ጌሻ ማጻፋ ሉቃሳ ምሽራቹዋ 9

የሱስ ባረና ካልያ ታማነ ላአቱዋ ኪቴዳ

(ማቶሳ 10:5-15፤ ማር. 6:7-13)

1 የሱስ ታማነ ላኡ አ ካልያዋንታ እትፐ ባረኮ ጼሲደ፥ ጻላህያ ኡባ አሳፐ ከሳናዉነ ሀርግያዋንታ ፓꬃና ማላ ዎልቃነ ማታ እሜዳ። 2 ጾሳ ካዉተꬃባ ኦዳናዉነ ሀርጋንቻቱዋ ፓꬃና ማላ ኡንቱንታ ኪቴዳ። 3 እ ኡንቱንታ ኪቲደ፥ “ኦግያ ቢደ፥ ጻምኣ ግድናካ፥ ዎይ ቃርጪትያ፥ ዎይ ቁማ፥ ዎይ ሚሻ ግድናካ አያነ ኦይቆፕተ፤ ላኤንꬅያ ማዩዋካ ኦይቆፕተ። 4 ህንተና አሳይ ሀቃን ሞኮፐነ፥ ሄዋፐ ከሳና ጋካናዉ፥ ህንተንቱ ገሌዳ ጎልያን ጋምእተ። 5 ሄ ካታማ አሳይ ህንተና ሞከናን እጾፐ፥ ሄዋፐ ከሲደ፥ ኡንቱንቱ ህንተና ሞከናን እጾዎ ማርካ ግዳና ማላ፥ ህንተንቱ ገድያፐ ባና ሾጭ ድጊደ ቢተ” ያጌዳ።

6 አ ካልያዋንቱ ቢደ፥ ቄር ካታማ ኡባን ምሽራቹዋ ቃላ ኦዲደነ ሀርጋንቻ ፓꬂደ ዩዬድኖ።

ሄሮድሰ ኦꬄዳባ

(ማቶሳ 14:1-12፤ ማር. 6:14-29)

7 ሀእ ጋሊላ ቢታ ካትያ ሄሮድሰካ ሀኔዳ የዉዋ ስሲደ ያት ጌዳ። ጋሶተꬃይነካ እት እት አሳይ፥ “ዮሃንስ ሀይቁዋፐ ደንዴዳ” ያጌ። 8 ሀራ አሳይ፥ “ኤላስ ከሲደ ቤቴዳ” ያግያ ዎደ፥ ሀራንቱ ቃይ፥ “በን ናባቱዋፐ እቱ ሀይቁዋፐ ደንዴዳ” ያጊኖ። 9 ሄሮድሰካ፥ “ታን ዮሃንሳ ቆꬍያ ቃንጽሳ ድጋድሽን፥ ሀዋዳን አሳይ ሃሳይያ ብታኒ ኦኔ?” ያጊደ፥ የሱሳ በአናዉ ኮዬዳ።

የሱስ እቼሹ ሻአ አሳ ምዚደ ካልሴዳ

(ማቶሳ 14:13-21፤ ማር. 6:30-44፤ ዮሃ. 6:1-14)

10 የሱስ ኪቶዋንቱ ስሚደ፥ ኡንቱንቱ ኦꬄዳዋ ኡባባ የሱሳዉ ኦዴድኖ። እካ ኡንቱንታ አኪደ፥ ቤተሳይዳ ያገትያ ካታማ ማታን ደእያ ታካሳ ቤዳ። 11 አሳይ እ ደኢያሳ ኤሪደ ካልና፥ ኡንቱንታ ሞክ አኪደ ጾሳ ካዉተꬃባ ኦዴዳ፤ ሀርግያፐ ፓጻናዉ በስያዋንታካ ፓꬄዳ።

12 ሳአይ ኦማርስያ ዎደ፥ የሱሳ ካልያ ታማነ ላአቱ አኮ ዪደ፥ “ሀ አሳይ ኡባይ ኑ ዩሹዋን ደእያ ሄራ ግዶነ ቄር ካታማቱዋ ግዶ ቢደ፥ አቅያሳነ ቁማ ደማና ማላ ሞይዛ፤ አያዉ ጎፐ ኑን ሀዋን አሳይ ባይናሳን ደኤቶ” ያጌድኖ።

