1 መꬍና ጎዳይ ሙሳነ አሮና ሀዋዳን ያጌዳ፤ 2 “እስራኤልያ አሳዉ ሀዋዳን ያጊደ ኦድተ፤ ‘ቢታ ቦላን ደእያ መህያ ኡባፐ ህንተ ማና መሄቱነ ዶአቱ ሀዋንታ። 3 ጹጉንꬃይ ዉር ጳልቀቴዳዋንታነ ዋሞትያ መሄቱዋ ኡባ ሚተ። 4 ሽን ዋሞ ጻላላ ዋሞትያዋንታ ዎይ ቃይ ጹጉንꬃ ጻላላይ ጳልቀቴዳዋንታ ሞፕተ። ጋሉ ዋሞቴ ሽን ጹጉንꬃይ ጳልቀትቤና ድራዉ እ ህንተንቶ ቱና። 5 ጉፓሊ ዋሞቴ ሽን ጹጉንꬃይ ጳልቀትቤና ድራዉ እ ህንተንቶ ቱና። 6 ሀርባይን ዋሞቴ ሽን ሞፕተ፤ አያዉ ጎፐ፥ እ ዋሞትያዋ ግዶፐነ፥ አዉ ጹጉንꬃይ ጳልቀꬃ ግደና ድራዉ፥ እ ህንተንቶ ቱና። 7 ጉዱንꬃካ ሞፕተ፤ አያዉ ጎፐ፥ አዉ ጹጉንꬃይ ጳልቀꬃ ግዶፐነ፥ ዋሞተና ድራዉ፥ እ ህንተንቶ ቱና። 8 ህንተ ሀዋንቱ አሹዋ ሞፕተ፤ ኡንቱንቱ ባኩታካ ቦቾፕተ፤ ኡንቱንቱ ህንተንቶ ቱና።

9 “ ‘ሃꬃ ግዶን ደእያ መታቱዋ ኡባፐ ህንተ ማናዋንቱ ሀዋንታ። አባ ግዶን ግድና ዎይ ቃይ ጎግያ ሃꬃ ግዶን ግድና ደእያ ኡባፐ ሞልያ ማላ ቀፊነ ፖቁ ደእያ ኡባ ሚተ። 10 ሽን አባ ግዶን ዎይ ሻፋን ሻምእሻምእያ መታቱዋፐነ ሸምፑ ደእያ፥ ቃጽያ መታቱዋፐ ሞልያ ማላ ቀፊነ ፖቁ ባይና ኡባይ ህንተንቶ ቱና። 11 ሀዋንቱ ህንተንቶ ቱና፤ ኡንቱንቱ አሹዋ ሞፕተ፤ ኡንቱንቱ ባኩታካ ቦቾፕተ። 12 ቀፊነ ፖቁ ባይና ሃꬃ ግዶን ደእያ መታቱ ኡባይ ህንተንቶ ቱና።

13 “ ‘ካፎቱዋፐ ቱና ግድያ ድራዉ ህንተ ሜናዋንቱ ሀዋንታ: አርጋንꬃ፥ ባዙዋ አንኩዋ፥ ካረꬃ አንኩዋ፥ 14 ጽንግልያ፥ ቆል ዛርያ ኡባ፥ 15 ቁሩዋ ዛርያ ኡባ፥ 16 ሶጎንያ፥ ሀዛዝያ፥ ሃꬃ ካፉዋ፥ ጋጭያ ዛርያ ኡባ፥ 17 ቄር ጉቱዋ፥ ብዩዋ፥ ዎጋ ጉቱዋ፥ 18 ሃꬃ ኩቱዋ፥ ሞልያ ካፉዋ፥ ባኩታ ምያ አንኩዋ፥ 19 ሽማላነ ሳቢሳ ግያ ሃꬃ ካፎቱዋ ዛርያ ኡባ፥ ጅንጅላትያነ ሻልያ።

