1 ሳምባታ ጋላስ የሱስ ባረና ካልያዋንቱና እትፐ እት ጎሻ ግዱዋና አꬍያ ዎደ አ ካልያዋንቱ ዛርጋፐ ትሻ ዱꬂደ ባረንቱ ኩሽያን ሽገቺደ ሙሳ ዶሜድኖ። 2 ፓርሳዋቱዋ ግዶፐ፥ “ሳምባታ ጋላሳን ኦꬃናዉ ዎጋ ግደናዋ አያዉ ኦꬂቴ?” ያጌድኖ። 3 የሱስ፥ “ካትያ ዳዊተነ እትፐ ደእያዋንቱ ኮሻቴዳ ዎደ ኦꬄዳዋ ናባብ በይክቴ? 4 ዳዊተ ጾሳ ጎልያ ገሊደ ቄሳቱዋፐ አትን ሀራ አሳይ ሜናዳን ድገቴዳ፥ ጾሳዉ ያርሸቴዳ ቁማ ሜዳ። እትፐ ደእያዋንቱካ እ እምናደ ሜድኖ” ያግ ዛሬዳ። ዎጋ 24:9

5 ሀዋፐ ካሊደ የሱስ፥ “አሳ ናአይ ሳምባታዉ ጎዳ!” ጌዳ።

6 ሀራ ሳምባታ ጋላሳን የሱስ አይሁዳቱዋ ዎስያ ጎልያ ገሊደ ታማርስ ደኤ። ሄዋንካ ኡሸቻ ኩሺ ስሌዳ ብታኒ ደኤ። 7 ህግያ ታማርስያዋንቱነ ፓርሳዋቱ የሱሳ ሞትያ ጋሱዋ ደማናዉ እ ሳምባታን አሳ ፓꬆፐ በአና ጊደ ናግ ደኢኖ። 8 እካ ኡንቱንቱ ቆፋ ኤሪደ ኩሺ ስሌዳ ብታንያ፥ “ደንዳ አሳ ግዱዋን ኤቃ” ያጌዳ። ብታኒካ ደንድ ኤቄዳ።

9 ሄዋፐ ስሚደ የሱስ፥ “ሀንንቶነ ሳምባታ ጋላሳን ሎኦባ ኦꬃናዉ በሲዬ ኢታባ ኦꬃናዉ በሲ? ሸምፑዋ አሻናዉ በሲዬ ዎꬋናዉ በሲ?” ያጌዳ። 10 የሱስ ባረ ዩሹዋን ደእያ አሳ ኡባ ጼሎዋፐ ጉይያን ብታንያ፥ “ነ ኩሽያ ምጫ!” ያጌዳ። እካ ምጪደ ፓጼዳ።

11 ኡንቱንቱ ሎይꬅ ሀንቄቲደ የሱሳ ቦላ ኦꬃናዋ ባረንቱ ግዶን ማቀቴድኖ።

12 ሄ ዎድያን የሱስ ደርያ ቦላ ዎሳናዉ ከሴዳ፤ ሄዋንካ ቃማ ኩመንꬃ ጾሳኮ ዎሲደ አቄዳ። 13 ሳአይ ዎንቶዋን ባረና ካልያዋንታ ጼሴዳ። ሄዋንቱፐካ ታማነ ላአቱዋ ዶሪደ፥ “ኪተቴዳዋንታ”*ኪተቴዳዋንታ፦ ሀዋ ጉሳይ ታማነ ላኡ የሱስ ኪቴዳ ሀዋራቱዋ ጉሳ። ያጊደ ሱንꬄዳ። 14 ኡንቱንቱ ሱንꬃይካ: ጰጽሮሳ ጊደ እ ሱንꬄዳ ስሞና፥ አ እሻ እንድራሳ፥ ያቆባ፥ ዮሃንሳ፥ ፕልጶሳነ ባርታላሞሳ፥ 15 ማቶሳ፥ ቶማሳ፥ እልፕዮሳ ናኣ ያቆባ፥ ባረ ጋደዉ ሴለትያ ስሞና፥ 16 ያቆባ ናኣ ይሁዳነ የሱሳ አꬅ እሜዳ አስቆሮቱ ይሁዳ። †አስቆሮቱ፦ ሀዋ ጉሳይ አይሁዳ ጋድያን ደእያ አስቆሮቱ ጌተትያ ጋድያፐ ዬናን አተና ጉሳ። ሀ ሱንꬃ ብለꬃይ፥ “ዎርዳንቻ”። ቃይካ፥ “ሀይቆ አꬅ እምያዋ” ጉሳ።