13 ሽን የሱስ ኡንቱንታ፥ “አሳዉ ሜተትያባ ህንተንቱ እምተ” ያጌዳ።

ኡንቱንቱ ዛሪደ፥ “አነ ቢደ፥ ሀ ኡባ አሳዉ ቁማ ሻመናን ꬋዮፐ ኑዉ እቼሹ ሶሉዋፐነ ላኡ ሞልያፐ ሀራይ ባዋ፤ ሄዎ ኑን ሀ ጮራ አሳዉ ቁማ ሻማና ማላ ኮያይ?” ያጌድኖ። 14 (ጋሱካ፥ ሄዋን ደእያ አሳይ እቼሹ ሻኣ ኬና።)*

የሱስ ባረና ካልያዋንታ፥ “እሻታሙ እሻታሙ አሳ ጭታን ጭታን ሻክ ሻክ ኡትስተ” ያጌዳ።

15 ኡንቱንቱካ እ ጎዋዳን ኡባ አሳካ ኡትሴድኖ። 16 የሱስካ እቼሹ ሶሉዋነ ላኡ ሞልያ ኦይቂደ፥ ፑደ ሳሉዋ ቦንጎት ጼሊደ ጾሳ ጋላቴዳ፤ ዱꬂደ፥ አሳዉ ግሻና ማላ አ ካልያዋንቶ እሜዳ። 17 አሳይ ኡባይካ ሚደ ካሌድኖ። ኡንቱንቱፐ አቴዳ ዶካ፥ ታማነ ላኡ ሳምፓ ኩሜዳዋ ደንꬄድኖ።

ጰጽሮስ የሱሳባ አዋዬዳ

(ማቶሳ 16:13-19፤ ማር. 8:27-29)

18 እት ጋላስ የሱስ ባረካ ዎስያ ዎደ፥ አ ካልያዋንቱካ አናና እትፐ ደእሽን፥ “አሳይ ታና ኦና ጊኖ?” ጊደ ኡንቱንታ ኦቼዳ።

19 ኡንቱንቱ ዛሪደ፥ “አሳይ ኔና ጻማቅያ ዮሃንሳ ያጌ፤ ሀራ አሳይ ቃይ ኤላሳ † ያጌ፤ ሀራይ ቃይ በን ናባቱዋፐ እቱ ደንዴዳ ያጌ” ያጌድኖ።

20 የሱስ ኡንቱንታ፥ “ህንተሽ፥ ታና ኦና ጊቴ?” ያጌዳ።

ጰጽሮስካ ዛሪደ፥ “ኔን ጾሳይ ኦኬዳ ክርስቶሳ” ያጌዳ።

የሱሳ ካልያዋንቱ ሀናናዉ በስያባ

(ማቶሳ 10:38-39፤ 16:24-26፤ ማር. 8:34-38፤ ሉቃሳ 14:26-27)

21 የሱስካ ኡንቱንታ፥ “ሀዋ ኦስነ ኦዶፕተ” ያግ ምንስ አዛዚደ፥ 22 “ታን፥ አሳ ናአይ፥ ዳሮ መቱዋ አካናዉ በሴ፤ ጭማቱዋን፥ ቄሳቱዋ ካፓቱዋንነ ሙሴ ህግያ ታማርስያዋንቱን እጸታናዉ ኮሼ፤ ኡንቱንቱ ታና ዎꬋናዋንታ፤ ታንካ ሄዘንꬆ ጋላስ ሀይቁዋፐ ደንዳናዉ በሴ” ያጌዳ።

23 የሱስካ አሳ ኡባ፥ “ታና ካላናዉ ዶስያዌ ደኦፐ፥ ባረ ሁጲያ ካዶ፤ ባረ ማስቃልያ ‡ ጋላሳን ጋላሳን ቶኪደ ታና ካሎ። 24 ባረ ሸምፑዋ አሻናዉ ዶስያዌ ኡባይ ባይዜ፤ ሽን ታ ድራዉ ባረ ሸምፑዋ ባይዝያዌ ኡባይ አሼ። 25 እት ኡራይ ሀ አላምያባ ኡባ አሺደ ባረ ሸምፑዋ ባይዞፐ ዎይ ባረዉ ፓጭሶፐ፥ አያ ማዲ? 26 አሳይ ታናንነ ታ ቃላን ዬላቶፐ፥ ታን አሳ ናአይ፥ ታ ቦንቹዋናነ ጌሻ ኪታንቻቱዋ ቦንቹዋና ይያ ዎደ አን ዬላታናዋ። 27 ታን ህንተንቶ ቱሙዋ ያጋይ፤ ሀዋን ደእያ አሳፐ፥ ጾሳ ካዉተꬃ በአና ጋካናዉ ሀይቁዋ ሀይቀናዋንቱ እቱ እቱ ደኢኖ” ያጌዳ።

