1 አሮና አቱማ ናናይ ላኡ መꬍና ጎዳ ስንꬃ ሺቂደ ሀይቄዳዋፐ ጉይያን፥ መꬍና ጎዳይ ሙሳ ሀዋዳን ያጌዳ። 2 “መꬍና ጎዳይ ሙሳ፥ ነ እሻይ አሮን ታቦታ ቦላን ደእያ አቶ ግያ ሳኣ ቁምእያ ስንꬃን ጋርዱዋፐ ጉየ ባጋና ደእያ ኡባፐ አꬌዳ ጌሻ ሳኣ ኡባ ዎደ ጮ ገለናዳን አዉ ኦዳ። ጮ ገሎፐ እ ሀይቃና፤ አያዉ ጎፐ፥ ታን ሻርያ ግዶና አቶ ግያ ሳኣ ቁምእያ ቦላን ቆንጫይ። እብራ. 6:19 3 አሮን ናጋራ ያርሾ እት ኮሩማነ ቃይ ጹግያ ያርሾ እት ዶርሳ ኦርግያ አኪደ፥ ሄ ኡባፐ አꬌዳ ጌሻ ሳኣ ገሎ። እብራ. 9:7

4 “አሮን ሊኑዋፐ ኦሰቴዳ ጌሻ ቃምሽያነ ሊኑዋፐ ኦሰቴዳ ጋርሳና ማይያ ማዩዋ ማዮ። ቃይ ሊኑዋፐ ኦሰቴዳ ዳንጩዋ ዳንጮ፤ ሄዋዳንካ ቃይ ባረ ሁጲያን ሊኑዋፐ ኦሰቴዳ ሻሽያ ኤንጩርሳ ዎꬆ። ሀዋንቱ ጌሻ ማዮቱዋ ግድያ ድራዉ፥ እ ባረ ቦላ ሃꬃን ሜጨት ክቺደ ማዮ።

5 “እስራኤልያ አሳ ማባራይ ናጋራ ያርሾ ላኡ ዴሻ ኮለቱዋ፥ ጹግያ ያርሾካ እት ዶርሳ ኮልያ አሮናዉ አይኖ። 6 አሮን ባረ ናጋራነ ባረ ሶ አሳ ናጋራ አቶ ጊሳናዉ ኮሩማ ያርሾ። 7 ሄዋፐ ጉይያን፥ ላኡ ዴሻ ኮለቱዋ አፊደ፥ መꬍና ጎዳ ዱንካንያ ፐንግያን መꬍና ጎዳ ስንꬃን ኤሶ። 8 ያቲደ ሄ ላኡ ዴሻቱዋን ሳማ የግና እቱ መꬍና ጎዳሳ፤ እቱ ቃይ ባዙዋ የድያዋ ግዴ። 9 አሮን መꬍና ጎዳዉ ሳማይ ከሴዳ ዴሻ አሂደ፥ ናጋራ ያርሾ ኦꬂደ ያርሾ። 10 ሽን ባዙዋ የድያ ሳማይ ከሴዳ ዴሻ ፓጻ ደእሽን መꬍና ጎዳዉ ሺሾ፤ ባዙዋ አ የደርስያ ዎደ፥ አሳ ናጋራ አቶ ጊሴ።

11 “አሮን ባረ ናጋራነ ባረ ሶ አሳ ናጋራ አቶ ጊሳናዉ፥ እት ኮሩማ ናጋራ ያርሹዋ ኦꬂደ ሺሾ። ያቲደ ባረ ናጋራ ያርሾ ሄ ኮሩማ ሹኮ። 12 ቃይ መꬍና ጎዳ ስንꬃን ደእያ ያርሽያ ሳኣፐ እጻና ጩውስያ ሚሻ ኩመንꬃ ቦንቁዋነ፥ ሊቅ ጋጨቴዳ ላኡ ኮጵያ ሳዊያ እጻና አኪደ፥ ጋርዱዋ ግዶ አሆ። 13 እ ሀይቀናዳን፥ እጻና ጩዋይ ታቦታ ቦላን ደእያ አቶ ግያ ሳኣ ቁምእያ ካማና ማላ፥ እጻና መꬍና ጎዳ ስንꬃን ደእያ ታማን ዎꬆ። 14 ቃይ ሄ ኦርግያ ሱꬃፐ ጉꬃ አኪደ፥ ባረ ብራꬍያ አን ናቂደ፥ አቶ ግያ ሳኣ ቁምእያዉ ስንꬃ ባጋ ጫጫፎ፤ ቃይ አቶ ግያ ሳኣ ቁምእያፐ ስንꬃ ባጋና ደእያ ሳኣካ ላፑ ገደ ጫጫፎ።

