1 ሄዋፐ ጉይያን ኢያሱ እስራኤልያ ዛራቱዋ ኡባ ሰኬማ ጌተትያ ካታማን ሺሼዳ። ጭማቱዋ፥ ካፓቱዋ፥ ዳናቱዋነ ኦላ ጋዳዋቱዋ ኡባ ጼስና ኡንቱንቱ ጾሳ ስንꬃን ሺቄድኖ። 2 ኢያሱ አሳዉ ኡባዉ ሀዋዳን ያጌዳ፤ “መꬍና ጎዳይ እስራኤልያ ጾሳይ ሀዋዳን ያጌ፤ ‘በን ህንተንቱ አዎቱ ኤፍራጺሳ ሻፋፐ ሄፍንꬃን ደኤድኖ፤ ኡንቱንቱ ሀራ ጾሳቶ ኦꬄድኖ። ኡንቱንቱፐ እቱ አብራሃማነ ናኮራ አዉዋ ታራ። ዶመꬃ 11:27 3 ሄዋፐ ጉይያን ህንተንቱ አዉዋ አብራሃማ፥ ሄ ሻፋፐ ሄፍንꬃን ደእያ ጋድያፐ ጼሳደ፥ ካናነ ቢታ ኡባን ካለꬃድ። አ ዛርያካ ጮራያድ፤ ይሳቃካ አዉ እማድ። ዶመꬃ 12:1-9፤ 21:1-3 4 ይሳቃዉካ ያቆባነ ኤሳ እማድ። ኤሳዉ ኤዶማ ገዝያ ላታናዳን እማድ፤ ሽን ያቆብነ አ ናናይ ዱገ ግብጼ ቤድኖ። ዶመꬃ 25:24-26፤ 36:8፤ 46:1-7፤ ዛረ. 2:5

5 “ ‘ጉየፐ ሙሳነ አሮና ኪታደ ታን ያን ኦꬄዳዋን ግብጼ ጋድያ አሳ ቦሻን ሾጫድ፤ ሄዋፐ ጉይያን ህንተንታ ከሳድ። ከሳ 3:1—12:42 6 ታን ህንተንቱ አዎቱዋ ግብጼፐ ከስና፥ ዞኦ አባኮ ዬድታ፤ ግብጼቱ ህንተንቱ አዎቱዋ ፓራቱ ጎችያ ጋረቱዋንነ ፓራዋቱዋን የደርሴድኖ። ከሳ 14:1-31 7 ኡንቱንቱ መꬍና ጎዳዉ ዋሴዳ ዎደ፥ ኡንቱንቱፐነ ግብጼቱዋፐ ግዱዋን ꬉማ የጋድ፤ ያታደ፥ አባይ ኡንቱንቱ ቦላ ስማናዳንነ ኡንቱንቱ ሙካናዳን ኦꬃድ። ታን ግብጼቱዋ ቦላ ኦꬄዳዋ ህንተንቱ ህንተንቱ አይፍያን በኤድታ። ህንተካ ዎራን ዳሮ ዎድያ ደኤድታ።

8 “ ‘ሄዋፐ ጉይያን ዮርዳኖሳ ሻፋፐ አዋይ ዶልያ ባጋና ደእያ አሞራዋናቱዋ ጋድያ ታን ህንተንታ አሃድ። ኡንቱንቱ ህንተናና ኦለትና፥ ታን ኡንቱንታ ህንተንቱ ኩሽያን አꬃደ እማድ፤ ህንተንቱ ጋድያ ላቴድታ። ቃይ ታን ኡንቱንታ ህንተንቱ ስንꬃፐ ꬋይሳድ።ፓይ. 21:21-35 9 ሄዋፐ ጉይያን ጽፖራ ናአይ ባላቅ፥ ሞኣበ ጋድያ ካቲ ደንዲደ፥ እስራኤላቱዋና ኦለቴዳ። ባኦራ ናአይ ባላም ህንተንታ ሸቃናዳን፥ ኪቲደ ጼስሴዳ፤ ፓይ. 22:1—24:25 10 ሽን ታን ባላመባ ስሳበይከ። ሄዋ ድራዉ እ ህንተንታ አንጄዳ፤ ያትና፥ ታን ህንተንታ ባላቃ ኩሽያፐ አሻድ።