20 “ ‘ቀፍያና ደእያ ኦይዱ ገድያን ሀመትያ ቄር መታቱ ኡባይ ህንተንቶ ቱና። 21 ግዶፐነ፥ ቀፊ ደእያ ኦይዱ ገድያን ሀመትያዋንቱፐ ኡንቱንቱ ገድያፐ ቦላና ጉፓናዉ ማድያ ገዲ ደእያዋንታ ሚተ። 22 ሄዋንቱካ፥ ቦልያ ዛርያ ኡባ፥ ኡኩቦ ዛርያ ኡባነ ቡምቡረꬃ ዛርያ ኡባ። 23 ሽን ሀራ ቀፍያና ደእያ ኦይዱ ገዲ ደእያ መታቱ ኡባይ ህንተንቶ ቱና።

24 “ ‘ሀዋንቱ ህንተና ቱንሳና፤ ኡንቱንቱ ባኩታ ቦችያ ኡባይ ኦማርስ ጋካናዉ ቱና ግዳናዋ። 25 ሀዋንቱ ባኩታ ደንꬅያ ኦንነ ባረ ማዩዋ ሜጮ፤ ሽን ግዶፐነ ኦማርስ ጋካናዉ እ ቱና። 26 ጹጉንꬃይ ደኢደ ጳልቀꬃ ግደናዋንታ ዎይ ቃይ፥ ዋሞተናዋንቱ ኡባይ ህንተንቶ ቱና፤ ኡንቱንቱ አሃ ቦችያ ኦንካ ቃይ ቱና። 27 ኦይዱ ገደቱዋን ሀመትያ መህያ ኡባፐ አዳነቱዋ ግንድያ ማላ ግንድያን ሀመትያዋንቱ ህንተንቶ ቱና፤ ቃይ ኡንቱንቱ ባኩታ ቦችያ ኦንካ ኦማርስ ጋካናዉ ቱና። 28 ሄዋንቱ ባኩታ ደንꬅያ ኦንነ ባረ ማዩዋ ሜጮ፤ ሽን ግዶፐነ ኦማርስ ጋካናዉ እ ቱና። ኡንቱንቱካ ህንተንቶ ቱና።

29 “ ‘ሳኣና ሀመትያዋንቱፐ ሀዋንቱ ህንተንቶ ቱና: ኦጩ፥ ኤጨሪ፥ ዱማ ዱማ ቆሞ ዛሪ፥ 30 ጌግ፥ ሀይላሹ፥ ኮርቺ፥ ዋካላይነ ሻቃንቻይ። 31 ሳኣና ሀመትያ ኡባቱዋፐ ህንተንቶ ቱና ግድያዋንቱ ሄዋንታ፤ ኡንቱንቱፐ ሀዬዳዋ ቦችያ ኡባይ ኦማርስ ጋካናዉ ቱና። 32 ኡንቱንቱፐ ሀይቄዳዌ አያ ቦላ ኩንዶፐካ ሄ ኡንቱንቱ አ ቦላ ኩንዴዳ ሚሻይ ቱና፤ ምꬃ ሚሻ ዎይ ማዩዋ ዎይ ጋልባ ዎይ ኬሻቱዋ ግድናካ፥ ጎኤትያ ሚሻ ኡባ ሃꬃ ግዶን ዎꬅተ፤ ሄዌ ኦማርስ ጋካናዉ ቱና፤ ሄዋፐ ጉይያን፥ ጌሻ ግዳናዋ። 33 ሀ ሳኣና ሀመትያዋንቱፐ እቱዋ ባኩታይ አይ ኡርቃ ሚሻ ግዶን ኩንዶፐካ፥ አ ግዶን ደእያባይ ኡባይ ቱና፤ ሄ ሚሻ መንꬅተ። 34 ሄ ሚሻ ግዶን ደእያ ሃꬃፐ ሜተትያ አይ ቁማ ቦላ ጾኮፐካ፥ ሄ ቁማይ ቱና፤ ቃይ ኡሽያባ አያነ ግዶ፥ ሄ ሚሻ ግዶን ደኦፐ፥ እካ ቱና። 35 ሀዋንቱ አሃይ አ ቦላ ኩንድያባይ አያ ግዶፐካ ቱና። ጮጭያ ዎይ ካꬅያ ኡርቃ ሚሻ ግዶፐካ መንꬅተ፤ ኡንቱንቱ ህንተንቶ ቱና። 36 ሀዋንቱ ባኩታይ ቦችያባይ ኡባይ ቱና ግዶፐነ፥ ፑልቱነ ሃꬃ ኦላይ ጌሻ። 37 ኡንቱንቱ ባኩታፐ እቱ ዘራናዉ ዎꬄዳ ዘረꬃ ካꬃ ቦላ ኩንዶፐ፥ ሄዌ ቱነና። 38 ሽን ሄ ዘረꬃ ቦላ ሃꬃይ ጉክ ስምና፥ ኡንቱንቱ ባኩታፐ እቱነ አ ቦላ ኩንዶፐ፥ ሄ ዘረꬃይ ህንተንቶ ቱና።

