “እስራኤልያ አሳዉ ሀዋዳን ያጋ፤ ‘ታን ሙሴ ባጋና ህንተንታ አዛዜዳዋዳን፥ አሳይ ባቃት ቢደ አትያ ካታማቱዋ ዶርተ። 3 አይ አሳይነ አኬከናንነ ኤረናን አሳ ዎꬎፐ፥ ያ ባቃት ቢደ፥ ሱꬃ አችያዋፐ አታናዋ። 4 አሳ ዎꬌዳዌ ሄ ካታማቱዋፐ እቱዋኮ ባቃት ቢደ፥ ካታማ ገልያ ፐንግያን ኤቂደ፥ ሀኔዳባ ሄ ካታማ ጭማቶ ኦዶ። ኡንቱንቱ ባረንቱ ካታማ አፊደ፥ እ ደአና ሳኣ እምና፥ እ ኡንቱንቱና ያን ደኦ። 5 ሱꬃ አችያዌ አ ካሊደ ዮፐ፥ ሄ ካታማ ጭማቱ አ አꬂደ እሞፕኖ። አያዉ ጎፐ፥ ባረ ሾሩዋ እ ቆፒደ፥ ባረ ካሰ ሞርከተꬃ ድራዉ ዎꬍቤና። 6 ሽቁዋ ስንꬃን ፕርዳዉ እ ኤቃና ጋካናሽ ሄ ዎድያን ደእያ ቄሳቱዋ ኡባቱዋ ካፑ ሀይቃና ጋካናዉ፥ ሄ ካታማን ደኦ። ሄዋፐ ጉይያን፥ ባቃቲደ ከሴዳ ካታማ ጉየ ዛሪደ፥ ባረ ሶ ገሎ’ ያጋ” ያጌዳ።

7 ሄዋፐ ጉየ እስራኤልያ አሳይ ንፍታሌማ ገዝያን፥ ጋሊላን ደእያ ቀዴሻነ አ ሄንꬃ ጋደቱዋ፥ ኤፍሬማ ገዝያን ደእያ ሰኬማነ አ ሄንꬃ ጋደቱዋነ ይሁዳ ገዝያን ደእያ ቅርያት-አርባአ ዎይ ከብሮነ ዱማዬድኖ። 8 ዮርዳኖሳ ሻፋፐ ሄፍንꬃን፥ ያርኮፐ አዋይ ዶልያ ባጋ ዎራን፥ ꬎቃሳን ደእያ ሮቤላ ዛራቱዋ ጋድያፐ ቤጸራ፥ ጋደ ዛራቱዋ ጋድያፐ ጋላኣደን ደእያ ራሞታነ ምናሰ ዛራቱዋ ጋድያፐ ባሳነን ደእያ ጎላና ዱማዬድኖ። 9 እስራኤልያ አሳ ኡባዉነ ኡንቱንቱ ግዶን ደእያ በተቶ ዱማዬዳ ካታማቱ ሀዋንታ፤ ኤረናን ደኢደ አሳ ዎꬌዳ አይ አሳይነ፥ ሽቁዋ ስንꬃን ኤቃና ጋካናዉ፥ ሱꬃ አችያዋ ኩሽያን ሀይቀናዳን፥ ሄ ካታማቱዋፐ እቱዋኮ ባቃታናዉ ዳንዳዬ።