17 የሱስካ ኡንቱንቱና እትፐ ደርያፐ ዎꬊደ ደምባሳን ኤቄዳ። አ ካልያዋንቱፐካ ጮራ አሳይ ሄዋን ደኤ። ቃይካ አፐ ስሳናዉነ ባረንቱ ሀርግያፐ ፓጻናዉ ይሁዳ ጋድያፐ፥ የሩሳላመ ካታማፐ፥ አባ ማታን ደእያ ጺሮሳፐነ ሲዶናፐ ዬዳ ጮራ አሳይ ሄዋን ደኢኖ። 18 ሀ አሳይካ አ ስሳናዉነ ባረንቱ ሀርግያፐ ፓጻናዉ ዬድኖ። ቱና አያናን ኦይቀቲደ መቶትያዋንቱካ ፓጼድኖ። 19 ዎልቃይ አፐ ከሲደ ኡባ ፓꬅያ ድራዉ አሳይ ኡባይ አ ቦቻናዉ ኮዬ።

20 ባረና ካልያዋንታ ጼሊደ ያጌዳ:

22 “አሳ ናኣ ድራዉ ህንተንታ አሳይ እጽያ ዎደነ ቶችያ ዎደ፥ ህንተንቱ ሱንꬃካ ኢታን ደንꬅያ ዎደ፥ አንጀቴድታ። 23 ሳሉዋን ህንተንቱ አካና ዎይታይ ዳራ ግድያ ድራዉ ሄ ጋላስ ናሸቻን ጉፕተ፤ ጋሱካ ካሰ ህንተንቱ አዎቱ ናባቱዋ ቦላን ሀዋዳን ኦꬂደ ደኤድኖ።

27 “ሽን ታን ኦድያዋ ስስያዋንቶ ያጋይ: ህንተንቱ ሞርከቱዋ ዶስተ፤ ህንተና እጽያዋንቶ፥ ሎኡዋ ኦꬅተ፤ 28 ህንተና ሸቂያዋንታ አንጅተ፥ ህንተና ናቂያዋንቶ፥ ዎስተ። 29 እት ባጋ ሻይያ ባቂያዎ፥ ላኤንꬁዋካ በሳ፤ ኦንነ ነ ኮትያ አክያዎ፥ ነ ሻምጭያካ ድጎፓ።

30 “ነዉ ደእያዋ ኔና ዎስያዎ፥ እማ፤ ነዋ አኬዳዋ፥ ዛራ ጋደ ኦቾፓ። 31 አሳይ ህንተንቶ ኦꬃና ማላ ህንተንቱ ዶስያዋዳን፥ ህንተንቱካ ሀራዉ ሀዋዳን ኦꬅተ።

32 “ህንተንታ ዶስያዋንታ ጻላላ ዶሶፐ አይ ጋላታይ ደኢ? ሀዋ ግዶፐ ናጋራንቻቱካ ባረና ዶስያዋንታ ዶሲኖ። 33 ህንተንቶ ሎኦባ ኦꬅያዋንቱ ጻላላዉ ህንተንቱ ሎኦባ ኦꬆፐ ሄዎ አይ ጋላታይ ደኢ? ናጋራንቻቱካ ሀዋዳን ኦꬂኖ። 34 ታልኢደ ህንተዉ ዛራናዉ ዳንዳይያዋንቱ ጻላላዉ ታልኦፐ አይ ጋላታይ ደኢ? ባረ ታልኤዳዋ ዛሪደ አካናዉ ናጋራንቻቱካ ባረንቱ ጋርሳን ታልኤቲኖ። 35 ሽን ህንተንቱ፥ ህንተንቱ ሞርክያ ዶስተ፤ ኡንቱንቶካ ሎኦባ ኦꬅተ፤ ህንተንቱፐ ታልኦዋ ዛሪድ አካናዉ ቆፖፕተ። ሀዋ ህንተንቱ ፖሎፐ ህንተንቶ ጋቲ ዳራናዋ። ቃይ ህንተንቱ ኡባፐ ቦላ ጾሳ ናና ግዳንታ። እ ኢታቶነ ጋላተናዋንቶካ ኬካ። 36 ህንተንቱ አቡ ማርያዋ ግዶዋዳን ህንተንቱካ ማርያዋንታ ግድተ።

