1 እት ጋላስ፥ ቃራጻ ሺሽያዋንቱነ ናጋራንቻቱ ኡባይ የሱሳ ስሳናዉ አኮ ሺቄድኖ። 2 ፓርሳዋቱነ ሙሴ ህግያ ታማርስያዋንቱ፥ “ሀ ብታኒ፥ ናጋራንቻቱዋ ሺሽያዋነ ኡንቱንቱና ቁማ ምያዋ” ያጊደ ዙዙሜድኖ። ሉቃሳ 5:29-30 3 የሱስካ ሌምሱዋን ዛሩዋ ሀዋዳን ያግ ኦዴዳ:

4 “ጼቱ ዶርሳይ ደእያ ኡራይ ህንተንቱ ግዶፐ ደእንቶ ሄዋፐ እቱ ባይንቶ ኡዱፑ ታማነ ኡዱፑኑዋ ደንባን አጊደ ባዬዳዋ ቤታና ጋካናዉ ኮየናዌ ኦኔ? 5 ደሜዳ ዎደ ናሸቻን ባረ ሀሽያ ቦላን ዶርሳ ቶክ፥ 6 ባረ ጎለ ስሚደ፥ ባረ ዶስያዋንታነ ሾራቱዋ እትፐ ጼሲደ፥ ‘ባዬዳ ታ ዶርሳ ደሞ ድራዉ፥ ታናና እትፐ ናሸትተ’ ያጊደ ኦዴ። 7 ሄዋዳንካ ናጋራ ፓጸꬃ ኮሸና ኡዱፑ ታማነ ኡዱፑ ጽላቱዋፐ አꬂደ ናጋራ ፓጽያ እት ናጋራንቻን ሳሉዋን ዳሮ ናሸቻይ ግዳናዋ።

8 “ቃይካ ታሙ ናሃስያ ሳንትሚ *ናሃስያ ሳንትሚ፦ ግሪከ ቃላ ብለꬃን እትና፥ እት ጋላሳ ሙምያ ኦꬅ ፔሼዳ ዎልቃ ኦሳንቻዉ ጭገትያ ሚሻ ኬና ግድያዋ ኦዴ። ደእያ ምሽራታ ታሙዋፐ እቱ ባይንቶ ደማና ጋካናዉ ጾምፕያ ጾምፓደ፥ ጎልያ ፕታደ ሎይꬃ ኮየናዉና እዛ ኦኔ? 9 እዛካ ደሜዳ ዎድያን ባረ ዶስያዋንታነ ባረ ሾራቱዋ እትፐ ጼሳደ፥ ‘ታፐ ባዬዳ ሳንትምያ ደሜዳ ድራዉ፥ ታናና እትፐ ናሸትተ’ ያጋደ ኦዳዉ። 10 ሄዋዳንካ ናጋራ ፓጽያ እት ናጋራንቻ ጋሶተꬃን ጾሳ ኪታንቻቱዋ ስንꬃን ናሸቻይ ሀናናዋ” ያጌዳ።

11 ጉጂደ የሱስ፥ “ላኡ ናናይ ደእያ እት ብታኒ ደኤ፤ 12 ኡንቱንቱፐካ ቴፋ ናአይ፥ ‘ነ ማጹዋፐ ታና ጋክያዋ እማ’ ጌዳ። አዉካ ባረ ማጹዋፐ ናናቶ ግሼዳ። 13 ጉꬃ ዎድያፐ ጉይያን ቴፋ ናአይ ባረና ጋኬዳዋ ኡባ ሺሽ አኪደ ህን ሃኮ ጋደ ቤዳ፤ ሄዋን ባረ አኬዳ ሚሻ ኡባ ላል ዉርስ አጌዳ። 14 እካ ደእያዋ ኡባ ዉርሴዳዋፐ ጉይያን ሄ ጋደን ዎልቃማ ኮሻይ ገሌዳ፤ እካ መቱዋን ኡንኤቱሳ ዶሜዳ። 15 ሀዋ ድራዉ ሄ ጋደን ደእያዋንቱፐ እቱዋኮ ሺቂደ፥ ‘ታና ነዉ ቆማ ኦꬃርኪ?’ ያግና፥ ብታኒካ ባረ ጉዱንꬃ ዉድያ ሄማና ማላ አ ደምባ የዴዳ። 16 ጉዱንꬃ ዉዲ ምያ ሀልኡዋ ማናዉ አሞቴዳ፤ ሽን ሄዌንቶካ አዉ እምያዌ ቤትቤና።