የሱሳ ማላይ ላመቴዳ

(ማቶሳ 17:1-8፤ ማር. 9:2-8)

28 የሱስ ሀዋ ጎዋፐ ጉይያን፥ እት ሳምንታ ኬና ጋምኢደ፥ ጰጽሮሳነ ዮሃንሳ፥ ያቆባካ አኪደ፥ ዎሳናዉ ደርያ ሁጲያ ከሴዳ። 29 እ ዎስሽን፥ አ ዴሙዋ ማላይ ላመቴዳ፤ አ ማዩካ ቦጺደ ጶልቄዳ። 30 ቆፐናን ላኡ አሳቱ፥ ሙሴነ ኤላስ ከስ ቤቲደ፥ የሱሳና ሃሳይ ደኢኖ። 31 ኡንቱንቱ ቦንቹዋን ቆንጭ ቤቲደ፥ የሱስ ጾሳ ቆፋ ፖላናዉ የሩሳላመን ሀይቃናዋ § አናና ሃሳዬድኖ። 32 ጰጽሮሳነ አናና እትፐ ደእያዋንታ ገምእሹ ጌሮዬዳሽን፥ ኤለካ ቤጎቲደ አ ቦንቹዋነ አናና ጋꬆ ኤቄዳ ላኡ አሳቱዋ በኤድኖ። 33 ሄ ላኡ አሳቱ፥ የሱሳ ምይያፐ ሻከትያ ዎደ፥ ጰጽሮስ የሱሳ፥ “ጎዳዉ፥ ሀዋን ደእያዌ ኑዉ ሎአ ግድያ ድራዉ፥ ሄዙ ዳስያ እቱዋ ነዉ፥ እቱዋ ሙሴዉ፥ እቱዋ ኤላሳዉ ኬጻና” ያጌዳ።

34 ጰጽሮስ ሄዋ ሃሳይ ደእሽን፥ ሻሪ ዪደ ኡንቱንታ ካም አግና የሱሳ ካልያዋንቱ ያዬድኖ። 35 ሻርያፐካ፥ “ታን ዶሬዳ ታ ናአይ ሀዋ፤ እ ግያዋ ስስተ” ያግያ ቃላይ ዬዳ።

36 ቃላይ ስሰቶዋፐ ጉይያን፥ የሱስ ባረ ጻላላ ግዲደ ቤቴዳ፤ ኡንቱንቱካ የዉዋ ባረንቱ ዎዛናን ኦይቂደ ሄ ዎድያን ኦንነካ አያነ ኦድቤና።

የሱስ ኢታ አያናን ኦይቀቴዳ ላኡ አሳቱዋ ፓꬄዳ

(ማቶሳ 17:14-18፤ ማር. 9:14-27)

37 ዎንተꬃ ጋላስ፥ የሱስነ ሄዙ አ ካልያዋንቱ ደርያፐ ዱገ ዎꬍያ ዎደ፥ ጮራ አሳይ የሱሳና ጋከቴዳ። 38 ሄ ዎደ አሳፐ እት ብታኒ ባረ ኮሻ ꬎቁ ኦꬂደ፥ “ታማርስያዎ፥ ታዉ ደእያዌ እት ናኣ ግዶ ድራዉ፥ ኔን አ በአና ማላ ኔና ዎሳይ፤ 39 ቃይ ኢታ አያናይ ዎዛና አናን ደንዲደ አ ዋስሴ፤ ዶናና ፓሮያና ጋካናዉ አ ኮኮርሲደ፥ ኡባ ጋላስ መቶꬅያዋፐ አትን፥ አ ኤለ የደና። 40 ኔና ካልያዋንቱ ሄ ኢታ አያና ከሳና ማላ፥ ታን ኡንቱንታ ዎሳድ፤ ሽን ዳንዳይበይክኖ” ያጌዳ።

