1 መꬍና ጎዳይ ሙሳነ አሮና ሀዋዳን ያጌዳ፤ 2 “እስራኤልያ አሳዉ ሀዋዳን ያጊደ ኦድተ፤ ‘አይ አሳ አቱንꬃፐ አያይኔካ ጎጎፐ፥ ሄ ጎግያባይ ቱና። 3 ሄ ጎግያዋፐ ደንዴዳዋን ሄ ኡራይ ቱና ግድያ ዎጋይ ሀዋ: ሄ ጎግያባይ አገናን ጎግናካ ዎይ ቃይ ጎግያዋ አግንቶካ ሄ አ ግዶን ደእያባይ አ ቱንሴ።

4 “ ‘አ ቦላፐ አያይኔካ ጎግያ አሳይ ግስያ አይ ግሱካ ቱና፤ ቃይ እ ኡትያባይ አያ ግዶፐካ ቱና። 5 አ ግሱዋ ቦችያ ኦንነ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና። 6 ጎግያዋና ደእያ አሳይ ኡቴዳዋ ቦላ ኡትያ ኦንነ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና።

7 “ ‘ጎግያባይ ደእያ አሳ ቦላ ቦችያ ኦንነ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና።

8 “ ‘ጎግያባይ ደእያ አሳይ ጌሻ አሳ ቦላ ጩቾፐ፥ ሄ አሳይ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና።

9 “ ‘ቃይ ጎግያባይ ደእያ አሳይ ኡትያ አይ ኮራይካ ቱና። 10 ባረፐ ጋርሳና ደእያዋ አያን ግዶፐካ ቦችያ ኦንነ ኦማርስ ጋካናዉ ቱና፤ ቃይ ሄዋንታ ማላትያዋንታ ቶክያ ኦንነ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና።

11 “ ‘ጎግያዋና ደእያ አሳይ ባረ ኩሽያ ሜጨተናን ደኢደ ቦችያ አሳይ ኦንነ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና።

12 “ ‘ቃይ ጎግያባይ ደእያ አሳይ ቦችያ ኡርቃ ሚሻ ኡባ መንꬅተ፤ ምꬃፐ ኦሰቴዳ ሚሻ ኡባይ ቃይ ሃꬃን ሜጨቶ።

13 “ ‘ጎግያባይ ደእያ አሳይ ሄ ጎግያዋፐ ጌይያ ዎደ፥ ባረዉ ላፑን ጋላሳ ፓይዶ። ባረ ማዩዋ ሜጮ፤ ባረ ቦላካ ፑልቱዋ ሃꬃን ሜጨቶ፤ ያቲደ እ ጌሻ ግዴ። 14 ሆስፑንꬃ ጋላስ ላኡ ማራ ሀራጰቱዋ ዎይ ላኡ ማራ ዶጎማቱዋ አኪደ፥ መꬍና ጎዳ ዱንካንያ ፐንግያ መꬍና ጎዳ ስንꬃ ዪደ፥ ቄስያዉ ኡንቱንታ እሞ። 15 ቄሲ ሀራጰቱዋፐ እቱዋ ናጋራ ያርሾ፥ ላኤንꬁዋ ቃይ ጹግያ ያርሾ ያርሼ፤ ያቲደ ቄሲ ብታንያ ቦላፐ ጎግያዋ ድራዉ መꬍና ጎዳ ስንꬃን አ ናጋራ አቶ ጊሴ።

16 “ ‘አይ አቱማ አሳይነ ባረ አቱማተꬃፐ ዘረꬃይ ጉኮፐ፥ ባረ ኩመንꬃ ቦላ ሃꬃን ሜጨቶ፤ ቃይ ኦማርስ ጋካናዉ እ ቱና። 17 አቱማተꬃፐ ጉኬዳ ዘረꬃይ ቦቼዳ ማዩዋ ኡባይ ዎይ ጋልባ ኡባይ ሃꬃን ሜጨቶ፤ ቃይ ኦማርስ ጋካናዉ እ ቱና። 18 ቃይ እት አቱማ አሳይ ማጫ አሳና ግስና፥ አ አቱማተꬃፐ ዘረꬃይ ጉኮፐ፥ ላኡካ ሃꬃን ሜጨትኖ፤ ቃይ ኦማርስ ጋካናዉ ኡንቱንቱ ቱና።

