1 ሄዋፐ ጉይያን ኢያሱ ሮቤላ ዘረꬃ፥ ጋደ ዛራቱዋነ ምናሰ ዛራቱዋፐ ባጋቱዋ ጼጊደ: 2 “መꬍና ጎዳ ቆማይ ሙሴ ህንተንታ አዛዜዳ ኡባ ፖሌድታ፤ ቃይ ታዉካ ኡባባን አዛዘቴድታ። ፓይ. 32:20-32፤ ኢያሳ 1:12-15 3 ዳሮ ዎድያፐ ሀቼ ጋካናዉ፥ ህንተንቱ ህንተንቱ እሻቱዋ ባሽበይክታ፤ መꬍና ጎዳይ ህንተንቱ ጾሳይ ህንተዉ እሜዳ ሀዳራ ፖሌድታ። 4 ስም መꬍና ጎዳይ ህንተንቱ ጾሳይ ኡንቱንቶ ጌዳ ቃላዳን፥ ህንተንቱ እሻቱዋ ሸምፕሴዳ። ሄዋ ድራዉ፥ መꬍና ጎዳ ቆማይ ሙሴ ህንተንቶ ዮርዳኖሳ ሻፋፐ ሄፍንꬃ ባጋና እሜዳ ላታ ጋድያን ደእያ ህንተንቱ ሶ ሶ ስምተ። 5 መꬍና ጎዳ ቆማይ ሙሴ ህንተንታ አዛዜዳ አዛዙዋነ ዎጋ ሎይꬅ ናግተ። መꬍና ጎዳ ህንተንቱ ጾሳ ሲቅተ፤ አ ኦግያ ኡባን ሀመትተ፤ አ አዛዙዋ አዛዘትተ፤ አናና ምን ኦይቀትተ፤ ህንተንቱ ኩመንꬃ ዎዛናፐነ ኩመንꬃ ሸምፑዋፐ አዉ ኦꬅተ” ያጌዳ።

6-8 ኢያሱ ኡንቱንታ አንጅ የዲደ፤ “በእተ፥ ህንተንቱ ሀእ ዳሮ መህያ፥ ብራ፥ ዎርቃ፥ ናሃስያ፥ ብራታነ ዳሮ ማዩዋ አኪደ ዱረቲደ፥ ህንተንቱ ጋድያ ስማና ሀኒታ። ሄዋ ድራዉ ህንተንቱ ሞርከቱዋፐ ኦሞዴዳዋ፥ ህንተንቱ እሻቱዋና ግሽ አክተ” ያጌዳ። ሄዋፐ ጉይያን ኡንቱንቱ ባረንቱ ሶ ሶ ቤድኖ።

ሙሴ ምናሰ ዛራቱዋፐ ባጋቶ ባሳነን ጋድያ እም ዎꬄዳ፤ ሽን አቴዳ ምናሰ ዛራቱዋ ባጋቶ ኢያሱ ዮርዳኖሳ ሻፋፐ አዋይ ዉልያ ባጋን ሀራ ዛራቱዋና እትፐ ላትያ ቢታ እሜዳ።

9 ሮቤላ ዛራቱ፥ ጋደ ዛራቱነ ምናሰ ዛራቱዋ ባጋቱ ባረንቱ ላታ ጋድያ ስሚደ ቤድኖ። ጾሳይ ሙሴ ባጋና አዛዝና ላቴዳ ጋላኣደ ጋድያ ባናዉ፥ ካናነ ጋድያን ሴሎን ደእያ እስራኤልያ አሳፐ ሻከቴድኖ።

10 ሮቤላ ዛራቱ፥ ጋደ ዛራቱነ ምናሰ ዛራቱዋፐ ባጋቱ ዮርዳኖሳ ሻፋ ማታን ካናነ ጋድያን ደእያ ጋልሎታ ዬዳ ዎደ፥ ሻፋ ማታን ያርሹዋ ያርሽያ ዎልቃማ ሳኣ 11 ግምቢና፥ “ሮቤላ ዛራቱ፥ ጋደ ዛራቱነ ምናሰ ዛራቱዋፐ ባጋቱ ዮርዳኖሳ ማታን፥ ጋልሎታን፥ ካናነ ዛዋን፥ እስራኤላቱ ባጋና ያርሹዋ ሳኣ ግምቤድኖ” ግያዋ እስራኤላቱ ስሴድኖ። 12 ኩመንꬃ እስራኤልያ አሳ ያአይ ኡንቱንቱ ኦላናዉ ባናዉ ሴሎ ግያ ሳን እትፐ ሺቄዳ።