15 “ሄዋፐ ጉይያን አሳ ናጋራ ያርሾ ግድያ ዴሻ ሹኪደ፥ አ ሱꬃ ጋርዱዋ ግዶ አሆ፤ ኮሩማ ሱꬃ ጫጫፌዳዋዳን፥ አቶ ግያ ሳኣ ቁምእያ ስንꬃነ አቶ ግያ ሳኣ ቁምእያፐ ስንꬃ ባጋና ደእያ ሳኣ ጫጫፎ። እብራ. 9:12 16 ያቲደ ኡባፐ አꬌዳ ጌሻ ሳኣ እስራኤልያ አሳ ቱናተꬃፐነ ናጋራፐ ጌሼ። ቃይ ኡንቱንቱ ቱናባ ኦꬅሽን፥ ኡንቱንቱ ግዶን ደእያ ጾሳ ዱንካንያካ ሄዋዳን ኦꬂደ ጌሾ። 17 እ ኡባፐ አꬌዳ ጌሻ ሳኣ ገሊደ፥ ባረ ናጋራ፥ ባረ ሶ አሳ ናጋራነ ኩመንꬃ እስራኤልያ አሳ ናጋራ አቶ ጊሲደ ከሳና ጋካናዉ፥ ኦንነ ጾሳ ዱንካንያ ግዶን ደኦፖ።

18 “ሄዋፐ ጉይያን እ መꬍና ጎዳ ስንꬃን ደእያ ያርሽያ ሳኣ ዪደ አ ናጋራ አቶ ጊሶ። ኮሩማ ሱꬃፐነ ዴሻ ሱꬃፐ ጉꬃ ጉꬃ አኪደ፥ ያርሽያ ሳኣ ዩሹዋን ደእያ ካጨቱዋ ኦኮ። 19 ቃይ ሄ ሱꬃፐ ጉꬃ ባረ ብራꬍያን አኪደ፥ ላፑ ገደ ያርሹዋ ሳኣ ቦላ ጫጫፊደ፥ እስራኤልያ አሳ ቱናተꬃፐ ሄ ያርሹዋ ሳኣ ጌሾ።

20 “አሮን ኡባፐ አꬌዳ ጌሻ ሳኣ፥ ጾሳ ዱንካንያነ ያርሽያ ሳኣ ጌሽያ ዎጋ ፖሌዳዋፐ ጉይያን፥ ፓጻ ደእያ ዴሻ ሺሾ። 21 አሮን ባረ ላኡ ኩሸቱዋ ፓጻ ደእያ ዴሻ ሁጲያን ዎꬂደ፥ እስራኤልያ አሳ ናቁዋ ኡባ፥ ኡንቱንቱ ማካላ ኡባ፥ ኡንቱንቱ ናጋራ ኡባ ፓጾ፤ ያቲደ ሄ ዴሻ ሁጲያን ሄዋ ቶሲደ ሄ ዴሻ አፋናዳን ጊግሴዳ አሳ ቦላን ባዙዋ የዶ። 22 እ ዴሻ ባዙዋ የድና፥ ዴሻይ ኡንቱንቱ ናጋራ ኡባ ቶኪደ፥ አሳይ ባይና ሳኣ ባዙዋ ቦ።

