1 ዳሮ ዎድያፐ ጉይያን፥ መꬍና ጎዳይ እስራኤልያ አሳ ኡንቱንቱ ዩሹዋን ደእያ ሞርከቱዋ ኡባፐ ሸምፕሴዳ። ሄ ዎደ ኢያሱ ጭሚደ፥ ዎድያ ሎይꬅ ሱጌዳ። 2 ያቴዳዌ እስራኤልያ አሳ ኡባ፥ ጭማቱዋ፥ ካፓቱዋ፥ ዳናቱዋነ ኦላ ጋዳዋቱዋ እትፐ ጼሲደ፥ ሀዋዳን ያጌዳ፤ “ታን ጭማደ፥ ዎድያ ሎይꬃ ሱጋድ። 3 መꬍና ጎዳይ ህንተንቱ ጾሳይ ህንተንቱ ድራዉ ሀ ካዉተꬃቱዋ ኡባ ኦꬄዳዋ ህንተንቱ ህንተንቱ ሁጲያዉ በኤድታ። ህንተንቶ ኦለቴዳዌ መꬍና ጎዳ ህንተንቱ ጾሳተነ። 4 በእተ፥ ዮርዳኖሳ ሻፋፐ ዶሚደ አዋይ ዉልያ ባጋና ደእያ ሜድትራነ አባ ጋካናዉ ደእያ፥ አቴዳ ካዉተꬃቱዋ ቢታ ኡባ፥ ታን ꬋይሴዳ ካዉተꬃቱ ቢታናካ ላታ ጋደ ኦꬃደ፥ ህንተንቱ ዛረቶ ሻካደ እማድ። 5 መꬍና ጎዳይ ህንተንቱ ጾሳይ ኡንቱንታ ሱጋናነ ህንተንቱ ስንꬃፐ ላግና መꬍና ጎዳይ ህንተንቱ ጾሳይ ጌዳዋዳን፥ ህንተንቱ ኡንቱንቱ ጋድያ ላታና።

6 “ሄዋ ድራዉ፥ ሙሴ ህግያ ማጻፋን ጻፈቴዳ ኡባ ናጋናዉነ ኦꬃናዉ ሎይꬅ ምንተ፤ አፐ ኡሸቻ ሀድርሳ ጎፕተ። 7 ሄዋን ህንተንቱ ግዶን አቴዳ ሀ ካዉተꬃቱዋና ዋላከቶፕተ። ኡንቱንቱ ጾሳቱዋ ሱንꬃ ደንꬆፕተ ዎይ ኡንቱንቱ ሱንꬃን ጫቆፕተ። ኡንቱንቶ ኦꬆፕተ ዎይ ኡንቱንቶ ጎይኖፕተ። 8 ሽን ሀቼ ጋካናዉ ህንተንቱ ኦꬄዳዋዳን፥ ጾሳ ህንተንቱ መꬍና ጎዳ ሎይꬅ ኦይክተ።

9 “አያዉ ጎፐ፥ መꬍና ጎዳይ ግታነ ምኖ ካዉተꬃቱዋ ህንተንቱ ስንꬃፐ ከሴዳ። ህንተና ግዶፐ፥ ሀቼ ጋካናዉ ኦንነ ህንተናና ኤቀታናዉ ዳንዳይቤና። 10 መꬍና ጎዳይ ህንተንቱ ጾሳይ ህንተንቶ ጌዳዋዳን፥ እ ባረ ሁጲያዉ ህንተንቶ ኦለትያ ድራዉ፥ ህንተፐ እት አሳይ ሻአ አሳ የደርሴዳ። ዛረ. 3:22፤ 32:30 11 መꬍና ጎዳ ህንተንቱ ጾሳ ኡባ ገደ ሲቃናዋ ዶጎፕተ። 12 ህንተንቱ ጉየ ስሚደ፥ ካዉተꬃቱዋፐ ሀዋን ህንተንቱ ግዱዋን አቴዳ አሳና እቱዋ ግዶፐ፥ ኡንቱንቱ ማቻቱዋ ህንተንቶ፥ ህንተንቱ ማቻቱዋ ኡንቱንቶ እም ዋላከቶፐ፥ 13 መꬍና ጎዳይ ህንተንቱ ጾሳይ ሀ ካዉተꬃቱዋ ህንተንቱ ስንꬃፐ የደርስያዋ አግ ባሻናዋ ጌሺደ ኤርተ። ሽን መꬍና ጎዳይ ህንተንቱ ጾሳይ እሜዳ ሀ ሎኦ ጋድያፐ ህንተንቱ ꬋያና ጋካናዉ፥ ኡንቱንቱ ህንተንቶ ጲረነ ግተ ግዳና፤ ህንተንቱ ዞክያዉ ልሶ፥ ህንተንቱ አይፍያዉካ አጉንꬃ ግዳና።

14 “ሀእ ስም ታን ሀይቃና ማታድ። መꬍና ጎዳይ ህንተንቱ ጾሳይ ህንተንቶ እማና ጌዳ ሎኦ ኡባፐ እትባይነ አትቤናዋ ህንተንቱ ኡባይ ህንተንቱ ዎዛናንነ ሸምፑዋን ኤሪታ። እ ህንተንቶ እማና ጌዳዋፐ እትባይነ አተናን፥ ኡባይ ፖለቴዳ። 15 መꬍና ጎዳይ ህንተንቱ ጾሳይ ህንተንቶ እማና ጌዳ ሎኦባይ ኡባይ አተናን ፖለቴዳዋዳን፥ መꬍና ጎዳይ ህንተንቱ ጾሳይ ህንተንቶ እሜዳ ሀ ሎኦ ጋድያፐ ህንተንታ ꬋይሳና ጋካናዉ፥ ኢታ ሙሩዋ ኡባካ ህንተንቱ ቦላን ሄዋዳን አሀና። 16 መꬍና ጎዳይ ህንተንቱ ጾሳይ ህንተናና ጫቀቴዳ ቃላ ጫቁዋ ህንተንቱ መንꬆፐ፥ ቢደ ሀራ ጾሳቶ ኦꬆፐነ ጎይኖፐ፥ መꬍና ጎዳ ሀንቁ ህንተንቱ ቦላ ኤጽ ከሳና፤ እ ህንተንቶ እሜዳ ሎኦ ቢታፐካ ህንተንቱ ኤለካ ꬋያና” ያጌዳ።