1 መꬍና ጎዳይ ሙሳ ሀዋዳን ያጌዳ፤ 2 “እስራኤልያ አሳዉ ሀዋዳን ያጋደ ኦዳ፤ ‘እት ማጫዉና ሻሃራደ አቱማ ናኣ የሎፐ፥ ባረ ፒላይ ዬዳ ዎደ እዛ ቱና ግድያዋዳንካ፥ ሄዋዳን እዛ ላፑን ጋላሳይ ጋካናዉ ቱና ግዳናኑ። 3 ሆስፑንꬃ ጋላስ ናአይ ቃጻረታናዉ ኮሼ። ዶመꬃ 17:12፤ ሉቃሳ 2:21 4 ሄዋፐ ጉይያን፥ ማጫዉና ባረ ፒላ ሱꬃይ ጽአና ጋካናዉ፥ ሀታማነ ሄዙ ጋላሳ ጋምኡ፤ ቃይ ባረ ጌይያ ጋላሳቱ ዉራና ጋካናዉ፥ ጌሻባ አያነ ቦቹፑ፤ ጾሳ ጌሻ ሳኣካ ገሉፑ።

5 “ ‘ሽን እት ማጫዉና ማጫ ናቶ የሎፐ፥ ባረ ፒላይ ዬዳ ዎደ እዛ ቱና ግድያዋዳንካ፥ ሀዋዳን ላኡ ሳምንታ ጋካናዉ፥ እዛ ቱና ግዳና፤ ሄዋፐ ጉይያን፥ ባረ ፒላ ሱꬃይ ጽአና ጋካናዉ ኡሱፑን ታማነ ኡሱፑን ጋላሳ ጋምኡ።

6 “ ‘ማጫዉና አቱማ ናኣ ግድና ማጫ ናኣ ግድና የላደ፥ ባረ ጌይያ ዎድያ ዉርሶዋፐ ጉይያን፥ ጹግያ ያርሾ እት ላይꬃ ዶርሳነ ናጋራ ያርሾ ቃይ እት ሀራጵያ ማራ ዎይ እት ማራ ዶጎሙዋ ጾሳ ዱንካንያ ፐንግያን ደእያ ቄስያኮ አሁ። 7 ቄሲ ሄዋ መꬍና ጎዳ ስንꬃን ያርሺደ፥ እዝ ናጋራ አቶ ጊሴ፤ ያቶፐ እዛ ባረ የሉዋ ሱꬃ ጎገꬃፐ ጌያዉ። አቱማ ናኣ ዎይ ማጫ ናኣ የልያ ማጫዉን ዎጋይ ሄዋ።

8 “ ‘ሽን እት ላይꬃ ዶርሳ ኦርግያ አሀናዉ እዝዉ ሻሉ ግዳና ꬋዮፐ፥ ላኡ ማራ ዶጎማቱዋ ዎይ ላኡ ማራ ሀራጳቱዋ አሁ፤ ኡንቱንቱፐ እቱ ጹግያ ያርሹዋሳ፤ እቱ ቃይ ናጋራ ያርሹዋሳ፤ ያቶፐ ቄሲ ሄዋንታ ያርሺደ፥ እዝ ናጋራ አቶ ጊሴ፤ እዛካ ጌሻ ግዳዉ’ ያጋ” ያጌዳ። ሉቃሳ 2:24