1 ሄዋፐ ጉይያን ሌዊያ ዛራቱዋ ያራቱ ካፓቱ ቄስያ ኤልኣዛራኮ፥ ነዌ ናኣ ኢያሱኮነ እስራኤልያ አሳ ዛረቶ ያራቱ ካፓቱዋኮ ሺቄድኖ። 2 ሄዋን ካናነ ጋድያን ደእያ ሴሎን ኡንቱንቱ ሀዋዳን ያጌድኖ፤ “ኑን ደአና ካታማቱዋነ ኑ መህያዉ ሄንꬃ ጋደቱዋ ኔን ኑ እማና ማላ መꬍና ጎዳይ ሙሴ ባጋና አዛዜዳ” ያጌድኖ። ፓይ. 35:1-8 3 ሄዋፐ ጉየ መꬍና ጎዳይ አዛዜዳዋዳን፥ እስራኤልያ አሳይ ሌዊያ ዛረቶ ሀ ካታማቱዋነ ሄንꬃ ጋደቱዋ ባረንቱ ጋድያፐ ግሺደ ኡንቱንቶ እሜድኖ።

4 ኮይሮ ሳማይ ቃሃታ ያራቶ ከሴዳ። ቄስያ አሮና ዛርያ ሌዋቱ ይሁዳ ዛራቱዋፐ፥ ስሞና ዛራቱዋፐነ ቢንያማ ዛራቱዋፐ ታማነ ሄዙ ካታማቱዋ ሳማን አኬድኖ። 5 አቴዳ ቃሃቱዋ ያራቱ ኤፍሬማ ዛራቱዋፐ፥ ዳና ዛራቱዋፐነ ምናሰ ዛራቱዋ ባጋፐ ታሙ ካታማቱዋ ሳማን አኬድኖ።

6 ገርሾና ያራቱ ይሳኮራ ዛራቱዋፐ፥ አሴራ ዛራቱዋፐ፥ ንፍታሌማ ዛራቱዋፐነ ባሳነን ደእያ ምናሰ ዛራቱዋ ባጋፐ ታማነ ሄዙ ካታማቱዋ ሳማን አኬድኖ።

7 ማራራ ያራቱ ሮቤላ ዛራቱዋፐ፥ ጋደ ዛራቱዋፐነ ዛብሎና ዛራቱዋፐ ታማነ ላኡ ካታማቱዋ አኬድኖ።

8 መꬍና ጎዳይ ሙሴ ባጋና አዛዜዳዋዳን፥ እስራኤልያ አሳይ ሀ ካታማቱዋነ ኡንቱንቱ ሄንꬃ ጋደቱዋ ሌዋቶ ሳማን ሻክ እሜድኖ።

9 ይሁዳ ዛራቱዋፐነ ስሞና ዛራቱዋፐ እስራኤልያ አሳይ አኪደ እሜዳ ካታማቱዋ ሱንꬃይ ሀዋፐ ካሊደ ጻፈቴዳ። 10 ኮይሮ ሳማይ ሌዊያ ዛራቱዋፐ የለቲደ፥ ቃሃታ ያራ ግዴዳ አሮና ዛረቶ ከስና፥ ኡንቱንቶ እሜዳ ካታማቱ ሀዋንታ: 11 እስራኤልያ አሳይ ይሁዳ ገዝያን ደእያ ቅርያት-አርባአ ዎይ ከብሮናነ አ ዩሹዋን ደእያ ሄንꬃ ጋደቱዋ ኡንቱንቶ እሜድኖ። (አርባእ አናቀ አዉዋ።) 12 ሽን ሄ ካታማ ዩሹዋን ደእያ ጋደቱዋነ ሞꬃቱዋ ይፉነ ናኣ ካሌባዉ ላታ ኦꬂደ እሜድኖ። 13 ቄስያ አሮና ዛረቶ አሳ ዎꬌዳ አሳይ ባቃት ቢደ አትያ ከብሮነ ካታማነ አ ሄንꬃ ጋደቱዋ፥ ሊብናነ አ ሄንꬃ ጋደቱዋ፥ 14 ያትራነ አ ሄንꬃ ጋደቱዋ፥ ኤሽታሞአነ አ ሄንꬃ ጋደቱዋ፥ 15 ሆሎናነ አ ሄንꬃ ጋደቱዋ፥ ዳቢራነ አ ሄንꬃ ጋደቱዋ፥ 16 አይናነ አ ሄንꬃ ጋደቱዋ፥ ዩጻነ አ ሄንꬃ ጋደቱዋነ ቤት-ሸመሻነ አ ሄንꬃ ጋደቱዋ፥ ኡባና ኡዱፑን ካታማቱዋ ይሁዳ ዛራቱዋፐነ ስሞና ዛራቱዋፐ አኪደ እሜድኖ። 17 ቢንያማ ዛራቱዋፐ ጋባኦናነ አ ሄንꬃ ጋደቱዋ፥ ገባአነ አ ሄንꬃ ጋደቱዋ፥ 18 አናቶታነ አ ሄንꬃ ጋደቱዋነ አልሞናነ አ ሄንꬃ ጋደቱዋ፥ ኡባና ኦይዱ ካታማቱዋ አኪደ እሜድኖ። 19 አሮና ዛርያ ቄሳቱዋ ካታማቱነ ኡንቱንቱ ሄንꬃ ጋደቱ ኡባና ታማነ ሄዛ።