41 የሱስ ዛሪደ ኡንቱንታ፥ “አማነና ሀ ዎድያ ደሻ አሳዉ፥ ታን ህንተናና አዉደ ጋካናዉ ደአኔ? ቃይ ህንተንቱባ አዉደ ጋካናዉ ዳንዳያኔ? ነ ናኣ ሃ አካያ” ያጌዳ።

42 ናአይ ዪደ ደእሽን፥ ኢታ አያናይ አ ሳኣን ኦሊደ ኮኮርሴዳ፤ የሱስ ኢታ አያና አጋ ግ ናኣ ፓꬂደ አ አቦ ዛሪደ እሜዳ። 43 አሳይ ኡባይካ ጾሳ ዎልቃማ ዎልቃፐ ደንዶዋን ማላለቴድኖ።

የሱስ ባረ ሀይቁዋባ ላኤንꬁዋ ኦዴዳ

(ማቶሳ 17:22-23፤ ማር. 9:30-32)

44 “ታና አሳ ናኣ፥ አሳይ አሳ ኩሽያን አꬂደ እማናዋ፤ ህንተንቱ ሀ የዉዋ ዶጎፕተ” ያጌዳ። 45 ሽን እ ግያዋ ኡንቱንቱ አኬክበይክኖ። ኡንቱንቶ ገለና ማላ ኡንቱንቱፐ ጌሜዳ ድራዉ፥ ሀ የዉዋ የሱሳ ኦቻናዉ ያዬድኖ።

ኡባፐ አꬍያዌ ኦኔሻ? ያግያ ኦሻ

(ማቶሳ 18:1-5፤ ማር. 9:33-37)

46 አ ካልያዋንቱ፥ “ኑ ግዶፐ ዳርያዌ ኦኔ?” ያጊደ ፓሉመቴድኖ። 47 የሱስ ኡንቱንቱ ዎዛና ቆፋ ኤሪደ፥ ጉꬃ ናኣ አሂደ፥ ባረ ማታን ኤሲደ፥ 48 “ሀ ጉꬃ ናኣ ታ ሱንꬃን ሞክያዌ ኦንነ ታና ሞኬዳ፤ ቃይ ታና ሞክያ ኡባይ፥ ታና ኪቴዳ ታ አባ ሞኬ። ህንተንቱ ኡባፐ ጉጽያዌ ኡባፐ ዳራ” ያጌዳ።

ህንተንቱ ግያዋ ጳልቀና ኡራይ ህንተንቱ ባጋ

(ማር. 9:38-40)

49 ዮሃንስካ ዛሪደ፥ “ጎዳዉ፥ እት አሳይ ነ ሱንꬃን ኢታ አያናቱዋ ከስያዋ ኑን በኢደ፥ ኑ ባጋ ግደና ድራዉ፥ አ ድጌዶ” ያጌዳ።

50 ሽን የሱስ አ፥ “ህንተንቱ ግያዋ ጳልቀናዌ ህንተንቱ ባጋ ግድያ ድራዉ፥ አ ድጎፕተ” ያጌዳ።

ሳማርያ ካታማ አሳቱ የሱሳ ሞካናዉ ኮይበይክኖ

51 የሱስ ሳሉዋ ብያ ዎዲ ማትና፥ ባረ ዎዛና ቆፋ የሩሳላመኮ ዛሬዳ። 52 ባረፐ ስንꬃዉ ኡባ የዉዋ ጊግሳና ማላ፥ ኪተትያ አሳ ሳማርያ ካታማ ኪቴዳ። 53 ሽን እ የሩሳላመ ባናዉ ደንዴዳ ድራዉ፥ አሳይ አ ሞክበይክኖ። 54 አ ካልያዋንቱ ያቆብነ ዮሃንስ ሄዋ በኢደ፥ “ጎዳዉ፥ ኑን ኤላስ ኦꬆዋዳን፥* ታማይ ሳሉዋፐ ዪደ ኡንቱንታ ማናዳን ጼሳና ማላ ኮያይ?” ያጌድኖ።

55 ሽን የሱስ ጉየ ስሚደ፥ ኡንቱንታ ሴሬዳ። † 56 “ታን፥ አሳ ናአይ፥ አሳ ሸምፑዋ አሻናዉ ዮዋፐ አትን፥ ባይዛናዉ ያበይከ” ያጌዳ። ኡንቱንቱ ሀራሳን ደእያ ቄር ካታማ ቤድኖ።