13 እስራኤልያ አሳይ ቄስያ ኤልኣዛራ ናኣ ፒንሃሳ፥ ጋላኣደ ጋድያን ደእያ ሮቤላ ዛራቱዋኮ፥ ጋደ ዛራቱዋኮነ ምናሰ ዛራቱዋፐ ባጋቱዋኮ ኪቴዳ። 14 እት እት ዛሪ ባረ ያራቱ ካፓቱዋፐ እት እት አሳ ዶሪደ፥ ታሙ አሳ ፒንሃሳና የዴዳ።

15 ኡንቱንቱ ሮቤላ ዛራቱ፥ ጋደ ዛራቱነ ምናሰ ዛራቱዋፐ ባጋቱ ደእያ ጋላኣደ ጋድያ ቢደ ኡንቱንታ፥ 16 “መꬍና ጎዳ አሳይ ኩመንꬃ ያአይ ህንተንታ ሀዋዳን ያጌ፤ ‘እስራኤልያ ጾሳ ቦላ አያዉ ሀዋ ማላ ኢታባ ኦꬄድቴ? ዋኒደ ጎፐ፥ ህንተንቱ ሀራ ያርሹዋ ሳኣ ህንተንቶ ግምቢደ፥ መꬍና ጎዳ ቦላ ማካሌድታ! አ ካልያዋካ አጌዲታ!ዛረ. 12:13-14 17 ፓኦራን ኑን ኦꬄዳ ናጋራይ ኑዉ ግደኔ? እስራኤልያ ሽቁዋ ቦላ ቦሻይ ዎꬌዳዋ ግዶፐነ፥ ሀቼ ጋካናዉካ ኑን ሄ ናጋራፐ ጌይቦኮ። ፓይ. 25:1-9 18 መꬍና ጎዳ ካልያዋፐ ሀችካ ዎራ ስማነየ?

“ ‘ህንተ ሀቼ መꬍና ጎዳ ቦላ ማካሎፐ፥ መꬍና ጎዳይ ዎንት ኩመንꬃ እስራኤልያ ሽቁዋ ሀንቀታናዋ። 19 ህንተንቱ ደእያ ጋዲ ቱኔዳዋ ግዶፐ፥ መꬍና ጎዳ ዱንካኒ ኤቄዳ ጋድያ ሃ ዪደ፥ ኑናና ጋድያ ሻክተ። ሽን ካሰፐ ደእያ መꬍና ጎዳ ኑ ጾሳ ያርሹዋ ሳአፐ ሀራ ያርሹዋ ሳኣ ግምቢደ፥ መꬍና ጎዳ ቦላ ማካሎፕተ፤ ዎይ ኑናካ ማካላንቻ ከሶፕተ። 20 ዛራሀ ዛረ አካን ናጋራ ግዶዋፐ አኪደ፥ ናጋራ ኦꬄዳ ድራዉ፥ ኩመንꬃ እስራኤልያ ሽቁዋ ቦላ ጾሳ ሀንቁ ዎꬍቤኔ? ባረ ናጋራ ጋሱዋን ሀይቄዳዌ አ ጻላላ ግደና’ ያጌ” ያጌድኖ። ኢያሳ 7:1-26

21 ሄዋፐ ጉየ ሮቤላ ዛራቱ፥ ጋደ ዛራቱነ ምናሰ ዛራቱዋፐ ባጋቱ እስራኤልያ ያራቱ ካፓቶ ሀዋዳን ያጊደ ዛሬድኖ፤ 22 “ዎልቃማይ መꬍና ጎዳ ጾሳ! ዎልቃማይ መꬍና ጎዳ ጾሳ! ኑን ሀዋ አያዉ ኦꬄደንቶ እ ኤሬዳ! ኑን አያዉ ኦꬄደንቶ ህንተንቱካ ኤራናዳን ኮዬቶ። ኑን መꬍና ጎዳ ቦላን ማካሌዳዋነ አዛዘተናን እጼዳዋ ግዶፐ፥ ሀቼ ኑና ፓጻ ዎꬆፕተ። 23 ኑን መꬍና ጎዳ ካልያዋ አጊደ፥ ጹግያ ያርሹዋ፥ ካꬃ ያርሹዋነ እትፐተꬃ ያርሹዋ ያርሻናዉነ ያርሽያ ሳኣ ግምቤዳዋ ግዶፐ፥ መꬍና ጎዳይ ኑና ሄ ኦሶ ኦቾ። 24 ኑን ሄዎ ግምቢቦኮ፤ ኑን ያርሹዋ ሳኣ ግምቤዳዌ፥ ስንꬃፐ ያና ላይꬃን ህንተንቱ ናናይ ኑ ናና፥ ‘ህንተና መꬍና ጎዳን እስራኤልያ ጾሳን አዬ ጋꬅያዌ? 25 ህንተንቶ፥ ሮቤላነ ጋደ ዛረቶ፥ መꬍና ጎዳይ ኑ ግዶንነ ህንተንቱ ግዶን ዮርዳኖሳ ሻፋ ዛዋዬዳ። መꬍና ጎዳን ህንተንታ ጋꬅያዌ ባዋ’ ያጋነንቶነ ጊደ ህርጌዳ ድራሳ። ሄዋዳን ኦꬂደ፥ ህንተንቱ ዛራቱ ኑ ዘረꬃ መꬍና ጎዳዉ ጎይነናዳን ተኤናን አግክኖ።

