1 የሱስ ሀዋፐ ስሚደ፥ ሳባኪድነ ጾሳ ካዉተꬃ ምሽራቹዋ ቃላ ካታማንነ ሄራን ኦዲደ አꬌዳ። ታማነ ላኡ የሱሳ ካልያዋንቱካ አናና እትፐ ደኢኖ። 2 ኢታ አያናፐነ ዎልቃማ ሀርግያፐ ፓጼዳዋንቱ እት እት ማጫዋንቱካ ደኢኖ። ሄዋንቱካ: ላፑ ጻላሂ ከሴዳ ማግዳላ ጌተትያ ካታማፐ ዬዳ ማይራሞነ፥ 3 ሄሮድሳ ጎልያን ሱንꬃ ግዴዳ ኩዛ ማቻት ዮሃኖ፥ ሶስና ጌተተዉናነ ሀራ ጮራቱዋና እትፐ ግዲደ፥ የሱሳነ አ ካልያዋንታ ሚሻን ማዴድኖ።

4 ጮራ አሳይ ዳሮ ካታማቱዋፐ ሺቂደ፥ የሱሳኮ ዬዳ ዎድያን ሌምሱዋን፥ 5 “ዘርያዌ ዘረꬃ ዘራናዉ ከሴዳ። ዘርያ ዎደ እት እት ዘረꬃይ፥ ኦግያ ዶናን ዎꬊደ የቴዳ። ያትና ሳሉዋ ካፉ ሄዋ ሜዳ። 6 ሀራይ ቃይ ዛላ ቦላ ዎꬊደ ዶሌዳ ዎደ ኮሽያ ሃꬃ ደመና ድራዉ መሌዳ። 7 ሀራ ዘረꬃይ አጉንꬃ ጋርሳን ዎꬌዳ። አጉንꬃይ እትፐ ድጪደ ምቴዳ። 8 ሀራይ ሎእያ ቱኤ ቢታን ዎꬌዳ። ዶሎዋፐ ጉይያን፥ ዘረቶዋፐ ጼቱ ኩሽያ ዳኩዋ ሞኬዳ” ያጌዳ።

የሱስ ሀዋ ሃሳዪደ፥ “ሀይꬃይ ደእያ ኡባይ ስሶ” ያግ ቃላ ꬎቁ ኦꬂደ ዋሴዳ።

9 አ ካልያዋንቱ፥ “ሀ ሌምሱ አያ ጉሴ?” ያግ አ ኦቼድኖ። 10 እካ ዛሪደ፥ ኢሳ. 6:9

“ህንተንቶ ጾሳ ካዉተꬃ ጹራ ኤራይ እመቴዳ፤ ሽን ሀራቶ፥ ጼሊድካ ኤረና ማላ፥ ስሲድካ አኬከና ማላ ሌምሱዋን ኦዳይ” ያጌዳ።

11 የሱስ፥ “ዘረꬃ ሌምሱ ሀዋ: ዘረꬃይ ጾሳ ቃላ። 12 ኦግያ ጋጻን ዎꬌዳ ዘረꬃይ፥ ጉꬃ ዎደዉ ቃላ ስስያ አሳ፤ ኤለካ ጻላሂ ዪነ፥ ኡንቱንቱ ስሶዋን አማን አተና ማላነ ቃላይ ዎዛናፐ ዶገታና ማላ ኦꬄ። 13 ዛላ ቦላን ዎꬌዳ ዘረꬃይ፥ ኮይሮ ቃላ ናሸቻን ስስያዋንታ። ሄዋንቱካ ጉꬃ ዎድያ አማንኔ ፓጪ ጋክያ ዎድያን ጻጱ ባንታ ድራዉ ኤለካ አማኑዋ ካዲኖ። 14 አጉንꬃ ጋርሳን ዎꬌዳ ዘረꬃይ፥ ቃላ ስስያዋንታ፤ ሽን ደኡዋ ህርጋይነ ዱረተꬃ እሻሉ ጩሌዳዋንታ። ሄዋንቱ ሎኦ አይፍያ እማናዉ ዳንዳይክኖ። 15 ሎኦ ቱኤ ቢታን ዎꬌዳ ዘረꬃይ በስያዌ፥ ሎአነ ጽሎ ዎዛናን ቃላ ስሲደ ናግያ አሳነ ሄ ቃላን ምን ኤቂደ ሎኦ አይፍያ አይፍያዋንታ።