23 “ሄዋፐ ጉይያን፥ አሮን ጾሳ ዱንካንያ ቢደ ኡባፐ አꬌዳ ጌሻ ሳኣ ገሌዳ ዎደ፥ ካሰ ባረ ማዬዳ ሊኑዋፐ ኦሰቴዳ ማዩዋ ቃሪደ ሄዋን ዎꬆ።ህዝ. 44:19 24 ጌሻ ሳኣን እ ባረ ቦላ ሃꬃን ሜጨቲደ፥ ሀራ ማዩዋ ማዪደ ከሶ፤ ያቲደ ጹግያ ያርሹዋ ባረዋነ አሳዋ ያርሺደ፥ ባረ ናጋራነ አሳ ናጋራ አቶ ጊሴ። 25 ቃይ ሄዋዳንካ ናጋራ ያርሹዋ ሀንዳ ያርሽያ ሳኣ ቦላን ዎꬂደ ጹጎ።

26 “ዎራ የድያ ዴሻ አፌዳ ብታኒካ ባረ ማዩዋ ሜጮ፤ ባረ ቦላካ ሃꬃን ሜጨቶ። ያት ስሚደ ዱንካኔዳሳ ዮ።

27 “ናጋራ አቶ ጊሳናዉ አሮን ኡባፐ አꬍያ ጌሻ ሳኣ ገሌዳ ዎደ፥ ናጋራ ያርሹዋ ኮሩማ ሱꬃነ ዴሻ ሱꬃ አኪደ ገሌዳ፤ ሀእ ህንተ ሄ ኮሩማነ ሄ ዴሻነ ዱንካኔዳ ሳኣፐ ጋጻ ከስተ። ኡንቱንቱ ጋልባ፥ ኡንቱንቱ አሹዋነ ኡንቱንቱ ቶጭያ ታማን ጹግተ። እብራ. 13:11 28 ሄዋ ታማን ጹጌዳ ብታኒ ባረ ማዩዋ ሜጮ፤ ባረ ቦላካ ሃꬃን ሜጨቶ፤ ሄዋፐ ጉይያን፥ ዱንካኔዳ ሳኣ ዮ።

29 “ሀዌ ህንተንቶ መꬍናዉካ ዎጋ ግዶ: ላፑንꬃ አግናይ ገሌዳ ታሙንꬃ ጋላሳን ህንተ ሁጲያ ካዉሽተ፤ እስራኤልያ አሳ ግድና ዎይ ቃይ ህንተ ግዶን ደእያ ሀራ ቢታ አሳ ግድናካ፥ አይ ኦሶነ ኦꬆፕተ።ዎጋ 23:26-32፤ ፓይ. 29:7-11 30 አያዉ ጎፐ፥ ህንተና ጌሻናዉ፥ ህንተ ናጋራ አቶ ጊስያ ጋላሳይ ሄ ጋላሳ። ህንተካ መꬍና ጎዳ ስንꬃን ህንተ ናጋራ ኡባፐ ጌያና። 31 ሄዌ ህንተ ዋና ሸምፑዋ ሸምፕያ ሳምባታ ጋላሳ። ሄ ጋላሳን ህንተ ሁጲያ ካዉሽተ፤ ሄዌ ህንተንቶ መꬍናዉካ ዎጋ ግዶ። 32 ቃይ ባረ አዉዋ ኮታን ቄሰ ግዳናዳን ኦከትያዌነ ዱማትያ አሳይ ጌሻ ግዴዳ ሊኑዋፐ ዳደቴዳ ማዩዋ ማዪደ፥ ናጋራ አቶ ጊስያ ዎጋ ፖሎ። 33 እ ኡባፐ አꬍያ ጌሻ ሳኣ፥ ጾሳ ዱንካንያ፥ ያርሽያ ሳኣ፥ ቄሳቱ ዋነ እስራኤልያ አሳ ኡባ ጌሾ። 34 እስራኤልያ አሳ ናጋራ ኡባ አቶ ጊስያ ዎጋ ህንተ ላይꬃን ላይꬃን እት ገደ ኦꬃናዳን፥ ሀዌ ህንተንቶ መꬍናዉካ ዎጋ ግዶ” ያጌዳ። ሙሴ መꬍና ጎዳይ አዛዜዳዋዳን ኦꬄዳ።