1 ሆስፑንꬃ ጋላሳን ሙሴ አሮናነ አ ናናቱዋ፥ ቃይ እስራኤልያ ጭማቱዋካ ጼሴዳ። 2 አሮና ሀዋዳን ያጌዳ፤ “ናጋራ ያርሾ እት ኮሩማ፥ ቃይ ጹግያ ያርሾ እት ዶርሳ ኦርግያ መꬍና ጎዳ ስንꬃ ሺሻ። መሄቱ ላኡካ ትላ ቦላና ደእያዋንታ ግድኖ። 3 ቃይ እስራኤልያ አሳ ሀዋዳን ያጋ፤ ‘መꬍና ጎዳይ ህንተንቶ ቆንጭያ ድራዉ፥ መꬍና ጎዳ ስንꬃን ያርሻናዉ፥ ናጋራ ያርሾ እት ዴሻ ኦርግያ፥ ጹግያ ያርሾ ትላ ቦላና ደእያ እት ላይꬃ ማራነ እት ላይꬃ ዶርሳ አሆ። 4 እትፐተꬃ ያርሾ እት ኮሩማ፥ እት ዶርሳ ኦርግያነ ዛይትያን ሙናቀቴዳ ካꬃ ያርሹዋ አህተ ያጋ’ ” ያጌዳ።

5 ኡንቱንቱ ሙሴ አዛዜዳዋ ኡባ ጾሳ ዱንካንያ ስንꬃ አሄድኖ፤ ያቲደ ማባራ ኡባይ ሺቂደ፥ መꬍና ጎዳ ስንꬃን ኤቄድኖ። 6 ሙሴ ኡንቱንታ፥ “መꬍና ጎዳ ቦንቹ ህንተንቶ ቆንጫና ማላ፥ ህንተ ኦꬃናዳን መꬍና ጎዳይ ህንተና አዛዜዳዌ ሀዋ” ያጌዳ።

7 ቃይ ሙሴ አሮናዉ ሀዋዳን ያጌዳ፤ “ያርሽያ ሳኮ ሃ ሺቃ፤ ነ ናጋራ ያርሹዋነ ነ ጹግያ ያርሹዋ ያርሻ፤ ያታደ ነ ሁጰ ናጋራነ ነ አሳ ናጋራካ አቶ ጊሳ። ቃይ መꬍና ጎዳይ አዛዜዳዋዳን፥ አሳይ ሺሽያ ያርሹዋ ያርሻደ፥ ኡንቱንቱ ናጋራካ አቶ ጊሳ” ያጌዳ። እብራ. 7:27

8 አሮን ያርሽያ ሳኮ ዪደ፥ ባረ ሁጰ ናጋራዉ ያርሹዋ ኦꬅ ሺሼዳ ኮሩማ ሹኬዳ። 9 አሮና አቱማ ናናይ ሱꬃፐ አኪደ አዉ አሄድኖ፤ እ ባረ ኩሽያ ብራꬍያ ሄ ሱꬃን የድ ከሲደ፥ ያርሽያ ሳኣ ካጨቱዋ ቦቼዳ፤ አቴዳ ሱꬃካ ያርሽያ ሳኣፐ ጋርሳ ባጋና ጉሴዳ። 10 መꬍና ጎዳይ ሙሳ አዛዜዳዋዳን፥ ቃይ ሄ ናጋራ ያርሹዋ አሹዋፐ ሞꬉዋ፥ ክላሆቱዋነ ትርያ ጼራ ቦላ ደእያ ሞꬍያ ያርሽያ ሳኣ ቦላን ዎꬂደ ጹጌዳ። 11 ሽን አቴዳ አሹዋነ ጋልባ ዱንካኔዳ ሳኣፐ ካረ ከሲደ ጹጌዳ።