16 “ጾምፕያ ሳꬂደ እትባን ቁምእ አግያዌ ዎይ አርሳፐ ጋርሳና ዎꬅያዌ ኦንነ ባዋ። ማቶሳ 5:15፤ ሉቃሳ 11:33 17 ቆንጨናን ቆሱዋን አትያባይ እት የዉነ ባዋ። ኤረተናንነ ቤትያሳ ከሰናን አታናባይ አይነ ባዋ። ማቶሳ 10:26፤ ሉቃሳ 12:2 18 ሄዋ ግድያ ድራዉ ሎይꬅ አኬካን ስስተ። ዎዛናፐ ስስያዎ ኡባዉ ጉጅ አኬካይ እመታና፤ አኬከናዋፐ ሄ አዉ ደእያዋ ማላትያ አኬካይካ አከታናዋ” ያጌዳ። ማቶሳ 25:29፤ ሉቃሳ 19:26

19 ሄ ዎድያን አታነ እሻቱ የሱሳና ጋከታናዉ አኮ ዬድኖ፤ ሽን አሳ ጮራተꬃፐ ደንዶ ጋሱዋን አ ደማናዉ ዳንዳይበይክኖ። 20 እት ብታኒ፥ “ነ ዳያነ ነ እሻቱ ኔናና ጋከታናዉ ኮዮ ድራዉ ካረን ዪደ ኤቄድኖ” ያግ ኦዴዳ።

21 እካ፥ “ታ ዳያነ ታ እሻቱ፥ ጾሳ ቃላ ስሲደ ኦሱዋ ቦላን ፔሽያዋንታ” ያግ ዛሬዳ።

22 እት ጋላስ የሱስ ባረና ካልያዋንቱና እትፐ ዎንግርያ ገሊደ፥ “አባፐ ሄፍንꬃ ቦይተ” ጌዳ። ኡንቱንቱካ ደንዲደ ሀመታ ዶሜድኖ። 23 ፕን ደእያ ዎደ፥ የሱስ ገምእሼዳ። አባን ጎቱዋ ጫርኩ ደንዶ ድራዉ፥ ዎንግርያ ጋርሳን ሃꬃይ ኩምና ዳሮ መቶቴድኖ። 24 ኡንቱንቱ የሱሳኮ ሺቂደ፥ “ጎዳዉ፥ ጎዳዉ! ኑን ባዮይተቴ!” ያጊደ አ ቤጎꬄድኖ።

እካ ቤጎቲደ ጎቱዋነ ሃꬃ ቤታ ሴርና፥ ጎቱነ ሃꬃ ቤታይ ኤቄዳ፤ ኡባባይካ ጮኡ ጌዳ። 25 እካ፥ “ህንተንቶ አማኑ ሀቃን ደኢ?” ያጌዳ።

ኡንቱንቱካ ያይ ማላለቲደ እቱ እቱዋ፥ “ሀዋዳን ጫርኩነ ሃꬃይ ጮኡ ጊተ ጊና አዛዘትያዌ ሀዌ ኦኔ?” ያገቴድኖ።

26 ጋሊላ አባፐ ሄፍንꬃና ደእያ ገርገሰኖና ጌተትያ ጋድያ፥ የሱስነ አ ካልያዋንቱ፥ ዎንግርያን ፕኒደ ጋኬድኖ። 27 ሄ ሃꬃፐ ፕን ሳኣ ዎꬎ ዎደ፥ ኢታ አያናን ኦይቀቴዳ እት ብታኒ፥ ካታማፐ ከሲደ አናና ጋከቴዳ። ዳሮ ዎድያፐ ዶሚደ ማዩዋ ማየናን ካሎ ጎልያ አጊደ ዱፉዋን ደኤ።

