1 መꬍና ጎዳይ ሙሴዉ ሀዋዳን ያጊደ ኦዴዳ፤ 2 “አሮናነ አ አቱማ ናናቱዋ ቃይ ኡንቱንቱና እትፐ፥ ቄሳተꬃ ማዩዋ፥ ኦክያ ዛይትያ፥ ናጋራ ያርሾ ሹክያ ኮሩማ፥ ላኡ ዶርሳ ኦርገቱዋነ፥ እርሹዋ የገናን ኡኬዳ ኡክꬃ ዎꬄዳ ማሶፍያ አካደ ያ። 3 ቃይ እስራኤልያ አሳ ኡባካ ጼሳደ፥ ዱንካንያ ካረ ሺሻ” ያጌዳ።

4 ሙሴ መꬍና ጎዳይ አዛዜዳዋዳን ኦꬄዳ፤ አሳይካ ኡባይ ዱንካንያ ካረን ሺቄዳ። 5 ሙሴ አሳዉ፥ “ኦꬃና ማላ መꬍና ጎዳይ አዛዜዳዌ ሀዋ” ያጌዳ።

6 ሙሴ አሮናነ አ አቱማ ናናቱዋ አሂደ፥ ሃꬃን ሜጬዳ። 7 አሮና ቃምሽያ ማይዜዳ፤ ዳንጩዋካ ዳንጭሴዳ። ቃይ አዱሳ ቃምሽያ ማይዚደ፥ አ ቦላን ኤፉድያ ማይዜዳ። ኤፉድያ ሂላቲደ ዳዴዳ ሳቂያን አሮናና ጋꬂደ ቃቼዳ። 8 ቃይ ትራን ዎꬅያዋ አሮና ቦላን አꬂደ፥ አ ግዶን ኡሪምያነ ቱሚምያ ዎꬄዳ። 9 ቃይካ አሮና ሁጲያን ሻሽያ ኤንጩርሳ ዎꬄዳ። መꬍና ጎዳይ ሙሳ አዛዜዳዋዳን ሄ ኤንጩርሳ ቦላን ስንꬃ ባጋና ዎርቃ ማዳልያ፥ ዎርቃፐ መꬌዳ ካላቻ ምስልያ ዎꬄዳ።

10 ያቶዋፐ ጉይያን ሙሴ ኦክያ ዛይትያ አኪደ፥ ዱንካንያነ ዱንካንያ ግዶን ደእያ ሚሻ ኡባ ኦኬዳ፤ ኡንቱንታ ጌሼዳ። 11 ቃይ ሄ ዛይትያፐ አኪደ፥ ያርሽያ ሳኣ ቦላ ላፑ ገደ ጫጫፌዳ፤ ያርሽያ ሳኣ፥ አ ሚሻቱዋ፥ ሜቻ ከርያነ አ ዎꬅያዋ፥ ጌሻናዉ ሄ ዛይትያን ኦኬዳ። 12 ቃይ ሄ ኦክያ ዛይትያፐ አማራ አሮና ሁጲያን ትጊደ፥ አ ጌሼዳ። 13 መꬍና ጎዳይ ሙሳ አዛዜዳዋዳን፥ ሙሴ አሮና አቱማ ናናቱዋ ስንꬃዉ አꬂደ፥ ቃምሽያ ማይዜዳ፤ ዳንጩዋን ዳንጭሴዳ። ኡንቱንቱ ሻሽያ ኤንጩርሳ ዎꬄዳ።