19 “ ‘ማጫ አሳዉ አግናን አግናን ይያ ፒላይ ዮፐ፥ ላፑን ጋላሳ ጋካናዉ እዛ ቱና፤ ቃይ እዞ ቦችያ ኦንነ ኦማርስ ጋካናዉ ቱና።

20 “ ‘ሄ ፒላ ዎደ እዛ ግስያዌ ኡባይ ቱና፤ ቃይ እዛ ኡትያዌ ኡባይካ ቱና። 21 እዛ ግስያ ግሱዋ ቦችያ ኡባይ ባረ ማዩዋ ሜጮ፤ ሃꬃንካ ሜጨቶ፤ ኦማርስ ጋካናዉ እ ቱና። 22 እዛ ኡትያዋ ቦችያ ኡባይ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና። 23 እዛ ግስያ ግሱዋ ግድናካ ዎይ እዛ ኡትያዋ ቦችያ ኦንነ ኦማርስ ጋካናዉ ቱና።

24 “ ‘አይ አቱማ አሳይነ ሄ ፒላ ዎደ ኢናና ግሶፐ፥ ሄ ፒላይ ቃይ አ ቦቾፐ፥ ላፑን ጋላሳ ጋካናዉ እ ቱና፤ እ ግስያ ግሱ ኡባይካ ቱና።

25 “ ‘እት ማጫ ምሽራትዉ እዝ ፒላ ዎድያ ግደናን ሀራ ዎድያን ሱꬃይ ጎጎፐ፥ ዎይ ቃይ እዝ ፒላይካ ባረ ዎድያፐ አꬂደ ኤቀናን እጺደ ጎጎፐ፥ እ ኤቃና ጋካናዉ እዛ ቱና። ባረ ፒላ ዎድያን ቱና ግድያዋዳን፥ ሄ ዎደካ እዛ ቱና። 26 ሄ ሱꬃይ ኢፐ ጎግያ ዎድያን እዛ ግሴዳ ግሱ ኡባይ፥ ባረ ፒላ ዎደ እዛ ግሴዳ ግሱዋካ ማላ ቱና፤ ቃይ እዛ ኡትያባይ ኡባይካ ባረ ፒላ ዎደ እዛ ኡትያባይ ቱና ግድያዋዳን ቱና። 27 ቃይ ሄ ቱኔዳባቱዋ ቦችያ ኦንነ ቱና፤ እ ባረ ማዩዋ ሜጮ፤ ባረ ቦላካ ሜጨቶ፤ ቃይ ኦማርስ ጋካናዉ እ ቱና።

28 “ ‘እዝፐ ጎግያባይ ኤቆፐ፥ እዛ ሄ ዎድያፐ ዶማደ ላፑን ጋላሳ ፓይዱ፤ ሄዋፐ ጉይያን፥ እዛ ጌሻ ግዳና። 29 ሆስፑንꬃ ጋላሳን እዛ ላኡ ማራ ሀራጰቱዋ ዎይ ላኡ ማራ ዶጎማቱዋ አካደ፥ ጾሳ ዱንካንያ ፐንግያ ቄስያኮ አሁ። 30 ቄሲ ሀራጰቱዋፐ እቱዋ ናጋራ ያርሾ እቱዋ ቃይ ጹግያ ያርሾ ያርሾ። ያቲደ ቄሲ ኢፐ ጎግያዋ ቱናተꬃ ድራዉ መꬍና ጎዳ ስንꬃን እ ናጋራ አቶ ጊሴ።

31 “ ‘ባረንቱ ግዶን ደእያ ጾሳ ዱንካንያ ቱንሲደ እስራኤልያ አሳይ ሀይቀናዳን፥ ኔን ሀዋዳን ኦꬃደ ኡንቱንቱ ባረና ቱንስያዋፐ ሻከቲደ ደአናዳን ናጋ።

32 “ ‘አ ቦላፐ አያይኔካ ጎግያ አሳዉነ አ አቱማተꬃፐ ጉኬዳ ዘረꬃን ቱንያ አሳዉ፥ 33 ቃይ ባረ ፒላ ጋሱዋን ቱንያ ማጫ አሳዉ፥ አቱማ ግድና ማጫዋ ግድና ጎግያባይ ደእያ አሳዉነ ቱኔዳ ማጫ አሳና ግስያ አቱማ አሳዉ እመቴዳ ዎጋይ ሄዋ’ ያግተ” ያጌዳ።