37 “ኦ ቦላንካ ፕርዶፕተ፥ ህንተንቱ ቦላንካ ፕርደተና፤ ሀራ ቦላ ኩናንያ ኦꬆፕተ፤ ህንተንቱ ቦላንካ ኩናን ኦሰተና። አቶ ጊተ፤ ጾሳይ ህንተንቶ አቶ ጋና። 38 እምተ፤ ህንተንቶ እመታና። ህንተንቱ ማኬዳ ማካን ህንተንቶ ማከታና። ባቂ ናቂና ሲል ኩም ፓላህ ላለትያ ማካ ህንተንቱ ክዉዋን እድንꬃና” ጌዳ።

39 ቃይካ የሱስ ሀዋፐ ካልያ ሌምሱዋ ኦዴዳ፤ “ቆቃይ ቆቃ ካለꬃናዉ ዳንዳዪ? ቆቃይ ቆቃ ካለꬆፐ ላአቱካ ኦይቀቲደ ኦላን ኩንድክኖ?ማቶሳ 15:14 40 ታማርያዌ ባረና ታማርስያዋፐ አና፤ ታማርያዌ ምን ታማሮፐ ባረና ታማርሶዋ ማላ ግዳናዉ ዳንዳዬ።

41 “ነ አይፍያ ግዶን ደእያ ቱሳ ከሰናን ደኣደ ሀራ ነ ላግያ አይፍያ ግዶን ደእያ ሱላ አያዉ ጼላይ? 42 ነ አይፍያ ጋርሳን ደእያ ቱሳ በኤናን ሀራ አሳኮ ሺቃደ፥ ‘ታ እሻዉ፥ ነ አይፍያ ጋርሳፐ ሱላ ታ ከሶ?’ ያጋናዉ ዎታ ዳንዳያይ? ሀ ሎኡዋ ማላትያ ኢታዉ፥ ኮይሮታደ ነ አይፍያ ግዶን ደእያ ቱሳ ከሳ። ሄዋፐ ጉይያን ነ እሻ አይፍያ ግዶን ደእያ ሱላ ከሳናዉ ጌሻደ ጼላናዉ ዳንዳያ።

43 “ሎኦ ምꬃይ ኢታ አይፍያ አይፈና፤ ሄዋዳንካ ኢታ ምꬃይ ሎኦ አይፍያ አይፋናዉ ዳንዳየና። 44 ምꬃይ ኡባይ ባረ አይፍያ አይፍያዋን ኤረቴ። አጉንꬃፐ ዎደንꬃ አይፊ ማጸተና፤ ሀዋዳንካ፥ ጹንዱቂያፐ ‡ጹንዱቂያ፦ ሀ ምꬃይ ጎምኦርያ ዛርያ ግዲደ አ አይፊ አያዉነ ማደናዋ። ላድያ አይፍያ ማጻናዉ ዳንዳየተና። ማቶሳ 12:34 45 ሎኦ አሳይ ባረ ሎኦ ዎዛናፐ ሎኦ የዉዋ ሃሳዬ። ቃይ ኢታ አሳይ ባረ ኢታ ዎዛናፐ ኢታ የዉዋ ሃሳዬ። አያዉ ጎፐ፥ አሳይ ባረ ዶናን ሃሳይያዌ ባረ ዎዛናን ኩሜዳዋ ዶናይ ሃሳይያ ድራሳ።

46 “ታን ኦዶዋ ኦꬅክታ፥ ሽን አያዉ ጎዳዉ፥ ጎዳዉ፥ ያጊደ ታና ጼጊቴ? 47 ታኮ ይያ ኡባይ ታ ቃላካ ስሲደ ኦሱዋን ፔሽያዌ ኦና ማላትንቶ ታ ህንተንታ በሳና፤ 48 እካ ጎልያ ኬጺደ ዳሮ ኦላ ቦኪደ ዛላ ቦላ ግንቢደ ኬጼዳ አሳ ማላቴ፤ ድኡ ድኢደ ሄ ጎልያ ሱግናካ፥ ምኖ ዛላ ቦላ ኬጸቶ ድራዉ ቃꬃናዉ ዳንዳይቤና። 49 ቃይ ታ ቃላ ስሲደ ኦሱዋን ፔሸና ኡራይ ባሱ ባንታሳ ሻፍያ ቦላን ጎልያ ኬጼዳዋ ማላቴ። ድኡ ድኢደ ሄ ጎልያ ሱጎ ዎደ ኤለካ ኩንዴዳ፤ ሄ ጎሊካ ኢታ ዎዳ ዎዲደ ባዬዳ” ያጌዳ።