20 አቴዳ ቃሃታ ያራቱ፥ ሌዊያ ዛረ ግድያዋንቱ ኤፍሬማ ዛራቱዋ ካታማቱዋፐ ሻክና አኬድኖ። 21 ኡንቱንቶ ኤፍሬማ ገዝያን ደእያ፥ አሳ ዎꬌዳ አሳይ ባቃት ቢደ አትያ ሰኬማነ አ ሄንꬃ ጋደቱዋ፥ ገዜራነ አ ሄንꬃ ጋደቱዋ፥ 22 ቅብጻይማነ አ ሄንꬃ ጋደቱዋነ ቤት-ሆሮናነ አ ሄንꬃ ጋደቱዋ፥ ኡባና ኦይዱ ካታማቱዋ አኪደ እሜድኖ። 23 ዳና ዛራቱዋፐ ኤልታቀነ አ ሄንꬃ ጋደቱዋ፥ ግባቶናነ አ ሄንꬃ ጋደቱዋ፥ 24 አያሎናነ አ ሄንꬃ ጋደቱዋነ ጋተ-ርሞናነ አ ሄንꬃ ጋደቱዋ፥ ኡባና ኦይዱ ካታማቱዋ አኪደ እሜድኖ። 25 ምናሰ ዛራቱዋ ባጋቱዋፐ ታእናካነ አ ሄንꬃ ጋደቱዋነ ጋተ-ርሞናነ አ ሄንꬃ ጋደቱዋ፥ ኡባና ላኡ ካታማቱዋ አኪደ እሜድኖ። 26 አቴዳ ቃሃታ ያራቱ ካታማቱነ ኡንቱንቱ ሄንꬃ ጋደቱ ኡባና ታማ።

27 ምናሰ ዛራቱዋ ባጋቱዋፐ አሳ ዎꬌዳ አሳይ ባቃት ቢደ አትያ፥ ባሳነን ደእያ ጎላና ካታማነ አ ሄንꬃ ጋደቱዋነ ባኤሽታራነ አ ሄንꬃ ጋደቱዋ፥ ኡባና ላኡ ካታማቱዋ አኪደ፥ ገርሾና ያራ ግድያ ሀራ ሌዋቶ እሜድኖ። 28 ይሳኮራ ዛራቱዋፐ ቅሽዮናነ አ ሄንꬃ ጋደቱዋ፥ ዳብራታነ አ ሄንꬃ ጋደቱዋ፥ 29 ያርሙታነ አ ሄንꬃ ጋደቱዋነ ኤንጋኒማነ አ ሄንꬃ ጋደቱዋ፥ ኡባና ኦይዱ ካታማቱዋ አኪደ እሜድኖ። 30 አሴራ ዛራቱዋፐ ምሽኣላነ አ ሄንꬃ ጋደቱዋ፥ አብዶናነ አ ሄንꬃ ጋደቱዋ፥ 31 ሄልቃታነ አ ሄንꬃ ጋደቱዋነ ራሆባነ አ ሄንꬃ ጋደቱዋ፥ ኡባና ኦይዱ ካታማቱዋ አኪደ እሜድኖ። 32 ሄዋዳንካ ንፍታሌማ ዛራቱዋፐ አሳ ዎꬌዳ አሳይ ባቃት ቢደ አትያ ጋሊላን ደእያ ቀዴሻነ አ ሄንꬃ ጋደቱዋ፥ ሀሞታነ አ ሄንꬃ ጋደቱዋ፥ ዶራነ አ ሄንꬃ ጋደቱዋነ ቃርታናነ አ ሄንꬃ ጋደቱዋ፥ ኡባና ኦይዱ ካታማቱዋ አኪደ፥ ኡንቱንቶ እሜድኖ። 33 ገርሾና ያራቱ ካታማቱነ ኡንቱንቱ አ ሄንꬃ ጋደቱ ኡባና ታማነ ሄዛ።

