1 ኢቲ ጋላሲ፥ ቃራፃ ሺሺያዋንቱኔ ናጋራንቻቱ ኡባይ ዬሱሳ ሲሳናው ኣኮ ሺቄዲኖ። 2 ፓሪሳዋቱኔ ሙሴ ሂጊያ ታማሪሲያዋንቱ፥ «ሃ ቢታኒ፥ ናጋራንቻቱዋ ሺሺያዋኔ ኡንቱንቱና ቁማ ሚያዋ» ያጊዴ ዙዙሜዲኖ። ሉቅ 5፡29-30 3 ዬሱሲካ ሌሚሱዋን ዛሩዋ ሃዋዳን ያጊ ኦዴዳ፡

4 «ፄቱ ዶርሳይ ዴዒያ ኡራይ ሂንቴንቱ ጊዶፔ ዴዒንቶ ሄዋፔ ኢቱ ባዪንቶ ኡዱፑ ታማኔ ኡዱፑኑዋ ዴንባን ኣጊዴ ባዬዳዋ ቤታና ጋካናው ኮዬናዌ ኦኔ? 5 ዴሜዳ ዎዴ ናሼቻን ባሬ ሃሺያ ቦላን ዶርሳ ቶኪ፥ 6 ባሬ ጎሌ ሲሚዴ፥ ባሬ ዶሲያዋንታኔ ሾራቱዋ ኢቲፔ ፄሲዴ፥ ‹ባዬዳ ታ ዶርሳ ዴሞ ዲራው፥ ታናና ኢቲፔ ናሼቲቴ› ያጊዴ ኦዴ። 7 ሄዋዳንካ ናጋራ ፓፄꬃ ኮሼና ኡዱፑ ታማኔ ኡዱፑ ፂላቱዋፔ ኣꬂዴ ናጋራ ፓፂያ ኢቲ ናጋራንቻን ሳሉዋን ዳሮ ናሼቻይ ጊዳናዋ።

8 «ቃይካ ታሙ ናሃሲያ ሳንቲሚ *ናሃሲያ ሳንቲሚ፡ ግሪኬ ቃላ ቢሌꬃኒ ኢቲና፥ ኢቲ ጋላሳ ሙሚያ ኦꬂ ፔሼዳ ዎልቃ ኦሳንቻው ጪጌቲያ ሚሻ ኬና ጊዲያዋ ኦዴ። ዴዒያ ሚሺራታ ታሙዋፔ ኢቱ ባዪንቶ ዴማና ጋካናው ፆምፒያ ፆምፓዴ፥ ጎሊያ ፒታዴ ሎይꬃ ኮዬናዉና ኢዛ ኦኔ? 9 ኢዛካ ዴሜዳ ዎዲያን ባሬ ዶሲያዋንታኔ ባሬ ሾራቱዋ ኢቲፔ ፄሳዴ፥ ‹ታፔ ባዬዳ ሳንቲሚያ ዴሜዳ ዲራው፥ ታናና ኢቲፔ ናሼቲቴ› ያጋዴ ኦዳው። 10 ሄዋዳንካ ናጋራ ፓፂያ ኢቲ ናጋራንቻ ጋሶቴꬃን ፆሳ ኪታንቻቱዋ ሲንꬃን ናሼቻይ ሃናናዋ» ያጌዳ።

11 ጉጂዴ ዬሱሲ፥ «ላዑ ናናይ ዴዒያ ኢቲ ቢታኒ ዴዔ፤ 12 ኡንቱንቱፔካ ቴፋ ናዓይ፥ ‹ኔ ማፁዋፔ ታና ጋኪያዋ ኢማ› ጌዳ። ኣዉካ ባሬ ማፁዋፔ ናናቶ ጊሼዳ። 13 ጉꬃ ዎዲያፔ ጉዪያን ቴፋ ናዓይ ባሬና ጋኬዳዋ ኡባ ሺሺ ኣኪዴ ሂኒ ሃኮ ጋዴ ቤዳ፤ ሄዋን ባሬ ኣኬዳ ሚሻ ኡባ ላሊ ዉርሲ ኣጌዳ። 14 ኢካ ዴዒያዋ ኡባ ዉርሴዳዋፔ ጉዪያን ሄ ጋዴን ዎልቃማ ኮሻይ ጌሌዳ፤ ኢካ ሜቱዋን ኡንዔቱሳ ዶሜዳ። 15 ሃዋ ዲራው ሄ ጋዴን ዴዒያዋንቱፔ ኢቱዋኮ ሺቂዴ፥ ‹ታና ኔው ቆማ ኦꬃሪኪ?› ያጊና፥ ቢታኒካ ባሬ ጉዱንꬃ ዉዲያ ሄማና ማላ ኣ ዴምባ ዬዴዳ። 16 ጉዱንꬃ ዉዲ ሚያ ሃልዑዋ ማናው ኣሞቴዳ፤ ሺን ሄዌንቶካ ኣው ኢሚያዌ ቤቲቤና።