28 የሱሳ ደሞዋፐ ጉይያን፥ ዋስ አ ስንꬃን ጉፋኒደ ዎልቃማ ኮሻን፥ “ዎልቃማ ጾሳ ናኣ የሱሳ፥ ታዉነ ነዉ አይበ እትፐተꬃይ ደኢ? ታና ዋይሶፓርኪ፤ ታ ኔና ዎሳይ” ያጌዳ። 29 እ ሄዋ አያዉ ጌዴ ጎፐ፥ ብታንያ የግ ከሳና ማላ የሱስ አ አዛዞ ድራሳ።

ኢታ አያናይ ብታንያ ኦይቆደፐ ዳሮ ዎደ ግዶ ድራዉ፥ ብራታ ሳንꬃላታን ገድያነ ኩሽያ ቃሸቲደ ናገቴ። ሳንꬃላታ ዱꬅ አኪደ ኢታ አያናይ ካለꬅና ባዙዋ ቤ።

30 የሱስካ፥ “ነ ሱንꬃይ ኦኔ?” ያግ ኦቼዳ። እካ ጮራ ኢታ አያናይ ገል ኡቶ ድራዉ፥ “ሌግዮና”*ሌግዮና፦ ሀ ሱንꬃይ ግሪከ ጌተትያ ቃላፐ አከቴዳ። ሱንꬃ ብለꬃይ “ጮራ” ጉሳ። ያጌዳ። 31 ባረንታ የሱስ፥ “ህን ጪሞ ኦላ ቢተ” ያገና ማላ ዎሴድኖ።

32 ሄዋን ደእያ ዞዝያ ጋጻን ሄመትያ ጮራ ጉዱንꬃቱ ደኢኖ። ጮራ ቱና አያናቱ፥ ሄ ጉዱንꬃቱዋ ጋርሳ፥ “ገልተ” ጋና ማላ የሱሳ ዎሴድኖ። እካ፥ “ቢደ ገልተ” ጌዳ። 33 ኢታ አያናቱካ ብታንያፐ ከሲደ ጉዱንꬃቱዋ ጋርሳ ገሌድኖ። ጉዱንꬃ ዉዲካ ላንቂያፐ ካጆቲደ ኤለካ አባን ምተቴድኖ።

34 ጉዱንꬃ ሄምያዋንቱ ሀኖዋ ኡባ በኦ ዎደ ሀራሳ ቢደ፥ ሄ ካታማንነ ዩሹዋን ሀኖዋ ኦዴድኖ። 35 አዬ ሀኔደንቶ በአናዉ ከሲደ፥ አሳይ የሱሳኮ ዬድኖ። ኢታ አያናይ ከሴዳ ብታኒ፥ አ ዎዛናይ ስምና ማዩዋ ማዪደ የሱሳ ገድያ ማታን ኡቶዋ በኢደ ያዬድኖ።

36 ኢታ አያናን ኦይቀቴዳ ብታኒ ዎት ፓጼደንቶ በኤዳ አሳይ፥ ሀራ አሳዉ ኦዴድኖ። 37 ገርገሰኖና ጋድያንነ ሄ ሄራን ደእያ አሳይ ኡባይ ዳሪ ያዬዳ ድራዉ፥ የሱስ ባረንቱ ማታፐ ባና ማላ ዎሴድኖ። እካ ዎንግርያን ገሊደ ቤዳ። 38 ኢታ አያናይ ከሴዳ ብታኒካ የሱሳና ባና ጊደ፥ አ ዎሴዳ፤ ሽን የሱስ፥ 39 “ነ ጎለ ስማደ ጾሳይ ነዉ ኦꬆ ዎልቃማባይ አየንቶ ማርካታ” ያግ የዴዳ።

