ጌሻ ማጻፋ ሉቃሳ ምሽራቹዋ 5

የሱስ ኮይሮ ባረና ካልያዋንታ ዶሬዳ

(ማቶሳ 4:18-22፤ ማር. 1:16-20)

1 እት ጋላስ የሱስ ገንሳሬጸ አባ * ጋጻን ኤቂደ ደእሽን ጮራ አሳይ አኮ ሺቂደ ጾሳ ቃላ ስሳናዉ ሱገት ደኢኖ። 2 ሄ ዎደ ላኡ ዎንግራቱ † አባ ጋጻን ኤቆዋ እ በኤዳ፤ ሞልያ ጲርያዋንቱ ቃይ ዎንግራቱዋፐ ዎꬊደ ባረንቱ ዳባ ሜጭ ደኢኖ። 3 የሱስ ዎንግራቱዋ ግዶፐ ስሞናዉኖ ግዴዳዉንን ገሊደ ሳኣፐ ያ አባኮ ጉꬃ ሺሻናዳን ኦቼዳ። ሄዋፐ ጉየ ዎንግርያ ቦላን ኡቲደ አሳ ታማርሱዋ ዶሜዳ።

4 ታማርሱዋ በꬆዋፐ ጉይያን ስሞና፥ “ዎንግርያ ያ አባ ጪሙዋኮ ሺሽተ፤ ህንተንቱ ዳባካ ሞልያ ጲራናዉ ኦልተ” ያጌዳ።

5 ስሞንካ፥ “ጎዳዉ፥ ቃማ ኩመንꬃ ዳቡር አቂደ አይነካ ኦይቂበይኮ፤ ሽን ሀእ ኔን ጎዋዳን ዳባ ኦሌቶ” ያግ ዛሬዳ።

6 ሄዋዳንካ ኦꬄዳ ዎደ፥ ዳሮ ጮራ ሞልያ ኦይቄድኖ። ኡንቱንቱ ዳባቱካ ዱጸረታናዉ ሀኔድኖ። 7 ሀራ ዎንግርያን ደእያ ላገꬃቱ ዪደ ማዳናዳን ዉቴድኖ፤ ኡንቱንቱ ላኡ ዎንግራቱዋንካ ሞልያ ኩንꬅና ዎንግራቱ ምተቱሳ ዶሜድኖ።

8 ስሞን ጰጽሮስካ ሀዋ በኤዳ ዎደ የሱሳ ጉልባታን ኩንዲደ፥ “ጎዳዉ፥ ታን ናጋራንቻ አሳ ግዶ ድራዉ ታፐ ሻከታ” ያጌዳ። 9 ሀዋ ጌዳዌ እነ አናና እትፐ ደእያዋንቱ ኡባይ ባረንቱ ኦይቄዳ ሞልያ ጮራተꬃን ማላለቴድኖ። 10 ሄዋዳንካ ቃይ ስሞና ላገꬃ ግዴዳዋንቱ ዛብድዮሳ ናናቱ ያቆብነ ዮሃንስ ማላለቴድኖ።

የሱስካ ስሞና፥ “ያዮፓ ሀዋፐ ጉይያን አሳ ጲርያዋ ግዳናሳ” ጌዳ።

11 ኡንቱንቱካ ዎንግራቱዋ ሃꬃፐ ጋጻ ከሲደ፥ ኡባባ አጊደ የሱሳ ካሌድኖ።

የሱስ ኦሉ ኦይቄዳ ብታንያ ፓꬄዳ

(ማቶሳ 8:1-4፤ ማር. 1:40-45)

12 የሱስ ካታማቱዋፐ እቱዋን ደእሽን ኦሉ ‡ ቦላ ኡባ ሜዳ ብታኒ ደእያዌ የሱሳ በኢደ አ ስንꬃንካ ኩንዲደ፥ “ጎዳዉ፥ ኔን ኮዮፐ ታና ፓꬃናዉ ዳንዳያ” ያጊደ ዎሴዳ።

13 የሱስካ ባረ ኩሽያ የድ ቦቺደ፥ “ዶሳይ ጌያ!” ጌዳ። ሄማንእያንካ ኦሉ አ የዴዳ።

14 የሱስ አ፥ “ሀዋ ኦስነ ኦዶፓ። ሽን ቄሳኮ ባደ ኔና በሳ። ሄዋፐ ጉየ ኦሉዋ ሀርግያፐ ፓጼዳዎ ማርካ ግዳናዳን ሙሴ ህግያን አዛዘቴዳ ያርሹዋ ሺሻ” ጌዳ።