17 ባሬ ባዪዙዋ ኤሮ ዎዴ፥ ‹ቁማይ ፆኒዴ ሳዓን ኣቲያ ታ ኣቦ ኦꬂያዋንቱ ኣፑኔ፤ ሺን ታኒ ሃዋን ኮሻን ሃይቃና ማታይታ? 18 ዴንዳዴ ታ ኣቡኮ ባኔ› ሃዋዳን ያጋና፤ ‹ታ ኣቦ፥ ፆሳካ ኔናካ ናቃዲ፤ 19 ሃኒፔ ጉዬ ኔ ናዓ ያጌታዴ ፄሴታናው ቤሲኬ፤ ኔው ኪቴቲያዋንቱፔ ኢቱዋዳን ታና ዎꬃሪኪ ጋና› ጌዳ። 20 ሄ ማንዒያንካ ዴንዲዴ ባሬ ኣቡኮ ዬዳ።

«ኢ ቢሮ ሃኩዋን ዴዒሺን፥ ኣዉ ቤዒዴ፥ ኣው ቃሬቴዳ፤ ኣኮ ዎፂ ቢዴ፥ ኣ ኢዲሚ ዬሬዳ።

21 «ናዓይካ፥ ‹ታ ኣቦ፥ ታኒ ፆሳካ ኔናካ ናቃዲ፤ ሃኒፔ ጉዬ ኔ ናዓ ጌቴታዴ ፄሴታናው ቤሲኬ› ያጌዳ።

22 ሺን ኣዉ ባሬ ኦሳንቻቱዋ፥ ‹ኤሌሊ ቢዴ፥ ኡባፔ ዶሬቴዳ ሎዖ ማዩዋ ኣሂዴ፥ ኣ ማዪዚቴ፤ ኣ ቢራꬊያን ሚጊዱዋ፥ ኣ ጌዲያንካ ጫማ †ሚጊዱዋ … ጫማ፡ ሃ ቃላቱ ናዓ ኣቡ፥ ኣ ፖሎ ዎዛናፔ ኣኮዋ ቤሲያዋንታ። ሚጊዱ፥ ሄ ናዓይ ጎሌን ዴዒያ ኣሳቱዋ ኡባፔ ሎዖ ፄሌቴዳዋ ቤሴ። ጫማይ ቃይ፥ ኢ ባሬ ኣቡሲ ኣይሌ ጊዴናዳን ናዓ ጊዲያዋ ቤሴ። ኣይላቱ ሄዎዴ ጫማ ዎꬂኪኖ። ዎꬂቴ። 23 ሞꬌዳ ኮሩማ ኣሂዴ ሹኪቴ፤ ሞይቴ፥ ናሼቶይቴ። 24 ኣያው ጎፔ፥ ሃዌ ታ ናዓይ ሃይቄዳ፤ ሺን ሃዒ ፓፄዳ፤ ባዬዳ፤ ሺን ሃዒ ቤቴዳ› ያጊና፥ ናሼቻ ዶሜዲኖ።

25 «ሄ ዎዲያን፥ ባይራ ናዓይ ጋዴን ዴዒያዌ ዪዴ ጎሌኮ ማቲያ ዎዴ፥ ዬꬃኔ ዱሩዋ ኮሹንቻ ሲሴዳ። 26 ኢካ ዬዉ ኣዬንቶ ኤራናው ኮዪዴ፥ ቆማቱዋፔ ኢቱዋ ፄሲዴ፥ ‹ሃዌ ኣዬ?› ጊዴ ኦቼዳ። 27 ቆማቱካ፥ ‹ኔ ኢሻይ ሳሮ ዬዳ ዲራው፥ ኔ ኣቡ ሞꬎ ኮሩማ ኣው ሹኬዳ› ያጊ ኦዴዲኖ።

28 «ባይራ ናዓይ ሃንቄቲዴ ጎሌ ጌሊኬ ያጊ ኢፂና፥ ኣዉ ካሬው ኬሲዴ፥ ጌላናዳ ዎሴዳ። 29 ሺን ኢ ዛሪዴ ባሬ ኣባ፥ ‹ሄኮ ሃዋ ኬና ዎዲያ ቆማዳን ኔው ኪቴታዲ፤ ኔ ኣዛዞዋፔ ኢቱዋኔካ ፓጪሳ ቤይኬ፤ ታ ላጌꬃቱዋና ኢቲፔ ናሼታና ማላ ሃራይ ኣቶ ኢቲ ዴሻ ቡልዑዋኔ ታው ኢማ ቤይካ፤ 30 ሺን ሃዌ ኔ ናዓይ ኔ ሚሻ ጫራቱዋና ኢቲፔ ዲፊሲዴ ዪና፥ ꬊኮ ቦራ ሹካዳ› ያጌዳ።

31 «ኣዉካ ኣ፥ ‹ታ ናዓው፥ ኔኒ ኡባ ጋላሳ ታናና ኢቲፔ ዴዓ፤ ታሳ ጊዴዳባይ ኡባይካ ኔዋ። 32 ሺን ሃዌ ኔ ኢሻይ፥ ሃይቄዳዌ ፓፆ ዲራዉኔ ባዬዳዌ ቤቶ ዲራው፥ ኑኒ ሚዲኔ ኡሺዴ ናሼታናው ቤሴ› ያጌዳ» ጊዴ ኦዴዳ።