34-35 አቴዳ ማራራ ያራ ግድያ ሌዋቶ ዛብሎና ዛራቱዋፐ አሳ ዎꬌዳ አሳይ ባቃት ቢደ አትያ ዮቅናኣማነ አ ሄንꬃ ጋደቱዋ፥ ቃርታነ አ ሄንꬃ ጋደቱዋ፥ ዲምናነ አ ሄንꬃ ጋደቱዋነ ናህላላነ አ ሄንꬃ ጋደቱዋ፥ ኡባና ኦይዱ ካታማቱዋ አኪደ እሜድኖ። 36 ሮቤላ ዛራቱዋፐ ቤጸራነ አ ሄንꬃ ጋደቱዋ፥ ያሃጻነ አ ሄንꬃ ጋደቱዋ፥ 37 ቅደሞታነ አ ሄንꬃ ጋደቱዋነ መፋኣታነ አ ሄንꬃ ጋደቱዋ፥ ኡባና ኦይዱ ካታማቱዋ አኪደ፥ ኡንቱንቶ እሜድኖ። 38 ቃይ ጋደ ዛራቱዋፐ አሳ ዎꬌዳ አሳይ ባቃት ቢደ አትያ፥ ጋላኣደን ደእያ ራሞታነ አ ሄንꬃ ጋደቱዋ፥ ማህናይማነ አ ሄንꬃ ጋደቱዋ፥ 39 ሀሰቦናነ አ ሄንꬃ ጋደቱዋነ ያእዜራነ አ ሄንꬃ ጋደቱዋ፥ ኡባና ኦይዱ ካታማቱዋ አኪደ፥ ኡንቱንቶ እሜድኖ። 40 ማራራ ያራ ግድያ ሀራ ሌዋቶ ሻክና ጋኬዳ ካታማቱ ኡባና ታማነ ላአ።

41 እስራኤልያ አሳይ ላቴዳ ጋድያን ደእያ ሌዋቶ ኡባና ኦይታማነ ሆስፑን ካታማቱ ኡንቱንቱ ሄንꬃ ጋደቱዋና ደኢኖ። 42 ሄ ካታማቱዋ ኡባ ዩሹዋን ሄንꬃ ጋደቱ ደኢኖ።

43 ሄዋዳን ኦꬂደ፥ መꬍና ጎዳይ ኡንቱንቱ አዋቶ እማናዉ ጫቄዳ ጋድያ ኡባ እስራኤልያ አሳዉ እምና ኡንቱንቱ ላቲደ፥ ያን ደኤድኖ። 44 መꬍና ጎዳይ ኡንቱንቱ አዋቶ ጫቄዳዋዳን፥ ኡንቱንቱ ኡባ ባጋናካ ሸምፕሴዳ። መꬍና ጎዳይ ኡንቱንቱ ሞርከቱዋ ኡባ ኡንቱንቶ አꬅ እሜዳ ድራዉ፥ ኡንቱንቱ ሞርከቱዋፐ እቱነ ኡንቱንቱና ኤቀታናዉ ዳንዳይቤና። 45 መꬍና ጎዳይ እስራኤልያ አሳዉ እማና ጌዳ ሎኦ ቃላ ኡባ ፖሌዳፐ አትን እቱነ ሳኣን አትቤና።