17 “ባረ ባይዙዋ ኤሮ ዎደ፥ ‘ቁማይ ጾኒደ ሳኣን አትያ ታ አቦ ኦꬅያዋንቱ አፑኔ፤ ሽን ታን ሀዋን ኮሻን ሀይቃና ማታይታ? 18 ደንዳደ ታ አቡኮ ባኔ’ ሀዋዳን ያጋና፤ ‘ታ አቦ፥ ጾሳካ ኔናካ ናቃድ፤ 19 ሀንፐ ጉየ ነ ናኣ ያገታደ ጼሰታናዉ በስከ፤ ነዉ ኪተትያዋንቱፐ እቱዋዳን ታና ዎꬃርኪ ጋና’ ጌዳ። 20 ሄ ማንእያን ደንዲደ ባረ አቡኮ ዬዳ።

“እ ብሮ ሃኩዋን ደእሽን፥ አዉ በኢደ፥ አዉ ቃረቴዳ፤ አኮ ዎጽ ቢደ፥ አ እድም የሬዳ።

21 “ናአይካ፥ ‘ታ አቦ፥ ታን ጾሳካ ኔናካ ናቃድ፤ ሀንፐ ጉየ ነ ናኣ ጌተታደ ጼሰታናዉ በስከ’ ያጌዳ።

22 “ሽን አዉ ባረ ኦሳንቻቱዋ፥ ‘ኤሌል ቢደ፥ ኡባፐ ዶረቴዳ ሎኦ ማዩዋ አሂደ፥ አ ማይዝተ፤ አ ብራꬍያን ምግዱዋ፥ አ ገድያንካ ጫማ †ምግዱዋ፥ ጫማ፦ ሀ ቃላቱ ናኣ አቡ፥ አ ፖሎ ዎዛናፐ አኮዋ በስያዋንታ። ምግዱ፥ ሄ ናአይ ጎለን ደእያ አሳቱዋ ኡባፐ ሎኦ ጼለቴዳዋ በሴ። ጫማይ ቃይ፥ እ ባረ አቦ አይለ ግደናዳን ናኣ ግድያዋ በሴ። አይላቱ ሄ ዎደ ጫማ ዎꬅክኖ። ዎꬅተ። 23 ሞꬌዳ ኮሩማ አሂደ ሹክተ፤ ሞይተ፥ ናሸቶይተ። 24 አያዉ ጎፐ፥ ሀዌ ታ ናአይ ሀይቄዳ፤ ሽን ሀእ ፓጼዳ፤ ባዬዳ፤ ሽን ሀእ ቤቴዳ’ ያግና፥ ናሸቻ ዶሜድኖ።

25 “ሄ ዎድያን፥ ባይራ ናአይ ጋደን ደእያዌ ዪደ ጎለኮ ማትያ ዎደ፥ የꬃነ ዱሩዋ ኮሹንቻ ስሴዳ። 26 እካ የዉ አየንቶ ኤራናዉ ኮዪደ፥ ቆማቱዋፐ እቱዋ ጼሲደ፥ ‘ሀዌ አዬ?’ ጊደ ኦቼዳ። 27 ቆማቱካ፥ ‘ነ እሻይ ሳሮ ዬዳ ድራዉ፥ ነ አቡ ሞꬎ ኮሩማ አዉ ሹኬዳ’ ያግ ኦዴድኖ።

28 “ባይራ ናአይ ሀንቀቲደ ጎለ ገልከ ያግ እጽና፥ አዉ ካረዉ ከሲደ፥ ገላናዳ ዎሴዳ። 29 ሽን እ ዛሪደ ባረ አባ፥ ‘ሄኮ ሀዋ ኬና ዎድያ ቆማዳን ነዉ ኪተታድ፤ ነ አዛዞዋፐ እቱዋነካ ፓጭሳ በይከ፤ ታ ላገꬃቱዋና እትፐ ናሸታና ማላ ሀራይ አቶ እት ዴሻ ቡልኡዋነ ታዉ እማ በይካ፤ 30 ሽን ሀዌ ነ ናአይ ነ ሚሻ ጫራቱዋና እትፐ ዲፍሲደ ዪና፥ ꬊኮ ቦራ ሹካዳ’ ያጌዳ።

31 “አዉካ አ፥ ‘ታ ናአዉ፥ ኔን ኡባ ጋላሳ ታናና እትፐ ደኣ፤ ታሳ ግዴዳባይ ኡባይካ ነዋ። 32 ሽን ሀዌ ነ እሻይ፥ ሀይቄዳዌ ፓጾ ድራዉነ ባዬዳዌ ቤቶ ድራዉ፥ ኑን ሚድነ ኡሺደ ናሸታናዉ በሴ’ ያጌዳ” ጊደ ኦዴዳ።