11 “ ‘ዮርዳኖሳ ሻፋ ፕኒደ፥ ያርኮ ዬድታ፤ ያርኮ አሳይነ አሞራዋናቱ፥ ፓርዛዋናቱ፥ ካናነቱ፥ ሂተቱ፥ ገርጌሰቱ፥ ሂዌቱነ ያቡሳዋናቱ ህንተናና ኦለትና፥ ታን ኡንቱንታ ህንተንቱ ኩሽያን አꬃደ እማድ። ኢያሳ 3:14-17፤ 6:1-21 12 ካጅያ ህንተፐ ስንꬃዉ ኪታደ፥ አሞራዋናቱዋ ካተቱዋ ላአቱዋ ህንተንቱ ስንꬃፐ ከሳድ። ሀዌ ኡባይ ሀናናዉ ዳንዳዬዳዌ፥ ህንተንቱ ማሻንነ ህንተንቱ ዎንዳፍያን ግደና። ከሳ 23:28፤ ዛረ. 7:20 13 ህንተንቱ ጎሺደ ከስቤና ጋድያነ ህንተንቱ ኬጽቤና ካታማቱዋ ታን ህንተንቶ እምና፥ አን ደኢታ። ሀእ ህንተንቱ ቶክቤና ዎይንያ ቱራ አይፍያነ ዎጋራ አይፍያ ሚታ’ ያጌ። ዛረ. 6:10-11

14 “ሄዋ ድራዉ ሀእካ መꬍና ጎዳዉ ያይተ፤ ቱሙ ዎዛናፐ አማነቲደ አዉ ጎይንተ። ህንተንቱ ማይዛ አዎቱ ኤፍራጺሳ ሻፋፐ ሄፍንꬃንነ ግብጼን ጎይኔዳ አላጋ ጾሳቱዋ ዎራ ኦሊደ፥ መꬍና ጎዳዉ ጎይንተ። 15 መꬍና ጎዳዉ ጎይንያዌ ህንተንታ ኢቶፐ፥ ህንተንቱ አዎቱ ሻፋፐ ሄፍንꬃን ደኢደ ጎይኔዳ ጾሳቱዋ ግድና፥ ዎይ ሀእ ህንተንቱ ደእያ አሞረ ጋድያ አሳ ጾሳቱዋ ግድና፥ ህንተንቱ ጎይንያዋ ሀቼ ዶርተ። ሽን ታናነ ታ ጎልያ አሳ ግዶፐ፥ ኑን መꬍና ጎዳዉ ጎይናና” ያጌዳ።

16 አሳይ ዛሪደ፥ “መꬍና ጎዳ አግ ባሺደ፥ ሀራ ጾሳቶ ጎይናናዌ ኑፐ ሃኮ! 17 ግብጼ ጋድያፐ፥ አይለተꬃ ጎልያፐ፥ ኑናነ ኑ አዎቱዋ ከሲደ አሄዳዌ፥ ሄ ዎልቃማ ማላታቱዋ ኑ ጼልሽን ኦꬄዳዌ፥ ኑን ቤዳ ኦግያ ኡባንነ አꬌዳ ቢታቱዋ ኡባ ግዱዋን ኑና ናጌዳዌ፥ መꬍና ጎዳ ኑ ጾሳተነ። 18 ቃይ መꬍና ጎዳይ አሳ ኡባ፥ ሄ ጋድያን ደእያ አሞረ አሳቱዋናካ ኑ ስንꬃፐ ላጊደ ከሴዳ። ሄዋ ድራዉ ኑንካ መꬍና ጎዳዉ ጎይናና፤ አያዉ ጎፐ፥ እ ኑ ጾሳ” ያጌዳ።

19 ሽን ኢያሱ አሳ ሀዋዳን ያጌዳ፤ “ህንተንቱ መꬍና ጎዳዉ ጎይናናዉ ዳንዳይክታ። አያዉ ጎፐ፥ እ ጌሻ ጾሳ፤ እ ቃናትያ ጾሳ፤ እ ህንተንቱ ናቁዋ ዎይ ህንተንቱ ናጋራ አቶ ጌና። 20 ህንተንቱ መꬍና ጎዳ አጊደ፥ አላጋ ጾሳቶ ጎይኖፐ፥ እ ህንተንቶ ሎኦባ ኦꬄዳዋፐ ጉይያን፥ ስሚደ ህንተንታ ቆሀናነ ꬋይሳና” ያጌዳ።