12 ሄዋፐ ጉይያን፥ አሮን ጹግያ ያርሹዋ ሹኬዳ፤ አ ናናይ ሱꬃ አኪደ አዉ አሄድኖ፤ እ ያርሽያ ሳኣ ምይያ ኡባን ጉሴዳ። 13 ቃይ ኡንቱንቱ ጹግያ ያርሹዋ ቆሙዋን ቆሙዋን ከሲደ፥ ሁጲያናካ አዉ አሄድኖ፤ እ ያርሽያ ሳኣ ቦላን ዎꬂደ ጹጌዳ። 14 ቃንꬃ አሹዋነ ገደቱዋካ ሃꬃን ሜጪደ፥ ያርሽያ ሳኣ ቦላን ደእያ ጹግያ ያርሹዋ ቦላን ዎꬂደ ጹጌዳ።

15 ሄዋፐ ጉይያን፥ አሮን አሳ ያርሹዋ ሺሼዳ፤ እ አሳ ናጋራ ያርሾ ግድያ ዴሻ ኦርግያ አኪደ ሹኬዳ፤ ካሰ ባረዋዳንካ ኡንቱንቱ ናጋራዉ ያርሼዳ። 16 ቃይ እ ጹግያ ያርሹዋ መህያ አሂደ፥ ዎጋይ አዛዝያዋዳን ኦꬂደ ያርሼዳ። 17 ካꬃ ያርሹዋካ ሺሼዳ፤ አፐ እት ኮጵያ ግድያዋ አኪደ፥ ዎንታ ዎንታ ጹግያ ያርሹዋፐ ሀራ አ ቦላን ዎꬂደ ጹጌዳ።

18 አሮን ቃይካ አሳ እትፐተꬃ ያርሾ ኮሩማነ ዶርሳ ኦርግያ ሹኬዳ፤ አ አቱማ ናናይ ሱꬃ አዉ አሄድኖ፤ እ ሄ ሱꬃ አኪደ፥ ያርሽያ ሳኣ ምይያ ኡባ ጉሴዳ። ዎጋ 3:1-11 19 ቃይ ኮሩማነ ዶርሳ ኦርግያ አሹዋፐ ሞꬉዋ፥ ናስያ፥ ቃንꬃ አሹዋ ማዬዳ ሀንዳ፥ ክላሆቱዋነ ትርያ ጼራ ቦላ ደእያ ሞꬍያ አሮና ናናይ አዉ አሄድኖ። 20 ኡንቱንቱ ሄ ሀንዳ አንጎሱዋ ቦላ ዎꬅና፥ አሮን ያርሽያ ሳኣ ቦላን ሄዋ ጹጌዳ። 21 ሽን ሙሴ አዛዜዳዋዳን፥ አሮን አንጎሶቱዋነ ኡሸቻ ገድያ ቃꬅያ ያርሹዋ ኦꬂደ፥ መꬍና ጎዳ ስንꬃን ቃꬄዳ።

22 ሄዋፐ ጉይያን፥ አሮን ባረ ኩሽያ አሳኮ ዛር ደንꬂደ ኡንቱንታ አንጄዳ። እ ናጋራ ያርሹዋ፥ ጹግያ ያርሹዋነ እትፐተꬃ ያርሹዋ ያርሾዋፐ ጉይያን፥ ያርሽያ ሳኣፐ ዱገ ዎꬌዳ።ፓይ. 6:22-26 23 ሙሴነ አሮን መꬍና ጎዳ ዱንካንያ ግዶ ገሌድኖ፤ ኡንቱንቱ ሄዋፐ ከሴዳ ዎደ፥ አሳ አንጄድኖ። ያትና መꬍና ጎዳ ቦንቹ አሳ ኡባዉ ቤቴዳ። 24 መꬍና ጎዳ ስንꬃፐ ታማይ ዎꬊደ፥ ያርሽያ ሳኣ ቦላን ደእያ ጹግያ ያርሹዋነ ሞꬍያ ሜዳ። አሳይ ኡባይ ሄዋ በኤዳ ዎደ እልሌዳ፤ ቃይ ኡንቱንቱ ባረንቱ ሶምኡዋን ሳኣ ቦቺደ ጉፋኔድኖ።