15 ግዶ ሽን አ ዋሪ ሎይꬅ አኪደ ቤዳ፤ ዳሮ ጮራ አሳይካ የሱስ ኦድያዋ ስሳናዉነ ባረንቱ ሀርግያፐ ፓጻናዉ ሺቄድኖ። 16 የሱስ ጮራ ዎደ ጌማሳ ቢደ ዎሴ።

የሱስ ቦላይ ስሌዳ ብታንያ ፓꬄዳ

(5:18-26፤ ማቶሳ 9:2-8፤ ማር. 2:3-12)

17 እት ጋላስ የሱስ ታማርሲደ ደእሽን ጋሊላፐነ ይሁዳ ሄራ ኡባፐ፥ የሩሳላመ ዬዳ ፓርሳዋቱነ ህግያ ታማርስያዋንቱ ኡት ደእሽን ሀርጋንቻቱዋ ፓꬃና ማላ ጾሳ አዉዋ ዎልቃይ አዉ እመቴዳ። 18 ሄ ዎደ ቦላይ ስሌዳ § እት ብታንያ አማሬዳ አሳይ ሻንቻማን ቶክ አህ ጎለ ገልሲደ የሱሳ ስንꬃን ዎꬃናዉ ኮዬድኖ። 19 አሳ ጮራተꬃፐ ደንዴዳዋን የሱሳኮ ሺቃናዉ ዳንዳይበይክኖ። ሄዋ ድራዉ ቦላዉ ግእ ጎልያ ካራ * ቃሪደ አ፥ ሻንቻማና አሳ ግዶን የሱሳ ስንꬃን ዎꬄድኖ።

20 የሱስካ ኡንቱንቱ አማኑዋ በኢደ፥ “ሀ ብታነዉ፥ ነ ናጋራይ አቶ ጌተቴዳ” ያጌዳ።

21 ሙሴ ህግያ ታማርስያዋንቱነ ፓርሳዋቱ፥ “ሀዌ ጾሳ ቦርያዌ ኦኔ? እት ጾሳፐ አትን ናጋራ አቶ ጋናዉ ኦን ዳንዳዪ?” ያግ ቆፋ ዶሜድኖ።

22 የሱስካ ኡንቱንቱ ቆፋ ኤሮ ድራዉ ሀዋዳን ጌዳ፥ “አያዉ ህንተንቱ ዎዛናን ሀዋዳን ቆፒቴ? 23 ‘ነ ናጋራይ አቶ ጌተቴዳ’ ጋናዋፐነ ‘ደንዳደ ባ’ ጋናዋፐ ሀቃዌ ማቴ? 24 የዉዋን ቃይ ሀዋ ታን ጌዳዌ፥ አሳ ናአይ ቢታ ቦላን ናጋራ ማራናዉ ማታይ ደእያዋ ህንተንቱ ኤራናዳና።” ሄዋፐካ ጉንዴዳ ብታንያ፥ “ደንዳ ነ ሻንቻማ ቶካደ ነ ጎለ ባ ጋይ” ያጌዳ።

25 ጉንዳይካ አሳ ስንꬃን ደንዶዋሽን ባረ ሻንቻማ ቶኪደ ጾሳ ጋላቲደ ባረ ሶይ ቤዳ። 26 ሀ ዎደ ኡባቱካ ዳሪ ማላለቴድኖ፤ ጾሳካ ጋላቲደ፥ “ሀቼ ማላባ በኤዶ” ያጊደ ያሻን ኩሜድኖ።

የሱስ ሌዊያ ዶሬዳ

(5:27-32፤ ማቶሳ 9:9-13፤ ማር. 2:13-17)

27 ሄዋፐ ጉይያን የሱስ ከሲደ ቤዳ፤ ሌዊያ ጌተትያ ቃራጻ ሺሽያዌ፥ ቃራጻ ሺሽያሳን ኡቶዋ በኢደ፥ “ታና ካላ” ጌዳ። 28 እካ ደንዲደ ኡባባ አጊደ አ ካሌዳ።

29 ሄዋፐ ስሚደ ሌዊ ባረ ጎለን ዳሮ ሾብያ ጊግሴዳ፤ ጮራ ቃራጻ ሺሽያዋንቱነ ሀራ ጮራ አሳይካ ኡንቱንቱና ኡቲደ ም ደኢኖ። 30 ፓርሳዋቱነ ህግያ ታማርስያ፥ ኡንቱንቱና ኦꬅያዋንቱ፥ የሱሳ ካልያዋንቱ ቦላን፥ “አያዉ ቃራጻ ቃንጽያዋንቱናነ ናጋራንቻቱዋና ሚቴኔ ኡሺቴ?” ያጊደ ዙዙሜድኖ።