21 አሳይ ኢያሳ፥ “ቱይት፥ ግደና! ኑን መꬍና ጎዳዉ ጎይናና” ያጌዳ።

22 ኢያሱ አሳ፥ “ህንተንቱ መꬍና ጎዳዉ ጎይንያዋ ዶሬዳዎ ህንተንቱ ሁጲያዉ ህንተንቱ ማርካ” ያጌዳ።

ኡንቱንቱ፥ “ኤ ኑን ማርካ!” ያጌድኖ።

23 ኢያሱ፥ “ያቶፐ፥ ህንተንቱ ግዱዋን ደእያ አላጋ ጾሳቱዋ ድግተ፤ ህንተንቱ ዎዛና መꬍና ጎዳኮ፥ እስራኤልያ ጾሳኮ ዛርተ” ያጌዳ።

24 ኡንቱንቱ፥ “ኑን መꬍና ጎዳዉ፥ ኑ ጾሳዉ፥ ጎይናና፤ አ አዛዙዋካ ፖላና” ያጌድኖ።

25 ሄ ጋላስ ኢያሱ አሳና ቃላ ጫቁዋ ጫቀቴዳ፤ ሰኬማን ህግያነ ዎጋ ኡንቱንቶ ከሴዳ። 26 ኢያሱ ሄ ቃላቱዋ ጾሳ ህግያ ማጻፋን ጻፌዳ። ሄዋፐ ጉይያን፥ እት ዎልቃማ ሹቻ አኪደ፥ መꬍና ጎዳ ዱንካንያ ማታን ደእያ ዎላ ጋርሳን ኤሴዳ። 27 ኢያሱ አሳዉ ኡባዉ፥ “በእተ፥ መꬍና ጎዳይ ኑዉ ሃሳዬዳ ቃላ ኡባ ሀ ሹቻይ ስሴዳ ድራዉ፥ እ ኑ ቦላ ማርካ ግዳናዋ። ህንተንቱ ጾሳ ቦላን ማካሎፐ፥ ሀ ሹቻይ ህንተንቱ ቦላ ማርካ ግዳናዋ” ያጌዳ። 28 ሄዋፐ ጉይያን፥ ኢያሱ አሳ ኡባ የድና፥ ኡባይካ ባረ ላታ ጋድያ ጋድያ ስሚደ ቤዳ።

29 ሄዋፐ ጉይያን መꬍና ጎዳ ቆማይ፥ ነዌ ናአ ኢያሱ፥ ላይꬃይ ጼታነ ታሙዋ ግድና ሀይቄዳ። 30 አሳይ ጋኣሻ ደርያፐ ሁጲሳ ባጋን፥ ኤፍሬማ ገዝያን ደእያ አ ላታ ጋድያን፥ ትምናት-ሴራን ሞጌድኖ። ኢያሳ 19:49-50

31 ኢያሱ ፓጻ ደኤዳ ዎደ ኡባንነ ኢያሱፐ ስምና ደኢደ፥ መꬍና ጎዳይ እስራኤላቶ ኦꬄዳ ኦሱዋ ኡባ ኤሬዳ ጭማቱዋ ዎደ ኡባን እስራኤላቱ መꬍና ጎዳዉ ጎይኔድኖ።

32 እስራኤልያ አሳይ ግብጼ ጋድያፐ አሄዳ ዮሴፎ መቀꬃ ሰኬማን ሞጌድኖ። ሄ ሳኣ ያቆብ ሸኬማ አዉዋ ሀሞራ ናናቱዋፐ ጼቱ ጻጋራ ብራን ሻሜዳ፤ ጉየፐ ዮሴፎ ዛራቱ ላቴድኖ። ዶመꬃ 33:19፤ 50:24-25፤ ከሳ 13:19፤ ዮሃ. 4:5፤ ኪታ 7:16

33 አሮና ናአይ ኤልኣዛረ ሀይቄዳ፤ አ ናኣ ፒንሃሳዉ እመቴዳ ኤፍሬማ ገዝያን ደእያ ግብኣ ጌተትያ ካታማን ሞጌድኖ።