14 ሄዋፐ ጉይያን፥ ናጋራ ያርሾ ኮሩማ ሙሴ አꬄዳ፤ አሮንነ አ አቱማ ናናይ ሄ ኮሩማ ሁጲያን ባረንቱ ኩሽያ ዎꬄድኖ። 15 ሙሴ ሄ ኮሩማ ሹኬዳ፤ አ ሱꬃፐ ባረ ብራꬍያን አኪደ፥ ያርሽያ ሳኣ ካጨቱዋ ኦኪደ፥ ያርሽያ ሳኣ ጌሼዳ፤ ቃይ ያርሽያ ሳኣ ናጋራ አቶ ጊሳናዉ አቴዳ ሱꬃ አፐ ጋርሳና ጉሲደ፥ ጾሳዉ ጌሼዳ። 16 ቃንꬃ አሹዋ ካሜዳ ሀንዳ ኡባ፥ ትርያ ጼራ ቦላ ደእያ ሞꬍያ፥ ላኡ ክላሆቱዋነ ኡንቱንታ ካሜዳ ሀንዳ አኪደ፥ ሙሴ ያርሽያ ሳኣ ቦላን ዎꬂደ ጹጌዳ። 17 ሽን መꬍና ጎዳይ ሙሳ አዛዜዳዋዳን፥ ጋልባ፥ ኮሩማፐ አቴዳዋነ ቶጭያ ዱንካኔዳ ሳኣፐ ጋጻ ከሲደ፥ ታማን ጹጌዳ።

18 ያት ስሚደ ሙሴ ጹግያ ያርሾ ሀንያ ዶርሳ ኦርግያ አሄዳ፤ አሮንነ አ አቱማ ናናይ ሄ ዶርሳ ኦርግያ ሁጲያን ባረንቱ ኩሽያ ዎꬄድኖ። 19 ሙሴ ሄ ዶርሳ ኦርግያ ሹኬዳ፤ አ ሱꬃ ያርሽያ ሳኣ ምይያ ኡባን ጉሴዳ። 20 ቃይ ዶርሳ ኦርግያ አሹዋካ አ ቆሙዋን ቆሙዋን ቃንጼዳ፤ ቃንጸꬃ፥ ሁጲያነ ሞꬍያ ያርሽያ ሳኣ ቦላ ዎꬂደ ሙሴ ጹጌዳ። 21 ቃንꬃ አሹዋነ ገደቱዋ ሃꬃን ሜጮዋፐ ጉይያን፥ ዶርሳ ኡባና መꬍና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ኦꬂደ፥ መꬍና ጎዳይ ሙሳ አዛዜዳዋዳን ያርሽያ ሳኣ ቦላን ዎꬂደ ጹጌዳ።

22 ሄዋፐ ጉይያን፥ ቄሰተꬃዉ ኦከትያ ዎደ ሺሽያ ላኤንꬆ ዶርሳ ሙሴ አሄዳ፤ አሮንነ አ አቱማ ናናይ ሄ ዶርሳ ሁጲያን ባረንቱ ኩሽያ ዎꬄድኖ። 23 ሙሴ ሄ ዶርሳ ሹኬዳ፤ አ ሱꬃፐ አኪደ፥ አሮናዉ ኡሸቻ ሀይꬃ ጼራ፥ ኡሸቻ ኩሽያ ዎጋ ብራꬍያነ፥ ኡሸቻ ገድያ ዎጋ ብራꬍያ ኦኬዳ። 24 ቃይ ሙሴ አሮና አቱማ ናናቱዋካ ስንꬃዉ አሂደ፥ ሄ ሱꬃፐ አኪደ፥ ኡንቱንቱ ኡሸቻ ሀይꬃ ጼራ፥ ኡንቱንቱ ኡሸቻ ኩሽያ ዎጋ ብራꬍያነ ኡንቱንቱ ኡሸቻ ገድያ ዎጋ ብራꬍያ ኦኬዳ። ሄዋፐ ጉይያን፥ ሙሴ አቴዳ ሱꬃ ያርሽያ ሳኣ ምይያ ኡባን ጉሴዳ።