40 የሱስ ስሜዳ ዎደ አሳይ ኡባይ ናግ ደእያ ድራዉ፥ አ ሞክ አኬድኖ። 41 ሄ ዎደ፥ አይሁደ አሳ ዎሳ ጎለዉ ሱንꬃ ግዴዳ ያእሮሳ ያገትያ ብታኒ አኮ ዬዳ። እካ የሱሳ ገድያ ስንꬃን ኩንዲደ፥ ባረ ጎለ ገላና ማላ ዎሴዳ። 42 ጋሶተꬃይካ ታማነ ላኡ ላይꬃይ ኩሜዳ አዉ ደእያ እት ናታ ሀይቃናዉ ማታ ኡቶ ድራሳ።

የሱስ ብያ ዎደ ጮራ አሳይ አ ዩሹዋን ሱገቲደ መቶꬄድኖ። 43 ሄ አሳ ግዶን ሄ ዎድያን ታማነ ላኡ ላይꬃ ኡባ ሱꬃይ ጎግያ ምሽራታ ደአዉ። ባረ ደእያ ሻሉዋ ኡባ ꬋልያ ኤርያዋንቶ ዉርስናካ ፓꬃናዉ ዳንዳዮዌ ኦንነ ባዋ።

44 ጉየና ያደ አ ማዩዋ ማጫራ ቦቻዱ፤ ሄ ማንእያን ኢፐ ጎግያ ሱꬃይ ኤቂ አጌዳ። 45 የሱስ፥ “ኦኔ ታና ቦቾዌ?” ያጌዳ።

ኡባይ ካድና ጰጽሮስ፥ “ጎዳዉ፥ አሳይ ሱገቲደ መቶትያ ዎደ፥ ‘ኦኔ ታና ቦቾዌ’ ያጋይ?” ጌዳ።

46 ሽን የሱስ፥ “እት አሳይ ታና ቦቼዳ፤ ዎልቃይካ ታፐ ከሶዋ ታን ኤራይ” ያጌዳ። 47 ምሽራታካ፥ የሱሳ እዛ ቦቾዌ ኤረተናን አትቤናዋ ኤራደ፥ ኮኮራደ ዮና የሱሳ ስንꬃን ኩንዳ አጋዱ። አያ ጋሱዋን የሱሳ ቦቻደንቶ እዛ ፓጾዋ ኡባ አሳ ስንꬃን ኦዳዱ።

48 እካ እዝዉ፥ “ሀ ምሽራቴ! ነ አማኑ ኔና ፓꬄዳ፤ ሳሮ ባ” ያጌዳ።

49 የሱስ ሃሳይ ደእሽን፥ አይሁዳ አሳ አማንያዋንቱ ሱንꬃ ሶይፐ እት ብታኒ ዬዳዌ፥ “ነ ናታ ሀያዱ፤ ስም ታማርስያዋ መቶꬆፓ” ያጌዳ።

50 የሱስ ሀዋ ስሲደ፥ “ያእሮሳ፥ አማናፐ አትን፥ ያዮፓ! እዛ ፓጻናዉኑ” ያግ ዛሬዳ።

51 ሶይ ገሊደ: ጰጽሮሳፐ፥ ያቆባፐ፥ ዮሃንሳፐ፥ ናት አቡፐነ ናት ዳይፐ አትን፥ ኦንነ ገላናዳን ኤኖ ግቤና። 52 ኡባይ ሄ ናትዉ ዬኪደነ ካዮቲድ ደኢኖ። ሽን የሱስ፥ “ዬኮፕተ፥ ግሳዱፐ አትን ሀያበይኩ” ያጌዳ።

53 እዛ ሀይቄዳዋ ኤሪደ አ ቦላ ሚጬድኖ። 54 ግዶፐ አትን የሱስ እዝ ኩሽያ ኦይቂደ፥ “ሀ ናቴ፥ ቤጎታ!” ያጌዳ። 55 እዝ ሸምፑካ ስምና ኤለካ ደንዳ ኤቂና ማናባ እማና ማላ፥ የሱስ አዛዜዳ። 56 እዝ አቡነ እዝ ዳያ ማላለቴድኖ፤ ሽን የሱስ ኡንቱንታ፥ ሀኖ የዉዋ ኦስነ ኦደና ማላ አዛዜዳ።