39 “ ‘ቃይ ህንተ ምያ መሄቱዋፐ እቱ ሀይቂና፥ አ ባኩታ ቦችያ ኦንነ ኦማርስ ጋካናዉ ቱና። 40 ኦንነ ሄ መህያ ባኩታፐ ሞፐ፥ ባረ ማዩዋ ሜጮ፤ ኦማርስ ጋካናዉ እ ቱና፤ ቃይ ኦንነ አ ባኩታ ቶኪደ ደንꬆፐ፥ ባረ ማዩዋ ሜጮ፤ ኦማርስ ጋካናዉ እ ቱና።

41 “ ‘ሳኣና ጎሸትያ መታ ኡባይ ህንተንቶ ቱና፤ አ ሞፕተ። 42 ኡሉዋን ጎሸትያዋ ግድና፥ ዎይ ኦይዱ ገድያን ሀመትያዋ ግድና፥ ዎይ ቃይ ዳሮ ገዲ ደእያዋ ግድናካ፥ ሳኣና ጎሸትያ መታ ኡባይ ቱና ግድያ ድራዉ አ ሞፕተ። 43 ሳኣና ጎሸትያ መታቱዋ ኡባን ሚደ ህንተ ሁጲያዉ ቱኖፕተ፤ ቃይ ኡንቱንቱን ህንተ አሳተꬃ ቱንሶፕተ። 44 ታን፥ መꬍና ጎዳይ፥ ህንተ ጾሳ። ታን ጌሻ ግድያ ድራዉ፥ ህንተካ ህንተና ዱማዪደ፥ ጌሻ ግድተ። ሳኣና ጎሸትያዋንቱን ህንተ አሳተꬃ ቱንሶፕተ። ዎጋ 19:2፤ 1 ጰጽ. 1:16 45 አያዉ ጎፐ፥ ታን ህንተ ጾሳ ግዳናዉ፥ ህንተና ግብጼ ጋድያፐ ከሴዳ መꬍና ጎዳ። ሄዋ ድራዉ፥ ታን ጌሻ ግድያ ድራዉ፥ ህንተካ ጌሻ ግድተ ያግተ ያጌዳ።

46 “ ‘መሄቱዋ፥ ካፎቱዋ፥ ሃꬃ ግዶን ፓጻ ቃጽያ መታቱዋ ኡባቱነ ሳኣና ሀመትያ መታቱዋ ኡባቱዋ ዎጋይ ሀዋ። 47 ሄዌነ ህንተ ቱናነ ጌሻ፥ ቃይ ሸምፑ ደእያ መታቱዋፐ ምያዋንታነ ሜናዋንታ ሻኪደ ኤራናሳ።’ ”