የሱሳ ካልያዋንታ ጋክያ ፓጭያ

(ማቶሳ 8:19-22)

57 ኡንቱንቱ ኦግያና ቢሽን፥ እት ብታኒ የሱሳ፥ “ጎዳዉ፥ ኔን ብያሳ ኡባ ታን ኔና ካላና” ያጌዳ።

58 የሱስ አ፥ “ዎራካናቶ ኦላይ፥ ሳሉዋ ካፋቶካ ጎሊ ደኤ፤ ሽን ታን፥ አሳ ናአይ፥ ገላ ሸምፓ አክያ ሳአይ ታዉ ባዋ” ያጌዳ።

59 የሱስ ሀራ ኡራ፥ “ታና ካላ” ያጌዳ።

ሽን፥ ብታኒ፥ “ጎዳዉ፥ ታን ካስያን ባደ ታ አባ ሞጋና” ያጌዳ።

60 የሱስ፥ “ሀይቆዋንታ ባረንቱ ሀይቆዋንቱ ሞግኖ፤ ኔን ባደ፥ ጾሳ ካዉተꬃባ ኦዳ” ያጌዳ።

61 ቃይ ሀራ ብታኒ፥ “ጎዳዉ፥ ታን ኔና ካላና፤ ሽን ኮይሩዋን ታ ሶይ አሳ ባደ ሳሮታና” ያጌዳ።

62 ሽን የሱስ አ፥ “ቦራ ጎሻናዉ ዶሞዌ ኦንነ ጉየ ጼሎፐ ጾሳ ካዉተꬃዉ በሰና” ያጌዳ።

9:3 ሉቃሳ 10:4-11

*9:14 እቼሹ ሻአ፦ እስራኤልያ ዎጋን ማጫዌነ ቄር ናናይ ፓይደተና ድራዉ፥ እቼሹ ሻኣ ጉሳይ ማጫዋነ ቄር ናና ፓይደናን ኩሜዳዋ። ሀ ፓይዱ ደእያ ኮይሮ ማራይ በን ማጻፋ እቱዋ እቱዋን ባዋ።

†9:19 ኤላሳ፦ ሀ ናቢ እ ሀይቆደፐ ዳሮ ዎደፐ ጉየ፥ የሱስ ክርስቶስ ቢታ ቦላን ታማርሲደ ደርያ ቦላ ዎሳዉ ከሲደ ላመት ቦጼዳዋፐ ጉየ ባጋን አናናነ ሙሴና ሃሳዬዳ። ሄዋ ጉሳይ ሀይቂ ስሚደ ዳሮ ጮራ ዎድያፐ ጉየ ፓጻ ቆንጬዳ ጉሳ።

9:19 ማቶሳ 14:1፣ 2፤ ማር. 6:14፣ 15፤ ሉቃሳ 9:7፣ 8

9:20 ዮሃ. 6:68፣ 69

9:23 ማቶሳ 10:38፤ ሉቃሳ 14:27

‡9:23 ማስቃልያ፦ ሀዋ ጉሳይ፥ እት አሳይ ባረ ላይꬃ ኡባን ጾሳ ካሊደ ሻከተናን ቶካናዉ በስያ መቱዋነ ዋይያ።

9:28 2 ጰጽ. 1:17፣ 18

§9:31 ሀይቃናዋ፦ ግሪከ ማጻፋ ቆፋን ሀዋ ጉሳይ፥ “የሱስ ሳሉዋ ብያዋ”፤ ሀዌ ቃይ እ ሀይቁዋፐ ደንድያዋነ ያቲደ ሳሉዋ ብያዋ ኡባ ሺሽ ኦይቄዳ ቆፋ።

9:46 ሉቃሳ 22:24

*9:54 ኤላስ ኦꬆዋዳን፦ እት እት ጌሻ ማጻፋ ብለꬃን፥ “ሀ አሳ ዉርሳናዉ” ያጌ።

†9:55 ኡንቱንታ ሴሬዳ፦ እት እት ጌሻ ማጻፋን ደእያ ብለꬃይ፥ “ኔን አይ ማላ አያነንቶ፥ ኔና ኤርኪ? አሳ ናአይ አሳ ሸምፑዋ አሻናዉ ዬዳፐ አትን፥ ባይዛናዉ ይቤና” ያጌ።

9:61 1 ካታ. 19:20