26 “ሄዋ ድራዉ ኑን ኑ ግዶን ያርሹዋ ሳኣ አነ ግምቦይተ ገዳ፤ ሽን ጹግያ ያርሹዋ ሳኣ ዎይ ሀራ ያርሹዋ ሳኣ ግደና። 27 ኑን ያርሹዋ ሳኣ ግምቤዳዌ ጹግያ ያርሹዋ፥ እትፐተꬃ ያርሹዋነ ሀራ ያርሹዋ ያርሺደ፥ መꬍና ጎዳዉ አ ዱንካንያን ጎይናና ማላ፥ ሀዌ ኑ ግዱዋንነ ህንተንቱ ግዱዋን፥ ቃይ ኑ ካልያ የለታ ግዱዋን ማርካ ግዳናሳ። ዎደፐ ህንተንቱ ዛራቱ ኑ ዘረꬃ፥ ‘ህንተና መꬍና ጎዳን ጋꬅያዌ አያይነ ባዋ’ ጋናዉ ዳንዳይክኖ። 28 ኡንቱንቱ ጌላዳን ኑና ዎይ ኑ የለታ ዎድያፐ ሄዋዳን ጎፐ፥ ኑን ኡንቱንቶ ዛሪደ፥ ‘ጾሳዉ ያርሽያ ሳኣ ሌምሱዋ ሀዋ በእተ። ሀዋ ኑ አዎቱ ጹግያ ያርሹዋነ ሀራ ያርሹዋ ያርሻናሳ ግደናን፥ ህንተፐነ ኑፐነ ግዱዋን ማርካ ግዳና ማላ ግምቤድኖ’ ያጋና። 29 መꬍና ጎዳ ቦላ ማካላናዌ ኑፐ ሃኮ! መꬍና ጎዳ ኑ ጾሳ ዱንካንያ ስንꬃን ኤቄዳ ያርሹዋ ሳፐ ሀራ፥ ጹግያ ያርሹዋ፥ ካꬃ ያርሹዋነ ሀራ ያርሹዋ ያርሽያ ሳኣ ግምቢደ፥ ሀቼ ዎራ ስምበይኮ” ያጊደ ዛሬድኖ።

30 ቄስያ ፒንሃስነ አናና ደእያ እስራኤልያ ያራቱ ካፓቱ፥ ሮቤላ፥ ጋዳነ ምናሰ ዛራቱ ኦዴዳዋ ስሲደ፥ ሎይꬅ ናሸቴድኖ። 31 ቄስያ ኤልኣዛራ ናአይ ፒንሃስ ሮቤላ፥ ጋዳነ ምናሰ ዛረቶ፥ “መꬍና ጎዳይ ኑ ግዶን ደእያዋ ኑን ሀቼ ኤሬዶ፤ አያዉ ጎፐ፥ ሀ የዉዋ ህንተንቱ መꬍና ጎዳ ቦላ ማካላናዉ ኦꬅበይክታ። ህንተንቱ ሀእ መꬍና ጎዳ ሙራፐ እስራኤልያ አሳ አሼድታ” ያጌዳ።

32 ሄዋፐ ጉይያን ቄስያ ኤልኣዛራ ናአይ ፒንሃስነ ካፓቱ ጋላኣደን ደእያ ሮቤላነ ጋደ ዛራቱዋ ማታፐ ካናነን ደእያ እስራኤልያ አሳኮ ስሚደ ሀኔዳባ ኡንቱንቶ ኦዴድኖ። 33 እስራኤልያ አሳይ ናሸቻን፥ ጾሳ ጋላቴድኖ። ቃይ ሮቤላ አሳቱነ ጋደ አሳቱ ደእያ ጋድያ ኦለቲደ ባይዛናዉ ባናዉ ሃሳይያዋካ አጌድኖ።

34 ሮቤላነ ጋደ ዛራቱ፥ “ሀ ያርሹዋ ሳአይ ጾሳ ጻላላይ ጾሳ ግድያዎ ኑ ኡባፐ ግዱዋን ማርካ ግዳናዋ” ያጌድኖ፤ ሄ ያርሹዋ ሳኣ ማርካ ሱንꬄድኖ።