31 የሱስካ፥ “ሀርጋንቻ አሳፐ አትን ፓጻ አሳዉ አክምያ ኮሸና። 32 ታን ዬዳዌ፥ ናጋራንቻቱ ባረንቱ ናጋራ ፓጺደ ስማናዳናፐ አትን፥ ጽላቱዋ ጼሳናዉ ያበይከ” ያግ ዛሬዳ።

የሱስ ጾማባ ኦሸቴዳ

(5:33-39፤ ማቶሳ 9:14-17፤ ማር. 2:18-22)

33 ሀዋፐ ጉይያን የሱሳ፥ “ዮሃንሳ ካልያዋንቱነ ፓርሳዋቱዋ ካልያዋንቱ ኡባ ዎደ ጾሚኖነ ዎሲኖ፤ ሽን ኔና ካልያዋንቱ ቃይ ኡባ ጋላስ ሚኖነ ኡሺኖ” ያጊደ ኦቼድኖ።

34 የሱስካ፥ “ምሽራይ ኡንቱንቱና ደእሽን ምያታቱ ጾማናዉ ዳንዳዪኖ? 35 የዉዋን ቃይ ምሽራይ ኡንቱንቱፐ ሻከቲደ ባና ዎዲ ያናዋ፤ ሄ ዎደ ጾማናዋንታ” ያግ ዛሬዳ።

36 የሱስካ ካልያ ሌምሱዋ ኦዴዳ: “ኦራꬃ ማዩዋፐ ፔꬍ አኪደ ኤጫ ማዩዋ ቦላን ፕያዌ ባዋ፤ ጋሱካ ሀዋዳ ኦꬆፐ ኦራꬃ ማዩዋ ፔꬌ፤ ኦራꬃ ፊካ ኤጫ ማዩዋን ጊገና። 37 ሀዋዳንካ ኤጬዳ ጭልግያን † ኦራꬃ ዎይንያ ኤሳ ዎꬅያዌ ባዋ፤ ዎꬆፐ ቃይ ኦራꬃ ዎይንያ ኤሳይ ጭልግያ ꬉሴ፤ ኤሳይካ ጉኬ፤ ጭልጋይካ ባዬ። 38 ኦራꬃ ዎይንያ ኤሳ፥ ኦራꬃ ጭልግያን ዎꬃናዉ በሴ። 39 ኤጫ ዎይንያ ኤሳ ኡሺደ ኦራꬃ ኮይያዌ ኦንነ ባዋ፤ ጋሱካ ኤጫይ ማልኤ ግያ ድራዉ።”

*5:1 ገንሳሬጸ አባ፦ ጋሊላ አባዉ እመቴዳ ዱማ ሱንꬃ።

5:1 ማቶሳ 13:1፣ 2፤ ማር. 3:9፣ 10፤ 4:1

†5:2 ዎንግርያ፦ ዎንግርያ ጌተቶዌ፥ ዎጋ ሃꬃ ዎይ አባ ቦላን አሳይ ሄፍንꬃ ባጋ ፕናናዉ ጎኤትያ ሚሻ። ሀይቆ አሳይ ሞገትያዋ ግደናዋ ኤራናዉ ኮሼ።

5:5 ዮሃ. 21:3

5:6 ዮሃ. 21:6

‡5:12 ኦሉዋ፦ 4:27 ጼልተ።

§5:18 ቦላይ ስሌዳ፦ ሀዋ ጉሳይ ግሪከ ቃላን “ፓራሉሞአይ” ጌተትያዋ። ሀ ቃላ ብለꬃይ እንግልዜꬁዋን “ፓራላይዝድ” ጉሳ። ሀ ላአቱዋካ ዳዉሮꬁዋን ብለꬃ እሞደ፥ ኬቼዳዋ ዎይ ቃጸና ማላ ዳቡሬዳዋ ጉሳ።

*5:19 ካራ፦ ሀ ፓይዱዋን ጌተቴዳ ጎልያ ካራይ ዳዉሮዋ ማላ ግደናዳን፥ ፓላስቲነ ጋደን ጎልያ ቦላን ደእያ ካራይ ገደ ቀረቲደ ኬጸቴ። ሄዌ ያቲደ ቃይ ዱፈቲደ ጋጻን ጋጻን ሀራ ምꬃይ ተጨትና ሎይꬅ ኬጸቴ። ሄዋ ማላ ኬጻይ ኦራꬃ ቃላ ጫቁዋ ዎድያን ኤረቴዳዋ።

5:30 ሉቃሳ 15:1፣ 2

†5:37 ጭልግያ፦ ሀዎ ዳዉሮꬁዋን እመትያ ጉጃ ብለꬃይ ኤሳ ናእያ ኦጎሩዋ።