25 ያቲደ ሞꬉዋ፥ ናስያ፥ ቃንꬃ አሹዋ ማዬዳ ሞꬍያ፥ ትርያ ጼራ ቦላ ደእያ ሞꬍያ፥ ላኡ ክላሆቱዋነ ኡንቱንታ ማዬዳ ሀንዳነ ኡሸቻ ገድያ አኬዳ። 26 ቃይ እርሹዋ የገናን ኡኬዳ ኡክꬃ ዎꬅያ መꬍና ጎዳ ስንꬃን ደእያ ማሶፍያፐ እት ኮምፑዋ፥ ዛይትያና ኡኬዳ እት ኡክꬃነ እት ሌኦ ኡክꬃ አኪደ፥ ሀዋንታ ሞꬍያ ቦላንነ ኡሸቻ ገድያ ቦላን ዎꬄዳ። 27 እ ሀ ቁማ ኡባ አሮና ኩሽያንነ አ አቱማ ናናቱዋ ኩሽያን ዎꬄዳ፤ ኡንቱንቱ መꬍና ጎዳ ስንꬃን ቃꬅያ ያርሹዋ ኦꬂደ ቃꬄድኖ። 28 ሄዋፐ ጉይያን፥ ሙሴ ሄ ቁማ ኡንቱንቱ ኩሽያፐ አክ፥ ጹግያ ያርሹዋና ጋꬂደ፥ ቄሰተꬃዉ ኦከትያ ዎደ መꬍና ጎዳዉ ታማን ጹጊደ ሺሽያ፥ ሳዉዋ ቶሹኩ ግያ ያርሹዋዳን፥ ያርሽያ ሳኣ ቦላን ዎꬂደ ጹጌዳ። 29 ቃይ ሙሴ አንጎሱዋ አኪደ፥ ቃꬅያ ያርሹዋ ኦꬂደ መꬍና ጎዳ ስንꬃን ቃꬄዳ፤ መꬍና ጎዳይ ሙሳ አዛዜዳዋዳን፥ ቄሳተꬃዉ ኦከትያ ዎደ ያርሽያ ዶርሳ ኦርግያ አሹዋፐ ሄዌ ሙሳ ጋክያ አ ግሹዋ።

30 ሙሴ ኦክያ ዛይትያፐነ ያርሽያ ሳኣ ቦላን ደእያ ሱꬃፐ አኪደ፥ አሮና ቦላነ አ ማዩዋ ቦላ፥ ቃይ አ አቱማ ናናቱዋ ቦላነ፥ ኡንቱንቱ ማዩዋ ቦላካ ጫጫፌዳ፤ ያቲደ አሮናነ አ ማዩዋ ቃይ አ ናናቱዋነ አ ናናቱዋ ማዩዋካ ጌሼዳ።

31 ሙሴ አሮናነ አ አቱማ ናናቱዋ ሀዋዳን ያጌዳ፤ “አሹዋ ጋከትያ ዱንካንያ ካረን ዶይስተ፤ ‘አሮንነ አ ናናይ ሄዋ ሚኖ’ ያጋደ ታን አዛዜዳዋዳን፥ ቄሳተꬃዉ ኦከትያ ዎደ ሺሽያ ያርሹዋ ዎꬅያ ማሶፍያ ግዶን ደእያ ያርሹዋ ኡክꬃና ሄዋን ሚተ። 32 ሄ አሹዋፐነ ኡክꬃፐ ፓላሄዳዌ ደኦፐ ታማን ጹግተ። 33 ቄሳተꬃዉ ኦክያ ዎጋይ ላፑን ጋላሳ አክያ ድራዉ፥ ሄ ህንተ ቄሳተꬃዉ ኦከትያ ላፑን ጋላሳይ ዉራናዉ፥ ዱንካንያ ፐንገፐ ካረ ከሶፕተ። 34 ሀ ሀች ኦሰቴዳዌ መꬍና ጎዳይ አዛዝና፥ ህንተ ናጋራ አቶ ጊሳናዉ ኦሰቴዳ። 35 ዱንካንያ ፐንግያን ላፑን ጋላሳ ኩመንꬃ ጋላስነ ቃማነ ታክተ፤ መꬍና ጎዳ ዎጋካ ናግተ፤ እጾፐ ህንተ ሀይቃና። ታና መꬍና ጎዳይ አዛዜዳዌ ሀዋ” ያጌዳ። 36 አሮንነ አ ናናይ መꬍና ጎዳይ ሙሴ ባጋና አዛዜዳዋ ኡባ ኦꬄድኖ።